حیدر آباد گولکنڈہ ، ہیروں کا دارلحکومت
گولکنڈہ بھارت کی ریاست آندھراپردیش میں واقع ہے یہاں کی کانوں سے نکلنے والے ہیرے حیدرآباد لے جائے جاتے جہاں ان کی تراش خراش ہوتی سترہویں اور اٹھارویں صدی عیسوی میں حیدرآباد کو Diamond Capital of world کہتے تھے . دنیا بھر میں ہیروں کی اسی فی صد سے زیادہ سپلائی یہیں سے ہوتی اس علاقے کی سب سے بڑی ہیروں کی کان کولر گنٹر ضلع کے گاؤں کولر کے قریب دریائے کرشنا کے کنارے واقع تھی جہاں دریا کی ریت کو چھان کر ہیرے نکالے جاتے
ہر سال یہاں سے بارہ ملین قیراط سے زیادہ کے ہیرے نکالے جاتے تھے ۔
یہ ہیرے دنیا بھر میں گولکنڈہ ڈائمنڈ کے نام سے مشہور تھے
دنیا کے مشہور ترین قیمتی ترین اورسب سے بڑے ہیرے یہاں سے نکالے گئے
جن میں
* در یائے نور ( گلابی)
180 قیراط
ملکہ ایران کے تاج کی زینت بنا
یہ گلابی ہیرا ایران کے مرکزی بینک کی عمارت میں، شاہراہِ فردوسی پر واقع خزانۂ جواہراتِ ملی میں محفوظ ہے۔
* کوہ نور ( بے رنگ ) 105 قیراط
* ہوپHope ( نیلا) 45.5 قیراط ۔۔
آج کل امریکہ میں ہے ۔۔
* ریجنٹ Regent ( بے رنگ) 140.62قیراط ۔۔
لوور کے ریکارڈ کے مطابق یہ ہیرا 1698ء میں گولکنڈہ کی کانوں سے ملا۔ مدراس کے انگریز گورنر تھامس پِٹ نے اسے خریدا اور انگلستان میں تراشوایا۔ پھر 1717ء میں اسے فرانس کے شاہی خاندان کے لئے خریدا گیا اور یہ
شاہ لوئی پانزدہم (Louis XV) کے تاج کی زینت بن گیا ۔۔آج کل پیرس کے عجائب گھر لوور میں موجود ہے ۔۔
* بقعہ نور – آرلیف (Orlov)
(بے رنگ ) 189.5 قیراط – روس میں ہے ۔
ملکہ کتھرائین دی گریٹ کے عصا میں نصب ہے
اور دوسرے بے شمار ہیرے شامل ہیں ۔
حقیقت تو ہے کہ اس زمانے میں گولکنڈہ ہیرے کی ملکیت طاقت شہرت اور خوش بختی کی علامت سمجھی جاتی تھی اس لئے دنیا کا ہر بڑا اور دولتمند شخص یہ ہیرے بڑی سے بڑی قیمت دے کر حاصل کرنے کا خواہش مند ہوتا ۔۔
٭٭٭٭٭٭
ہندوؤں کی حکایت اور گولکنڈہ کی کان :
گولکنڈہ کی کولر کان کب اور کیسے دریافت ہوئی کوئی نہیں جانتا لیکن اسے شہرت سولہویں اور سترہویں صدی میں ملی جب یہاں سے نکلنے والے ہیرے ساری دنیا میں مشہور ہوئے
تاہم ہندوؤں کی مذہبی روایات میں اسے کرشنا سے منسوب کیا جاتا ہے ۔
بھاگوت پران ہندو مذہب کی ایک اہم سنسکرت کتاب ہے۔ اسے شریمد بھاگوتم بھی کہتے ہیں۔ یہ اٹھارہ بڑے پرانوں میں شمار ہوتی ہے۔ پران ایسی مذہبی کتابیں ہیں جن میں دیوتاؤں، کائنات کی تخلیق، قدیم بادشاہوں اور عقیدت مندوں کی داستانیں بیان ہوتی ہیں ۔۔
پران بھاگوات کے بارہ حصے ہیں جنہیں اسکندھ کہتے ہیں
پران بھاگوات کے دسویں اسکندھ میں ایک ہیرے کا ذکر ہے۔۔سیامنتک منی — جو سورج دیوتا سوریہ نے اپنے عقیدت مند ستراجیت کو دیا تھا۔
سیامنتک منی ہی ہندو روایات کے مطابق کوہ نور ہے ۔۔
ستراجیت نے اسے سونے کے ایک ہار میں جڑوا لیا ۔۔ اس کی چمک اتنی تیز تھی کہ جب ایک دن وہ اسے گلے میں پہن کر دوارکا میں کرشن سے ملنے آیا تو لوگوں کو لگا کہ سورج دیوتا خود زمین پر اتر آیا ہے۔
چوبداروں نے کرشن کو خبر دی کہ سورج دیوتا آپ سے ملنے آئے ہیں۔ کرشن نے مسکرا کر کہا کہ آنے والا ستراجیت ہے اور یہ روشنی اس کے گلے میں پڑے ہیرے کی وجہ سے ہے۔
کرشن کو ہیرا بہت پسند آیا اور اس نے ستراجیت سے کہا کہ اسے بادشاہ اُگراسین کے سپرد کر دے۔ ستراجیت نے انکار کر دیا ۔۔
ایک دفعہ ستراجیت کا بھائی پرسین اس ہار کو پہن کر شکار کے لئے نکلا۔ جنگل میں ایک شیر نے اسے مار ڈالا۔ پھر جامبوان نے شیر کو مار کر ہیرا غار میں اپنے بچے کو کھیلنے کے لیے دے دیا۔ ادھر پرسین گھر نہ لوٹا تو ستراجیت نے کرشن پر الزام لگایا کہ اس نے ہیرے کی خاطر اس کے بھائی کو قتل کر دیا ہے۔
کرشن کو اس الزام پر بڑا دکھ ہوا اور وہ ہیرے کی تلاش پر نکلے
جنگل میں پرسین اور اس کے گھوڑے کی لاشیں ملیں کرشن تلاش کرتے ہوئے غار تک پہنچے۔ وہاں جامبوان سے ان کا مقابلہ اٹھائیس دن چلا۔ آخرکار جامبوان نے کرشن میں رام کو پہچان لیا اور ہیرا ان کے حوالے کر دیا۔ کرشن نے دوارکا واپس آ کر سب کے سامنے منی ستراجیت کو لوٹا دی۔ ستراجیت کو اپنے الزام پر ندامت ہوئی اور اس نے اپنی بیٹی ستیہ بھاما کی شادی کرشن سے کر دی۔
ایک اور ہندو روایت کے مطابق دریائے کرشنا کے کنارے ریت میں پائے جانے والے ہیرے کرشنا کے آنسو ہیں جو ان کی آنکھوں سے گرنے کے بعد ہیرے بن جاتے ہیں ۔
٭٭٭٭٭٭٭٭
کوہ نور جو انمول ہے :
گولکنڈہ سے لاکھوں ہیرے ملے ان تمام ہیروں میں جو اہمیت اور شہرت “ کوہ نور “ کو حاصل ہوئی وہ آج تک دنیا کے کسی اور ہیرے کو نہیں مل سکی اور یہ دنیا کا وہ واحد ہیرا ہے جس کی قیمت کا بھی آج تک کوئی تعین نہیں کر سکا نہ کبھی یہ بکا اور نہ کوئی اس کو خرید سکا
اس ہیرے کو پانے کے لئے کئی جنگیں لڑی گئیں اور ہزاروں انسانوں کا خون بہایا گیا
یہ ہیر ا مردوں کے لئےنحوست اور ہلاکت اور خواتین کے لئے خوش بختی کی علامت سمجھا جاتا ہے
یہ ہیرا کب دریافت ہوا اس کے بارے میں تو تاریخ خاموش ہے
لیکن اس کی موجودگی کا پہلا ثبوت تیروہویں صدی میں ملتا ہے
کہا جاتا ہے کہ یہ شمالی ہندوستان کی کاکا ٹیا ریاست کے شاہی خاندان کی ملکیت تھا جس کی سرحدیں سارے شمالی ہندوستان میں حیدرآباد سے لے کر چنئی ( مدراس) تک پھیلی ہوئی تھی
1310 ء میں خلجی سلطنت کے دوسرے سلطان علاؤالدین خلجی کے سالار ملک کافور نے کا کاٹیا سلطنت پر حملہ کیا اور ایک مہینہ کے محاصرے کے بعد دارلحکومت وارینگل کو فتح کرلیا۔۔ راجہ پرتاپ ردرا نے ہتھیار ڈال دیئے اور خراج دینا قبول کر لیا اور تاوان جنگ کے طور پر ایک ہزار ہاتھی سات ہزار گھوڑے ۔ بارہ ہزار اونٹ اور بیشمار مال و دولت پیش کیا ۔۔
لیکن ملک کافور خوش نہ تھا اس نے کوہ نور اور دریائے نور بھی طلب کر لئے جو راجہ کو نہ چاہتے ہوئے بھی دینے پڑے
اور یوں یہ دونوں مشہور ہیرے سلاطین دہلی کی ملکیت بن گئے ۔ ظہیرالدین بابر نے 1526 ء میں پانی پت کی پہلی جنگ میں ابراہیم لودھی کو شکست دے کر دہلی پر قبضہ کرلیا
ابراہیم لودھی کی والدہ بوا بیگم نے یہ ہیرا بابر کے بیٹے ہمایوں کی نذر کر دیا۔۔
بابر نے اپنی کتاب “ بابر نامہ “ میں اس کا ذکر یوں کیاہے
“ 186 قیراط کا یہ ایک انتہائی خوبصورت ہیرا ہے جو اس قدر قیمتی ہے کہ اگر اسے بیچ دیا جائے تو اس کے عوض ملنے والی رقم سے تمام دنیا کے انسانوں کو دو دن تک کھانا کھلایا جا سکتا ہے “
یوں یہ ہیرا مغلوں کے خزانے کی زینت بن گیا ۔۔
شاہ جہاں نے تخت سیلمانی کی طرز پر ایک تخت بنوایا جسے “ تخت طاؤس”Peacock Throne کہتے ہیں جو سونے کا بنا ہوا تھا اور اس پر ایک من کے قریب ہیرے جواہرات اور قیمتی پتھر جڑے گئے تھے کوہ نور اور دریائے نور کو ان پتھروں میں مرکزی حیثیت حاصل تھی
ان دنوں تاج محل بھی زیر تعمیر تھا
تاج محل کے معمار احمد شاہ لاہوری کا کہنا تھا کہ اس تخت پر تاج محل سے زیادہ لاگت آئی ۔۔۔
٭٭٭٭٭٭
فرانسیسی سیاح ژاں کی کہانی :
ژاں باتیست تاورنیے سترھویں صدی کا فرانسیسی سیاح اور جواہر فروش تھا۔ پیرس میں پیدا ہوا اور تقریباً چالیس برس کے دوران ایشیا کے چھ سفر کیے۔ تجارت اسے ایران، مغل ہندوستان اور دکن کے گولکنڈہ تک لے گئی۔ ژاں نے اپنے مشاہدات 1676 ء میں Les Six Voyages، یعنی چھ سفر، کے نام سے شائع کیے۔
اس نے اپنی کتاب میں گولکنڈہ کے ہیروں کی کان اور کوہ نور اور دریائے نور کا ذکر بڑی تفصیل سے کیا ہے ۔
وہ کولر کے ایک بے نام کسان کی کہانی لکھتا ہے جسے دریائے کرشنا کے کنارے زمین کھودتے ہوئے ایک پچیس قیراط کا ہیرا ملا جس کے بعد پھر یہ جگہ ہیروں کے لئے مشہور ہوگئی۔
تاورنیے ہندوستان سے ایک بڑا نیلا ہیرا بھی فرانس لے گیا، جسے بادشاہ لوئی چہاردہم نے خرید لیا۔ کئی بار تراشے جانے کے بعد اسی پتھر سے آج کا مشہور ہوپ ڈائمنڈ بنا۔
ہوپ ڈائمنڈ (Hope Diamond) امریکہ کے دارالحکومت واشنگٹن، ڈی سی میں سمتھسونین کے نیشنل میوزیم آف نیچرل ہسٹری کی دوسری منزل پر نمائش کے لیے رکھا ہے۔
٭٭٭٭٭٭٭٭
کوہ نور۔ ۔ نور کا پہاڑ
1739 ء میں ایران کے بادشاہ نادر شاہ نے کرنال کی جنگ میں مغل شہنشاہ محمد شاہ کو شکست دے کر دہلی پر قبضہ کر لیا
محمد شاہ نے نادر شاہ کے ڈر سے کو ہ نور ہیرا تخت طاؤس سے نکال کر اپنی پگڑی میں چھپا لیا نادر شاہ کو کسی حاسد نے خبر دے دی
اس نے ایک تقریب کا اہتمام کیا اور اس میں اعلان کیا کہ آج سے محمد شاہ میرا پگڑی بدل بھائی ہے اور اس کی پگڑی اتار کر اپنے سر پر رکھ لی اور اپنی پگڑی اسے پہنا دی
محمد شاہ رنگیلا دیکھتا ہی رہ گیا۔۔
اپنے کمرے میں جاکر جب اس نے پگڑی سے ہیرا برآمد کیا تو اس چمک دھمک اور آب وتاب دیکھ کر بے اختیار اس کے منہ سے کوہ نور کے الفاظ نکلے
جس کے معنی ہیں نور کا پہاڑ
یوں اس ہیرے کو کوہ نور کا نام نادر شاہ نے دیا۔
نادر شاہ دہلی کو لوٹ کر جب واپس ایران کی جانب روانہ ہوا تو مورخین کے مطابق لوٹ کا یہ سامان بشمول تخت طاؤس کے سات سو ہاتھیوں بارہ ہزار گھوڑوں اور سات ہزار اونٹوں پر لدا ہوا تھا
جس کی کل مالیت ایک محتاط اندازے کے مطابق سات سو ملین روپے تھی ۔۔ جس میں کوہ نور اور دریائے نور کی قیمت شامل نہ تھی
1747 ء میں نادر شاہ ایک بغاوت میں قتل ہوا
عباس صفوی نے ایران پر دوبارہ صفوی راج قائم کردیا
اور نادر شاہ کے سالار احمد شاہ ابدالی نے افغانستان میں ایک آزاد ریاست قائم کرنے کا اعلان کیا جس کا دارلحکومت قندھار تھا۔۔
نادر شاہ کا خاندان جان بچا کر احمد شاہ ابدالی کے پاس پناہ حاصل کرنے آگیا جہاں 1751 ء میں نادر شاہ کے بیٹے نے کوہ نور احمد شاہ ابدالی کو دے دیا۔۔
ایک اور روایت کے مطابق جب احمد شاہ ابدالی کوقوچان خراسان میں نادر شاہ پر قاتلانہ حملے کی خبر ملی اور وہ موقعہ واردات پر پہنچا تو اسے نادر شاہ کی سربریدہ لاش ملی اس نے نادر شاہ کی انگلی سے شاہی مہر والی انگوٹھی اتاری اس کے بازو بند کے ساتھ بندھا کوہ نور ہیرا اتارا اور اپنی فوج کے ساتھ قندھار لوٹ آیا ۔۔
یہ ہیرا 1813ء تک ابدالی خاندان کے پاس رہا ۔۔
٭٭٭٭٭٭
کوہ نور . جس کی قیمت صرف طاقت ؛
احمد شاہ ابدالی کی موت کے بعد کو ہ نور اس کے بیٹے شاہ تیمور اور اس کے بعد احمد شاہ ابدالی کے پوتے شاہ شجاع والیٔ قندھار کے پاس رہا جب اس کے مخالفین نے اسے تخت سے معزول کر دیا تو وہ بھاگ کر ہندوستان آیا تو یہ ہیرا اس کے ساتھ تھا، یہاں مہاراجہ رنجیت سنگھ نے اسے پناہ دی اور کھوئی ہوئی حکومت کی بحالی کا وعدہ کیا اس دوران مہاراجا کو کوہ نور ہیرے کے بارے علم ہوا۔ رنجیت سنگھ نے یہ ہیرا شاہ شجاع سے طلب کیا مگر شاہ نے جواب دیا کہ اس ہیرے کو قرض کے عوض کابل کے تاجروں کے پاس بطور رہن رکھوا چکا ہے اس پر مہاراجا غضب ناک ہو گیا اس نے شاہ شجاع کے خاندان کو اندرون لاہور مبارک حویلی میں سخت پہرے میں رکھا (گرمی کا موسم تھا مئی کے آخری ایام تھے) ان کا کھانا پینا بند کروا دیا بھوک اور پیاس سے معصوم بچوں کا رورو کر برا حال ہو گیا تین دن کی ناقابل برداشت ذلت اور سختیوں سے تنگ آ کر شاہ شجاع نے ہیرا رنجیت سنگھ کے حوالے کرنے کا فیصلہ کیا اور شرط عائد کی کہ وہ کوہ نور ہیرا خود مہاراجا کے حوالے کرے گا
رنجیت سنگھ یہ پیغام سن کر سب کچھ چھوڑ چھاڑ کر بھاگتا ہوا فوراً شاہ شجاع کے پاس پہنچا اس نے یہ ہیرا اپنی کمر سے باندھ رکھا تھا
اور اسے کھول کر رنجیت سنگھ کے حوالے کر دیا
رنجیت سنگھ نے پوچھا:- “اس کی قیمت کیا ہوگی؟ شاہ شجاع نے جواب دیا :- “ طاقت! جس کے ذریعے ہر بادشاہ نے اسے حاصل کیا میرے آبا و اجداد نے اسے حاصل کیا اور اب مجھ سے آپ طاقت کے ذریعے حاصل کر رہے ہیں کل کوئی اور طاقت کے ذریعے آپ سے حاصل کر لے گا“۔
یہ ہیرا مہاراجا رنجیت سنگھ کی خلعت کی زینت بنا رہا۔ یہ ایک بازوبند میں جڑا تھا جسے راجہ رنجیت سنگھ کبھی اپنے آپ سے جدا نہ کرتا تھا اور دن رات اسے اپنے بازو سے باندھے رکھتا تھا ۔۔
1839ء میں مہاراجا کا انتقال ہو گیا
اور کوہ نور مختلف ہاتھوں سے ہوتا ہوا بالآخر رنجیت سنگھ کی بیوہ جنداں بائی اور اس کے چھ سالہ بیٹے دلیپ سنگھ کے پاس پہنچا ۔۔۔
٭٭٭٭٭٭٭
خالصہ دربار سے واسکٹ کی جیب تک :
رنجیت سنگھ کی وفات کے بعد خالصہ دربار جانشینی کی کشمکش اور سازشوں کا گڑھ بن گیا۔ اقتدار کی لڑائی نے سلطنت کو اندر سے کمزور کر دیا۔ 1849 ء میں دوسری اینگلو سکھ جنگ میں شکست کے بعد لاہور میں ایک معاہدہ ہوا۔ اس کی تیسری شق میں کوہِ نور کا نام لے کر لکھا گیا کہ جس ہیرے کو مہاراجہ رنجیت سنگھ نے شاہ شجاع الملک سے لیا تھا، اسے اب لاہور کے مہاراجہ ملکۂ انگلستان کے حوالے کریں گے۔ یوں کم سن مہاراجہ دلیپ سنگھ کے ہاتھ سے کوہِ نور بھی نکل گیا۔
انگلینڈ روانہ ہونے سے پہلے ہیرا کچھ عرصہ پنجاب بورڈ کے رکن جان لارنس کی تحویل میں رہا۔ لارنس بعد میں خود ایک قصہ سنایا کرتے تھے۔ ان کے بقول، انہوں نے ہیرے کی ڈبیا واسکٹ کی جیب میں رکھی اور پھر بھول گئے۔ کوئی چھ ہفتے گزرے ہوں گے کہ گورنر جنرل لارڈ ڈلہوزی کا پیغام آیا۔ کوہِ نور ملکہ وکٹوریہ کو بھیجنے کا وقت آ گیا ہے اسے فوراً انگلستان بھیجا جائے ۔۔
پنجاب بورڈ کی نشست میں جان لارنس نے اپنے بھائی سر ہنری لارنس سے کہا، ’’اسے فوراً منگوائیے۔‘‘
ہنری نے جواب دیا، ’’وہ تو تمہارے پاس ہے!‘‘
تب جان لارنس کو اپنی واسکٹ یاد آئی۔ اس نے ملازم کو بلا کر ڈبیا کے بارے میں دریافت کیا۔۔ اس نے بتایا کہ وہ اسے جیب سے نکال کر ایک پرانے ٹین کے صندوق میں رکھ چکا ہے۔ لارنس نے ڈبیا منگوائی اور کہا، ’’کھولو، دیکھو اس میں کیا ہے۔‘‘
ملازم نے کپڑے کی تہیں کھولیں، اندر جھانکا اور بولا، ’’صاحب، اس میں تو بس شیشے کا ایک ٹکڑا ہے۔”
٭٭٭٭٭٭
دونوں ہیرے انگریز انگلینڈ لے گئے ؛
گورنر جنرل لارڈ ڈلہوزی کے حکم کی تعمیل ہوئی۔
کوہِ نور 4 اپریل 1850ء کو بمبئی سے برطانوی بحری جہاز ایچ ایم ایس میڈیا (HMS Medea) پر انگلینڈ بھیجا گیا۔ اسے ایک مقفل صندوق میں رکھا گیاتھا ۔۔ جو ایک بڑی آہنی تجوری کے اندر تھا۔ ہیرے کی نگرانی کی ذمہ داری دو افسران، کیپٹن جے ریمزی اور لیفٹیننٹ کرنل ایف میکسن، کو سونپی گئی۔
یکم جولائی کو جہاز پورٹس ماؤتھ کے قریب اسِپٹ ہیڈ پہنچا۔ اگلے دن دونوں افسر ہیرے کو ریل سے لندن لے گئے اور اسے ایسٹ انڈیا کمپنی کے حوالے کیا۔
اور یوں کوہ نور صدیوں کے سفر کے بعد ہندوستان ، ایران ، افغانستان اور لاہور سے ہوتا ہوا 1850 ء میں لندن پہنچ گیا ۔۔
تین جولائی 1850 ء کو ایسٹ انڈیا کمپنی کے وائس چئیرمین نے لندن کے بکھنگم پیلس میں ایسٹ انڈیا کمپنی کی دو سو پچاسویں سالگرہ کے موقعہ پر اسے ملکہ برطانیہ وکٹوریہ کی خدمت میں پیش کیا گیا
اس ہیرے کو دوبارہ تراشنے کے بعد ملکہ وکٹوریہ نے اسے اپنے بروچ کی زینت بنایا ۔۔ ملکہ وکٹوریہ کے مرنے کے بعد
1902 ء میں یہ کنگ ایڈورڈ ہفتم کی ملکہ الیگزینڈرا کے تاج میں جڑا گیا ۔
ملکہ الیگزینڈرا نے اسے 1902ء میں اپنے شوہر ایڈورڈ ہفتم کی تاج پوشی پر پہنا۔
پھر 22 جون 1911ء میں اسے ان کی بہو ملکہ میری نے کوہ نور والا تاج اپنے شوہر جارج پنجم کی تاج پوشی پر پہنا۔
اور مادر ملکہ میری کی وفات کے بعد 2002ء میں یہ ملکہ برطانیہ ملکہ الزبتھ دوم کے قبضے میں آگیا۔۔ لیکن انہوں نے کبھی اسے نہیں پہنا ۔۔
کوہِ نور والا تاج آخری بار 2 جون 1953 ء کو ملکہ مادر نے اپنی بیٹی ملکہ الزبتھ دوم کی تاج پوشی کے دن پہنا تھا ۔
2002 ء میں ملکہ مادر کی آخری رسومات کے دوران یہ تاج ان کے تابوت پر رکھا گیا تھا۔
آجکل یہ ہیرا اور تاج جیول ہاؤس لندن ٹاور میں رکھا گیا ہے
یہ ہیرا آج بھی انمول ہے اور آج تک کوئی اس کی قیمت نہیں لگا سکا
کوہ نور پر ایران افغانستان پاکستان اور انڈیا کی حکومتوں کا دعویٰ ہے جو برطانوی سرکار سختی سے مسترد کرتی ہے
شہزادی بمباں سدر لینڈ راجہ رنجیت سنگھ کی پوتی اور راجہ دلیپ سنگھ کی بیٹی تھی اور اس خاندان کی آخری چشم وچراغ تھی
اس نے اپنی زندگی کے آخری ایام لاہور میں گزارے اور 10 مارچ 1957ء کو لاہور میں ہی فوت ہوئی اور گلبرگ کے گورا قبرستان میں دفن ہے
اس نے ایک دفعہ انٹرویو دیتے ہوئے کہا تھا کہ
“ وہ دونوں ہیرے ( راجہ دلیپ سنگھ اور کوہ نور ) انگریز اپنے ساتھ انگلینڈ لے گئے
گیارہ سالہ راجہ کو اس کی ماں سے جدا کر دیا اسے عیسائی بنا دیا وہ ساری عمر اپنے وطن اور اپنی ماں کو یاد کرتا رہا اور وہیں مر گیا لیکن اسے نہ ماں ملی اور نہ وطن واپس آنے کی اجازت
کوہ نور کو انہوں نے ملکہ برطانیہ کے تاج میں سجا دیا تاکہ کوئی اس کی واپسی کا مطالبہ کرنے کی جراَت نہ کرسکے “
٭٭٭٭٭٭
لندن کے شیشے میں سجی لاہور کی یاد ؛
میں نے اڑتیس پاؤنڈ کا ٹکٹ خریدا ۔۔صرف کوہ نور کا دیدار کر نے کے لئے ۔۔
لندن ٹاور کے جیول ہاؤس میں داخل ہوا ۔۔ تو بار بار ایک ہی خیال ذہن میں گونج رہا تھا کہ بعض ناموں سے ہماری شناسائی، ان کو دیکھنے سے بہت پہلے ہو جاتی ہے۔ کوہِ نور بھی میرے لیے ایسا ہی ایک نام تھا۔ بچپن سے اس کے بارے میں سنا تھا بہت پڑھا تھا ۔۔ کبھی کسی بادشاہ کی داستان میں سنا، کبھی کسی حکمران کی شکست کے قصے میں پڑھا ۔ اس کے بارے میں بے شمار روایات سن رکھی تھیں ۔۔۔
اب دل میں عجیب وغریب خیالات بسائے اسے دیکھنے کے لیے میں لندن کے ایک قلعے کے اندر، شاہی خزانے کی طرف جا رہا تھا۔
راہدری میں کھڑی ایک خوش وضع سمارٹ گوری سے کوہ نور کا پوچھا جو غالباً راہنمائی کے لئے ہی وہاں کھڑی تھی اس نے غور سے مجھے دیکھا اور سامنے کمرے کی طرف اشارہ کرتے ہوئے کہا کہ وہ سامنے ٹریژری ہے وہیں کوہ نور رکھا ہے میں اس کمرے کی طرف بڑھ گیاجس طرف اس نے اشارہ کیا تھا لیکن ٹریژری سے پہلے ایک اور کمرہ تھا کوہِ نور کی تاریخ والا کمرہ ۔ کمرہ جو کوہِ نور کی داستان سنانے کے لیے مخصوص تھا۔ جس میں بڑے خوبصورت انداز میں ہیرے کی تاریخ لکھی تھی ۔۔
شیشے کے شوکیس کے پیچھے ہیرے کی دو نقلیں رکھی تھیں۔ ایک میں اس کی پرانی تراش دکھائی گئی تھی، جب انگریز اسے ہندوستان سے لے کر آئے تھے اوردوسری وہ نقل تھی جو انگلستان پہنچنے کے بعد اسے دی گئی۔
ان دونوں نقلوں کے سامنے مجھے ولیم ڈیلرمپل اور انیتا آنند کی کتاب Koh-i-Noor: The History of the World’s Most Infamous Diamond یاد آئی۔ اس کتاب میں ہیرے کا سفر مغلوں کے شاہی خزانے سے شروع ہو کر ایران، افغانستان اور لاہور سے گزرتا ہوا لندن پہنچتا ہے۔
میں کچھ دیر دونوں کو دیکھتا رہا۔ ایک ہی پتھر کی دو صورتیں ۔۔ ایک بڑی اور ایک چھوٹی اور ان کے بیچ لاہور سے لندن تک کی پوری مسافت سمٹ آئی تھی۔ لیکن یہ محض بحری جہاز کے سفر کی داستان نہیں تھی انہی دو پتھروں کے درمیان ایک سلطنت کے زوال اور دوسری کے عروج کی داستان بھی پڑی تھی۔
اگلا دروازہ شاہی خزانے کا تھا۔ ٹریژری ۔۔ جس میں شیشے کی الماریوں کے اندر مملکت انگلستان کے تاج اور جواہرات سجے تھے ۔ تاج برطانیہ کا غرور اس کا فخر اور اُن کے سامنے ایک بیلٹ چل رہی تھی ۔ جس پر سیاح کھڑے تھے ۔۔ میں بھی اُس پر کھڑا ہو گیا۔ ایک ایک کر کے سارے تاج، بازوبند ۔۔ بندے ۔۔ بروچ اور ہار نگاہ کے سامنے آنے لگے۔ اور گزرتے رہے ۔۔ہر نگینے کی اپنی چمک تھی۔ ہر ہیرے کی اپنی کہانی ۔۔ اور شاید ان میں سے ایک بھی ان کا اپنا نہیں تھا ۔۔ سب کے سب ان محکوموں کی ملکیت تھے جن پر تاج انگلستان نے صدیوں حکومت کی تھی ۔۔ لیکن میری نظر تو صرف کوہ نور کی متلاشی تھی ۔۔
پھر مادر ملکہ کا تاج سامنے آیا۔ شیشے کے اُس پار، تاج کے اگلے اوپری حصے میں، دوسرے ہیروں کے بیچوں بیچ، وہ یوں جڑا تھا جیسے ہیروں کا راجہ ہو اور میں جیسے سانس لینا بھول گیا ۔۔
جس نام کو برسوں تاریخ کے اوراق میں پڑھا تھا، جس کی ہزاروں تصویریں دیکھی تھیں ۔ وہ سامنے تھا ۔۔ اُسے پہچاننے کے لیے میرے پاس چند لمحے تھے۔ میں نے اُسے فوراً پہچان لیا۔ لگا جیسے میرا اور اُس کا کوئی بہت پرانا رشتہ ہو۔ اُس کی تراش خراش اس سے امڈتی نیلگوں چمک میری نگاہ کو خیرہ کرنے لگی اس میں کچھ ایسا تھا کہ میری نظر بس اسی پر ٹھہر گئی تھی ۔۔ اُس لمحے مجھے نادر شاہ کا خیال آیا۔ میرا حال اس سے مختلف نہیں تھا یقیناً وہ بھی اسی طرح بے خود ہو گیا ہو گا۔ جب اس نے پہلی بار اسے دیکھا ہوگا ۔
میں ابھی اُسے جی بھر کر دیکھ بھی نہ پایا تھا کہ چلتی ہوئی پٹی مجھے اُس سے دور لے گئی۔
مجھے دس برس کا دلیپ سنگھ یاد آیا۔ شہزادی بمباں کے انٹرویو کے الفاظ کانوں میں گونجنے لگے ۔۔ معاہدۂ لاہور کی وہ شق نگاہوں کے سامنے آ گئی جس کے تحت کوہِ نور ملکہ وکٹوریہ کے حوالے کیا جانا تھا۔
شہزادی بمباں سچ کہتی تھی۔ جس عمر میں بچے اپنے ہمیشہ کے لئے بچھڑنے والے باپ کی چھوڑی ہوئی معمولی سی چیز بھی سنبھال کر رکھتے ہیں ۔۔ اُس عمر میں دلیپ سنگھ کے سامنے اپنے باپ کے خزانے کی سب سے مشہور نشانی سے دست بردار ہونے کی شرط رکھ دی گئی تھی۔ جو اسے پوری کرنی پڑی ۔۔
لیکن انگریز اتنا ظالم تھا کہ صرف باپ کی نشانی نہیں چھینی ۔۔ دونوں کو انگلینڈ لے گیا ۔۔ہمیشہ کے لئے ۔ ہیرے کو بھی اور اس کے مالک کو بھی ۔ ہیرا اس زمین سے جدا ہو گیا جہاں وہ پیدا ہواتھا اور دس سالہ دلیپ سنگھ ہمیشہ کے لئے اپنی اس ماں سے جسے اس نے جنم دیا تھا ۔
لاہور کے خزانے کا ہیرا لندن میں تھا اور پنجاب کا آخری مہاراجہ اپنے وطن سے دور۔
دل چاہا کہ اُس کی ایک تصویر لے لوں، حالاں کہ سامنے جلی حروف میں تصویر کشی کی ممانعت لکھی تھی۔
ابھی یہ خیال دل میں آیا ہی تھا کہ قریب کھڑے گارڈ کی زوردار آواز کمرے میں گونجی۔ اُس نے آگے بڑھ کر چند قدم دور کھڑے ایک سردار جی کے ہاتھ سے موبائل چھین لیا جو اس کی فوٹو لینے کی کوشش کر رہاتھا اور اسے بازو سے پکڑ کر باہر لے گیا۔
مجھے اُس گارڈ کی درشتگی پر حیرت ہوئی۔
گورا اتنا بدتمیز ۔۔ بے لحاظ اور بد تہذیب ہوتا نہیں ہے لیکن پتہ نہیں کیوں وہ کوہ نور کے معاملے میں اتنا حساس کیوں تھا ۔۔ ایک لمحے کو خیال آیا کہ شاید سردار جی نے کوہِ نور کی تصویر لینے کی کوشش میں اس کی کسی دکھتی رگ پر ہاتھ رکھ دیا تھا۔
پٹی چلتی رہی اب دوسرے تاج دوسرے جواہرات میری نگاہوں کے سامنے سے گزرنے لگے تھے ۔۔ لیکن مجھے ان میں کوئی دلچسپی نہیں تھی ۔۔میری نگاہیں بس اسی کی متلاشی تھیں ۔۔میں نے گردن موڑ کر ایک بار پھر اس شو کیس کی طرف دیکھا۔ جس کے پیچھے کوہ نور والا تاج رکھا تھا لیکن وہ مجھے پھر نظر نہ آیا ۔۔ آنکھوں کی پیاس ابھی بجھی بھی نہ تھی کہ چلتی ہوئی بیلٹ مجھے اُس سے دور لے گئی. آج افغانستان، پاکستان، ایران اور ہندوستان، سب کوہِ نور پر دعویٰ کرتے ہیں۔ ہر ایک کے پاس اُس کی داستان کا اپنا ورق ہے۔ لیکن کوہِ نور کو تو ہمیشہ سے طاقت پسند تھی، اور آج بھی وہ طاقتور کی گود میں بیٹھا ہے۔جیول ہاؤس سے باہر نکلا تو میرے کانوں میں وہ الفاظ گونج رہے تھے جو روایت کے مطابق شاہ شجاع نے بے بسی کے عالم میں مہاراجہ رنجیت سنگھ سے کہے تھے۔
’’اس ہیرے کی قیمت صرف طاقت ہے۔ جو طاقتور ہو، وہی کوہِ نور کا مالک بنتا ہے۔‘‘
اب یہ میرا اللہ ہی بہتر جانتا ہے کہ اہلِ برطانیہ سے یہ ہیرا کون چھینے گا۔لیکن چھینے گا ضرور۔کیونکہ طاقت کسی ایک کی وفادار نہیں ہوتی ہمیشہ اپنا گھر بدلتی ہے ۔۔



تبصرہ لکھیے