حضرت ابو الدرداء رضی اللہ تعالیٰ عنہ سے روایت ہے کہ رسول اللہ ﷺ نے فرمایا:
أَيَعْجِزُ أَحَدُكُمْ أَنْ يَقْرَأَ فِي لَيْلَةٍ ثُلُثَ الْقُرْآنِ؟
قَالُوا: وَكَيْفَ يَقْرَأُ ثُلُثَ الْقُرْآنِ؟
قَالَ: ﴿قُلْ هُوَ اللَّهُ أَحَدٌ﴾ تَعْدِلُ ثُلُثَ الْقُرْآنِ.
ترجمہ:
رسول اللہ ﷺ نے فرمایا: کیا تم میں سے کوئی اس بات سے عاجز ہے کہ ایک رات میں قرآن کے ایک تہائی حصے کے برابر تلاوت کر لے؟
صحابۂ کرام رضی اللہ عنہم نے عرض کیا: یا رسول اللہ! یہ کیسے ممکن ہے؟ آپ ﷺ* نے فرمایا: قُلْ هُوَ اللَّهُ أَحَدٌ(سورۂ اخلاص) قرآن کے ایک تہائی کے برابر ہے۔
(صحیح مسلم)
ڈاکٹر قاری محمد ضیاء الرحمٰن صاحب امام و خطیب فیصل مسجد اسلام آباد نے اس مبارک حدیث کی روشنی میں نہایت ایمان افروز اور فکر انگیز گفتگو فرمائی۔ آپ نے واضح کیا کہ اللہ تعالیٰ نے اپنے بندوں پر بے شمار آسانیاں فرمائی ہیں اور معمولی نظر آنے والے اعمال میں بھی عظیم اجر و ثواب رکھ دیا ہے۔ انہی عظیم نعمتوں میں سے ایک نعمت سورۂ اخلاص ہے جس کی فضیلت نبی کریم ﷺ نے خود بیان فرمائی۔ ڈاکٹر صاحب نے فرمایا کہ ہر مسلمان کو قرآن کریم سے اپنا مضبوط تعلق قائم کرنا چاہیے۔ قرآن صرف رمضان المبارک میں پڑھنے کی کتاب نہیں بلکہ یہ ہماری روزمرہ زندگی کا ساتھی ہے۔ روزانہ قرآن کریم کی تلاوت کو اپنی عادت اور معمول بنا لینا چاہیے۔ کیونکہ قرآن کی تلاوت سے دلوں کو سکون، گھروں میں خیر و برکت، رزق میں وسعت، زندگی میں آسانی اور ایمان میں تازگی پیدا ہوتی ہے۔
آپ نے نہایت خوبصورت انداز میں قرآن کی روزانہ تلاوت کا حساب بھی بیان فرمایا تاکہ ہر شخص اپنی استطاعت کے مطابق اس مبارک عمل کا اہتمام کرے۔ اگر کوئی شخص روزانہ ایک پارہ تلاوت کرے تو وہ سال میں تقریباً 12 مرتبہ پورا قرآن مجید ختم کر لیتا ہے۔ اگر روزانہ نصف پارہ پڑھے تو سال میں تقریباً 6 مرتبہ قرآن مجید مکمل کر لیتا ہے۔ اگر روزانہ ایک چوتھائی (پاؤ) پارہ پڑھے تو سال میں تقریباً 3 مرتبہ قرآن کریم ختم کرنے کی سعادت حاصل کر لیتا ہے۔ ڈاکٹر صاحب نے توجہ دلائی کہ اگر کسی دن زیادہ تلاوت ممکن نہ ہو تو کم از کم سونے سے پہلے سورۂ اخلاص تین مرتبہ پڑھنے کا معمول ضرور بنا لیا جائے۔ یہ عمل نہایت آسان ہے چند لمحوں میں مکمل ہو جاتا ہے. لیکن اللہ تعالیٰ کے ہاں اس کا اجر بے حد عظیم ہے۔
بندہ رات کو آرام کرنے سے پہلے یہ مختصر سا عمل انجام دے کر پورے قرآن کے ایک ختم کے برابر ثواب کا مستحق بن سکتا ہے۔خصوصاً فیصل مسجد کے شعبۂ تحفیظ کے طلبہ کا ذکر کرتے ہوئے فرمایا کہ جن بچوں نے سورۂ اخلاص حفظ کر رکھی ہے۔ ان کے لیے تو اس پر عمل کرنا اور بھی آسان ہے۔ اگر وہ روزانہ سونے سے پہلے اس سورہ کو تین مرتبہ پڑھنے کا اہتمام کریں تو ان شاء اللہ ہر رات عظیم اجر و ثواب کے مستحق ہوں گے۔ یہ ایسا عمل ہے جو بظاہر مختصر ہے مگر اللہ تعالیٰ کے ہاں اس کی قدر و منزلت بہت بلند ہے۔ڈاکٹر صاحب نے اس بات پر بھی زور دیا کہ صرف خود عمل کرنا کافی نہیں بلکہ اپنے اہلِ خانہ، بچوں، دوستوں اور دیگر مسلمانوں کو بھی اس مبارک سنت کی ترغیب دینی چاہیے۔ تاکہ زیادہ سے زیادہ لوگ اس عظیم فضیلت سے فائدہ اٹھا سکیں۔
درس کے اختتام پر ڈاکٹر صاحب نے نہایت رقت آمیز اور درد بھری دعا کروائی۔ آپ نے اللہ رب العزت کے حضور التجا کی کہ:
اے اللہ! اپنے خاص فضل و کرم سے فیصل مسجد پر عائد تمام رکاوٹوں اور بندشوں کو ختم فرما نمازیوں کے لیے آسانیاں پیدا فرما۔ اس عظیم مسجد کو اس کی شان و عظمت کے مطابق ہمیشہ آباد و شاداب رکھ، اور اسے ذکرِ الٰہی، تلاوتِ قرآن اور عبادت گزاروں سے معمور فرما۔ یا اللہ! مسجد اقصیٰ، مسجد قرطبہ اور دنیا بھر کی ان تمام مساجد پر اپنا خصوصی فضل فرما جو اپنے نمازیوں کی منتظر اور ترس رہی ہیں۔ انہیں آزادی، امن، عزت اور رونق نصیب فرما، اور ان میں دوبارہ سجدوں کی بہاریں لوٹا دے۔اے رب کریم! جو لوگ مساجد کی آبادکاری میں رکاوٹ بنتے ہیں، یا ظلم، سازش اور ناانصافی کے ذریعے اللہ کے گھروں کو ویران کرنے کی کوشش کرتے ہیں۔ تو اپنی کامل حکمت کے مطابق ان کے شر سے امتِ مسلمہ کو محفوظ فرما، ان کی سازشوں کو ناکام بنا، اور اپنے گھروں کی حفاظت کا خود انتظام فرما۔
اے اللہ! ہمیں قرآن کریم سے سچی محبت عطا فرما۔ اس کی تلاوت کو ہماری زندگی کا مستقل معمول بنا دے۔ ہمیں اس پر عمل کرنے، دوسروں تک اس کا پیغام پہنچانے اور اس کے نور سے اپنی زندگیوں کو منور کرنے کی توفیق عطا فرما۔ ہمیں دنیا و آخرت کی کامیابیاں نصیب فرما، ہماری مساجد کو آباد رکھ، ہماری عبادتوں کو قبول فرما اور ہمیں اپنے نیک بندوں میں شامل فرما۔ آمین یا رب العالمین۔
تبصرہ لکھیے