خدائے لازوال نے کرۂ ارض کو پھلوں، پھولوں، معدنی خزانوں، اناج اور دلکش، سحر انگیز نظاروں سے سجا کر آخر میں حضرت آدمؑ کے ذریعے دھرتی پر انسان کی آبادکاری کر دی۔ جب بھی کسی باشعور اہلِ دانش و حکمت نے خدا کی کائنات، دھرتی، اس کے خزانوں، نظاروں اور پیکرِ ہستی پر غور کیا تو یہ حقیقت سامنے آئی کہ خالقِ کائنات نے روزِ اول سے آج تک ہر دور میں اپنی لازوال، عظیم، دلکش اور حیران کن تخلیق سے اہلِ دنیا کو ششدر کر کے رکھ دیا۔
طاقتور بادشاہ کو معمولی انسان سے شکست دینا، فرعون کے گھر میں حضرت موسیٰؑ کی پرورش، پھر حضرت موسیٰؑ کے ہاتھوں فرعون کو دریائے نیل کی موجوں میں تنکے کی طرح غرق کر دینا، وسائل، مالی استحکام اور بڑے فوجی لشکروں کے مالک ملکوں کو کمزور ممالک کے ہاتھوں شکست سے دوچار کر دینا، اسی قدرت کی نشانیاں ہیں۔ اس کی ایک حالیہ مثال روس اور امریکہ کو افغانستان میں پیش آنے والی مشکلات کو قرار دیا جاتا ہے۔حق تعالیٰ کی تخلیقات کا مطالعہ کریں تو خوبصورتی، تنوع اور حیران کن خصوصیات کے حامل انسانوں کی پیدائش بھی اس کا ایک عظیم مظہر ہے۔ ظاہری حالات پر نظر ڈالیں تو ایسے غیر معمولی انسان بظاہر کامیابی کے آسمان پر چمکنے کے قابل دکھائی نہیں دیتے، لیکن خدائے لازوال کی مدد سے یہی معمولی لوگ کامیابی و کامرانی کے کے-ٹو پر فتح کے جھنڈے گاڑ دیتے ہیں اور اہلِ دنیا کی عقل دنگ رہ جاتی ہے۔
زندگی اور انسانوں کے یہ نشیب و فراز اس حقیقت پر مہر ثبت کرتے ہیں کہ یہ کائنات کسی حادثے کا نتیجہ نہیں، بلکہ ایک غیر مرئی قوت اس پورے نظام کو انتہائی مہارت اور حکمت سے چلا رہی ہے۔ دنیا میں جب بھی کوئی انسان طاقت، اقتدار، فوجی قوت اور مالی استحکام حاصل کرتا ہے تو وہ بلند و بالا عمارتیں، باغات اور حیران کن تعمیرات کر کے اپنی عظمت کو ہمیشہ کے لیے محفوظ کرنا چاہتا ہے۔ وہ شہرت کے لیے بے شمار کام کرتا ہے، لیکن قدرت کا عجیب اور اٹل اصول یہ ہے کہ وقت کی آندھی ایسی تمام کوششوں کو گمنامی کے غار میں دفن کر دیتی ہے۔آپ تاریخِ انسانی کے بڑے حکمرانوں اور سلطانوں کا ریکارڈ دیکھ لیں۔ انہوں نے اپنے مالی وسائل سے اہلِ علم و دانش کو اپنے درباروں میں جمع کیا، عظیم لشکر تیار کیے اور ایسے ایسے کارنامے انجام دینے کی کوشش کی جنہیں آنے والی نسلیں یاد رکھیں، مگر صدیوں کی گرد نے ان کے بیشتر نام مٹا دیے۔
اس کے برعکس، جب کائنات کا مالک کسی انسان کو عزت، شہرت اور محبوبیت عطا کرنا چاہتا ہے تو کسی معمولی گھرانے میں ایسا شخص پیدا کرتا ہے کہ سینکڑوں بادشاہوں کی شہرت اس کے سامنے ماند پڑ جاتی ہے۔ ایسے لوگ دانستہ کوششوں سے نہیں، بلکہ اللہ تعالیٰ کی عطا سے تاریخ میں ہمیشہ کے لیے زندہ ہو جاتے ہیں۔ انسانوں کے اس عروج و زوال سے یہی حقیقت سامنے آتی ہے کہ کامیابی اور ناکامی صرف اللہ تعالیٰ کے اختیار میں ہے۔ وہ جسے چاہے عزت عطا کرے اور جسے چاہے محروم کر دے۔ جب اللہ کسی انسان سے کوئی بڑا کام لینا چاہتا ہے تو اسے غیر معمولی صلاحیتوں سے نواز دیتا ہے، اور اس کی شہرت نسلوں تک قائم رہتی ہے۔ایسا ہی ایک انسان یکم اپریل 1936ء کو برصغیر کے شہر بھوپال (موجودہ بھارت) میں پیدا ہوا۔ قدرت نے اس بچے کے مقدر میں وہ کام لکھ دیا تھا جو آگے چل کر پاکستان کے دفاع کی تاریخ بدلنے والا تھا۔ قیامِ پاکستان کے بعد عبدالقدیر خان اپنے خاندان کے ساتھ ہجرت کر کے کراچی آ گئے۔
تعلیم مکمل کرنے کے بعد انہوں نے میٹروپولیٹن میں ملازمت اختیار کی، پھر اعلیٰ تعلیم کے لیے جرمنی اور ہالینڈ گئے۔ وہاں میٹریل ٹیکنالوجی میں ایم ایس کرنے کے بعد بیلجیئم سے میٹالرجیکل انجینئرنگ میں ڈاکٹریٹ کی ڈگری حاصل کی۔ اسی دوران وہ مادّوں کی ساخت اور انہیں مطلوبہ شکل میں تبدیل کرنے کی جدید ٹیکنالوجی سے آگاہ ہوئے۔ادھر سانحۂ مشرقی پاکستان رونما ہوا۔ اس کے بعد بھارت کے جوہری عزائم اور بدلتی ہوئی علاقائی صورتِ حال نے پاکستان کے لیے نئے چیلنج پیدا کیے۔ انہی حالات میں 1974ء میں ڈاکٹر عبدالقدیر خان پاکستان آئے اور اس وقت کے وزیرِاعظم ذوالفقار علی بھٹو کو خط لکھ کر اپنی خدمات پیش کیں۔بھٹو صاحب نے انہیں فوری طور پر ذمہ داری سونپی، اور کہوٹہ میں محدود وسائل کے ساتھ ایک لیبارٹری قائم کی گئی، جو بعد میں پاکستان کے جوہری پروگرام کا اہم مرکز بن گئی۔ یورینیم کی افزودگی کے لیے انتہائی تیز رفتار سینٹری فیوج مشینوں کی ضرورت تھی۔ پاکستان کو اس میدان میں بے شمار مشکلات کا سامنا کرنا پڑا، مگر ڈاکٹر عبدالقدیر خان اور ان کی ٹیم نے مسلسل محنت کے بعد ان رکاوٹوں پر قابو پا لیا۔
1984ء میں ڈاکٹر عبدالقدیر خان نے جنرل ضیاء الحق کو اطلاع دی کہ پاکستان جوہری صلاحیت حاصل کر چکا ہے اور ضرورت پڑنے پر مختصر وقت میں ایٹمی تجربہ کرنے کی پوزیشن میں ہے۔ تاہم، بین الاقوامی دباؤ کے باعث یہ فیصلہ کچھ عرصہ مؤخر رہا۔بالآخر 1998ء میں بھارت کے جوہری تجربات کے بعد پاکستان نے بھی 28 مئی 1998ء کو بلوچستان کے چاغی کے پہاڑوں میں کامیاب جوہری دھماکے کیے۔ ان کامیاب تجربات میں ڈاکٹر عبدالقدیر خان اور ان کی ٹیم کی خدمات کو پاکستان کی دفاعی تاریخ کا ایک اہم سنگِ میل سمجھا جاتا ہے۔ انہی خدمات کے باعث ڈاکٹر عبدالقدیر خان کو “محسنِ پاکستان” کے لقب سے یاد کیا جاتا ہے۔ پاکستانی قوم آج بھی ان کی خدمات کو قدر کی نگاہ سے دیکھتی ہے اور انہیں قومی دفاع، خودمختاری اور سائنسی ترقی کی علامت سمجھتی ہے۔
تبصرہ لکھیے