مکتبہ سیاست کے طلبا جانتے ہیں کہ معاہدہ ویسٹ فیلیا (1648ء) جدید بین الاقوامی نظام کی تشکیل میں ایک اہم سنگِ میل تصور ہوتا ہے۔ اس معاہدے نے علاقائی خود مختاری، ریاستی اقتدارِ اعلیٰ اور دیگر ریاستوں کے داخلی معاملات میں عدم مداخلت کے اصولوں کو تقویت فراہم کی۔ تاہم جدید ریاست کا تصور اس معاہدے کے بعد ایک طویل تاریخی، سیاسی اور ادارہ جاتی ارتقا کا نتیجہ ہے۔
جدید ریاست ایک ایسا سیاسی و قانونی نظام ہے جس کے تحت مخصوص جغرافیے میں بسنے والے افراد ایک باقاعدہ حکومت کے تحت زندگی گزارتے ہیں اور ریاست اپنے داخلی و خارجی معاملات میں خود مختار ہوتی ہے۔مطلب یہ ہوا کہ جدید ریاست چار اجزا یعنی مخصوص جغرافیہ، آبادی، حکومت اور داخلی و خارجی خود مختاری پر مشتمل ہوتی ہے۔ریاست کا جغرافیہ، اس کی سرحدیں، قدرتی وسائل اور اس کی آبادی جامد، جبکہ حکومتیں، سیاسی جماعتیں اور سیاسی رہنما وغیرہ غیر جامد عناصر ہوتے ہیں۔ تاہم قومی مفادات مستقل بھی ہوسکتے ہیں اور متغیر بھی۔جمہوری ریاستوں میں حکومت وہ اجارہ جاتی نظام ہے جس کے ذریعے ریاست اپنے اختیارات استعمال کرتی ہے، قوانین وضع کرتی ہے، ان کا نفاذ کرتی ہے اور ملک کے انتظامی، سیاسی، معاشی و سماجی امور چلاتی ہے۔ریاست کے جامد اور غیر جامد عناصر میں بنیادی فرق ان کی نوعیت اور تغیر پذیری کا ہے۔ اس لیے ریاست کا وجود کسی مخصوص حکومت، جماعت یا سیاسی شخصیت کا محتاج نہیں ہوتا بلکہ ریاست ایک مستقل قانونی و سیاسی وجود رکھتی ہے۔
فرانسیسی فلسفی، سیاسی مفکر و قانون دان مونٹیسکو کے مطابق اگر ریاست کے تمام اختیارات ایک ہی فرد یا ادارے کے پاس ہوں تو آمریت اور اختیار کے ناجائز استعمال کا خطرہ پیدا ہوتا ہے۔ اس لیے انہوں نے ریاستی اختیارات کو تین الگ اداروں میں تقسیم کرنے کا تصور پیش کیا۔مونٹیسکو کے نظریۂ تقسیمِ اختیارات کے پہلو سے جمہوری ریاست تین ستونوں، مقننہ، انتظامیہ اور عدلیہ، پر مشتمل ہوتی ہے۔دفاعی ادارے کے ساتھ مختلف ادارے انتظامیہ کے دائرۂ اختیار میں آتے ہیں۔ ریاستوں کے دساتیر و قوانین میں مختلف اداروں کا دائرۂ اختیار وضع ہوتا ہے۔بدقسمتی سے پاکستان میں ریاست کی اصطلاح ہمیشہ سے غلط استعمال ہوتی رہی ہے۔ روایتی طور پر مقتدرہ اور فوج کے ادارے کو ریاست کا ہم معنی قرار دے کر نظامِ توازن و احتساب کا دروازہ ہی بند کیا جاتا ہے۔ الیکٹرانک میڈیا، پرنٹ میڈیا اور سوشل میڈیا پر بیٹھے صاحبِ حیثیت شخصیات بھی ریاست کے اصلی تصور کے بجائے روایتی تصور کو فروغ دیتے نظر آتی ہیں۔
جب کسی ریاستی ادارے یا مقتدرہ کو ریاست کا ہم معنی قرار دے دیا جاتا ہے تو ریاست کے وسیع تر آئینی و قانونی تصور کو ایک مخصوص ادارے کی حدود میں محصور کر دیا جاتا ہے۔ اس طرزِ فکر سے ادارہ جاتی اجارہ داری کو فروغ ملتا ہے اور ریاستی اختیارات کی تقسیم، توازن اور احتساب کا جمہوری تصور کمزور پڑنے لگتا ہے۔ حالانکہ کسی بھی ریاستی ادارے کی قانونی حیثیت اس کے آئینی مینڈیٹ سے متعین ہوتی ہے، نہ کہ اس کی سیاسی، انتظامی یا عسکری قوت سے۔ ریاست کسی ادارے کی ملکیت نہیں بلکہ تمام شہریوں کا مشترکہ آئینی و سیاسی وجود ہوتی ہے۔ایک جمہوری ریاست کو منظم و مربوط طریقے سے چلانے کے لیے آئین و قانون کی ضرورت پڑتی ہے۔ آئین و قوانین ادارہ جاتی دائرۂ اختیار وضع کرتے ہیں۔ کوئی فرد، ادارہ یا جماعت آئین و قانون میں متعین کردہ حدود و اختیارات سے تجاوز کرے تو عام عوام کو آئینی حق پہنچتا ہے کہ وہ اس پر تنقید کرے اور برملا اس کے خلاف اپنی رائے کا اظہار کرے۔
آئینِ پاکستان کا آرٹیکل 19 شہریوں کو آزادیِ اظہارِ رائے کا حق فراہم کرتا ہے۔ اگرچہ اس حق پر آئین میں بیان کردہ معقول قانونی پابندیاں بھی عائد ہیں۔ اسی طرح آرٹیکل 19-A معلومات تک رسائی کے حق کو تسلیم کرتا ہے۔ ان آئینی ضمانتوں کا مقصد شہریوں کو ریاستی و حکومتی معاملات میں سوال اٹھانے، معلومات حاصل کرنے اور اپنی رائے کا اظہار کرنے کے قابل بنانا ہے۔ جمہوری معاشرے میں تنقید کو محض اختلافِ رائے نہیں بلکہ جواب دہی اور شفافیت کے اہم ذریعے کے طور پر دیکھا جاتا ہے۔چنانچہ دیکھا جائے تو مقتدرہ اور فوج کے ادارے پر تنقید کرنے والے بھی ریاست کے نام پر تنقید کر رہے ہوتے ہیں۔ مقتدرہ اور فوجی ادارے کو ریاست کا ہم معنی قرار دے کر اسے ریاستی جواز اور قانونی حیثیت فراہم کی جاتی ہے۔جمہوری اقدار کی رو سے حکومتوں، سیاسی جماعتوں، سیاسی نمائندگان اور ریاستی اداروں کی پالیسیوں و کارکردگی پر تنقید کرنا شہریوں کا بنیادی حق ہے۔ البتہ ریاست کے مستقل وجود اور آئینی نظام کو نقصان پہنچانے والی سرگرمیوں اور حکومت یا اداروں پر جائز تنقید میں فرق ہونا چاہیے۔ تشدد پر اکسانا، غیر قانونی سرگرمیوں میں ملوث ہونا، آئینی نظم کو تباہ کرنے کی کوشش کرنا اور ریاست کے مستقل وجود پر سوالات اٹھانے جیسے مسائل قانون کے مطابق ڈیل ہوتے ہیں۔
ادارے وضع کردہ آئینی حدود و قیود کا خیال نہ رکھیں اور حکومتیں ریاستی نظم و نسق چلانے میں ناکام ہو جائیں تو اس پر عوامی ردِعمل آنا فطری ہوتا ہے۔عوامی ردِعمل کا تقاضا ہوتا ہے کہ حکومتیں اور ادارے اپنی پالیسیوں پر نظرِ ثانی کرکے بہتر کارکردگی کے ذریعے عوام کی دلجوئی کریں۔مگر ہمارا کلچر اس سے یکسر مختلف ہے۔ تنقید کرنے والا توازن برقرار نہیں رکھتا اور سیدھے ریاست پر حملہ آور ہوتا ہے اور اگر متوازن انداز میں متعلقہ فریق پر تنقید کرتا بھی ہے تو آگے سے ردِعمل اتنا شدید آتا ہے کہ جس سے معاملات حل ہونے کے بجائے مزید خرابی کی طرف چلے جاتے ہیں۔ریاستوں کی مضبوطی کا پیمانہ محض ان کی عسکری قوت، جغرافیائی وسعت یا معاشی وسائل نہیں ہوتے بلکہ ان کی آئینی بالادستی، ادارہ جاتی استحکام، قانون کی حکمرانی اور عوامی اعتماد بھی ریاستی استحکام کے لیے ضروری ہوتے ہیں۔ ایک مضبوط جمہوری ریاست وہ ہوتی ہے جہاں ادارے آئینی حدود میں رہ کر کام کریں، حکومتیں عوام کے سامنے جواب دہ ہوں، عدلیہ آزاد ہو اور شہری بلا خوف و خطر اپنی رائے کا اظہار کر سکیں۔ شہریوں کو خاموش رکھنا طاقت نہیں بلکہ ان کا اعتماد حاصل کرنا طاقت ہے۔متوازن جمہوری معاشرے، جن میں آئین و قانون کی بالادستی تسلیم ہو، وہی معاشرے ریاستوں کو امن و ترقی کی راہ پر گامزن کر سکتے ہیں۔



تبصرہ لکھیے