غالب ہر دور کے ایک بڑے شاعر ہیں۔ ان کی شاعری کا ہر کوئی مدح سرانہ نظر آتا ہے۔ مرزا غالب 1797ء میں اکبر آباد (آگرہ) میں پیدا ہوئے۔ اپنے حالاتِ زندگی کے متعلق انہوں نے خود لکھا ہے:
”میں قوم کا ترکِ سلجوق ہوں، میرا دادا ماوراء النہر سے شاہ عالم ثانی کے دور میں ہندوستان میں آیا۔ سلطنت ضعیف ہو چکی تھی، صرف پچاس گھوڑے اور نشان سے شاہ عالم کا نوکر ہوا۔ میرا باپ عبداللہ قادر بیگ بہادر لکھنؤ جا کر نواب آصف الدولہ کا نوکر ہوا، پھر حیدرآباد جا کر نواب نظام علی خاں کا ملازم ہوا۔ اس کے بعد الور کا رخ کیا اور راجہ بختیار سنگھ کا نوکر ہوا، جو وہاں کسی لڑائی میں مارا گیا۔ نصر اللہ بیگ خان بہادر میرا حقیقی چچا مرہٹوں کی طرف سے اکبر آباد کا صوبہ دار تھا، اس نے مجھے پالا۔ میں آٹھویں رجب 1212ھ میں روبکاری کے واسطے یہاں بھیجا گیا۔ پانچ برس کا تھا جب والد فوت ہوا، آٹھ برس کا تھا جب چچا مر گیا۔ مجھ کو مبدءِ فیاض کے سوا کسی سے تلمیذ نہیں۔ عبدالصمد محض فرضی نام ہے۔“
یہ الفاظ مرزا اسد اللہ خان غالب کے ہیں، جو انہوں نے اپنی خود نوشت میں کہے ہیں۔¹ ،انتخابِ غالب از سید اختر عباس)۔ چچا کے انتقال کے بعد غالب کی پرورش ان کے نانا نے کی۔ غالب پہلے پہل ‘اسد’ تخلص کرتے تھے، بعد میں انہوں نے ‘غالب’ تخلص اپنا لیا۔ نجم الدولہ، دبیر الملک، مرزا اسد اللہ خان بہادر نظام جنگ، جو مرزا نوشہ کے نام سے بھی معروف ہیں، کے دو تخلص تھے: ‘اسد’ اور ‘غالب’۔ وہ اردو اور فارسی دونوں زبانوں کے جید اور بڑے شاعر واقع ہوئے ہیں۔
مرزا غالب کی اردو شاعری غزل، قصیدے، مثنوی، قطعات، اور رباعیات کی صورت میں تازگی اور شگفتگی کا ایک مرقع ہے۔ بلاشبہ غالب ایک قادرِ الکلام شاعر تھے، جن کی شاعری میں زندگی کا ہر پہلو اور ہر رنگ نظر آتا ہے۔ ان کے اشعار میں گہرائی بھی ہے اور گیرائی بھی، اور ان کا اسلوب سب سے منفرد و یکتا دکھائی دیتا ہے۔ ان کی شاعری کی نمایاں خصوصیات میں انفرادیت، جدتِ ادا، پہلو داری، معنی آفرینی، نادر تشبیہات و استعارات، نئے نئے الفاظ و تراکیب، طنز و ظرافت، اور آفاقیت شامل ہیں، جو انہیں دوسرے ہم عصر شعراء سے ایک بلند اور منفرد مقام دلاتی ہیں۔
سب کہاں، کچھ لالہ و گل میں نمایاں ہو گئیں
خاک میں کیا صورتیں ہوں گی کہ پنہاں ہو گئیں²
یہ شعر اس حقیقت کو واضح کرتا ہے کہ زمین میں جو حسین شخصیات دفن ہوئیں، ان میں سے کچھ تو لالہ و گل کی شکل میں ظاہر ہو گئیں، جب کہ بیشتر مٹی میں مل کر گم ہو گئیں۔
عشرتِ قطرہ ہے دریا میں فنا ہو جانا
درد کا حد سے گزرنا ہے دوا ہو جانا³
اس شعر کا مفہوم یہ ہے کہ غالب مشکلات سے گھبراتے نہیں ہیں، بلکہ مسلسل جدوجہد اور صبر سے انسان کا دل اور حوصلہ اتنا مضبوط ہو جاتا ہے کہ تمام مشکلات اس کے لیے بے معنی اور بے وقعت ہو جاتی ہیں۔ زندگی میں جب یکے بعد دیگرے مصیبتیں آتی ہیں تو انسان ابتدا میں گھبراتا ہے، لیکن ایک وقت ایسا آتا ہے کہ ہر مشکل اسے آسان دکھائی دینے لگتی ہے۔غالب کی زندگی کے آخری ایام کا جائزہ لینے سے یہ بات روشن ہوتی ہے کہ ان کے آخری دن شدید مشکلات میں گزرے۔ انتہائی مقروض ہونے اور تنگ دستی نے انہیں ہلا کر رکھ دیا تھا۔اگرچہ غالب کی شاعری میں داغ دہلوی کی طرح باقاعدہ ‘دہلی کا مرثیہ’ نہیں ملتا، تاہم ان کے ہاں ایک تہذیبی بساط کے لٹنے، ایک حسین نقش کے مٹنے، اور ایک پھول کے خاک میں ملنے کا گہرا درد موجود ہے۔ غالب کے نزدیک یہ المیہ اتنا شدید ہے کہ آنسو بھی اس کے لیے ناکافی محسوس ہوتے ہیں؛ اسی لیے داغ جیسے بڑے شاعر بھی اس باب میں غالب کے مقابلے میں نہیں ٹھہرتے۔
درد منت کشِ دوا نہ ہوا
میں اچھا نہ ہوا، برا نہ ہوا⁴
یوں تو غالب کی زندگی بڑے غم و آلام سے عبارت تھی۔ 1857ء کی جنگِ آزادی کا ہولناک منظر انہوں نے اپنی آنکھوں کے سامنے دیکھا۔ یہ ایک مسلمہ حقیقت ہے کہ دنیا میں ہر انسان کو نشیب و فراز، مشکلات، اور مصائب کا سامنا کرنا پڑتا ہے۔ انسان ہمیشہ خوشیوں کا آرزو مند رہتا ہے، لیکن خوشیوں کے لمحات مختصر ہوتے ہیں جبکہ غم کے ایام طویل معلوم ہوتے ہیں۔ شاید اسی کیفیت کو ساغر صدیقی نے یوں بیان کیا ہے:
زندگی جبرِ مسلسل کی طرح کاٹی ہے
جانے کس جرم کی پائی ہے سزا، یاد نہیں
مرزا غالب 1857ء کی جنگِ آزادی کے ہنگاموں کے دوران دہلی ہی میں مقیم تھے۔ اس زمانے کے حالات کو انہوں نے اپنی تصنیف دستنبو میں تفصیل سے قلمبند کیا ہے۔ دہلی کی فتح کے بعد انگریز فوجوں کی لوٹ مار سے غالب کا ذاتی گھر تو محفوظ رہا، لیکن جو قیمتی زیورات اور سامان بیگم نے چوری اور لوٹ مار کے خوف سے میاں کالے خان کے خفیہ تہہ خانے میں رکھوائے تھے، وہ انگریزوں کے ہتھے چڑھ گئے۔ چند گورے فوجیوں نے غالب کو پکڑ کر کرنل برن کے سامنے پیش کیا۔ بازپرس ہوئی، لیکن زندگی باقی تھی اس لیے مرزا بچ گئے۔تاہم، جب امن قائم ہونے کے بعد غالب نے اپنی پنشن اور دربار میں رسائی بحال کرانے کے لیے کوششیں شروع کیں، تو انہیں صاف صاف کہہ دیا گیا کہ وہ غدر کے دنوں میں باغیوں کے خیرخواہ رہے ہیں اور انہوں نے بہادر شاہ ظفر کی مدح میں ایک شعر کہا تھا (جس میں لفظ ‘سکہ’ استعمال ہوا تھا)۔
یہ دراصل کسی اور موقعے کا شعر تھا جو بہادر شاہ ظفر کی تخت نشینی کے وقت کہا گیا تھا، لیکن ثبوت کی عدم موجودگی کی وجہ سے غالب اس الزام سے اپنی بَرأت ثابت نہ کر سکے۔ قلعے کا وظیفہ تو پہلے ہی بند ہو چکا تھا، اب پنشن اور دربار کے معاملے میں بھی انہیں زک اٹھانی پڑی اور ان کا ‘کوئین پوئٹ’ (Queen Poet) بننے کا خواب بھی ادھورا ہی رہ گیا۔ان شخصی صدموں اور چند دوسری وجوہات کی بنا پر غالب ‘غدر’ کو اچھے لفظوں میں یاد نہیں کرتے تھے۔ حقیقت یہ ہے کہ مرزا کی نظر اپنے مستقبل پر تھی، اور غدر سے دو سال قبل جب یہ فیصلہ ہوا تھا کہ بہادر شاہ ظفر کے بعد مغل بادشاہی کا سلسلہ ختم کر دیا جائے گا، تو غالب نے اپنے مستقبل کو انگریزوں سے وابستہ کرنے کی کوششیں شروع کر دی تھیں۔ چنانچہ انگریزوں کے دوبارہ متصرف ہو جانے کے بعد اگر غالب نے ان کا ساتھ دیا، تو یہ ان کی معاملہ فہمی اور مستقبل بینی کے پیشِ نظر کوئی اچنبھے کی بات نہیں ہونی چاہیے۔
چند ہی ماہ کے اندر اندر انہوں نے ملکہ وکٹوریہ کی تعریف میں ایک قصیدہ ‘شمارِ یافت روزگارِ یافت’ کے نام سے لکھا۔ یہ قصیدہ نومبر 1858ء میں دستنبو کے پہلے ایڈیشن کے ساتھ چھپوایا گیا، اور دستنبو کے چند نسخے خاص اہتمام سے تیار کرا کے بعض ‘خاص مقاصد اور مطالب کے لیے’ ہندوستان اور انگلستان کے اکابر کو بھجوائے گئے۔
اگر غالب نے ‘غدر’ کو برے ناموں سے یاد کیا تو اس کی وجہ یہ تھی کہ اس ہنگامے نے ان کے مستقبل کا پورا نقشہ بگاڑ کر رکھ دیا تھا۔ غالب نے ‘غدر’ کی تاریخ ‘رستخیزِ بیجا’ سے نکالی، لیکن اس کا ہرگز یہ مطلب نہیں کہ وہ حبِ وطن سے عاری تھے یا اپنے ہم وطنوں کے لیے ان کے دل میں کوئی درد یا ہمدردی نہیں تھی۔ غدر کے بعد انگریزوں نے ہندوستانیوں پر جو مظالم ڈھائے، غالب کو ان کا گہرا احساس تھا۔ اپنے طبقے کی پامالی اور شہر کی ویرانی کا جو تذکرہ غالب کے خطوط میں ملتا ہے، وہ انتہائی دل سوز اور دردناک ہے۔
ان خطوط کا مطالعہ کرتے وقت اس حقیقت کو پیشِ نظر رکھنا چاہیے کہ دہلی پر انگریزوں کے مکمل غلبے کے بعد کس کی ہمت تھی کہ انگریزوں کے خلاف ایک لفظ بھی زبان پر لا سکے، پھر بھی مرزا کے خطوط میں انگریزوں کی زیادتیوں اور سختیوں کی طرف اہم اشارے ملتے ہیں۔ غدر کے بعد دہلی کے باسیوں اور بالخصوص مسلمانوں پر مصائب کے جو پہاڑ ٹوٹے، ان کا تذکرہ آج بھی آنکھوں کو اشکبار کر دیتا ہے۔ غالب نے یہ سب کچھ خود دیکھا تھا، اور ان کی مظلومیت و بے بسی کا احساس درج ذیل قطعے سے بخوبی ہوتا ہے:
بسکہ فعّالِ ما یرید ہے آج
ہر سلحشور انگلستان کا
گھر سے بازار میں نکلتے ہوئے
زہرہ ہوتا ہے آب انسان کا
چوک جس کو کہیں، وہ مقتل ہے
گھر بنا ہے نمونہ زنداں کا
شہرِ دہلی کا ذرہ ذرہ خاک
تشنۂ خوں ہے ہر مسلمان کا
اس طرح کے وصال سے یا رب
کیا مٹے گا دلِ داغِ ہجراں کا⁵
تاہم، ان تمام کوششوں کے باوجود ان کی پنشن بحال نہ ہو سکی۔ پنشن کی بحالی اور اس میں اضافے کے لیے انہیں زندگی بھر انگریز حکام کی منت سماجت کرنی پڑی، عدالتوں کے چکر کاٹنے پڑے، اور یہاں تک کہ کلکتہ تک کا طویل اور کٹھن سفر بھی کرنا پڑا۔مذکورہ بالا بادشاہ کے جس سکّے یا شعر کا ذکر عبد اللطیف نے کیا ہے، وہ دراصل یہ تھا:
سکہ زد در جہاں بفضلِ الٰہ
شاہِ ہندوستان بہادر شاہ
1857ء کی جنگِ آزادی سے پہلے ہی انگریزوں نے جاسوسوں کا ایک وسیع جال پھیلا رکھا تھا، اور عام لوگوں میں حکیم احسن اللہ خان اور نواب محبوب علی خان کے بارے میں طرح طرح کے شبہات پائے جاتے تھے۔ گوری شنکر نے انگریزوں کو یہ اطلاع دی کہ مرزا غالب نے یہ شعر لکھ کر دیا تھا، اور اس طرح غالب پر یہ الزام تھوپ دیا گیا تھا۔
غالب اور شگفتگی
مرزا غالب کے مزاج میں ظرافت اور شوخی اتنی کوٹ کوٹ کر بھری تھی کہ بلاشبہ انہیں ‘حیوانِ ظریف’ کہا جانا چاہیے۔ ان کی اس ظرافت و شوخی کی اصل بنیاد ان کی جدت طرازی اور بذلہ سنجی تھی۔ غالب فطرتاً ظریف الطبع اور شوخ مزاج واقع ہوئے تھے، اور وہ اپنے دل کے گہرے غموں کو ظرافت کے پردے میں چھپا کر جینے کے قائل تھے۔ جیسا کہ وہ خود کہتے ہیں:
پکڑے جاتے ہیں فرشتوں کے لکھے پر ناحق
آدمی کوئی ہمارا دمِ تحریر بھی تھا
ایک روز مرزا غالب کے شاگرد میر مہدی مجروح ان کے مکان پر آئے تو دیکھا کہ مرزا صاحب پلنگ پر لیٹے کراہ رہے ہیں۔ وہ فوراً ان کے پاؤں دبانے لگے۔ مرزا صاحب نے ٹوکتے ہوئے کہا:
”بھئی، تو سید زادہ ہے، مجھے کیوں گناہگار کرتا ہے؟“
میر مہدی مجروح نہ مانے اور کہا:”اگر آپ کو ایسا ہی خیال ہے تو پاؤں دبانے کی اجرت دیجیے گا۔“
مرزا صاحب نے برجستہ کہا: ”ہاں، اس میں کوئی مضائقہ نہیں۔“
جب وہ پاؤں دبا چکے تو انہوں نے ازراہِ مزاح مرزا صاحب سے اجرت کا مطالبہ کیا۔ مرزا صاحب نے مسکرا کر کہا:
”بھیا، کیسی اجرت؟ تم نے میرے پاؤں دبائے، میں نے تمہارے پیسے دبائے؛ حساب برابر ہو گیا!“
بلاشبہ غالب کا اصل فنی کمال ان کی شوخ نگاری، لطیف ذکاوت، طنز کی کاٹ، اور شگفتہ بیانی میں مضمر ہے، جن کی مثالیں ان کے خطوط اور کلام میں جابجا ملتی ہیں۔
(جاری ہے)
حوالہ جات:
1.دیوانِ غالب مطبوعہ نظامی کانپور 1862ء، ص 89؛ دیوانِ غالب مطبوعہ مکتبہ میری لائبریری لاہور 1969ء، ص 67)
3.دیوانِ غالب مطبوعہ نظامی کانپور 1862ء، ص 43؛ دیوانِ غالب مطبوعہ مکتبہ میری لائبریری لاہور 1969ء، ص 31؛ انتخابِ غالب، ص 11
4.دیوانِ غالب مطبوعہ نظامی کانپور 1862ء، ص 30؛ دیوانِ غالب مطبوعہ مکتبہ میری لائبریری لاہور 1969ء، ص 37
5.دیوانِ غالب مطبوعہ تخلیقات لاہور بہ طرزِ نظامی کانپور، ص 238)
تبصرہ لکھیے