پاکستان کے نوجوانوں کو جدید ٹیکنالوجی، مصنوعی ذہانت (AI) اور کلاؤڈ کمپیوٹنگ کی عالمی معیار کی تعلیم فراہم کرنے کے لیے علی بابا کلاؤڈ (Alibaba Cloud) اور الخدمت فاؤنڈیشن پاکستان کے درمیان اسلام آباد میں مفاہمتی یادداشت پر دستخط کر دیے گئے ہیں، جس کے تحت ‘بنو قابل’ پلیٹ فارم کے ذریعے پاکستان میں خصوصی علی بابا کلاؤڈ ٹریننگ سینٹرز قائم کیے جائیں گے۔
علی بابا کلاؤڈ کی نمائندگی کرتے ہوئے ہینک شاؤ (Mr. Hank Shao) اور الخدمت فاؤنڈیشن پاکستان کی نمائندگی کرتے ہوئے نوید علی بیگ نےمفاہمتی یادداشت پر دستخط کیے۔ یہ شراکت داری علی بابا کلاؤڈ پرائیوٹ لمٹیڈ سنگاپور اور الخدمت فاؤنڈیشن پاکستان کے درمیان عمل میں آئی ہے، جبکہ پاکستان میں علی بابا کلاؤڈ کے مجاز پارٹنر Cognix Solutions Private Limited نے بھی اس منصوبے میں معاونت فراہم کی۔ معاہدے کے مطابق دو خصوصی علی بابا کلاؤڈ ٹریننگ سینٹرز قائم کیے جائیں گے، جن میں ایک کراچی میں بنو قابل انکیوبیشن سینٹر جبکہ دوسرا لاہور میں بنو قابل انوویشن سینٹر میں قائم کیا جائے گا۔
ان مراکز میں نوجوانوں کو مصنوعی ذہانت اور کلاؤڈ کمپیوٹنگ کے جدید کورسز کرائے جائیں گے، جبکہ شرکاء کو بین الاقوامی سطح پر تسلیم شدہ پروفیشنل سرٹیفکیشن پروگرامز تک رسائی بھی حاصل ہوگی۔ اس اشتراک کے تحت فیکلٹی ٹریننگ اور سرٹیفکیشن کا ایک مسلسل پروگرام بھی جاری رکھا جائے گا، جس کے ذریعے انسٹرکٹرز کو عالمی معیار کے مطابق تربیت اور جدید ٹیکنالوجی سے ہم آہنگ ریفریشر ٹریننگ فراہم کی جائے گی۔ معاہدے کے تحت ‘AI for Pakistan’s Future’ کے عنوان سے مشترکہ AI Hackathon بھی باقاعدگی سے منعقد کیا جائے گا، جس میں پاکستانی نوجوان قومی سطح کے مسائل کے حل کے لیے جدید اور عملی ٹیکنالوجیکل آئیڈیاز پیش کریں گے۔ نمایاں کارکردگی دکھانے والی ٹیموں کو خصوصی پذیرائی اور معاونت فراہم کی جائے گی۔
الخدمت فاؤنڈیشن کا بنو قابل پروگرام ملک بھر میں نوجوانوں کو تیز رفتار اور معیاری تعلیم فراہم کرنے والا ایک نمایاں پلیٹ فارم بن چکا ہے، جہاں اب تک 11 لاکھ 50 ہزار سے زائد طلبہ رجسٹر ہو چکے ہیں جبکہ 90 ہزار سے زائد نوجوان مختلف پروگرامز میں کامیابی سے سرٹیفائیڈ ہو چکے ہیں۔ یہ اشتراک غیر تجارتی بنیادوں پر قائم کیا گیا ہے، جس کا مقصد پاکستان کے نوجوانوں کو ڈیجیٹل مہارتوں سے آراستہ کرنا، روزگار کے بہتر مواقع پیدا کرنا اور ملک کی ڈیجیٹل معیشت کو مضبوط بنیاد فراہم کرنا ہے۔
یہ معاہدہ پاکستان میں جدید ٹیکنالوجی، مصنوعی ذہانت اور کلاؤڈ کمپیوٹنگ کے فروغ کی جانب ایک اہم پیش رفت قرار دیا جا رہا ہے، جو نوجوانوں کو مستقبل کے تقاضوں سے ہم آہنگ مہارتیں فراہم کرنے میں معاون ثابت ہوگا۔
تبصرہ لکھیے