ہوم << اسلام اور بدھ مت کا تعلق، ایک تاریخی جائزہ - دائود ظفر ندیم

اسلام اور بدھ مت کا تعلق، ایک تاریخی جائزہ - دائود ظفر ندیم

دائود ظفر ندیم اس مضمون سے پہلے ایک وضاحت کردوں کہ یہ ایک خالص علمی یا تحقیقی مضمون نہیں ہے بلکہ یہ میرے نقطہ نظر کی عکاسی کرتا ہے۔ اس امر کا اعتراف ہے کہ یہ موضوع ایک گہری تحقیق کا تقاضا کرتا ہے اور یہ اہل علم کا فرض ہے کہ وہ اس علمی تحقیقی کاوش میں اپنا حصہ ڈالیں۔
بعض محققین اسلام کو ایک سامی مذہب کے طور پر پیش کرتے ہیں مگر اسلام اپنے آپ کو ایک ایسی آفاقی سچائی کے طور پر پیش کرتا ہے جو صرف بنی اسرائیل کے سلسلے سے نہیں جڑا ہوا بلکہ یہ انسانی ارتقا کے عالمگیر سلسلے سے جڑا ہوا ہے اور یہ ان تمام رسولوں اور پیغمبروں کی سچائی کی تصدیق کرتا ہے جو سامی مذاہب کے علاوہ بھی دوسری اقوام اور دوسرے خطوں میں تشریف لائے اور انھوں نے انسانوں تک اللہ کا پیغام پہنچایا۔
بدھ مت ایک اہم مذہب اور فلسفہ حیات ہے۔ خلافتِ بنو امیہ (661ء تا 750ء) کا دور عرب ملوکیت کی توسیع کا دور تھا۔ سارے مشرق وسطی میں بنوامیہ کی حکومت تھی۔ آٹھویں صدی کی ابتدا میں عرب جرنیل محمد بن قاسم نے آج کے جنوبی پاکستان میں واقع بودھی اکثریت کے علاقہ سندھ کو فتح کیا۔ وہاں کے ایک بڑے شہر برہمن آباد کے ہندوئوں اور بدھ مت کے پیروئوں نے درخواست کی کہ ان کی مذہبی آزادی برقرار رکھی جائے اور انہیں اپنے مندروں کی تعمیرِ نو کی اجازت دی جائے۔ محمد بن قاسم نے گورنر حجاج بن یوسف سے مشورہ کیا جس نے مسلمان علما سے پوچھا۔ مسلمان علما نے فیصلہ میں، جسے بعد میں ”برہمن آباد بندوبست“ کہا گیا، بدھ مت کے پیروکاروں (اور ہندوئوں) کو اہلِ کتاب قرار دے دیا۔
اہل کتاب سے مراد ایسے مذاہب ہیں جو اللہ کے کسی رسول اور اللہ کی نازل کردہ کتاب پر ایمان رکھتے ہیں۔ اہل اسلام کو جب بدھ مت کے پیروکاروں سے معاملہ کرنا پڑا تو انہیں بھی وہی حقوق اور حیثیت دے دی گئی جو یہود و نصاریٰ کو ان کی حکومت میں حاصل تھی۔ انہیں اپنے مذہب پر عمل کرنے کی آزادی تھی بشرطیکہ ان کے عام لوگ جزیہ ادا کرتے رہیں۔ بدھ مت کے پیروکاروں کو اہلِ کتاب قرار دینے کا ضمنی مطلب یہ تھا کہ وہ ”نجات یافتہ“ گروہوں میں شمار ہوتے تھے، قران مجید کی مندرجہ ذیل آیت کے مطابق (سورۃ بقرہ، آیت 62) ”جو کوئی مسلمان اور یہودی اور نصرانی اور صابی اللہ اور قیامت کے دن پر ایمان لائے اور اچھے کام بھی کرے تو ان کا اجر ان کے رب کے ہاں موجود ہے اور ان پر نہ کچھ خوف ہو گا اور نہ وہ غمگین ہوں گے۔“
اموی گورنر حجاج بن یوسف نے حکم جاری کیا ”بودھی اور دوسرے مندر تعمیر کرنے اور مذہبی امور میں رواداری کے لیے برہمن آباد کے سرداروں کی درخواست منصفانہ اور معقول ہے۔ میں نہیں جانتا کہ سوائے ٹیکس وصول کرنے کے ہمارے اُن کے اوپر اور کیا حقوق ہیں۔ انہوں نے ہماری اطاعت قبول کر لی ہے اور خلیفہ کو جزیہ دینے کا وعدہ کیا ہے۔ کیونکہ وہ اب ذمّی بن گئے ہیں اس لیے ہمیں کوئی حق نہیں کہ ہم ان کی جان و مال میں مداخلت کریں۔ انہیں اجازت دی جائے کہ وہ اپنے مذہب کی پیروی کریں اور اس امر سے انہیں کوئی منع نہ کرے۔“
بعد ازاں بدھ مت کے پیروئوں کو اپنے معبد اور خانقاہیں دوبارہ تعمیر کرنے کی اجازت مل گئی اور ساتھ ہی انہیں، جزیہ ادا کرنے کی شرط پر، ذمی (یعنی غیر مسلم محفوظ اشخاص) کا رتبہ مل گیا۔ اموی خلفاء اور اس کے بعد بغداد سے حکومت کرنے والے عباسی خلفاء (550ء تا 1258ء) اور ان کے بعد کے ہندوستان کے مسلمان حکمرانوں نے اصولی طور پر یہی پالیسی اپنائی رکھی۔ اس کا نتیجہ یہ تھا کہ بدھ مت کو مشرکانہ مذاہب میں نہیں گردانا گیا جن کے پیرووں کو مندرجہ بالا استحقاق حاصل نہیں تھے۔
بودھی اور ہندو مندروں کی تعمیرِ نو کے بعد عرب گورنروں نے وہاں آنے والے زائرین پر ٹیکس عائد کر دیا تھا۔ مسلمان علماء نے نہ تو اس زمانے میں اور نہ ہی بعد میں اس پالیسی کو بنیادی اسلامی عقائد کے خلاف سمجھا۔ بدھ مت کے پیروکاروں کو قانونی حیثیت، سیاسی حمایت اور مذہبی رواداری کے سلوک کا ملنا اس امر پر دلالت کرتا تھا کہ بدھ مت کی روحانی راہ اور اخلاقی قواعد ایک بالاتر قدرت یعنی خدا کی مستند وحی سے حاصل شدہ تھے۔ آٹھویں صدی عیسوی میں فارسی تاریخ دان الکرمانی نے بلخ، افغانستان میں واقع نووہار خانقاہ کے مفصل حالات لکھے اور کچھ بودھی روایات کو اسلام میں ان کی مشابہ اصطلاحات میں بیان کیا۔
دوسرے عباسی خلیفہ المنصور (دورِ خلافت: 754 تا 775عیسوی) نے اپنی سلطنت کے نئے دارالخلافت کی تعمیر کے لیے ہندوستانی ماہرِ تعمیرات ملازم رکھے۔ اس نے اس نئے شہر کا نام بغداد رکھا جو کہ ایک سنسکرت نام ہے جس کا معنی ہے ”عطیہِ خداوندی“۔ شہر کے منصوبہ کے مطابق خلیفہ نے بیت الحکمت تعمیر کروایا جس کا مقصد یہ تھا کہ یونانی اور ہندوستانی ثقافتی دنیاؤں کے ادب کا مطالعہ اور ترجمہ کیا جائے بالخصوص سائنسی موضوعات پر۔ اگلے عباسی حکمران، خلیفہ المہدی (دورِ خلافت: 775 تا 785عیسوی) نے بیت الحکمت میں کام کرنے کے لیے برِصغیر اور افغانستان سے کئی بودھی راہبوں کو مدعو کیا۔ اس نے اُن کے ذمہ، بنیادی طور پر طِب اور علمِ نجوم کی کُتب کا سنسکرت سے عربی میں ترجمہ کا کام لگایا۔
پانچویں عباسی خلیفہ ہارون الرشید (دورِ خلافت: 786 تا 809 عیسوی) کا وزیر یحیی بن خالد بن برمک تھا جو کہ بلخ کی نووہار خانقاہ کے بودھی انتظامی سربراہوں میں سے ایک کا مسلمان پوتا تھا۔ اگرچہ اس وقت بغداد کے بیت الحکمت میں بودھی عالم پہلے سے موجود تھے لیکن یحیی نے مزید بودھی عالموں کو بھی مدعو کیا، خاص طور پر کشمیر سے۔ ان کی توجہ کا مرکز بودھی طبی متون تھے، خاص طور پر رویگپت کی کتاب ”کامیابیاں کا سمندر“ (سنسکرت میں: سدھاسار)۔
یہ قیاس کیا جا سکتا ہے کہ اس زمانہ میں بودھی اور مسلمان عالموں کے درمیان مذہبی اعتقادات پر بحثیں ہوئی ہوں گی لیکن چونکہ بیت الحکمت کے علما کی مرکزی دلچسپی یونانی فلسفہ میں تھی اس لیے ان کا بدھ مت کا بہت گہرا مطالعہ نہیں تھا۔ تاہم ابن ندیم کی دسویں صدی عیسوی کے آخر کی کتاب ”الفہرست“ میں کئی بودھی مقالوں کا ذکر ملتا ہے جنہیں اس دور میں عربی زبان میں ترجمہ کیا گیا تھا، مثلاً ”بدھ کی کتاب“ (عربی میں: کتاب البُد)۔ یہ دو مختلف سنسکرت کتابوں سے ماخوذ تھی: ”گزشتہ زندگی تاریخ کی ایک مالا“ (سنسکرت میں: جتک مالا) اور اشواگھوش کی ”بدھ کے اعمال“ (سنسکرت میں: بدھا کاریتا)
مشرقی افغانستان اور شمال مغربی پاکستان کی آبادی میں ہندوئوں اور بودھیوں کی ایک بڑی تعداد شامل تھی۔ 876 تا 976 عیسوی، یہ سارا علاقہ ہندو شاہی حکومت کے ماتحت تھا۔ عباسیوں کے باجگزار، سُنّی مسلمان غزنویوں نے افغان حصہ کو 976 عیسوی تک فتح کر لیا تھا اور پاکستانی طرف بھی 1010 عیسوی میں انہوں نے ہندوشاہی حکمرانوں کا تختہ لپیٹ دیا۔ غزنوی حکمران سابقہ ہندو شاہی علاقوں میں ہندو مت اور بدھ مت کے لیے رواداری کے قائل تھے۔ البیرونی (976 تا 1048عیسوی) ، ایک ایرانی عالم اور ادیب جو کہ غزنوی دربار میں ملازم تھا، لکھتا ہے کہ دسویں صدی عیسوی کے اختتام پر آج کے مشرقی افغانستان میں واقع بودھی خانقاہیں بشمول نووہار خانقاہ کے، قائم و دائم تھیں۔ البیرونی، محمود غزنوی کے ابتدائی گیارھویں صدی عیسوی میں ہندوستان پر حملے میں اس کے ہمراہ تھا۔ اس نے ہندوستان میں جو کچھ سیکھا اس پر مبنی ایک کتاب ”کتاب الہند“ تحریر کی۔ اس میں اُس نے بنیادی بودھی روایات اور اعتقادات کی تفصیل بتائی اور کہا کہ ہندوستانی مہاتما بدھ کو ایک پیغمبر مانتے ہیں۔ اس سے یہ واضح ہوتا ہے کہ وہ جانتا تھا کہ بدھ مت کے پیرو شاکیہ منی کو اپنا خدا نہیں مانتے۔ سلجوق خاندان کے دورِ حکومت میں الشہرستانی نے اپنی بارھویں صدی عیسوی کی ”کتاب الملل و النحل“ یعنی مذاہب اور فرقوں کی کتاب میں بھی بدھ مت کے بارہ میں البیرونی کی دی گئی تفصیلات دہرائیں۔
غزنوی دور میں ہمیں اسلامی ادب میں بدھ مت کے اثر کی مزید مثالیں ملتی ہیں۔ مثلاً نابیناؤں کے ایک گروہ کی کہانی جس میں ہر شخص ایک ہاتھی کو مختلف رنگ میں بیان کر رہا تھا اُس کے مختلف اعضا کو ہاتھ لگا کر۔ یہ کہانی ایرانی عالم ابو حامد الغزالی (1058 تا 1111عیسوی) کی تحریروں کے ذریعہ تصوّف میں پہنچی۔ فلسفیانہ شک و شبہ کی حمایت میں الغزالی نے اس تمثال کو یہ دکھانے کے لیے استعمال کیا کہ مسلمان متکلمون حق کا صرف کچھ حصہ جانتے تھے جبکہ مہاتما بدھ نے اسے غیر بودھی مذاہب کی آپس کی بحث کی بے فاعدگی سکھانے کے لیے غیر بودھی مذاہب کے زمرے میں استعمال کیا۔
چھٹا ایلخانی حکمران، غزان خان (دورِ حکومت: 1295 تا 1304 عیسوی) شیعہ صوفی شیخ صدرالدین ابراہیم کے زیرِ اثر مسلمان ہو گیا۔ اس کے باوجود اس نے اپنے وزیر رشید الدین کو حکم دیا کہ وہ ایک عالمگیر تاریخ (عربی میں: جامع التواریخ) مرتب کرے۔ نیز اس نے ہدایت دی کہ اس تاریخ میں ان مختلف قوموں کے اعتقادات بھی شامل ہوں جن سے منگولوں کا سامنا ہوا تھا، بشمول بدھ مت کے۔ پس اس نے اپنے دربار میں کشمیر سے ایک بودھی راہب بکشی کمالشری کو مدعو کیا تاکہ وہ رشید الدین کی اعانت کرے۔ اس اشتراک کا نتیجہ ”بدھ کی زندگی اور تعلیمات“ تھا جو کہ عربی اور فارسی دونوں زبانوں میں ”جامع التواریخ“ کی دوسری جلد کے تیسرے حصہ ”تاریخِ ہند“ میں شامل تھا۔
الکرمانی اور البیرونی کی طرح رشید الدین نے بھی بدھ مت اور اس کی تعلیمات کو مسلمان اصطلاحات میں واضح کیا۔ پس ان نے اُن چھ مذہبی بانیوں کی فہرست دی جنہیں ہندوستانی بطور پیغمبر تسلیم کرتے تھے: تین یزدانی : شِو، وشنو اور برہما اور تین غیر یزدانی: جین مت کے ارہنت، چارواک نظام کے ناستک اور بدھ مت کے شاکیہ منی۔ اس نے دیووں کا ذکر بطور فرشتوں کے کیا اور مارا کا بطور ابلیس یعنی شیطان کے۔ یہ متن چھ سمساری حالتوں کا ذکر بھی کرتا ہے اور کرمی قانونِ علت و معلول کا بھی اور اس امر کا کہ مہاتما بدھ کے الفاظ ”کانگیور“ کے تبتی ترجموں کے مجموعہ میں محفوظ ہیں۔
رشید الدین نے یہ بھی لکھا کہ اس کے زمانہ میں ایران میں گیارہ بودھی متون عربی ترجمہ میں موجود تھے۔ ان میں امیتابھ کی خالص سرزمین کے بارہ میں ”سکھہ کی پاک صاف سرزمین کے ترتیب کی سوتر“، 'آوالوکیت ایشور' یعنی درد مندی کی تجسیم کے بارہ میں ”بُنی ہوئی ٹوکری کی طرح ترتیب کی سوتر“ اور 'مایتریا' یعنی مستقبل کے بدھ اور محبت کی تجسیم کے بارہ میں ”مایتریا کا بیان“ شامل تھے۔
اس کے تقریباً ایک صدی بعد، ابتدائی پندرہویں صدی عیسوی میں حافظِ آبرو نے سمرقند میں تیموری پادشاہ شاہ رُخ کے دربار میں ملازمت کے دوران ”مجمع التواریخ“ مرتب کی۔ اس کتاب کا مہاتما بدھ اور بدھ مت کے بارہ میں حصہ رشیدالدین کی کتاب سے ماخوذ ہے۔
(جاری ہے)
دوسری قسط یہاں ملاحظہ کریں
تیسری قسط یہاں ملاحظہ کریں

Comments

Click here to post a comment

  • ماشاءاللہ بہت اچهی تحریر ہے اللہ سب کو عمل کی اور سمجهنے کی تو فیق دیں اور ادارے میں کام کرنے والے افراد اور لکهنے والوں کو بهی اچهی بات آگے بتانے کا اجر دے

  • کیاکافروں کے مال و متاع اور ترقیوں کے راز ۔۔۔۔کافروں کی عقل اور ان کے بنائے ہوئے نظام کی وجہ سے ہے ؟؟؟
    اور کیا یہ دنیاوی مال و متاع اور ترقیاں حاصل کرنا ہی کامیابی کی علامت ہے ؟؟؟؟
    اوردیہان سے ملاحظہ فرمائیں کہ اللہ رب العزت کے فرمان کے مطابق حقیقی کامیابی کس چیز میں ہے ۔
    اور اس حقیقی کامیابی کو پانے کا راستہ کون سا ہے ۔
    ارشاد باری تعالیٰ ہے ۔(مَّن كَانَ يُرِيدُ الْعَاجِلَةَ عَجَّلْنَا لَهُ فِيهَا مَا نَشَاءُ لِمَن نُّرِيدُ ثُمَّ جَعَلْنَا لَهُ جَهَنَّمَ يَصْلَاهَا مَذْمُومًا مَّدْحُورًاالخ بنی اسرائیل 18 پارہ 15
    (ترجمہ:جو ہے خواہش مند دنیا کے فائدے کا تو جلدی دے دیتے ہیں ہم اسے یہیں ،جو چاہتے ہیں ہم اور جس کو چاہتے ہیں ،پھر ٹہرا رکھا ہے ہم نے اس کے لئے جہنم ،داخل ہوگا وہ اس میں برے حال سے اور راندئہ درگاہ ہوکر )
    اگلی آیت مبارکہ میں ارشاد ہے ( وَمَنْ أَرَادَ الْآخِرَةَ وَسَعَىٰ لَهَا سَعْيَهَا وَهُوَ مُؤْمِنٌ فَأُولَـٰئِكَ كَانَ سَعْيُهُم مَّشْكُورًا )
    بنی اسرائیل 19 پارہ 15
    (ترجمہ :اور جو خواہشمند ہو آخرت کا، اور کوشش کرے اس کے لئے ،جو کوشش ضروری ہے، اور ہو بھی وہ مومن، پس یہ لوگ ہیں کہ ہے ان کی کوشش مقبول )
    اگلی آیت مبارکہ میں ارشاد ہے (كُلًّا نُّمِدُّ هَـٰؤُلَاءِ وَهَـٰؤُلَاءِ مِنْ عَطَاءِ رَبِّكَ ۚ وَمَا كَانَ عَطَاءُ رَبِّكَ مَحْظُورًا)بنی اسرائیل 20 پارہ 15
    (ترجمہ :ہر ایک کو مدد دیتے ہیں ہم ان کو بھی اور اُن کو بھی عطاءمیں سے تیرے رب کی ،اور نہیں ہے عطا ءتیرے رب کی کسی پر بند)
    ابن کثیر رحمتہ اللہ علیہ لکھتے ہیں کہ کچھ ضروری نہیں کہ طالب دنیا کی ہر ایک چاہت پوری ہی ہو ،جس کا جو ارادہ اللہ پورا کرنا چاہے کردے لیکن آخرت میں ایسے لوگ خالی ہاتھ رہ جائیں گے ۔یہ تووہاں جہنم کے گڑھے میں گھرے ہوں گے نہایت برے حال میں ذلت و خواری میں ہوں گے کیوں کہ یہاں انہوں نے یہی کیا تھا ،فانی کو باقی پر دنیا کو آخرت پر ترجیح دی تھی اس لئے وہاں رحمت الٰہی سے دور رہیں۔
    مزید لکھتے ہیں کہ ہاں جو صحیح طریقے سے طالب دارآخرت ہوجائے اور آخرت میں کام آنے والی نیکیاں سنت کے مطابق کرتا رہے اور اس کے دل میں بھی ایمان کی تصدیق اور یقین ہو ،عذاب و ثواب کے وعدے صحیح جانتا ہو ،اللہ اور رسول صلیٰ اللہ علیہ وسلم کو مانتا ہو ،ان کی کوشش قدر دانی سے دیکھی جائے گی نیک بدلہ ملے گا ۔
    مزید لکھتے ہیں کہ ان دونوں قسم کے لوگوں کو ایک وہ جن کا مطلب صرف دنیا ہے دوسرے وہ جو طالب آخرت ہیں ،دونوں قسم کے لوگوں کو ہم بڑھاتے رہتے ہیں جس (چیز)میں بھی وہ (طالب)ہیں ،یہ تیرے رب کی عطاءہے ،وہ ایسا متصرف اور حاکم ہے جو کبھی ظلم نہیں کرتا مستحق سعادت کو سعادت اور مستحق شقادت کو شقادت دے دیتا ہے۔
    ؟؟قرآن پاک پر ایمان رکھنے والے بھائیوں اوردوستوں!
    رب پر ایمان رکھتے ہو ۔۔۔۔رب کے سچے کلام پر ایمان رکھتے ہو۔۔۔۔پھر رب کے سچے کلام پر غور کیوں نہیں کرتے ؟؟
    اللہ تعالیٰ فرماتا ہے کہ دنیا کی طلب رکھنے والے کو دنیا مل جاتی ہے ۔۔۔۔آخرت کی طلب رکھنے والے کو آخرت ملتی ہے ۔
    اللہ تعالیٰ دونوں کو ان کی چاہتوں اور خواہشوں کے مطابق عطاءفرماتا ہے ۔۔۔۔اور اللہ تعالیٰ کی عطاءکسی پر بند نہیں ہے ۔
    کافروں کو دنیاوی عزت ،راحت ،مال و متاع اور ترقیاں اس لئے حاصل ہیں کیوں وہ طالب دنیا ہیں ۔۔۔۔دنیا کی طلب رکھتے ہیں ۔۔۔۔دنیا کی جستجو رکھتے ہیں ۔۔۔۔اس لئے ان کو اللہ تعالیٰ ان کے طلب کے مطابق عطاءفرماتا ہے
    اور جگہ ارشاد باری تعالیٰ ہے ۔(مَن كَانَ يُرِيدُ الْحَيَاةَ الدُّنْيَا وَزِينَتَهَا نُوَفِّ إِلَيْهِمْ أَعْمَالَهُمْ فِيهَا وَهُمْ فِيهَا لَا يُبْخَسُونَ ﴿١٥﴾ أُولَـٰئِكَ الَّذِينَ لَيْسَ لَهُمْ فِي الْآخِرَةِ إِلَّا النَّارُ ۖ وَحَبِطَ مَا صَنَعُوا فِيهَا وَبَاطِلٌ مَّا كَانُوا يَعْمَلُونَ)ھود 15،16 پارہ 12
    (ترجمہ :جو کوئی چاہتا ہے دنیا کی زندگی اور اس کی رونق تو پورا پورادیتے ہیں ہم بدلہ ان کو ان کے اعمال کا اسی دنیا میں اور ان کے ساتھ اس میں ذرا بھی کمی نہیں کی جاتی ،یہی ہیں وہ لوگ کہ نہیں ہے ان کے لئے آخرت میں (کچھ)سوائے جہنم کے اور برباد ہوگیا وہ جو بنایا تھا انہوں نے اس دنیا میں اور ضائع ہوگئے وہ سب ( اعمال )جو وہ کیا کرتے تھے )
    تفسیر معارف القرآن میں مفتی شفیع رحمتہ اللہ علیہ لکھتے ہیں کہ جو شخص (اپنے اعمال خیر سے) محض حیات دنیوی (کی منعفت )اور شہرت حاصل کرنا چاہتا ہے (جیسے شہرت و نیک نامی و جاہ )اور ثواب حاصل کرنے کی اس کی نیت نہ ہو تو اللہ تعالیٰ ان لوگوں کے (ان )اعمال (کی جزائ)ان کو دنیا میں ہی پورے طور پر بھگتا دیتا ہے اور ان کے لئے دنیا میں کوئی کمی نہیں ہوتی ۔یعنی دنیا ہی میں ان کے اعمال کے عوض ان کو نیک نامی اور صحت و فراغ عیش و کثرت اموال و اولاد عنایت کردیا جاتا ہے ۔
    تفسیر مظہری میں ہے کہ مومن اگر چہ دنیا کی فلاح کا بھی خواہش مند ہوتا ہے مگر آخرت کا ارادہ غالب رہتا ہے اس لئے اس کو دنیا میں بقدر ضرورت ہی ملتا ہے اور بڑا معاوضہ آخرت میں پاتا ہے ۔(تفسیر مظہری)
    صحیح مسلم میں بروایت حضرت انس رضی اللہ تعالیٰ عنہ منقول ہے کہ رسول اللہ صلیٰ اللہ علیہ وسلم نے فرمایا کہ اللہ تعالیٰ کسی پر ظلم نہیں کرتے ،مومن جو نیک کام کرتا ہے اُ س کو دنیا میں بھی کچھ بدلہ ملتا ہے اور آخرت میں ثواب ملتا ہے ،اور کافر (چوں کہ آخرت کی فکر ہی نہیں رکھتا اس لئے اُ س کا ) حساب دنیا میں ہی بھگتا دیا جاتا ہے ،اس کے نیک اعمال کے بدلے میں دنیا کی دولت ،عزت ،صحت،راحت اس کو دیدی جاتی ہے یہاں تک کہ جب وہ آخرت میں پہنچتا ہے تو اس کے پاس کچھ نہیں ہوتا جس کا معاوضہ وہاں پائے۔(صحیح مسلم )
    احادیث نبوی صلیٰ اللہ علیہ وسلم پر ایمان رکھنے والے بھائیوں اوردوستوں!نبی کریم صلیٰ اللہ علیہ وسلم پر ایمان رکھتے ہو ۔۔۔۔نبی کریم صلیٰ اللہ علیہ وسلم کی احادیث پر ایمان رکھتے ہو۔۔۔۔پھر اپنے پیارے نبی صلیٰ اللہ علیہ وسلم کی احادیث پر غور کیوں نہیں کرتے ؟؟؟؟
    معارف القرآن میں مفتی محمد شفیع رحمتہ اللہ علیہ لکھتے ہیں کہ ہر عمل کے مقبول اور باعث نجات آخرت ہونے کی پہلی شرط یہ ہے کہ وہ عمل اللہ کے لئے کیا گیا ہو۔۔۔۔اور اللہ تعالیٰ کے لئے کرنا وہ ہی معتبر ہے جو اس کے رسول صلیٰ اللہ علیہ وسلم کے بتائے ہوئے طریقہ پر کیا گیا ہو۔۔۔۔جو شخص اللہ اور اس کے رسول پر ایمان ہی نہیں رکھتا اس کے تمام اعمال و اخلاق ایک بے روح ڈھانچہ کی طرح ہیں۔۔۔۔ جس کی شکل و صورت تو اچھی بھلی ہے مگر روح نہ ہونے کے سبب دار آخرت میں اس کا کوئی وزن اور اثر نہیں ۔۔۔۔البتہ کیوں کہ اُس کے عمل سے دنیا کے لوگوں کو فائدہ پہنچتا ہے اور ظاہری صورت کے اعتبار سے وہ نیک عمل ہے۔۔۔۔ اس لئے اللہ تعالیٰ نے اپنے کمال عدل و انصاف کی بناءپر اس کے عمل کوبھی بالکل ضائع نہیں قرار دیا۔۔۔۔ بلکہ اس کے کرنے والے کے پیش نظر جو مقصد تھا کہ اس دنیا میں اس کی عزت ہو لوگ اس کو سخی اور بڑا آدمی سمجھیں ،دنیا کی دولت ،تندرستی اور راحت نصیب ہو ۔۔۔۔اللہ تعالیٰ اُس کو یہ سب کچھ دنیا میں دے دیتے ہیں ۔۔۔۔اور آخرت کا تصور اور وہاں کی نجات اس کے پیش نظر ہی نہیں تھی ۔۔۔۔اور نہ اس کا بے روح عمل وہاں کی نعمتوں کی قیمت بن سکتا تھا ۔۔۔۔اس لئے ان اعمال کا وہا ں کچھ عوض نہیں ملے گا اور کفر و معصیت کی وجہ سے جہنم میں رہے گا ۔
    میرے بھائیوں اور دوستوں ! یہ راز ہے کافروں کی ترقیوں اور مال و زر اور شہرت کی بہتات کا ۔۔۔۔کافر دنیا میں کوئی بھی اچھا عمل کرتے ہیں ۔۔ ۔۔اور کوئی ایجادات کرتے ہیں ۔۔۔۔جن سے دنیا نفع حاصل کرتی ہے ۔۔۔۔۔ اللہ تعالیٰ ان کے اچھے اعمال کو ضائع نہیں فرماتا ۔۔ ۔ ۔ اور ان کوان کے اچھے اعمال کی وجہ سے دنیاوی فائدے عزت ،شہرت ،مال و متاع عنایت فرماتا ہے ۔