وزیراعلیٰ پنجاب عثمان بزدار کے ترجمان شہباز گل نے عہدے سے استعفیٰ دے دیا جبکہ وزیر اعلی کے مشیر محمد عون چوہدری کو ان کے عہدے سے ہٹا دیا گیا ہے۔ صوبائی حکومت کی جانب سے محمد عون چوہدری کی تبدیلی کا نوٹیفکیشن جاری کردیا گیا ہے۔
ذرائع کے مطابق وزیراعلیٰ پنجاب عثمان بزدار کی عمرہ سے واپسی پر صوبائی کابینہ میں مزید تبدیلیاں متوقع ہیں، عوامی فلاح کے تقاضے پورے نہ کرنے والے وزرا ءکو ہٹایا جائے گا۔ اس سے قبل شہباز گل نے آج صبح ٹوئٹر کے ذریعے اہم اعلان کرتے ہوئے کہا تھا کہ وہ کوئی اہم فیصلہ کرنے والے ہیں۔
This morning took an important decision. Inshallah will share with you soon.
— Dr. Shahbaz GiLL (@SHABAZGIL) September 13, 2019
علاوہ ازیں سوشل میڈیا پر ان کے استعفے کے حوالے سے ایک پرچے کا عکس وائرل ہو رہا ہے۔ ذرائع کا مزید بتانا ہے کہ وزیراعظم کے وژن کے مطابق کام نہ کرنے والے مزید وزرا کے خلاف کاروائی کا فیصلہ کیا گیا ہے، کیونکہ بعض وزرا مواقع ملنے کے باوجود تسلی بخش کارکردگی نہیں دکھا سکے ہیں۔ وزیراعلیٰ پنجاب نے وزیر اعظم سے اپنی حالیہ ملاقات میں انہیں تمام تر صورتحال سے آگاہ کیا تھا۔
صوبائی حکومت کی جانب سے جاری کردہ نوٹی فکیشن کے مطابق عون چوہدری کی جگہ آصف محمود کو وزیر اعلیٰ پنجاب کا مشیر تعینات کیا گیا ہے۔ آصف محمود وزیراعلیٰ کے مشیر برائے ہارٹی کلچر اور سیاحت کے طور پر کام کریں گے۔
تبصرہ لکھیے