حمیدہ شاہین ، منفرد اسلوب کی شاعرہ - رقیہ اکبر چوہدری

۔۔
یہ شہرہ آفاق اشعار جس ہستی کے ہیں دنیا انہیں حمیدہ شاہین کے نام سے جانتی ہے۔ ایسی نابغہ کی شخصیت و تخلیقات پہ بات کرنا مجھ جیسی عام سمجھ بوجھ والی ادب کی ایک ادنیٰ طالبہ کےلیے جہاں بہت بڑے اعزاز کی بات ہے، وہیں یہ کار دشوار بھی ہے۔ حمیدہ شاہین صاحبہ کی شاعری جو شان و شوکت رکھتی ہے، میں اعتراف کرتی ہوں کہ اس کے شایان شان کچھ کہنے کےلیے میرا فہم و علم بہت کم ہے، اس لیے اپنے بےربط خیالات پر مبنی یہ چند سطور اس امید پہ آپ کے سامنے رکھتی ہوں .
شاعری ہو یا نثر یا فنون لطیفہ کی کوئی بھی صنف کائنات کے پراسرار بھید اور حیات کارزار کے سربستہ رموز کھولتے ہیں۔اس لئے کسی بھی سماج کی تعمیر و تشکیل میں فنون لطیفہ کی اہمیت دو چند ہوتی ہے۔ یہی وجہ ہے کہ تخلیق کار معاشرے کا سب سے قیمتی اور حساس حصہ گردانے جاتے ہیں۔ ایک اعلیٰ تخلیق کار ہونا بہت بڑی بات ہے اور اگر اسی اعلیٰ تخلیق کار میں بہت بڑا انسان بھی چھپا ہو تو سونے پہ سہاگا ہو جائے۔ حمیدہ شاہین صاحبہ کا شمار ایسے ہی تخلیق کاروں میں ہوتا ہے۔ نہایت وضع دار ،دھیمے لب و لہجے میں بات کرنے والی ،شفیق اور مہربان ہستی جن کے بارے میں بجا طور پر کہا جا سکتا ہے کہ وہ جو لکھتی ہیں وہ صرف الفاظ کا مجموعہ نہیں ہوتا بلکہ پورا اخلاقی پیکج ہوتا ہے۔
تخلیقیت کے اوج کمال کو چھوتی حمیدہ شاہین کو رب تعالیٰ نے تخلیقیت کے ساتھ ساتھ ایسی اخلاقی خوبیوں سے بھی نوازا ہے جس کی ہر خاتون خواہشمند ہوتی ہے۔ تخلیق میں جیسا کمال انہیں ودیعت ہوا ہے، ان کے ہم عصروں میں اس کی مثال ملنا مشکل ہے۔
موجودہ ادبی منظر نامے میں جو چند ایک شاعرات اپنے منفرد، دلکش اور کاٹ دار اسلوب سے پہچانی جاتی ہیں حمیدہ شاہین وہاں صف اول میں کھڑی نظر آتی ہیں۔ نظم و نثر میں یکساں دسترس کی حامل، حمیدہ شاہین فی الحقیقت اپنے جداگانہ لب و لہجے سے پہچانی جاتی ہیں۔ ہم جب کسی بھی شاعر کےلیے منفرد اسلوب کی بات کرتے ہیں تو عموماً یہ بھی محض لفاظی ہوتی ہے جسے ہم روا روی میں بول دیتے ہیں لیکن جب بات حمیدہ شاہین صاحبہ کہ آئے تو یہ محض رسماً بولے جانے والے کلمات نہیں ہوتے وہ حقیقت میں اپنا ایک مکمل جداگانہ اسلوب رکھتی ہیں جو ہمیں کہیں اور نہیں ملتا۔
آج ہماری ہار سمجھ میں آنے والی بات نہیں
اس کے پورے لشکر میں تھے آدھے آج ہمارے لوگ
کس کے ساتھ ہماری یک جانی کا منظر بن پاتا
آدھے جان کے دشمن تھے اور آدھے جان سے پیارے لوگ

حمیدہ شاہین صاحبہ کے بارے میں محمد حمید شاہد صاحب کے یہ الفاظ میرے خیالات کو بہ احسن بیان کر رہے ہیں: "دیکھا گیا ہے کہ بالعموم غزل گو شاعر مصرع مصرع آگے بڑھتے ہیں اور مصرع تازہ کے تعاقب میں اپنے ہی فکری دھارے کو کاٹتے پیٹتے چلے جاتے ہیں۔انتشار فکری اچھے بھلے شاعروں کو اپنے ہی قدموں پر یوں گرا دیتی ہے جیسے وہ ہڈیوں کے استخوان کے بغیر زمین پر پڑے ماس کا ڈھیر ہوں۔ تاہم حمیدہ شاہین کی فکر مربوط ہے اور اُس کا ایک رُخ متعین ہے جو ان کے تخلیقی وجود کو قامت اور پہچان عطا کرتا ہے." وہ اپنی نظم و نثر کے ذریعے ان دکھوں کو بیان کرنا چاہتی ہیں اور کرتی ہیں جنہوں نے بالعموم تمام مرد و زن اور بالخصوص خواتین کی زندگی کو بہت مشکل بنا رکھا ہے۔ مگر اسے بیان کرتے ہوئے ان کے لہجے میں قطیعت تو نظر آتی ہے بغاوت نہیں۔ معاشرتی ناہمواری اور سماجی ناروا بندشوں کے خلاف آواز بلند کرتے ہوئے ان کے لہجے میں ایسی کاٹ ملتی ہے کہ قاری انگشت بدندان رہ جائے. آپ ان کی یہ مشہور زمانہ نظم پڑھیے

وہ اپنے فن کے ذریعے صرف انسان کی حس جمالیات کو ہی تسکین نہیں پہنچاتیں بلکہ پورے آہنگ سے ان اخلاقی اقدار کو بھی بیان کرتی ہیں جنہیں ہم اپنی نااہلی سے ایک ایک کر کے گنواتے جا رہے ہیں۔یہی وجہ ہے کہ ان کے کلام کی تاثیر بہت گہری اور پائیدار اور ترسیل نہایت تیز رفتار ہوتی ہے۔ ڈاکٹر خورشید رضوی صاحب نے بالکل بجا فرمایا کہ ''سامعین حمیدہ کا شعر جس طرح وصول کرتے ہیں اس کی مثال کم کم ملتی ہے مجھے یہ خوشی ہے کہ اس کے کمالات کو لوگوں نے گہرائی میں جا کر اپریشیئٹ کیا ہے۔ بہت دور تک اس کی گونج سنی گئی اور بجا طور پر سنی گئی." ان کی یہ غزل جو زبان زد عام ہے، آپ اس کے مختلف اشعار کو اپنے سماجی حالات ،ماحول اور سیاسی منظر نامے سے نتھی کر کے پڑھیں تو آپ کو اندازہ ہو ان کی آفاقیت و جامعیت ادب کی کس معراج کو چھو رہی ہے۔
اور اب اسی غزل کے ان اشعار کی گہرائی و گیرائی کو سمجھیے
اور اب یہ پڑھیں
آپ انھیں پڑھیں تو معلوم ہوتا ہے کہ وہ روایتی غزل کے دائروں کو توڑ کر غزل لکھتی ہیں، اب چاہے موضوعات کتنے ہی روایتی کیوں نہ ہوں، ان کا بیان،اسلوب ایسا اچھوتا ،غیر روایتی اور جدت سے بھرپور ہوتا ہے کہ قاری چونک جاتا ہے.
وہ شاعری کا ایسا روشن باب ہیں جن کے ذکر کے بغیر ادب کی تاریخ لکھنی ممکن ہی نہیں۔
(حمیدہ شاہین کے اعزاز میں یونیورسٹی آف منیجمنٹ اینڈ ٹیکنالوجی لاہور کے زیرِ اہتمام منائی گئی ایک شام میں پڑھا گیا مضمون)