اچھا 20 کروڑ پاکستانیو کو کتنی صفائی سے استرا پھیرا گیا ہے اس مرتبہ۔ ڈان میں خبر چھپی اور حکومت نے اعلامیہ جاری کیا کہ خبر جھوٹ ہے۔ اس سے تین سوال جنم لیتے ہیں جن سے کئی ذیلی سوالات مزید جنم لیتے ہیں۔ خیر جوابات سب کے درکار ہیں۔
پہلا سوال:
جب حکومت یہ اقرار کر چکی ہے کہ ڈان میں چھپنے والی خبر کسی نے لیک نہیں کی بلکہ ایک من گھڑت خبر ہے تو وزیرِ داخلہ نے پرویز رشید کی برطرفی کی وجہ یہ کیوں بتائی کہ پرویز رشید خبر رکوانے میں ناکام رہے؟
اگر حکومت کی پہلی بات کو مان لیا جائے کہ ڈان نے جھوٹی کہانی لگائی تو اسکا مطلب وزیرِ داخلہ کے بیان کی روشنی میں یہ بنتا ہے کہ پرویز رشید کو پتہ تھا کہ ڈان کے پاس جھوٹی خبر ہے اور وہ رکوانے میں ناکام رہے۔ تو یہ کیسے ممکن ہے کہ پرویز رشید کو جھوٹی خبر کا تو علم ہو اور یہ علم نہ ہو کہ وہ جھوٹی خبر ڈان کو دی کس نے ہے۔
وزیرِ داخلہ کا بیان حکومت کے بیان کی روشنی میں یہ مطلب بھی دیتا ہے کہ ریاست کا وزیرِ اطلاعات و نشریات فوج اور ملک کے خلاف لگنے والی جھوٹی خبر کا پتہ ہونے کے باوجود خاموش رہا۔ اس خبر کی وجہ سے جس کی وجہ سے پوری دنیا میں پاکستان کی رسوائی ہوئی۔ وزیرِ داخلہ صاحب کیا یہ قوم سے غداری نہیں ہے اور اس پر وزیرِ اطلاعات و نشریات پرویز رشید کے خلاف آرٹیکل 6 کے تحت کاروائی نہیں ہونی چاہیے؟
دوسرا سوال:
حکومت نے کہا کہ خبر جھوٹی ہے جو ڈان نے شائع کی۔ اور وزیرِ داخلہ کو برطرف کیا گیا اس وجہ سے کہ وہ جھوٹی خبر پتہ ہونے کے باوجود ملک دشمنی کا مظاہرہ کرتے رہے اور خبر نہ رکوائی۔ چلو مان لیا اس بات کوبھی۔ اصل سوال تو ابھی بھی وہیں کا وہیں کھڑا ہے۔ کہ ڈان کو جھوٹی خبر دی کس نے؟ بھئی دیکھیں نا حکومت ایک جھوٹی خبر لگنے کی وجہ سے اپنے ایک وزیر کو برطرف کر رہی ہے اس وجہ سے کہ جھوٹی خبر نہ رکوا سکا۔ تو جناب جھوٹی خبر آئی کہاں سے؟ وزیر تو قربانی بکرا بنا رہے ہیں اصل سوال کا جواب کیوں نہیں دے رہی حکومت کہ جھوٹی خبر ڈان کو دی کس نے؟
تیسرا سوال:
ڈان نے جھوٹی کہانی چھاپی حکومت نے کہا جھوٹ ہے۔ اچھا اس جھوٹ کی وجہ سے دنیا بھر میں پاکستان کو دھشت گرد کہا گیا، مودی کی ساکھ بحال ہو گئی، ضربِ عضب کو دنیا والوں نے ڈرامہ قرار دیا۔ جھوٹی کہانی چھاپنے والوں کے خلاف حکومت نے اب تک کوئی کاروائی کیوں نہیں کی اگر حکومت خود ملوث نہیں ہے تو؟ حکومت کو کس بات کا ڈر ہے جو ڈان کے خلاف کاروائی سے گبھرا رہی ہے؟
جاننا قوم کا حق ہے۔ جمہوری، آئینی اور معاشرتی طور پر قوم سے سچائی چھپانا جرم ہے۔ حکومت کو چاہیے کہ اولین فرصت میں ان سوالات کا جواب دے کر عوام کو مطمئن کرے۔
تبصرہ لکھیے