ہزاروں سال نرگس اپنی بےنوری پہ روتی ہے
بڑی مشکل سے ہوتا ہے چمن میں دیدہ ور پیدا
جناب صدر اور معزز سامعین،
آج میں جس موضوع کا سہارا لے کر آپ کے سامنے کھڑا ہوں , وہ ہے ۔ ۔ ۔ اقبال
جی ہاں ۔ ۔ ۔ اقبال ! کون اقبال ۔ ۔ ۔ ؟ وہ اقبال , جس نے سوئی قوم کو , خواب غفلت سے جگایا ۔ وہ اقبال , جس نے برصغیر کے مسلمانوں کو , آزادی کی راہ دکھائی ۔ وہ اقبال , جس نے مسلمان کو , عظمت رفتہ یاد دلائی ۔ وہ اقبال , جس نے امت مسلمہ کو , بھولا ہوا سبق یاد دلایا ۔ وہ اقبال , جس نے قلوب کو گرمایا ۔ ۔ روحوں کو تڑپایا ۔ وہ اقبال , جس نے ترقی و خوشحالی , کامیابی و کامرانی , عزت و عظمت , رفعت و بلندی سمیت ہر خیر کو یوں سمیٹ ڈالا ۔ ۔ ۔
کی محمد سے وفا تو نے تو ہم تیرے ہیں
یہ جہاں چیز ہے کیا لوح و قلم تیرے ہیں
جناب صدر،
اقبال اگر ہمیں آزادی کی راہ نہ دکھاتا , تو آج ہم اس خطے میں مجبور اقلیت بن کر جی رہے ہوتے ۔ کل کا ہمارا نوکر ہندو بنیا , آج ہمارا مالک بنا بیٹھا ہوتا ۔ ہمارا کوئی پرسان حال نہ ہوتا ۔ ہمارا کوئی مقام نہ ہوتا ۔ کوئی شناخت نہ ہوتی ۔ کوئی پہچان نہ ہوتی ۔ شناخت دی ۔ ۔ تو اقبال نے ۔ پہچان دی ۔ ۔ تو اقبال نے
حاضرین محترم،
ذرا غور فرمائیں ۔ ہر گزرتے دن کے ساتھ اقبال کی عظمت بڑھتی چلی جاتی ہے ۔ ۔ مگر ہماری عظمت کا سورج غروب ہوتا چلا جاتا ہے ۔ ہر آنے والا دن اقبال کے اقبال کو اور بلند کردیتا ہے ۔ ۔ لیکن ہمارا اقبال اب تک قصہ پارینہ بنا ہوا ہے ۔ ہر نیا سورج فکر اقبال کے نئے پہلوؤں کو لے کر روشن ہوتا ہے ۔ ۔ مگر ہماری دنیا پر اب تک تاریکی چھائی ہوئی ہے ۔ ۔ ۔ تو اس کی وجہ صرف اور صرف یہ ہے کہ ہم نے اقبال ڈے تو منائے ۔ ۔ اقبال کے گن تو گائے ۔ ۔ اقبال کی عظمت کو سلام تو پیش کیے ۔ ۔ ۔ لیکن ہم نے آج تک پیغام اقبال اپنانے کی کوشش نہیں کی ۔
اروروں کا ہے پیام اور , میرا پیام اور ہے
عشق کے دردمند کا طرزِ کلام اور ہے
سامعین محترم،
اقبال نے ہمیں کردار کا غازی بنانا چاہا ۔ ۔ ہم گفتار کے غازی بن بیٹھے ۔ اقبال نے ہمیں خودی کا درس دیا ,,, مگر ہم خود سر بن بیٹھے ۔ اقبال نے ہمیں عمل کی راہ دکھائی ,,, لیکن ہم نے محض باتوں اور دعووں سے خود کو منوانا چاہا ۔ اقبال نے ہمیں یقین محکم سے لیس کیا ,,, مگر ہم تشکیک کی راہوں پر چل نکلے ۔ اقبال ہمیں روحانیت کی طرف لے کر گیا ,,, مگر ہم بھاگ کر مادیت کے ساتھ سے چمٹ گئے ۔ اقبال نے ہمیں مَن کی دنیا سے متعارف کرایا ,,, مگر ہم ظاہر میں کھو کر رہ گئے ۔
اے اسلام کے نام لیواؤ،
اگر تمھیں عظمت رفتہ کی یاد ستاتی ہے ۔ اگر تم دوبارہ امامت کے منصب پر فائز ہونا چاہتے ہو ۔ اگر تم پھر سے دنیا کی زمام اقتدار اپنے ہاتھ میں لینا چاہتے ہو ,,, تو آؤ ۔۔۔ ! اقبال تمھیں خوش آمدید کہتا ہے ۔ ۔ کلامِ اقبال اٹھاؤ ۔ ۔ فکرِ اقبال سمجھو ۔ ۔ پیغامِ اقبال لو اور پوری دنیا پر چھا جاؤ ۔
سبق پھر پڑھ صداقت کا , عدالت کا , شجاعت کا
لیا جائے گا تجھ سے کام دنیا کی امامت کا
تبصرہ لکھیے