روزہ داروں کی عید سے قبل عید - شمائلہ فاطمہ لنگاہ

رمضان المبارک صرف روزوں کا مہینہ نہیں بلکہ یہ روحانی انقلاب کا موسم ہوتا ہے۔ ہر مسلمان اس مہینے میں اپنی نیکیوں میں اضافہ کرتا ہے، دل کو تقویٰ کی روشنی سے منور کرتا ہے اور اپنی زندگی کو اللہ کی رضا کے تابع کر لیتا ہے۔ یہی وہ مہینہ ہے جب بھوکے کو کھانا کھلانے کی حقیقی خوشی نصیب ہوتی ہے، صبر کا حقیقی مفہوم سمجھ میں آتا ہے اور بھوک پیاس سہہ کر بندہ ان لوگوں کا درد محسوس کرتا ہے جو ہمیشہ محرومی کی زندگی گزارتے ہیں۔ افطار کے وقت روزہ دار کے چہرے پر جو طمانیت ہوتی ہے، وہ کسی ظاہری خوشی سے زیادہ قیمتی ہوتی ہے۔

پھر جب یہ مہینہ اپنے اختتام کی جانب بڑھتا ہے، تو آخری عشرہ ایک نئی روحانی فضا قائم کر دیتا ہے۔ مساجد میں اعتکاف کرنے والے، طاق راتوں میں عبادت کرنے والے، سحری کے وقت آنکھوں میں آنسو لیے دعائیں مانگنے والے ۔۔۔ یہ سب اس بات کا ثبوت ہیں کہ یہ مہینہ واقعی بندے کو اس کے رب کے قریب کر دیتا ہے۔

عید الفطر کی رات، جسے لیلۃ الجائزہ کہا جاتا ہے، اصل میں انعام کی رات ہے۔ یہ ان کے لیے خوشی کا لمحہ ہوتا ہے جو پورے اخلاص کے ساتھ روزے رکھتے ہیں، اپنی نفسانی خواہشات کو قابو میں رکھتے ہیں اور رب کی رضا کی جستجو کرتے ہیں۔ اس رات اللہ اپنے بندوں کو بخشش کی نوید سناتا ہے اور فرشتوں کے سامنے ان پر فخر کا اظہار کرتا ہے۔ یہی وہ لمحہ ہوتا ہے جب سچے روزہ داروں کے دل خوشی سے معمور ہو جاتے ہیں اور ان کے لیے عید الفطر سے پہلے ہی عید کی حقیقی خوشی آ جاتی ہے۔