عبدالستار ایدھی چلے گئے .... انا للہ و انا الیہ راجعون - ڈاکٹر عاصم اللہ بخش

اللہ تعالیٰ ان کی مغفرت فرمائے۔ آمین
”پاکستان“ کی اصل روح کے متعلق جاننا ہو تو ایدھی صاحب کی زندگی کو دیکھ لیجیے۔ بلکہ وہ عظیم شخص تو اپنی موت میں بھی ہم سب کے لیے اہم ترین پیغام چھوڑ گیا۔
آپ اور کچھ مت کیجیے .... ابھی سے فیس بک پر لکھے وہ سب سٹیٹس پڑھنے شروع کر دیجیے جو ان کی موت سے متعلق ہیں... شیعہ، سنی، بریلوی، سلفی، دیوبندی، قادیانی، عیسائی، ہندو، سکھ... سب پڑھ ڈالیے۔ کہیں بھی دکھ، رنج، خراج عقیدت اور دعا کے علاوہ کچھ اور ملے تو ضرور بتائیے گا...
یہ سب اس لازوال قوت کا نتیجہ ہے جس کا کوئی توڑ کسی کے پاس نہیں... ہم جسے ”انسانیت“ کہتے ہیں۔
جو بھی انسانوں کی بھلائی سوچے گا، وہ انہیں اپنی محبت میں یکجا کر لے گا۔
یہ جو ہم سب صبح شام چھوٹی چھوٹی بات پر ایک دوسرے سے بحث، تکرار اور جھگڑے کرتے ہیں جن کے خیالات و نظریات کبھی مل کر نہیں دیتے... انہیں یہ سوچنا چاہیے کہ سب اختلاف ایک طرف رہ گئے، سب حوالے دھرے کے دھرے رہ گئے اور آج سب یک آواز ہیں ایدھی صاحب کی شخصیت کی مدح میں۔
وجہ صرف اتنی ہے انہوں نے ہم سب کے مابین کبھی تفریق نہیں کی، سب کے لیے ہمہ وقت حاضر رہے اور آج پورا ملک ان کے لیے حاضر ہے، ان کے لیے کوئی تفریق نہیں۔
یہی وہ نسخہ ہے اتحاد اور یکجہتی کا جو وہ نحیف و نزار بوڑھا ہم سب کو دکھا اور سمجھا کر اپنے رب کے حضور جا اترا ہے۔