9 نومبر یومِ اقبال ہے۔ علامہ اقبال وہ معزز ہستی ہیں جن کی ستائش جی بھر کر کی جاتی ہے اور دھڑکتے دلوں والے محبانِ اقبال انہیں ولی کا درجہ دیتے ہیں۔ کئی لوگ عقیدت و محبت میں آ کر انہیں پیرِ رومی کی طرز پر “مرشدِ لاہوری” کے نام سے پکارتے ہیں۔ اقبال سے محبت کرنے والوں کی فہرست طویل ہے۔ زمانہ جتنی مرضی کروٹیں بدل لے، علامہ اقبال کا اقبال شہرت کے لحاظ سے ہمیشہ محوِ پرواز ہی رہا ہے۔
علامہ اقبال سے محبت کرنے والوں میں رمضان عطائی جیسے رند بھی تھے، جو ان کی قبر پر مجاور بن کر بیٹھ گئے اور والہانہ عقیدت کا اظہار کرتے رہے۔ کئی مشائخ، علماء اور اساتذہ اقبال کے اشعار پڑھ پڑھ کر اپنی عاقبت کے لیے ضیاء کا اہتمام کرتے ہیں۔ واعظین کے خطبوں کی تکمیل، عاشقوں کے عشق کی پختگی اور فلاسفروں کی ذہنی آسودگی ان کے کلام میں مضمر ہے۔
اقبال کی فکر کا نمایاں عنصر حبِ رسولِ محتشم ہے۔ یہی ان کی فکر کی اساس ہے اور اسی پر ان کے کلام میں حرارت اور روشنی نظر آتی ہے۔ اقبال کے ہاں تحرک اور جدوجہد کا درس بھی ملتا ہے۔
لیکن افسوس اس بات کا ہے کہ ان کے اشعار کے پردے میں ان کا فلسفہ چھپ گیا ہے۔ ان کی کتاب “تشکیلِ جدید الٰہیاتِ اسلامیہ” ہنوز تشریح طلب ہے۔ اس کی بے شمار شرحیں لکھی گئی ہیں۔ جملہ معترضہ کے طور پر نذیر نیازی، خلیفہ عبدالحکیم، جاوید اقبال اور ڈاکٹر عثمان نے اپنے تئیں کوشش کی کہ ان کے خطبات کی تشریح و توضیح کی جائے۔ کسی حد تک وہ کامیاب بھی رہے، لیکن ابھی محبانِ اقبال کے سامنے کئی عقدے وا ہونا باقی ہیں۔ فکرِ اقبال کو سمجھنے کے لیے یہ کتابیں بہت زیادہ معاون ثابت ہو سکتی ہیں۔
اس کے علاوہ موجودہ دور میں علامہ اقبال کا فارسی کلام بھی تقریباً ناپید ہو رہا ہے۔ اس کا ازسرِ نو جائزہ لینا ہوگا۔ اگر اس کلام کی قدر و منزلت کا اندازہ لگانا ہو تو ہمیں ایران میں علامہ صاحب کے فارسی کلام پر ہونے والے کام کا جائزہ لینا ہوگا۔
علامہ اقبال سے عقیدت رکھنے والوں کے ساتھ ساتھ کچھ لوگ ان سے شدید نفرت بھی کرتے ہیں۔ ان کا مؤقف یہ ہے کہ اقبال خودی اور شاہین کی خودداری کا درس دینے والے تھے مگر عملی زندگی میں متحرک نہیں تھے اور ناکام بھی تھے۔
کہا جاتا ہے کہ علامہ صاحب خود نوابِ بھوپال سے وظیفہ حاصل کرتے تھے اور ان کے عائلی معاملات بھی دگرگوں تھے۔ اس کی بنیاد وہ ان کے بیٹے جسٹس جاوید اقبال کی کتابوں “اپنا گریبان چاک” اور “زندہ رود” کو بناتے ہیں، جن میں انہوں نے بغیر کسی لگی لپٹی کے اپنے والد کی نجی زندگی سے پردہ اٹھایا ہے۔ عطیہ فیضی کے نام خطوط کو بھی موضوع بنا کر انہیں ہدفِ تنقید بنایا جاتا ہے۔
میری گزارش یہ ہے کہ دونوں طبقات افراط و تفریط کا شکار ہیں، کیونکہ علامہ اقبال انسان تھے، پیغمبر نہیں تھے۔ گو کہ یہ مان لینے میں کوئی حرج نہیں کہ علامہ صاحب عملی زندگی میں متحرک نہیں تھے، تو کیا حرج ہے؟ اس وقت کے شعراء اور فلاسفہ پر نظر دوڑائیں تو کون متحرک تھا؟ بڑے بڑے نام اپنی عملی زندگی میں تقریباً ناکام ہی نظر آتے ہیں۔
عشق کرنا بھی کوئی گناہ نہیں۔ اگر محبت تھی تو پاکیزگی بھی بدرجہ اتم موجود تھی۔ رہی بات نوابِ بھوپال والی تو علامہ صاحب کا وہ عقیدت مند تھا؛ اگر وہ محبت سے کچھ خدمت کر دیتا تھا تو اس میں کوئی حرج نہیں۔
یہ تو طے ہے کہ علامہ اقبال کے فکر و فلسفے نے کئی نوجوانوں کی زندگیاں بدل دیں۔ ان کے ہاں انقلاب اور محبتِ رسول کی فراوانی موجزن نظر آتی ہے۔ اقبال کی فکری پرتو نے ڈاکٹر علی شریعتی کے توسط سے انقلابِ ایران کی بنیاد رکھی۔
آج کلامِ اقبال یا فلسفۂ اقبال کو تعصب کی عینک اتار کر دیکھا جائے تو لطف دوبالا ہو جاتا ہے۔ افسوس کہ آج اقبال دشمنی ایک فیشن بن چکا ہے، اور ہر وہ شخص جو “روشن خیالی” کے گھوڑے پر سوار ہوتا ہے، پہلا حملہ اقبال پر ہی کرتا ہے۔ علامہ اقبال کی وجہ سے کئی نسلیں سنور گئیں۔
لیکن مقامِ لطف یہ ہے کہ اقبال دشمنی کے سیلاب کے باوجود اقبال کی محبت کا جادو سر چڑھ کر بولتا ہے، کیونکہ کوئی بھی دانا شخص اقبال کے کلام کے بغیر اپنی گفتگو مکمل نہیں کر سکتا۔
افسوس کہ حکومت بھی اقبال دشمنی میں اپنا کردار ادا کر رہی ہے۔ مزارِ اقبال کو عامۃ الناس کے لیے بند کرنا اقبال دشمنی نہیں تو اور کیا ہے؟ یومِ اقبال پر چھٹی بند کرنا بھی ایک طرح کی ناقدری ہے۔
بہرحال علامہ اقبال ایک عاشقِ رسول، فلسفی اور شاعر تھے۔ ان کی فکر و فلسفہ کئی زمانوں کو روشنی عطا کرتا رہے گا۔
خدایا! رحم کند ایں عاشقانِ پاک طینت را۔
علامہ اقبال کیوں نہ لوگوں کے دلوں میں زندہ رہیں، کیونکہ وہ زندگی کا راز پا چکے تھے:
در دلِ مسلم مقامِ مصطفیٰ است
آبروئے ما از نامِ مصطفیٰ است
تبصرہ لکھیے