ہوم << اسلامی دنیا کا الشیخ الاکبر – ڈاکٹر تصور اسلم بھٹہ
600x314

اسلامی دنیا کا الشیخ الاکبر – ڈاکٹر تصور اسلم بھٹہ

آج کا دن 16 نومبر 1240ء محی الدین ابن عربی کا یوم وفات
شام کے دارالسلطنت دمشق کے شمالی ضلع الصالحیہ میں ایک اونچا پہاڑ ہے جسے جبل قاسیون کہتے ہیں۔اس پہاڑ کی چوٹی پر گھنے، لمبے اور سرسبز درختوں کی چھاؤں میں ابن عربی دفن ہیں۔ایران اور ترکی (خصوصاً وہ لوگ جن کی مادری زبان فارسی ہے) آپ کو ابن عربی کہتے ہیں، جب کہ مغرب میں اور اہلِ عرب آپ کو ابن العربی اور ابن سراقہ کے نام سے جانتے ہیں۔

دنیا نے انہیں بہت سے ناموں سے یاد کیا، مگر اسلامی تصوف کی تاریخ میں ان کی سب سے پائیدار پہچان الشیخ الاکبر ہے اور مسلمانوں کی تاریخ میں یہ لقب آج تک کسی دوسری شخصیت کے لیے استعمال نہیں کیا گیا۔انہیں سلطان العارفین بھی کہتے ہیں۔یہ مقبرہ اور اس سے متصل عمارات نویں عثمانی سلطان اور پہلے عثمانی خلیفہ سلیم اوّل نے بنوائیں۔کہتے ہیں 1517ء میں جب سلطان سلیم نے مملوک مصر کو شکست دے کر مصر اور مشرقِ وسطیٰ فتح کیے تو اس کے مفتوحہ علاقوں میں حجاز، شام، عراق اور فلسطین کے علاقے بھی شامل تھے۔قسطنطنیہ واپس جاتے ہوئے وہ دمشق سے گزرا اور دمشق پہنچنے کے بعد سب سے پہلے اس نے ابن عربی کے مزار پر حاضری دی۔اور جب تک دمشق میں رہا، ابن عربی کے مزار کے باہر خیمہ زن رہا، کیونکہ سلاطینِ عثمانیہ ابن عربی کو اپنا روحانی پیشوا مانتے تھے اور ان کا بہت احترام کرتے تھے۔ ان کا عقیدہ تھا کہ سلطنتِ عثمانیہ ابن عربی کی دعاؤں کا نتیجہ ہے۔

مزار کی شکستہ حالت دیکھ کر اسے بہت رنج ہوا اور اس نے ہنگامی بنیادوں پر ایک شاندار مقبرہ اور اس سے ملحقہ ایک عظیم الشان مسجد، یونیورسٹی، ہسپتال، یتیم خانہ اور لنگرخانہ تعمیر کرنے کا حکم دیا۔اور اس کمپلیکس کے اخراجات کے لیے ایک بہت بڑی جاگیر مختص کی۔ایک عثمانی روایت میں آتا ہے کہ شیخ اکبر نے سلطان سلیم کو خواب میں شام اور مصر کی فتح کی بشارت دی تھی۔ اس روایت کو عثمانی عقیدت کی تاریخ میں جگہ ملی۔بعد میں آنے والے عثمانی سلاطین نے ان عمارات میں کئی اضافے کیے۔موجودہ مقبرے کا نقشہ اور عمارت وہی ہے جو سلطان سلیم اوّل نے 1517ء میں بنوائی تھی۔یہ مشرقِ وسطیٰ میں سلاطینِ عثمانیہ کی جانب سے تعمیر کروائی جانے والی پہلی عمارت بھی ہے۔

اندلس کا شہزادہ اور فقیری کا لبادہ:
ابو عبداللہ محمد بن علی بن محمد ابن عربی الحاتمی الطائی کے والد کا تعلق عرب کی مشہور شخصیت حاتم طائی کے قبیلے سے تھا اور والدہ بربر تھیں۔وہ 28 جولائی 1165ء کو مریسیہ، اندلس میں ایک امیر و کبیر خاندان میں سونے کا چمچ منہ میں لے کر پیدا ہوئے. ان کے والد علی ابن محمد، حاکمِ مریسیہ کے خاص مصاحبین میں شامل تھے۔بعد میں وہ موحدین سلطان ابو یعقوب یوسفی کے وزیر مقرر ہوئے اور اشبیلیہ منتقل ہوگئے، اس لیے ابن عربی کا بچپن بہت عیش و آرام اور ناز و نعم میں بسر ہوا۔اشبیلیہ اس دور میں سلطنتِ اندلسیہ کا دارالسلطنت تھا اور مسلم تہذیب و تمدن کا گہوارہ تھا۔ اس کا موجودہ نام Seville ہے، جہاں وہ مدرسہ آج بھی موجود ہے جس میں ابن عربی نے اپنی تعلیم حاصل کی۔ ان کی شادی ایک بہت امیر گھرانے میں ہوئی اور بیوی کا نام مریم تھا۔

انہوں نے فوجی تربیت بھی حاصل کی اور کچھ عرصہ فوج میں ملازمت بھی کی۔یہیں انہیں وہ واقعہ پیش آیا جس نے ان کی زندگی کا ایک نیا رخ متعین کر دیا اور سوچنے کا انداز بدل دیا۔ایک دفعہ آپ اشبیلیہ کے کسی بہت دولتمند امیر کے ہاں دعوت میں مدعو تھے، جہاں پر آپ کی طرح دوسرے رؤسا کے بیٹوں کو بھی بلایا گیا تھا۔ کھانے کے بعد جب رقص و سرود کی محفل سجی، جام گردش کرنے لگا اور صراحی آپ تک پہنچی اور آپ نے جام کو ہاتھ میں پکڑا، تو انہیں لگا جیسے کسی نے انہیں مخاطب ہو کر کہا ہو:
“اے محمد! کیا تم کو اسی لیے پیدا کیا گیا تھا؟”
آپ نے جام کو ہاتھ سے رکھ دیا اور پریشانی کے عالم میں دعوت سے باہر نکل گئے۔

عمارت کے بیرونی دروازے پر آپ نے وزیر کے چرواہے کو دیکھا، جس کا لباس مٹی سے اٹا ہوا تھا۔ آپ اس کے ساتھ ہو لیے اور شہر سے باہر اپنے کپڑوں کا اس کے کپڑوں سے تبادلہ کیا۔ کئی گھنٹوں تک ویرانوں میں گھومنے پھرنے کے بعد آپ ایک قبرستان پر پہنچے، جو نہر کے کنارے واقع تھا۔ آپ نے وہاں پر ڈیرا لگانے کا فیصلہ کیا اور ایک ٹوٹی ہوئی قبر میں جا اترے۔ دن اور رات ذکرِ الٰہی میں مصروف ہو گئے اور سوائے نماز کی ادائیگی کے وقت کے اس میں سے نہ نکلتے تھے۔ چار روز کے بعد آپ باہر نکلے تو آپ کی کایا پلٹ چکی تھی۔ ایک امیر زادہ فقیر اور درویش بن چکا تھا۔ آگہی اور معرفت کا ایک دریا آپ کے سینے میں موج زن تھا۔

جب زندگی کا سوال بدل گیا
سوانح نگاروں نے ان کی زندگی کی ایک بڑی تبدیلی کو ایک مختصر منظر میں سمو دیا ہے۔ محفل اپنی جگہ جاری رہی، مگر اس نوجوان کے لیے زندگی کا سوال بدل چکا تھا۔آپ نے اس کے بعد اپنے شیخ ابوالقاسم بن قسی کی زیرِ نگرانی ایک نو ماہ کا چلہ کاٹا۔اور یوں ناز و نعم میں پلے اس شہزادے کی زندگی بدل گئی۔والد اور والدہ کی وفات کے بعد ان پر دو جوان بہنوں کی ذمہ داری آن پڑی۔بہنوں کی شادی سے فراغت کے بعد وہ اس راہ پر چل پڑے جس کا ان کے رب نے ان سے وعدہ لیا تھا، حالانکہ سلطان انہیں اپنے دربار سے وابستہ رکھنا چاہتا تھا۔ اس نے انہیں قاضی القضاہُ کے عہدے کی بھی پیشکش کی اور وزیراعظم بنانے کی بھی، لیکن انہوں نے یہ پیشکشیں ٹھکرا دیں اور درویشی کی راہ اختیار کی۔

وہ خود لکھتے ہیں کہ میں شاکر غنی اور صابر فقیر میں سے صابر فقیر کو افضل سمجھتا ہوں۔اور میں نے اپنے لیے فقر کا ہی راستہ اختیار کیا تھا۔ چنانچہ فرماتے ہیں:
“میں کسی حیوان کا ہرگز مالک نہیں ہوں اور نہ ہی اس کپڑا کا، جس کو میں پہنتا ہوں، نہ اس مکان کا جس میں رہتا ہوں۔ میں تو مسافر ہوں۔”
لہٰذا انہوں نے خواب میں ملنے والی ہدایت کے مطابق اندلس چھوڑ دیا، تیونس کا سفر اختیار کیا اور آٹھ سال وہاں قیام کیا، جہاں پر آپ اپنے دوست ابو محمد عبدالعزیز بن ابوبکر القریشی المہدوی کے ہاں ٹھہرے۔وہاں پر آپ نے اپنے قیام کے دوران دوست کی فرمائش پر اپنی کتاب روح القدس رقم کی۔پھر مصر اور وہاں سے حجازِ مقدس کی طرف عازمِ سفر ہوئے۔وہ 1202ء میں حج کے لیے مکہ پہنچے۔

مکہ کا قیام اور الفتوحات المکیہ
مکہ آپ کے نزدیک عالم الغیب اور عالم الشہود کا مقامِ اتصال ہے۔مکہ میں دو سال قیام کیا اور اسی دوران انہوں نے اپنی شہرہ آفاق کتاب “الفتوحات المکیہ” لکھی، جو 4000 صفحات پر مشتمل ہے۔ اس کے 560 ابواب ہیں اور تصوف پر لکھی جانے والی کتب میں اس کا درجہ بہت بلند ہے۔

ترکیہ کا سفر
ابن عربی 1204ء میں مکہ سے روانہ ہو کر بغداد، موصل اور دوسرے شہروں سے ہوتے ہوئے 1205ء میں قاہرہ پہنچے، جہاں آپ پر ارتداد کا الزام لگایا گیا، مگر ایوبی حاکم الملک العادل نے آپ کی جان بچائی۔ 1206ء میں آپ ایک بار پھر مکہ آئے اور ایک سال تک وہاں پر قیام کیا۔ اس کے بعد دمشق، موصل اور حلب سے ہوتے ہوئے آپ ایشیائے کوچک (ترکی) چلے گئے۔1207ء میں قونیہ پہنچے۔ یہاں پر سلجوقی سلطان کیکاؤس نے آپ کا بہت ادب و احترام کے ساتھ استقبال کیا اور آپ کی رہائش کے لیے ایک مکان بنوایا، جسے آپ نے بعد میں ایک بھکاری کو دے دیا۔ قونیہ میں آپ کی آمد مشرقی تصوف میں ایک انقلاب کا پیش خیمہ ہے، جس کا وسیلہ آپ کے شاگرد اور سوتیلے بیٹے صدر الدین قونوی بنے، جن کی ماں سے آپ کی شادی ہوئی۔ صدر الدین قونوی، جو آگے چل کر تصوف کے علائم میں شمار ہوئے، مولانا جلال الدین رومی کے قریبی دوستوں میں سے تھے۔ آپ نے ابن عربی کی کتاب فصوص الحکم پر شرح لکھی، جو آج تک حرفِ آخر سمجھی جاتی ہے۔

ارطغرل غازی سے ملاقات اور سلطنتِ عثمانیہ کی بشارت:
اسی دوران ان کی ملاقات خاندانِ عثمانیہ کے جدِ امجد اور کائی قبیلے کے سردار ارطغرل غازی سے ہوئی۔ ان دنوں کائی قبیلہ زمین اور پناہ کی تلاش میں دربدر پھر رہا تھا۔انہوں نے ارطغرل کو بازنطینی سلطنت کی مشرقی سرحد پر واقع سوت (Sogut) کی طرف ہجرت کی ہدایت کی اور اسے یہ بشارت دی کہ ایک دن اس کی نسل تین براعظموں پر حکومت کرے گی اور خلافتِ اسلامیہ کو اس کا کھویا ہوا مقام واپس دلائے گی۔

دمشق، فصوص الحکم اور وفات:
حجاز، عراق اور اناطولیہ کے طویل سفروں کے بعد ابن عربی 1223ء کے لگ بھگ دمشق میں مقیم ہوئے اور پھر آخر عمر تک وہیں مقیم رہے، جہاں 16 نومبر 1240ء کو پچھتر سال کی عمر میں ان کا انتقال ہوا۔اسی شہر میں انہوں نے فصوص الحکم لکھی، جس میں مختلف انبیا سے وابستہ حکمتوں کے ذریعے معرفت کے سوالات پر غور کیا۔ ان کے شاگرد صدر الدین قونوی نے ان کی فکر کی تعبیر اور اشاعت میں اہم کردار ادا کیا۔ قونوی اور ان کے بعد آنے والے شارحین کی بدولت یہ علمی روایت اناطولیہ، ایران اور برصغیر تک پہنچی۔اور یوں علم و ادب کا یہ روشن سورج، جو مغرب (اندلس) سے طلوع ہوا تھا، ساری دنیا کو اپنی روشنی سے منور کرنے کے بعد مشرق میں غروب ہوگیا۔مرسیہ میں پیدا ہونے والا ایک شہزادہ درویش بنا، ساری دنیا میں اپنے علم و فکر کا پرچار کرنے کے بعد دمشق میں آسودۂ خاک ہوا۔ آٹھ صدیاں گزرنے کو ہیں اور اس کی کتابیں اب بھی قاری کے سامنے وہ سوال رکھ دیتی ہیں جسے اشبیلیہ کی روایت نے ایک جملے میں سمیٹ دیا تھا: “اے محمد، کیا تمہیں اسی لیے پیدا کیا گیا تھا؟”

وحدت الوجود کا نظریہ
ابن عربی کا نام عموماً وحدت الوجود کے ساتھ لیا جاتا ہے۔ ان کی فکر میں وجودِ حقیقی اللہ کا ہے اور مخلوقات اپنا وجود اسی سے پاتی ہیں۔ “وحدت الوجود” کی اصطلاح بعد کے شارحین اور ناقدین کی بحثوں میں ان کے نام سے مشہور ہوئی۔ صدیوں تک اہلِ علم اس سوال پر گفتگو کرتے رہے کہ ان کی تحریروں میں خالق اور مخلوق کے تعلق کو کیسے سمجھا جائے۔ اسی اختلاف نے ان کے گرد ایک وسیع علمی روایت پیدا کی، جس میں مدح، شرح اور تنقید سبھی کی آوازیں سنائی دیتی ہیں۔

تصوف کے سلسلہ “اکبریہ” کا قیام اور پانچ سو کتابوں کا مصنف
انہیں تصوف کے ایک نئے سلسلے “اکبریہ” کا بانی سمجھا جاتا ہے، جو وحدت الوجود کے نظریے پر قائم ہے اور آج اس سلسلۂ تصوف کی شاخیں دنیا کے ہر ملک، خاص طور پر یورپ، امریکہ، ترکی اور عرب ممالک میں قائم ہیں، جہاں اس سلسلۂ تصوف کے ماننے والے بہت بڑی تعداد میں موجود ہیں۔ابن عربی دنیائے اسلام کے ممتاز صوفی، عالم، مفسر، عارف، محقق، فلسفی، شاعر، جراح، ڈاکٹر، ماہرِ نجوم اور قدوہ علما اور علوم کا بحرِ بیکراں ہیں۔ انہیں اسلامی تصوف میں شیخ اکبر کے نام سے یاد کیا جاتا ہے اور تمام مشائخ آپ کے اس مقام پر تمکین کے قائل ہیں۔ عام خیال یہ ہے کہ تصوفِ اسلامی میں وحدت الوجود کا تصور سب سے پہلے انہوں نے ہی پیش کیا۔ ان کا قول تھا کہ باطنی نور خود رہبری کرتا ہے۔ بعض علما نے ان کے اس عقیدے کو الحاد و زندقہ سے تعبیر کیا ہے، مگر صوفیا انہیں شیخ الاکبر کہتے ہیں۔

آپ تصوف کے قائل ہوں یا نہ ہوں،آپ صوفی ازم کو مانیں یا نہ مانیں،وحدت الوجود پر ایمان لائیں یا نہ لائیں،آپ ابن عربی کی عظمت اور فضیلت، ان کے علمی مقام اور مرتبے سے انکار نہیں کرسکتے۔بلاشبہ ان جیسی ہستیاں صدیوں بعد پیدا ہوتی ہیں اور رہتی دنیا تک نجمِ ثاقب بن کر اندھیری رات کے مسافروں کو راہ دکھاتے ہیں۔عثمان یحییٰ نے ابن عربی کی سوانحِ عمری لکھی۔ اس نے آپ کی تاریخِ پیدائش 8 جولائی 1165ء لکھی ہے۔انہوں نے پانچ سو سے زائد کتابیں لکھیں، بیشتر آج بھی موجود ہیں۔ عثمان یحییٰ نے آپ کی 846 کتب کے عنوان درج کیے ہیں۔ ان کی بیشتر کتابوں کا دنیا کی تمام مشہور زبانوں میں ترجمہ ہوا۔ان کی کتب دنیا کی کئی یونیورسٹیوں میں پڑھائی جاتی ہیں۔ ان پر پی ایچ ڈی کے مقالے لکھے جاتے ہیں۔

اردو میں شیخ اکبر
ان کی تقریباً تمام ہی کتابوں کا اردو ترجمہ کیا گیا ہے۔برصغیر کے اردو خواں قارئین تک ابن عربی کی فکر پہنچانے میں فصوص الحکم اور فتوحات مکیہ کے تراجم اور شروح نے نمایاں کردار ادا کیا۔ مولوی عبد القدیر صدیقی نے فصوص الحکم کا اردو ترجمہ کیا اور مولانا اشرف علی تھانوی نے خصوص الکلم میں اس پر تعلیقات لکھیں۔پیر مہر علی شاہ کی تحقیق الحق فی کلمۃ الحق بھی اس موضوع پر برصغیر کی علمی گفتگو کا حصہ ہے۔اردو میں روح القدس، مشکاۃ الانوار اور روحانی اسفار اور ان کے ثمرات جیسی تحریریں بھی قاری کو ابن عربی کی علمی دنیا کے مختلف پہلوؤں تک لے جاتی ہیں۔فصوص الحکم اور فتوحات مکیہ پنجاب یونیورسٹی کے نصاب میں شامل ہیں۔ابن عربی کی مندرجہ ذیل کتابوں کا اردو ترجمہ موجود ہے:

فصوص الحکم
• فصوص الحکم ترجمہ عبدالغفور دوستی (1889، حیدرآباد دکن)۔
• فصوص الحکم ترجمہ سید مبارک علی (1894، کانپور)۔
• فصوص الحکم ترجمہ مولوی عبد القدیر صدیقی۔ یہ کتاب پنجاب یونیورسٹی کے نصاب میں شامل ہے۔
• مولانا اشرف علی تھانوی نے فصوص الحکم پر تعلیقات درج کی ہیں۔ کتاب کا نام ہے خصوص الکلم، جس میں انہوں نے ابن عربی کا دفاع کیا ہے۔
• پیر مہر علی شاہ صاحب کی کتاب تحقیق الحق فی کلمۃ الحق اور ملفوظاتِ مہریہ ابن عربی کے دفاع میں اپنی مثال آپ ہیں۔
• ابرار احمد شاہی۔

فتوحات مکیہ
• فتوحات مکیہ ترجمہ مولوی فضل خان مرحوم (وفات 1938ء)، جس میں پہلے 30 فصول کا ترجمہ کیا گیا تھا۔
• فتوحات مکیہ ترجمہ سلیم چشتی۔ 1987ء تک ترجمے کی چار جلدیں شائع ہوئیں۔
• فتوحات مکیہ ترجمہ فاروق القادری۔ پہلی 2 فصول کا ترجمہ 2004ء میں شائع ہوا۔

رسائل ابن عربی
• ابن عربی کے چار رسائل:
1. شجرة الكون
2. الكبريت الاحمر
3. الامر المحكم والمربوط
4. كتاب الاخلاق و الامر
کا ترجمہ 2001ء میں لاہور سے شائع ہوا ہے۔ مترجم محمد شفیع ہیں۔

رسائل ابن العربی (جلد اول)
• ابن عربی فاؤنڈیشن نے عصری تقاضوں کو مدنظر رکھتے ہوئے جدید اور عصری اردو میں شیخ اکبر کے سہل تراجم کرنے کا بیڑا اٹھایا۔ اس سلسلے کی پہلی کڑی رسائل ابن عربی (جلد اول) جون 2008ء میں منظرِ عام پر آئی۔ اس کتاب میں شیخ اکبر کی درج ذیل کتب اور رسائل شامل کیے گئے ہیں:

• کتاب الجلال والجمال\
• کتاب الوصیۃ\
• حلیۃ الابدال\
• نقش الفصوص\
• رسالۃ الفناء فی المشاہدہ\
• کتاب اصطلاحات الصوفیۃ\
• رسالہ الی امام الرازی\
• کتاب الألف و ہو کتاب الأحدیہ\
• القسم الإلھی\
• الجلالہ و ہو کلمة اللہ\
• کتاب التراجم\
• میم واو نون\
• التدبیرات الإلهیۃ فی اصلاح المملکۃ الإنسانیۃ

مملکتِ انسانی کی اصلاح میں خدائی تدبیریں دسمبر 2008ء کو شائع ہوئی۔
• مشکاۃ الانوار فیما روی عن اللہ من الأخبار، بنام 101 احادیث قدسی، مکمل عربی متن، اردو ترجمے اور شیخ اکبر کے نزدیک احادیث کی اہمیت پر شامل مقدمے کے ساتھ ابن عربی فاؤنڈیشن پاکستان سے شائع ہوئی۔ تحقیقِ عربی متن: اسٹیفن ہرٹنسٹائن اور مارٹن ناٹ کٹ، مترجم: ابرار احمد شاہی۔
• الإسفار عن نتائج الأسفار، بنام روحانی اسفار اور ان کے ثمرات، تحقیق شدہ مکمل عربی متن، اردو ترجمے کے ساتھ ابن عربی فاؤنڈیشن سے شائع ہوئی۔
تدوینِ عربی متن: ڈینس گرل (داؤد الفقیر)، فرانسیسی اسکالر، ابرار احمد شاہی۔
• روح القدس فی مناصحة النفس
• نفس کا آئینہ حق

آپ تصوف کے قائل ہوں یا نہ ہوں،آپ صوفی ازم کو مانیں یا نہ مانیں،وحدت الوجود پر ایمان لائیں یا نہ لائیںآپ ابن عربی کی عظمت اور فضیلت، ان کے علمی مقام اور مرتبے سے انکار نہیں کرسکتے۔بلاشبہ ان جیسی ہستیاں صدیوں بعد پیدا ہوتی ہیں اور رہتی دنیا تک نجمِ ثاقب بن کر اندھیری رات کے مسافروں کو راہ دکھاتے ہیں۔

مصنف کے بارے میں

Avatar photo

ڈاکٹر تصور اسلم بھٹہ

تبصرہ لکھیے

Click here to post a comment