بعض لوگ حقیقتاً پریشانی، اضطراب، تکالیف اور مختلف مسائل کا سامنا کرتے ہیں۔ تاہم ہمارے معاشرے اور اردگرد کے ماحول میں ایسے لوگوں کی بھی کمی نہیں جو فی الواقع ان مسائل کا شکار نہیں ہوتے، لیکن کچھ “مہربان” لوگ انہیں ان مسائل میں مبتلا کر دیتے ہیں۔
ان مہربانوں کی شکلیں مختلف ہوتی ہیں: کسی کے والد، کسی کی ماں، کسی کی بہن، کسی کی شریکِ حیات، کسی کا بھائی اور کسی کا پڑوسی!
خدا کے لیے اپنے خونی رشتہ داروں، قریبی دوستوں اور چاہنے والوں پر رحم کیجیے۔آپ کے معمولی سے طعنے، بے عزتی، تحقیر آمیز رویے اور ذہنی اذیت رسانی سے کسی کو زندگی بھر کا ایسا زخم لگ سکتا ہے جو کبھی نہ بھر سکے۔جس بات، عمل یا رویے کو آپ معمولی سمجھ کر نظر انداز کر دیتے ہیں، وہ کسی کی زندگی کا سکون، چین اور خوشیاں چھین سکتا ہے۔بڑوں سے دست بستہ گزارش ہے کہ اپنے رویے اور اندازِ تربیت میں مثبت تبدیلی لائیں۔
اسی طرح مربیوں اور اساتذہ سے بھی درخواست ہے کہ جس طرح چھوٹوں کو بڑوں کے حقوق اور آداب سکھائے جاتے ہیں، اسی طرح بڑوں کو بھی یہ سکھانے کی اشد ضرورت ہے کہ چھوٹوں کے بھی کچھ حقوق ہیں، ان کے جذبات ہیں اور ان کی عزتِ نفس بھی قابلِ احترام ہے۔
تبصرہ لکھیے