Tag: ہندوستان

حال ہی میں نومبر 2008کے ممبئی حملوں میں ملوث پاکستانی نژاد کینیڈا کے شہری تہور حسین رانا کی امریکہ سے ہندوستان حوالگی ایک بڑی سفارتی کامیابی گر دانی جار ہی ہے۔ مگر بڑا سوال ہے کہ کیا اس حوالگی سے ممبئی حملوں کی پلاننگ وغیر کے حوالے سے ٹوٹے ہوئے تار جوڑنے میں مدد ملے گی؟

عوامی یادداشت انتہائی کمزور ہوتی ہے۔ اگر یہ کمزور نہ ہوتی، تو یقیناًسوال پوچھا جاتا کہ 25جون 2012ء کی اسی طرح ہندوستانی ایجنسیوں نے ذبیح الدین انصاری عرف ابو جندل کو سعودی عرب سے لانے میں جب کامیابی حاصل کی تھی، تو ان تیرہ برسوں میں کیس میں کس قدر پیش رفت ہوئی ہے؟

اس وقت بھی بالکل اسی طرح کا ڈھونڈورا پیٹا گیا تھا کہ اب ممبئی حملوں کی پوری سازش بے نقاب ہو جائےگی۔ 2008ء سے ہی بتایا جاتا تھا کہ مہاراشٹر کے بیہڑ ضلع کے رہائشی انصاری ہی حملوں کے وقت کراچی میں قائم کنٹرول روم سے حملہ آوروں کو گائیڈ کر رہا تھا۔مگر 2016ء میں عدالت نے اس کو 2006ء میں اورنگ آباد کے اسلحہ برآمدگی کیس میں سزا سنائی۔ ممبئی حملوں کے سلسلے میں اس کی ٹرائل کی اب خبر بھی نہیں آرہی ہے۔

ہندوستان کے اقتصادی مرکز ممبئی پر ہونے والا دہشت گرد حملہ اس لحاظ سے منفردتھاکہ اس سے دو ماہ قبل ہی پاکستانی دارالحکومت اسلام آباد میں میرٹ ہوٹل پر خود کش ٹرک حملہ میں پچاس سے زائد افراد ہلاک ہوچکے تھے، جن میں تین امریکی شہری بھی شامل تھے۔ اس کے علاوہ امریکی سی آئی اے اور ہندوستانی خفیہ ایجنسیوں جیسے انٹلی جنس بیورو، ریسرچ اینڈ انیلیسز ونگ(را)سمیت تقریباً سبھی خفیہ اداروں حتیٰ کہ ممبئی پولیس اور پانچ ستارہ ہوٹل تاج کی انتظامیہ کو بھی ا ن حملوں کی پیشگی اطلاع تھی۔ دو برطانوی صحافیوں اڈرین لیوی اور کیتھی اسکارٹ کلارک کی تحقیق پر مبنی کتاب ”دی سیج” کے مطابق، اس حملے سے پہلے ایک سال کے دوران مختلف اوقات میں چھبیس اطلاعات ان اداروں کوموصول ہوئیں جن میں ان حملوں کی پیشن گوئی کے علاوہ حملہ آوروں کے راستوں کی بھی نشاندہی کی گئی تھی۔ خفیہ معلومات اس حد تک واضح تھیں کہ اگست2008 ء میں جب ممبئی پولیس کے ایک افسر وشواس ناگرے پا ٹل نے شہر کے فیشن ایبل علاقے کے ڈپٹی کمشنر آف پولیس کا چارج سنبھالا تو ان کی نظر اس خفیہ فائل پر پڑی جس میں نہ صرف حملوں کا ذکر تھا بلکہ اس کے طریق کار پر بھی معلومات درج تھیں۔ ان اطلاعات کا ماخذ امریکی خفیہ ایجنسی سی آئی اے تھی۔آئی بی کے ایک مخبر کی طرف سے بھیجی گئی پل پل کی اطلاعات بھی موجود تھیں جن میں حملے کے لیے تاج ہوٹل کی بھی نشاندہی کی گئی تھی۔ اس افسر نے فوراً تاج ہوٹل کی انتظامیہ کو متنبہ کیا کہ وہ معقول حفاظتی انتظامات کا بندوبست کریں۔ اسلام آبادکے میریٹ ہوٹل میں دھماکہ اور اکتوبر میں دوبارہ اسی طرح کی خفیہ معلومات ملنے کے بعد پاٹل نے تاج ہوٹل کی سکیورٹی کے ساتھ گھنٹوں کی ریہرسل کی،کئی دروازے بند کروائے اور اس کے ٹاور کے پاس سکیورٹی پکٹ قائم کی۔ ان انتظامات کے بعد پاٹل چھٹی پر چلے گئے۔اس دوران تاج ہوٹل کی انتظامیہ نے نہ صرف حفاظتی بندشیں اورسکیورٹی پکٹ ہٹوا دیں۔ بتایا گیا کہ حفاظت پر مامور حفاظتی اہلکار دوران ڈیوٹی ہوٹل کے کچن سے کھانا مانگ رہے ہیں۔ اتنی واضح خفیہ اطلاعات اور ریہرسل تک کے باوجود ہندوستانی سکیورٹی ایجنسیوں نے ان حملوں کو روکنے کی پیش بندی کیوں نہیں کی؟ یہ ایک بڑا سوال ہے جس سے پردہ اٹھنا باقی ہے۔

یہ سوال اس لیے بھی اہم ہے کہ دو سال کے تعطل کے بعد جولائی2006ء میں ممبئی ٹرین دھماکوں اوربعد میں سمجھوتہ ایکسپریس پرکیے گئے حملوں کے بعدپاکستان اورہندوستان باہمی تعلقات معمول پر لانے کی سعی کر رہے تھے۔ جس وقت ممبئی میں حملہ ہوا، عین اسی وقت پاکستانی وزیرخارجہ شاہ محمود قریشی اپنے ہندوستانی ہم منصب پرنب مکھرجی کے ساتھ نئی دہلی کے حیدر آباد ہاؤس میں محوگفتگو تھے اور ہندوستانی سکریٹری داخلہ مدھوکر گپتا پاکستان میں تھے۔

اس کتاب میں حملے کے محرک پاکستانی نژاد امریکی شہری ڈیوڈ کولمین ہیڈلی کے کردار اور پس منظر پر خاصی روشنی ڈالی گئی ہے۔ اس کے مطابق ہیڈلی دراصل امریکی انسداد منشیات ایجنسی اور سی آئی اے کے مخبر کے طور پر کام کرتاتھا۔ ڈرگ انفورسمنٹ کے لیے اطلاعات فراہم کرنے اور ہیروئن حاصل کرنے کے لیے ہیڈلی نے جب 2006 ء میں افغانستان سے متصل سرحدی قبائلی علاقوں کا دورہ کیا تھا۔ امریکہ کو اندیشہ تھا کہ القاعدہ کے جنگجو لشکر کی صفوں میں داخل ہوگئے ہیں جن کے ذریعے اسامہ بن لادن تک پہنچا جاسکتا ہے۔

ممبئی میں یہودیوں کے مرکز ’شباڈ ہاؤس‘ پرحملے کے لیے لشکر کی اعلیٰ قیادت تیار نہیں تھی، کیونکہ ان کو علم تھا کہ اس سے وہ عالمی جہاد کا حصہ بن کر القاعدہ اور طالبان کی طرح برا ہ راست امریکی اوردیگر مغربی طاقتوں کا نشانہ بن جائیں گے،لیکن ان تفتیشی صحافیوں کے مطابق کیمپ میں مقیم زیرتربیت اٹھارہ ہندوستانی جنگجوؤ ں کے اصرار پر شباڈ ہاؤس کو ٹارگٹ لسٹ میں شامل کرلیا گیا۔ان میں ذبیح الدین انصاری عرف ابوجندل بھی شامل تھا۔ صوبہ مہاراشٹر میں انصاری کوجاننے والوں کا کہنا ہے کہ وہ ضلع بیہڑ کے پولیس ہیڈکوارٹر میں بطورالیکٹریشن اورمقامی مخبرکام کرتا تھا۔انسداد دہشت گردی سیل کے سربراہ کے پی رگھونشی جب ایک بار ضلع کے دورہ پر تھے، تو اس کو اپنے ساتھ لے گئے۔ بتایا جاتا ہے کہ 2006ء میں اسی صوبے کے شہر اورنگ آباد میں اسلحے کے ایک بڑے ذخیرے کو پکڑوانے میں انصاری نے کلیدی کردار ادا کیا،جس کے بعد وہ روپوش ہوکرلشکر میں شامل ہوگیا۔اسی کیس میں اس کو سزا بھی ہوگئی ہے۔

ادھر امریکہ اورپاکستان میں ہیڈلی کی گرل فرینڈز، بیوی اوردوسرے اہل خانہ اس کی مشکوک سرگرمیوں کے بارے میں خدشات ظاہرکررہے تھے۔ پاکستان میں مقیم اس کی بیوی فائزہ نے اسلام آباد میں امریکی سفارت خانہ جاکربھی شکوک و شبہات کا اظہار کیا اوراصرار کیا کہ اس کے شوہر کی وقتاً فوقتاً ممبئی جانے اوروہاں اس کی مصروفیات کی تفتیش کی جائے، مگر سفارت خانہ کے افسروں نے اس کی شکایت کو خانگی جھگڑاقرار دے کر فائل داخل دفترکردی۔

دوسری جانب خفیہ اطلاعات کے باوجود ہندوستان کی سکیورٹی انتظامیہ کی لاپرواہی کا اندازہ اس سے لگایا جاسکتا ہے کہ جب نیشنل سکیورٹی گارڈز (این ایس جی) نے دہلی سے متصل ہریانہ میں اپنے ہیڈکوارٹرسے حملوں کے بیس منٹ بعد ہی نقل و حرکت شروع کی تو کابینہ سکریٹری اور بعد میں وزارت داخلہ کے ایک جوائنٹ سکریٹری نے فون کرکے انھیں متنبہ کیا کہ وہ احکامات کے بغیرنقل و حرکت کرنے کے مرتکب ہوئے ہیں۔ اس تنبیہ کے ستر منٹ بعد وزارت داخلہ نے انھیں بتایا کہ صوبائی وزیراعلیٰ نے این ایس جی کی مدد مانگی ہے، اس لیے وہ فوراً ممبئی روانہ ہوجائیں مگر ائیر پورٹ جاکر معلوم ہوا کہ ہندوستانی فضائیہ کا ٹرانسپورٹ طیارہ ابھی کئی سو کلومیٹر دور چندی گڑھ میں ہے۔ کمانڈو یونٹ کے سربراہ جیوتی دتہ نے را ء سے ان کا خصوصی طیارہ مانگا تو پتہ چلا کہ اس کا عملہ غائب ہے اور جہاز میں ایندھن بھی نہیں ہے۔آدھی رات کے بعد جب دستہ طیارے میں سوار ہوا توان کو بتایا گیا کہ وزارت داخلہ کے چند افسر بھی ان کے ہمراہ جارہے ہیں، اس لیے ان کا انتظار کیا جائے۔ بالآخر جب طیارہ اگلے دن صبح ممبئی پہنچا تو افسرکو لینے کے لیے چمچاتی اور لال بتی والی گاڑیاں موجود تھیں، مگر کمانڈو دستوں کو لے جانے کے لیے کوئی ٹرانسپورٹ نہیں تھی۔ اس عرصے کے دوران تاج اور اوبرائے ہوٹلوں کے علاوہ یہودی مرکز پر جنگجوؤں نے مکمل کنٹرول حاصل کرلیا تھا اور سینکڑوں افراد لقمہ اجل بن چکے تھے۔

ان حملوں سے دو سال قبل18فروری 2007ء کی شب دہلی اور لاہور کے درمیان چلنے والی سمجھوتہ ایکسپریس کے دو ڈبے تاریخی شہر پانی پت کے نزدیک دھماکوں سے اڑ گئے۔ 68 اموات میں اکثر پاکستانی شہری تھے۔ ابتدائی تفتیش میں ہندوستانی ایجنسیوں نے ان دھماکوں کے تار بھی مسلم نوجوانوں کے ساتھ جوڑنے کی کوشش کی، چند ایک کو حراست میں بھی لیا۔ میڈیا میں انڈین مجاہدین اور پاکستان میں سرگرم کئی تنظیموں کا بھی نام لیا گیا۔ مگر چند دیانت دار افسران کی بدولت اس دھماکہ میں ایک ہندو انتہا پسند تنظیم’ ابھینوبھارت‘ کے رول کو بے نقاب کیا گیا۔سب سے زیادہ خطرے کی گھنٹی اس وقت بجی جب نومبر 2008ء میں ملٹری انٹیلی جنس کے ایک حاضر سروس کرنل پرساد سری کانت پروہت کے رول کی نشاندہی کرکے اس کو گرفتار کیا گیا۔ اگلے دو سالوں میں نیشنل انویسٹی گیٹنگ ایجنسی (این آئی اے) نے سوامی اسیما نند اور ایک انجینئر سندیپ ڈانگے کو بھی حراست میں لے لیا۔ اسی دوران راجستھان کے انٹی ٹیررسٹ اسکواڈ کے 806 صفحات پر مشتمل فرد جرم میں انکشاف کیاگیاکہ فروری 2006ء میں ہندو انتہا پسندوں نے وسطی ہندوستان کے ایک شہر اندور میں سمجھوتہ ایکسپریس پر حملے کی سازش تیار کی تھی۔ اس میٹنگ میں ہندو انتہا پسندوں کی مربی تنظیم راشٹریہ سیوک سیوم سنگھ(آر ایس ایس) کے مقتدر لیڈر اندریش کمار بھی موجود تھے۔ اس سے قبل ان کا نام اجمیر شریف کی درگاہ میں ہوئے دھماکہ کی سازش میں بھی آیا تھا۔مگر ان کی کبھی دوران حراست تفتیش نہیں ہوئی۔ 12 فروری 2012ء میں این آئی نے آر ایس ایس کے کارکنوں راجندر پہلوان، کمل چوہان اور اجیت چوہان کر گرفتار کیا۔ ایجنسی کے بقول ان تین افراد نے ہی ٹرین میں بم نصب کیے تھے۔

گو کہ ہندوستان میں سرکاری ایجنسیاں دہشت گردی سے متعلق واقعات کے تار آنکھ بند کیے مسلمانوں سے جوڑتی آرہی ہیں، مگر 29 ستمبر 2008ء کو مہاراشٹر کے مالیگاؤں شہر کے ایک مسلم اکثریتی علاقہ میں ہوئے دھماکوں اور اس میں ملی لیڈز نے مہاراشٹر کے اینٹی ٹیررسٹ اسکواڈ کے سربراہ ہیمنت کرکرے کو چونکا دیا۔ ایک غیر جانبدارانہ تفتیش کے بعد اس نے ہندو دہشت گردی کا بھانڈا فاش کیا۔ کرکرے ممبئی حملوں میں دہشت گردوں کا نشانہ بن گئے، جس کے بعد یہ تفتیش مرکزی ایجنسی این آئی اے کے سپر د کی گئی۔ اس کے بعد تو حیدرآباد کی مکہ مسجد، اجمیر درگاہ، سمجھوتہ ایکسپریس دھماکوں کے تار ہندو دہشت گردی سے جڑتے گئے۔ جب کرکرے نے یہ نیٹ ورک بے نقاب کیا تھا تو بی جے پی اور شیو سینا کے متعدد رہنماؤں نے ان کے خلاف زبردست شور برپا کیا اور انہیں ’ملک کا غدار‘ قرار دیا تھا۔ بہرحال کرکرے کی تحقیق کا یہ نتیجہ نکلا کہ دہشت گردانہ واقعات کے بارے میں جو عمومی تاثر پید اکردیا گیا تھا، وہ کچھ حد تک تبدیل ہوا کہ اس کے پشت پر وہ عناصر بھی ہیں جو اس ملک کوہندو راشٹر بنانا چاہتے ہیں۔ ابتداء میں ان واقعات میں معصوم مسلم نوجوانوں کو ماخوذ کرکے انہیں ایذائیں دی گئیں اور کئی ایک کو برسوں تک جیلوں میں بند رکھا گیا۔

ایک معروف صحافی لینا گیتا رگھوناتھ نے کانگریسی حکومت کی ہند و دہشت گردی کے تئیں’ نرم رویہ‘ کو افشاں کیا تھا۔ لینا کے بقول تفتیشی ایجنسیوں کے ایک افسر نے انھیں نام نہ ظاہر کرنے کی شرط پر وزارت داخلہ کو سونپی گئی ان خفیہ رپورٹوں کے مطالعے کی اجازت دی تھی۔ ان رپورٹوں میں مرکزی وزارت داخلہ سے یہ درخواست کی گئی تھی کہ وہ آر ایس ایس کو ایک شو کاز (وجہ بتاؤ) نوٹس جاری کرے کہ اس کے خلاف جو شواہد اور ثبوت ہیں کیوں نہ ان کی بنیاد پر اسے غیر قانونی اور ممنوع قرار دیا جائے؟ مہاراشٹر کی اس وقت کی کانگریس کی قیادت میں مخلوط حکومت نے بھی ابھینو بھارت اور دیگر ہندو انتہا پسند تنظیموں کو غیر قانونی قرار دینے کی سفارش کی تھی لیکن اس پر مرکزی حکومت نے عمل نہیں کیا۔

خیر اب سب سے بڑا سوال یہ ہے کہ کیا تہور حسین رانا کی حوالگی سے ممبئی حملوں کے باقی تار جڑ جائیں گے یا اس کو بس گودی میڈیا کے ذریعے ڈھنڈورا پٹوانے کا کام کیا جائےگا۔ کئی تجزیہ کارو ں کا کہنا ہے کہ رانا کو موت کی سزا دے کر ہی اب اگلا عام انتخاب لڑا جائےگا۔ ویسے عوامی یاداشت اتنی کمزور تو ہے ہی کہ انصاری کی حوالگی جس طرح اب یادداشت سے محو ہو چکی ہے، چند سال بعد رانا کی حوالگی کو بھی عوام بھول جائیں گے۔ میڈیا جو ایک زمانے میں سوال پوچھتا تھا، وہ اب حکومت کا احتساب کرنے سے کتراتا ہے، خاص طور پر جب قومی سلامتی کا معاملہ ہو۔

غالباً 2018ء میں جب جموں و کشمیر کے گورنر نریندر ناتھ ووہرا کی مدت ختم ہو رہی تھی. دہلی میں ان کے ممکنہ جانشین کے بطور ریٹائرڈ لیفیٹننٹ جنرل سید عطا حسنین کا نام گردش کر رہا تھا۔ جنرل حسنین جو سرینگر میں موجود فوج کی چنار یا 15 ویں کور کے کمانڈر رہ چکے تھے، کی کشمیر میں بطور گورنر کی ممکنہ تعیناتی پر میں چونک سا گیا تھا. انھی دنوں انڈیا انٹرنیشنل سینٹر میں سر راہ ملاقات کے دوران میں نے ان سے پوچھا کہ اس خبر کا ماخذ کیا ہے؟ تو ان کا کہنا تھا کہ نہایت ہی اعلیٰ ذرائع سے ان کو بتایا گیا ہے کہ وہ اس عہدے کے لیے تیار رہیں۔ میں نے ان سے کہا، چاہے وہ کتنے ہی سیکولر کیوں نہ ہوں، ان کا نام مسلمانوں جیسا ہے، اس لیے وہ اس عہدہ کے تقاضوں پر پورے نہیں اترتے ہیں۔ اب ان کے چونکنے کی باری تھی۔میں نے بتایا کہ جموں و کشمیر کا گورنر ویشنو دیو ی شرائن بورڈ اور امرناتھ شرائن بورڈ کا چیئرمین بھی ہوتا ہے۔ ان دونوں تیرتھ استھانوں کے ایکٹ میں واضح طور پر درج ہے کہ اس کا چیئرمین ایک ہندو ہی ہوسکتا ہے۔ یہی ہوا کہ چند رو ز بعد ایک ہندو ستیہ پال ملک کو گورنری کی دستار تفویض کی گئی۔ یعنی ایک مسلم اکثریتی خطہ ہونے کے باوجود جموں و کشمیر کا گورنر یا لیفٹیننٹ گورنر مسلمان نہیں ہوسکتا ہے، کیونکہ وہ ہندو استھانوں کے انتظام و انصرام کا ذمہ دار بھی ہوتا ہے۔

ستم ظریفی دیکھیے ابھی حال ہی میں ہندوستانی پارلیمنٹ نے سو سال قدیم مسلم وقف قانون کو رد کرکے ایک نیا قانون پاس کرکے اس میں یہ لازم قرار دیا کہ مرکزی وقف کونسل اور ریاستی وقف بورڈذ کے بیشتر اراکین غیر مسلم ہونے چاہییں۔ سابقہ قانون کے تحت دونوں اداروں کے تمام اراکین کا مسلمان ہونا ضروری تھا۔اب اس میں غیر مسلم اراکین کی لازمی شمولیت متعین کر دی گئی ہے۔ یہاں تک کہ مرکزی وقف کونسل میں 22 میں سے 12 اراکین غیر مسلم ہو ں گے اور ریاستی وقف بورڈز میں 11 میں سے 7 اراکین غیر مسلم ہو سکتے ہیں۔چار مسلم اراکین میں دو خواتین کا ہونا لازمی ہے۔ ان اراکین اور چیئرمین کو اب حکومت نامزد کرےگی۔ نیز ریاستی وقف بورڈ کے چیف ایگزیکٹو آفیسر کا بھی مسلمان ہونا ضروری نہیں ہے۔وقف جائیدادوں کے تنازعوں کا نپٹارا کرنے کے لیے قائم وقف ٹربیونل میں مسلم ماہر قانون کی موجودگی لازمی ہوتی تھی۔ اب ٹربیونل صرف ایک موجودہ یا سابقہ ڈسٹرکٹ جج اور ایک ریاستی افسر پر مشتمل ہوگا۔ مہاراشٹرا میں شری سائی بابا ٹرسٹ کا قانون کہتا ہے کہ جو افسر وہاں کام کرے گا اسے سائی بابا کا عقیدت مند ہونا چاہیے اور اسے ڈیکلریشن دینا پڑتا ہے۔ اسی طرح دیگر ہندو یا دیگر مذاہب کے مٹھوں یا عبادت گاہوں کے انتظام ا انصرام کےلیے اسی مذہب کا ہونا لازمی ہے، تاکہ وہ دل و جان اور عقیدہ کے ساتھ اس ادرارے کی خدمت کرسکے۔

یہ نیا قانون کس قدر متعصبانہ حد تک ظالمانہ ہے کہ اس کی ایک اور شق کے مطابق اب صرف ایسا شخص ہی وقف یا اسلامی مذہبی و فلاحی مقاصد کے لیے زمین یا جائیداد عطیہ کر سکتا ہے، جو کم از کم پانچ سال سے با عمل مسلمان ہونے کا ثبوت پیش کرے گا۔ وہ دینداری کا ثبوت کیسے فراہم کرے گا اس کی کوئی وضاحت نہیں کی گئی ہے۔ کیا کسی سند کی ضرورت ہوگی یا علماء کی تصدیق درکار ہوگی؟ اور یہ فیصلہ کون کرے گا کہ وہ پچھلے پانچ سال سے باعمل مسلمان ہے یا اسلام پر عمل پیرا ہونے کا معیار کیا ہے؟ یعنی یہ قانون غیر مسلموں کو وقف بورڈز میں شامل ہونے اور اس کا انتظام و انصرام چلانے کی اجازت دیتا ہے، مگر اگر وہ وقف کے کاموں کے لیے عطیہ دینا چاہیں گے، تو اس کی اجازت نہیں دیتا ہے۔

تنگ نظری اور تعصب کی عینک پہن کر بنایا گیا یہ قانون تضاد ات کا عجیب مجموعہ ہے۔ اسی طرح اگر کوئی متولی وقف جائیداد بیچتا ہے تو پہلے دو سال کی سزا تھی،اس کو اب چھ ماہ کر دیا گیا ہے۔ پہلے یہ جرم ناقابل ضمانت (نان بیل ایبل) تھا، اس کو قابل ضمانت (بیل ایبل) بنا دیا گیا ہے۔اگر کسی جائیداد پر حکومت اور وقف بورڈ کا تنازعہ ہے، تو اب وہ وقف نہیں مانی جائے گی۔ کلکٹر ایسے معاملات میں اپنی رپورٹ ریاستی حکومت کو دے گا اور مالکانہ ریکارڈ میں تبدیلی کرے گا۔ دارالحکومت دہلی کے سینٹرل گورنمٹ آفس کمپلکس کا بیشتر حصہ جس میں خفیہ ایجنسی راء سمیت سینٹرل بیورو آف انویسٹی گیشن سمیت کئی سرکاری اداروں کے صدر دفاتر وقف کی زمینوں پر تعمیر کیے گئے ہیں، اب ہمیشہ کے لیےوقف کی دسترس سے باہر ہو گئے ہیں۔

ایک بار انٹرویو کے دوران مسلم لیڈر اور بابری مسجد ایکشن کمیٹی کے رکن مرحوم جاوید حبیب نے مجھے کہا تھا کہ بابری مسجدکی شہادت کا سانحہ اس خطے کی جدید تاریخ کے پانچ بڑے واقعات میں سے ایک ہے۔ پہلا 1857ء کی جنگ آزادی، دوسرا 1920ء میں مہاتما گاندھی کی قیادت میں کانگریس کا نیا آئین اور سوراج کا مطالبہ، تیسرا 1947ء میں تقسیم ہند اور آزادی، چوتھا 1971ء میں بنگلہ دیش کا وجود میں آنا، اور پانچواں 1984ء میں سکھوں کی مقدس عبادت گاہ گولڈن ٹمپل پرحملہ اور 1992ء میں بابری مسجد کا انہدام، جو دراصل اعتماد کا انہدام تھا۔ اگر وہ زندہ ہوتے تو ریاست جموں و کشمیر کی 2019ءمیں خصوصی حیثیت کے خاتمہ اور اب 2025ء میں صدیوں سے مسلمانوں کی طرف سے وقف کی گئی زمینوں، جائیدادوں، جن سے مساجد، مدرسے اورمتعدد تعلیمی اور رفاہی ادارے چلتے ہیں، کے مالکانہ حق پر شب خون مارنے کو بھی اس فہرست میں شامل کردیتے۔ بقول سابق رکن پارلیمنٹ محمد ادیب بابری مسجد تو بس ایک عبادت گاہ تھی، اب تو اس نئے وقف قانون سے ہندوستان کی سبھی مساجد و درگاہوں کا مستقبل داؤ پر لگ گیا ہے ۔

پچھلی دو دہائیوں سے سکھ اکثریتی صوبہ پنجاب سے اکثر خبریں آتی تھیں کہ مقامی سکھ خاندان یا کسان اپنے علاقوں میں1947ءسے غیر آباد مساجد کو دوبارہ آباد کرانے یا نئی مساجد بنانے کے لیے اپنی زمینیں بطور عطیہ دے رہے ہیں۔ اس طرح کے کم و بیش دو سو سے زیادہ واقعات رپورٹ ہوئے ہیں۔ چونکہ اس صوبہ میں مسلم آبادی ہی ایک فیصد سے کم ہے، اس لیے مسلمان ا ن مساجد کو آباد کر ہی نہیں سکتے ہیں، کیونکہ اکثر دیہی علاقوں میں دور دور تک ان کی آبادی ہی نہیں ہے ۔ رواں برس کے اوائل میں ہی ضلع مالیرکوٹلہ کے ایک گاؤں عمرپورہ میں سکھجندر سنگھ نونی اور ان کے بھائی اوینندر سنگھ نے مسجد کی تعمیر کے لیے کئی ایکڑ زرعی زمین وقف کر دی۔ ا ن کا کہنا تھا کہ چونکہ ان کے گاؤں میں آباد مسلمان گھرانوں کے پاس عبادت کے لیے کوئی مسجد نہیں تھی، اس لیے انھوں نے اپنی ذمہ داری سمجھتے ہوئے یہ زمین عطیہ کرنے کا فیصلہ کیا۔ دیگر سکھوں تجونت سنگھ اور رویندر سنگھ گریوال نے مسجد کی تعمیر میں مالی معاونت فراہم کی۔ وہ ریاست جہاں مسلمانوں کی آبادی محض 1.9 فیصد ہے اور جہاں 1947 میں خونریز فسادات ہوئے تھے، اب ایک خاموش انقلاب، یعنی فرقہ وارانہ رواداری کی نقیب بنی ہوئی ہے ۔ اسی طرح جٹوال کلاں نامی سکھ اکثریتی گاؤں میں، جہاں مشکل سے درجن بھر مسلم گھرانے آباد ہیں، ایک نئی مسجد تقریباً مکمل ہو چکی ہے۔ یہ سب سکھوں کی زمین اور مالی عطیات کی بدولت ممکن ہوا۔ اب نئے وقف قانون کی رو سے پنجاب میں سکھ خاندانوں کی جانب سے مسلمانوں کے لیے عطیہ کی گئی سینکڑوں زمینیں کالعدم یا غیر قانونی قرار پائیں گی۔ایک سکھ سرپنچ کے مطابق اگر یہ قانون پہلے سے نافذ ہوتا تو وہ مسجد بنانے میں مدد نہیں کرسکتے تھے۔ ان کا کہنا تھا کہ یہ معاملہ صرف عطیہ کا نہیں، بلکہ مشترکہ زندگیوں کا ہے اور حکومت ایسی یکجہتی کی راہ میں کیسے رکاوٹ ڈال سکتی ہے۔

اعداد و شمار کے مطابق ہندوستان میں وقف کی 8لاکھ72ہزار جائیدادیں ہیں، جن میں زرعی اور غیر زرعی زمینیں، ایک لاکھ سے زائد مساجد، مکانات اور تیس ہزار کے قریب درگاہیں شامل ہیں۔ جن میں سے 7 فیصد پر قبضہ ہے، 2 فیصد مقدمات میں ہیں اور 50 فیصد کی حالت نامعلوم ہے۔ 2013ء میں منموہن سنگھ کی قیادت میں کانگریسی حکومت نے وقف پراپرٹی پر قبضوں کے خلاف جو سخت قانون بنایا تھا، اس کی وجہ سے21 لاکھ ایکڑ کی زمین واگزار کرائی گئی تھی۔ اس طرح وقف کی ملکیتی زمینیں 18لاکھ ایکڑ سے 39لاکھ ایکڑ تک بڑھ گئی تھیں۔ ہندو فرقہ کو لام بند کرنے کے لیے ایک پروپیگنڈہ کیا گیا کہ مسلمانوں نے زمینوں پر قبضہ کیا ہوا ہے اور ساتھ ہی یہ ابہام بھی پھیلایا گیا کہ ہندوستان میں ریلوے اور محکمہ دفاع کے بعد سب سے زیادہ جائیداد وقف کی ہے۔ حالانکہ سچ یہ ہے کہ صرف چار ریاستوں تامل ناڈو، آندھرا پردیش، تلنگانہ اور اڑیسہ میں ہندو مٹھوں و مندروں کے پاس 10لاکھ ایکڑ اراضی ہے۔ اگر اس میں دیگر ریاستیں، خاص طور پر شمالی ہندوستان کی اترپردیش اور بہار کو شامل کیا جائے تو یہ وقف کے پاس موجود اراضی سے کئی گنا زیادہ ہوں گی۔ اسی طرح مسیحی برادری بھی ہر شہر میں پرائم پراپرٹی کی مالک ہے۔

سیاسی تجزیہ کار سنجے کے جھا نے دی وائر میں لکھا کہ یہ قانون دراصل فرقہ وارانہ شکوک پیدا کرنے کی بڑی سازش کا حصہ ہے، جسے حکومت عوام کی بھلائی کے نام پر پیش کر رہی ہے۔وزیر اعظم نریندر مودی حکومت کا یہ دعویٰ کہ اس نے وقف بل مسلمانوں کی فلاح کے لیے لایا ہے، آزاد ہندوستان کی تاریخ کا بدترین سیاسی فریب ہے۔ اس جھوٹ کو بیچنے کا جو حوصلہ حکومت نے دکھایا ہے وہ ناقابل یقین ہے۔ان کا مقصد مسلمانوں کو تنہا اور الگ تھلگ کرنا ہے۔ اس قانون کے اثرات پنجاب سے کہیں آگے تک ہیں۔ پورے ہندوستان میں اب بین المذاہب خیرات شک کی نگاہ سے دیکھی جاے گی۔ کوئی ہندو یا سکھ اگر کسی مسلم وقف ادارے کو عطیہ دینا چاہے تو پہلے اُسے مذہب تبدیل کرنا ہوگا اور پانچ سال انتظار کرنا پڑے گا۔ یوں خیرات کا جذبہ سرکاری دھندلکوں میں الجھ کر رہ جائےگا۔ ایسی حکومت، جس کے پاس ایک بھی مسلم رکن پارلیمنٹ نہیں، مسلمانوں کی فلاح و بہبود کے راگ الاپتی ہے، جبکہ اس کا سیاسی ڈھانچہ نفرت انگیز تقاریر، حاشیے پر ڈالنے والی پالیسیوں اورمسلمانوں کو قانونی جال میں جکڑنے کی مہم چلا رہا ہے۔ عمر پورہ اور جٹوال کلاں جیسے دیہاتوں میں سکھ اور مسلمان آج بھی مل کر بستیاں بساتے ہیں۔ مگر قانون کی نظر میں اب ان کی محبت اور بھائی چارہ قابلِ گرفت بھی ہو سکتی ہے۔ اسی طرح اب کسی بھی زمین کو وقف تسلیم کرنے کے لیے اس کی باضابطہ رجسٹریشن اور متعلقہ دستاویزات درکار ہوں گی۔ اب اگرسلاطین، تغلق یا مغل دور میں کوئی زمین وقف ہوئی ہو، اس کے دستاویزات کہاں سے لائیں جائیں گے۔

جموں و کشمیر وقف بورڈ کے اعداد و شمار کے مطابق، اس کے زیرِ انتظام 3300 جائیدادیں تقریباً 32000 کنال (تقریباً 4000 ایکڑ) زمین ہے۔ تاہم ایک بڑا حصہ—خصوصاً خانقاہیں، امام بارگاہیں، لنگر گاہیں اور قبرستان—ابھی تک غیر دستاویزی یا جزوی طور پر رجسٹرڈ ہیں۔ دیہی کشمیر میں ان مقامات کی بنیاد کئی نسلیں پہلے رکھی گئی تھی، اور انہیں رسمی قانونی طریقہ کار کے بجائے کمیونٹی کے مسلسل استعمال کے ذریعے سند حاصل ہوئی تھی۔ ”استعمال کے ذریعے وقف“ یعنی ”وقف بائی یوز“کی شق کے خاتمے کے بعد، یہ مقامات اب دوبارہ درجہ بندی، تنازعے یا حتیٰ کہ دوبارہ استعمال کے خطرے سے دوچار ہو سکتے ہیں۔ قانونی تحفظ، جو کبھی تسلسل اور اجتماعی یادداشت سے حاصل ہوتا تھا، اب مکمل طور پر تحریری دستاویزات پر منحصر ہو گیا ہے۔

تاریخی طور پر کشمیر میں —جیسے کہ برصغیر کے بیشتر حصوں میں —مذہبی اور فلاحی زمینیں اکثر باہمی اعتماد اور زبانی معاہدوں کی بنیاد پر قائم ہوتی تھیں۔ جہاں بزرگ کسی درخت تلے نماز پڑھنے بیٹھتے، وہاں مسجد وجود میں آجاتی؛ جہاں کسی گاؤں کے پہلے شہید کو دفنایا جاتا، وہاں قبرستان بن جاتا؛ اور جہاں کوئی صوفی اپنی جائے نماز بچھاتا، وہاں خانقاہ کی بنیاد پڑتی۔ ’استعمال کے ذریعے وقف‘ کا اصول ایسے مقامات کو قانونی حیثیت دیتا تھا، چاہے کوئی تحریری ثبوت موجود نہ ہو۔نیا قانون محض کوئی سرکاری ضابطے کی تبدیلی نہیں بلکہ ایک گہری تہذیبی تبدیلی ہے۔ کشمیر کے بیشتر علاقوں میں بے شمار قبرستان، خانقاہیں اور دینی مدارس مقامی افراد، محلوں یا گاؤں کی کمیٹیوں کے ذریعے چلائے جا رہے ہیں، جن کے پاس کوئی تحریری دستاویزات نہیں، مگر خدمت کے طویل اور بے داغ ریکارڈ ضرور ہیں. نیا قانون ان جائیدادوں پر ریاستی اداروں یا نجی ترقیاتی منصوبوں کے قبضے کا راستہ ہموار کر سکتا ہے، خصوصاً جدید کاری یا شہری منصوبہ بندی کے نام پر۔ دفعہ 370 کی منسوخی اورمرکزی انتظام کے بعد، اس اقدام کو کشمیر کے مزید مذہبی، ثقافتی اور سیاسی زوال کا حصہ سمجھا جا رہا ہے۔کبھی ان جائیدادوں کا محافظ سمجھے جانے والا جموں و کشمیر وقف بورڈ اب بے دست و پا نظر آتا ہے۔

وقف ترمیمی قانون کی منظوری نے اتر پردیش میں تقریباً 98 فیصد وقف جائیدادوں کو غیر یقینی صورتحال سے دوچار کر دیا ہے۔وقف کی پوری جائیدادوں کا 27فیصد حصہ اسی صوبہ میں ہے۔ ان میں سے ایک بڑی تعداد اب تک ریونیو ریکارڈز میں درج نہیں ہے۔ نئے قانون کے تحت وقف جائیدادوں کے فیصلے کا اختیار وقف بورڈ سے منتقل ہو کر ضلع مجسٹریٹ کے پاس اب ہوگا، جو زرعی سال 1359ھ (1952ء) کے ریونیو ریکارڈز کی بنیاد پر فیصلہ دیں گے۔ ترمیم کا اطلاق ان 57792 سرکاری جائیدادوں پر ہو گا، جو مختلف اضلاع میں پھیلی ہوئی ہیں اور مجموعی طور پر 11712 ایکڑ پر محیط ہیں۔ تیس سے زائد مسلم دانشورو ں، جن میں سابق بیوروکریٹ، یونیورسٹی اساتذہ، قانون دان، سیاستدان وغیرہ شامل ہیں نے ایک مشترکہ بیان میں شکایت کی ہے کہ پارلیمنٹ کی طرف سے وقف ایکٹ کی منظوری نے مسلم کمیونٹی کو مایوس اور الگ تھلگ کر دیا ہے۔ ان کے مطابق آئین ہند میں دیے گئے ان کے آئینی حقوق نظر انداز کر دیے گئے ہیں۔ اس عمل نے مسلم نوجوانوں میں بیگانگی کا احساس پیدا کیاہے، جو اب اپنے ملک کے سیاسی منظرنامے میں اپنی جگہ کے بارے میں سوالات اٹھا رہے ہیں۔ اس گروپ میں جس میں کئی سابق اعلیٰ فوجی افسران، جیسے لیفٹیننٹ جنرل ضمیر الدین شاہ، سابق پولیس سربراہ محمد وزیر انصاری شامل ہیں، کا کہنا ہے کہ موجودہ حالات دل دہلا دینے والے ہیں اوران کے آباء و اجداد کے وژن کے بالکل برعکس ہیں، جنھوں نے جامع مشترکہ قومیت کا تصور کیا تھا جہاں تمام اقوام ہم آہنگی کے ساتھ رہ سکیں گی۔

حیدر آباد کے ممبر پارلیمنٹ اور آل انڈیا مجلس اتحاد المسلمین کے سربراہ اسد الدین اویسی کے مطابق یہ وقف ترمیمی ایکٹ ہندوستان کے مسلمانوں کے ایمان اور عبادت پر ایک حملہ ہے۔ پارلیمنٹ میں اپنی تقریر میں انہوں نے کہا کہ نریندر مودی کی حکومت نے اس ملک کی سب سے بڑی اقلیت کے خلاف اعلان جنگ کر دیا ہے اور یہ جنگ آزادی، سماجی و معاشی سرگرمیوں اور شہریت پر ہے تو تھی ہی، اب مدارس، مساجد، خانقاہوں اور درگاہوں کو نشانہ بنایا جا رہا ہے۔ ہندو، سکھ، جین اور بدھ مت کے ماننے والوں کی وقف کی گئی جائیدادوں کا تحفظ برقرار رہےگا، کیونکہ ان کے قوانین کو تحفظ حاصل ہے اور ان کا انتظام خود ان کے ہاتھوں میں ہے۔ کوئی بھی غیر مذہب ا ن کے لیے عطیہ دے سکتا ہے اور ان کے انڈومنٹس کا تحفظ ہوگا۔ان پر لاء آف لیمیٹیشن کا اطلاق نہیں ہوگا۔ اویسی کا کہنا تھا کہ مسلمانوں سے وقف بائی یوزر چھینا گیا ہے، مگر دیگر مذاہب کے ماننے والوں کے لیےچھوٹ ہے۔ ہندو، بدھ، سکھ مذاہب کو منقولہ و غیرمنقولہ جائیداد کو حاصل کرنے اور اس کے انتظام کا حق حاصل ہے، مگر صرف مسلمانوں سے یہ حق چھینا گیا ہے۔

دہلی میں 271 وقف جائیدادیں محکمہ آثار قدیمہ کے کنٹرول میں ہیں۔ یہ جائیدادیں اب عملی طور پر مسلمانوں کے ہاتھوں سے نکل گئی ہیں، کیونکہ ان کی پاس ان کے مالکانہ حقوق کے دستاویزی ثبوت موجود نہیں ہیں۔ اس میں شمالی ہندوستان کی سب سے پہلی قطب الدین ایبک کی تعمیر کردہ تاریخی مسجد قوت الاسلام بھی ہے، جو قطب مینار کے بغل میں واقع ہے۔چونکہ تنازعہ کی صورت میں حکومت کے ہی افسر کو فیصلہ کرنا ہے، اسی لیے ایسی صورتوں میں جہاں تنازعہ حکومت کے کسی محکمہ کے ساتھ ہے، تو اس پراپرٹی کا خدا ہی حافظ ہے۔ وقف بائی یوزر میں جب کوئی افسر کہہ دے گا کہ یہ وقف کی جائیداد نہیں ہے، تو وقف بورڈ خاموش بیٹھ جائے گا اور کوئی کارروائی نہیں کرے گا،کیونکہ ان کے چیئرمین حکومت کے نامزد کردہ ہوں گے۔

اس قانون کے ذریعے شاید مسلمانوں کو بتایا گیا ہے کہ ان کی حالت ایسی ہوچکی ہے جیسے جنگل میں چرواہا بکریوں کو چھوڑ کر بھاگ گیا ہے اور ان کی دیکھ بھال بھیڑیوں کے سپرد کر دی گئی ہے، جو اس کو شیر سے بچانے کے نام پر خود نوچ رہے ہیں۔ بتایا جاتا ہے کہ وسط ایشیاء پر روس کے قبضے کے بعد سب سے پہلے اوقاف ضبط کیے گئے تھے تاکہ مساجد اور مدرسوں کے وسائل ختم کرائے جائیں۔ جب عوام نے چندہ جمع کرکے مسجدیں چلانا شروع کیں، تو چند ہ ٹیکس لگایا گیا۔ لوگوں نے اب گھروں میں نمازیں ادا کرنا شروع کیں، مساجد ویران ہوگئیں۔ مقامی کمیونسٹ پارٹی کے یونٹ قرار دار پاس کرتے کہ مسجد ویران ہے، اس لیے اس کو رفاہی کاموں کے لیے مختص کیا جائے۔ اس طرح مسجدکو شہید کروایا جاتا اور کسی اور تصرف میں لایا جاتا۔

ایک چیز خوش آئند ہے کہ ہندوستانی مسلم زعما کو یہ بات سمجھ میں آگئی ہے کہ ان کو کنارے لگایا گیا ہے۔ ورنہ جب ان سے درخواست کی جاتی کہ کشمیر میں ہورہے انسانی حقوق کی خلاف ورزیوں پر کچھ ہونٹ تو ہلائیں، تو ان کے منہ کا ذائقہ خرا ب ہوجاتا تھا۔ سال 2019 میں جب خصوصی حیثیت ختم کر دی گئی، تو جمعیت علماء ہند کے ایک ذمہ دار تو جنیوا مودی حکومت کا دفاع کرنے پہنچ گئے۔ ایک آدھ ملی رہنماؤں کو چھوڑ کر ان میں اکثر مارٹن نیمولر کی اس نظم کی عملی تفسیر تھے:
پہلے وہ سوشلسٹوں کے پیچھے آئے، اور میں خاموش رہا — کیونکہ میں سوشلسٹ نہیں تھا۔
پھر وہ ٹریڈ یونین کے کارکنوں کے پیچھے آئے، اور میں خاموش رہا — کیونکہ میں ٹریڈ یونین کا کارکن نہیں تھا۔
پھر وہ یہودیوں کے پیچھے آئے، اور میں خاموش رہا — کیونکہ میں یہودی نہیں تھا۔
پھر وہ میرے پیچھے آئے — اور بولنے والا کوئی نہ بچا تھا۔

شاید ہندوستان میں مسلمان ابھی تک خوش قسمت ہیں کہ ایک ذی ہوش طبقہ ابھی بھی ان کے ساتھ کھڑا ہے۔ان کو ساتھ لےکر ہی ان کی داد رسی ہوسکے گی، اور ان کی عبادت گاہوں کو تحفظ فراہم ہوسکے گا۔

بھارتی ریاست مہاراشٹر کے شہر ناگپور میں مغل شہنشاہ اورنگزیب کے مقبرے کو گرانے کے لیے کیے گئے مظاہروں کے نتیجے میں ہندو مسلم کشیدگی میں شدت آگئی۔ میڈیا رپورٹس کے مطابق، شہر میں پرتشدد جھڑپیں ہوئیں، کئی گاڑیاں جلا دی گئیں، اور گھروں پر پتھراؤ کیا گیا، جس سے متعدد افراد زخمی ہوگئے۔ پولیس نے صورتحال پر قابو پانے کے لیے 20 افراد کو حراست میں لے کر علاقے میں دفعہ 144 نافذ کر دی۔ کانگریس کے رہنما ہرش وردھن نے ان فسادات کا ذمہ دار ریاستی حکومت کو قرار دیتے ہوئے کہا کہ کئی دنوں سے ریاستی وزرا اشتعال انگیز تقاریر کر رہے تھے، جس کے نتیجے میں یہ ہنگامے پھوٹ پڑے۔

محی الدین محمد، جو اورنگزیب عالمگیر کے نام سے مشہور ہیں، مغلیہ سلطنت کے چھٹے شہنشاہ تھے۔ وہ 1658ء سے 1707ء تک تخت نشین رہے اور ان کے عہد میں مغل سلطنت اپنی جغرافیائی وسعت کی انتہا کو پہنچی۔ ان کے دورِ حکمرانی میں اسلامی قوانین کو نافذ کرنے کے لیے “فتاویٰ عالمگیری” مرتب کی گئی، جو آج بھی اسلامی فقہ کا ایک اہم ماخذ سمجھی جاتی ہے۔ اورنگزیب کو بعض مورخین ایک سخت گیر حکمران تصور کرتے ہیں، جبکہ دیگر انہیں ایک منصف مزاج اور عادل بادشاہ قرار دیتے ہیں۔ ان کے دور میں مندروں کو نقصان پہنچانے کے الزامات بھی لگائے گئے، لیکن تاریخی شواہد کے مطابق، انہوں نے کئی مندروں کی تعمیر و مرمت بھی کروائی۔ بھارت میں ہندو قوم پرست تنظیمیں اورنگزیب کے نام اور ان کے تاریخی مقامات کو مٹانے پر بضد ہیں۔ چند برس قبل، بی جے پی حکومت نے دہلی کی مشہور “اورنگزیب روڈ” کا نام تبدیل کر دیا تھا، اور اب “اورنگزیب لین” سمیت دیگر مغل شہنشاہوں سے منسوب سڑکوں کے نام بدلنے کے مطالبے کیے جا رہے ہیں۔

حالیہ واقعات کا آغاز اس وقت ہوا جب آل انڈیا مجلس اتحاد المسلمین (AIMIM) کے رہنما اکبر الدین اویسی نے اورنگ آباد میں اورنگزیب کے مقبرے پر حاضری دی، جس پر ہندو قوم پرست رہنماؤں نے شدید ردعمل دیا۔ ریاست کے سابق وزیر اعلیٰ اور بی جے پی کے رہنما دیویندر فڈنویس نے اورنگزیب کے خلاف نازیبا الفاظ استعمال کیے، جبکہ مہاراشٹر نونرمان سینا (MNS) کے ترجمان گجانن کالے نے مقبرے کو منہدم کرنے کی دھمکی دی۔ دیویندر فڈنویس نے کہا: “اویسی، میری بات سنو، اورنگزیب کی شناخت پر کتا بھی پیشاب نہیں کرے گا۔” یہ بیان بھارت میں بڑھتی ہوئی نفرت انگیزی اور تاریخی مسلم حکمرانوں سے شدید تعصب کی عکاسی کرتا ہے۔ ان واقعات کے دوران مراٹھی فلم چھاوا کی ریلیز نے بھی اورنگزیب کے خلاف ایک نئی بحث چھیڑ دی ہے۔ فلم میں مغل شہنشاہ کو منفی انداز میں پیش کیا گیا، جس پر بھارتی سماج میں رائے تقسیم ہوگئی۔

سماج وادی پارٹی (SP) کے رہنما ابو اعظمی نے اورنگزیب کا دفاع کرتے ہوئے کہا”وہ ایک انصاف پسند بادشاہ تھا، ظالم حکمران نہیں۔ اورنگزیب کے دور میں حکمرانی کی لڑائی تھی، مذہب کی نہیں۔ انہوں نے کئی ہندو مندروں کی بھی تعمیر کروائی تھی۔” یہ بیان بی جے پی اور دیگر ہندو انتہا پسند جماعتوں کو پسند نہیں آیا اور ابو اعظمی کو سخت تنقید کا نشانہ بنایا گیا۔

ہندو قوم پرست جماعتیں بھارت میں مسلم ورثے کو مٹانے کے لیے مسلسل متحرک ہیں۔ تاریخی مقامات اور اسلامی شخصیات کو نشانہ بنانے کے پیچھے دراصل وہی سوچ کارفرما ہے جس نے بابری مسجد کو شہید کیا اور دیگر مسلم آثار کو ختم کرنے کی کوشش کی۔ یہ رویہ صرف بھارت کے اندرونی معاملات تک محدود نہیں، بلکہ اس کے نتیجے میں خطے میں عدم استحکام اور پاکستان سمیت دیگر مسلم ممالک میں بھارت کے خلاف جذبات مزید شدت اختیار کر رہے ہیں۔ بھارت بطور ریاست اب بھی پاکستان کے وجود کو مکمل طور پر تسلیم کرنے کے لیے تیار نہیں اور عالمی سطح پر پاکستان مخالف سرگرمیوں میں مصروف ہے۔ بھارت خود کو دنیا کی سب سے بڑی جمہوریت اور ایک “سیکولر” ملک کہتا ہے، مگر زمینی حقائق اس دعوے کی نفی کرتے ہیں۔ تاریخی مقامات کے نام بدلنے، مساجد کو نشانہ بنانے، اور مسلم حکمرانوں کی توہین جیسے اقدامات اس بات کا واضح ثبوت ہیں کہ بھارت میں سیکولر ازم محض ایک کھوکھلا نعرہ بن چکا ہے۔

آج بھی ہندو قوم پرست جماعتیں مذہبی اقلیتوں کے خلاف ایجنڈا چلا رہی ہیں اور حکومتی سرپرستی میں مسلمانوں کے خلاف نفرت کو فروغ دیا جا رہا ہے۔ یہی رویہ دو قومی نظریے کی حقانیت کو ثابت کرتا ہے کہ برصغیر کے مسلمانوں کے لیے ایک علیحدہ ریاست کا قیام ناگزیر تھا۔ بھارت میں بڑھتی ہوئی مسلم دشمنی کے خلاف عالمی برادری کی خاموشی تشویشناک ہے۔ خاص طور پر عرب ممالک، جو بھارت کے ساتھ گہرے تجارتی تعلقات رکھتے ہیں، انہیں اس مسئلے پر سنجیدگی سے غور کرنا چاہیے۔ مسلم حکمرانوں نے برصغیر پر عدل و انصاف کی بنیاد پر حکمرانی کی، مگر موجودہ بھارتی قیادت تاریخ کو مسخ کرنے اور مسلم ثقافتی ورثے کو مٹانے پر تُلی ہوئی ہے۔

سوال یہ ہے کہ کیا اورنگزیب کے مزار کے ساتھ بھی بابری مسجد جیسا سلوک ہوگا؟ یا یہ معاملہ محض بیانات اور احتجاج تک محدود رہے گا؟ بھارت میں ہندو انتہا پسندوں کو قابو میں رکھنے والا کوئی ہے یا نہیں؟

بھارتی مسلمان راشٹریہ سویم سیوک سنگھ(آر ایس ایس) دہشت گرد تنظیم کے بنیادی ممبر وزیر اعظم بھارت نریندرا مودی کی ہندتوا،حکومت میں ایسی کشتی میں سوار ہچکولے کھارہے ہیں جو بغیر چپو کے تیر رہی ہے۔ بھارت میں مسلمانوں کی ایک بھی مرکزی سیاسی پارٹی نہیں۔ سیاسی طور پر مسلمان پہلے پنڈت جواہر لال نہرو کی سیکولر گانگریس کے ساتھ تھے۔ اس کے دور میں بھی ہندو مسلم جھگڑے کروا کے مسلمانوں کو بہت نقصان پہنچایا گیا تھا۔ کانگریس نے بھی مسلمانوں کے ساتھ تعصب کا رویہ رکھاتھا۔

سیکولر آئین رکھنے والے بھارت میں نریندرا مودی کی پارٹی بی جے پی نے ہندو مذہب کی بنیاد پر ہمیشہ الیکشن لڑا۔ بھارت میں ہندوؤں کی اکثریت ہے۔ مسلمان اقلیت میں ہیں۔ لہٰذا مودی نے ہمیشہ بھارت کے ہندوؤں کو مسلمانوں کے خلاف کھڑا کرکے ہندو اکثریت کے زور پر الیکشن جیتا۔ یہ حربہ استعمال کرکے مودی پہلے گجرات کا وزیر اعلیٰ بنا تھا۔ گجرات میں مسلمانوں کے خلاف ہندوؤں کو اکسایا۔ مسلمانوں پر پولیس سے حملے کرائے۔ ایک وقت میں ڈھائی ہزار سے زیادہ مسلمانوں کو شہید کیا۔ اسی بنیاد پر بھارت کا تیسری بار وزیر اعظم منتخب ہوا۔مودی بھارت کو صرف انتہا پسند ہندوؤں کا ملک بنانے کے پروگرام پر چل رہا ہے۔ اس کی سیاسی پارٹی نے الیکشن میں پورے بھارت میں کسی ایک مسلمان کو الیکشن لڑنے کے لیے ٹکٹ نہیں دیاتھا۔ اس لیے بھارتی پارلیمنٹ میں مودی کی سیاسی پارٹی کا ایک بھی مسلمان منتخب ممبر نہیں۔

کانگریس کے ٹکٹ پر ایک مشہورشاعرعمران پرتاب گڑھی منتخب ہوا۔ ایک خاتون اِقرا حسن چوہدری کیرانہ سے سماج وادی پارٹی کے تخت پر بی جے پی کو شکست دے کرمنتخب ہو کر آئی۔ اس کے خاندان کے لوگ برسوں سے ممبر منتخب ہوتے رہے ہیں. اسدالدین اویسی ایڈوکیٹ حیدر آباد آندھرا پر دیش سے کل ہند مجلس المسلمین پارٹی کے صدر ہیں۔ کئی بار لوک سبھا کے ممبر منتخب ہوئے ہیں۔ یہ حضرات پارلیمنٹ میں پہنچ کر اپنے اپنے طور پر مسلمانوں مظالم کے لیے آواز اُٹھاتے رہتے ہیں۔کاش کہ بھارتی مسلمان کل ہند مجلس المسلمین پر ہی متفق ہو جائیں۔ جن علما کو بھارت میں ہندوؤں کے سامنے اسلام کا پر امن اورشانتی والامذہب اسلام، جو برابری پر یقین رکھتا ہے پیش کرنا تھا ، وہ صرف اسلامی کی عبادات تک محدود ہو کر رہ گئے ہیں۔ بلکہ جب بانی پاکستان قائدط اعظم محمد علی جناحؒ دوقومی نظریہ پر پاکستان کی تحریک چلا رہےتھے، تو گانگریسی علما نے ہندو قومیت کی بنیاد پر پاکستان کی مخالفت کی تھی۔جب کشمیری مسلمان بھارت کے مظالم کے خلاف اُٹھ کر پاکستان میں شامل ہونے کی تحریک چلاتے ہیں تو ان کو نصیحت کرتے ہیں کہ بھارت پولیس پر پتھر بازی نہ کرو، ان سے دب کر رہو۔

تعصب کی بنیاد پرپورے بھارت میں مسلمانوں کے خلاف متعصب ہندوؤں نے مہم چلائی ہوئی ہے۔ مودی حکومت مسلمانوں پر ہر تشدد کی حمایت کرتی ہے۔ آرایس ایس مسلمانوں کو دھمکیاں دیتی رہتی ہے کہ پاکستان چلے جاؤ یا واپس ہندو بن جاؤ۔ دوسرا کوئی بھی راستہ نہیں ہے۔ متعصب ہندو کسی بھی بے بس مسلمان کوپکڑ کر تشدد کرتے ہیں۔ جے ماتا کے زبردستی نعرے لگانے پر مجبور کرتے ہیں۔اس پر ڈنڈے برساتے ہیں اور شہید کر دیتے ہیں۔ کبھی کسی پر گائے ذبح کرنے یا گائے کاگوشت فریج میں رکھنے کے الزام میں اس پر تشددکر کے شہید کر دیتے ہیں۔ کبھی مسجد کو مسمار کر کے اس پر مندر تعمیر کرتے ہیں۔ پانچ سوسالہ پرانی بابری مسجد کو متعصب ہندوؤں نے شہید کر کے اس کی جگہ مندر بنادیا اور یہ کام مودی حکومت نے کیا۔

یہ مظالم کوئی نئی بات نہیں ہے۔ اس کا تاریخی پس منظر ہے۔ ہندوستان کے اصل پرانے باشندے دراوڑ تھے۔ وہ ہندوستان پر حکومت کرتے تھے۔داروڑی تمدن کوہستان شولک،دریائے ناپتی اور نریدا اور کوئٹہ سے بیکا نیر اور کاٹھیاواڑ تک پھیلا ہوا تھا۔اسے ہڑپاسی تمدن بھی کہتے ہیں۔ بعض آثار قدیمہ نے داروڑی تمدن کے زمانے کا تعین۰۵۲۳ قبل مسیح کیا ہے۔ اس طرح یہ تمد ن مصر اور سمیریا کا ہم عصر تھا۔ ۰۰۵۲قبل مسیح میں آریہ نسل نے وسط ایشیا سے ہندوستان پر حملہ کیا۔ ہندوستان کے اصل باشندوں کو آہستہ آہستہ تشدد کا نشانہ بناکر ان کی زمینیں، کاروبار اور حکومت چھین کر ان کو شودر بنا دیا۔ ہندوستان کے حکمران اور اصل باشندوں کو طاقت کے زور پر کمزور کر کے پورے ہندوستان کے مالک بن بیٹھے۔ بھارت کے متعصب ہندو اسی تاریخی واقعہ کو بڑی باریکی سے اب مسلمانوں پر آزما رہے ہیں۔مسلمانوں نے محمد بن قاسمؒ سے لے کر بہادر شاہ ظفر تک برصغیر پر ہزار سال سے زائد کامیابی سے حکومت کی ہے۔ مگر جب مسلمان طاؤس و رباب میں پڑ گئے تو انگریزوں نے برصغیر پرتجارت کے بہانے قبضہ کرلیا۔ اب ہندو اکثریت کی بنیاد پر مسلمانوں سے ہزار سالہ غلامی کا بدلہ لینا چاہتے ہیں.

اللہ نے قائد اعظمؒ کی قیادت میں کلمہ لا الہ الا اللہ کی بنیاد پر مثل مدینہ ریاست”مملکت اسلامی جمہوریہ پاکستان“ عطیہ کے طور پر دے دی۔ اس نے اسلام کا وہ نظام رائج کرنا تھا جس نے دنیا کے چار براعظموں پر کامیابی سے12 سوسال کامیابی سے شاندار حکومت کی تھی۔ اسے بھارت میں رہ جانے والے مسلمانوں کا پشتیبان بننا تھا کہ ہندو ان پر ظلم کرنے سے پہلے سو بار سوچتے۔ قائداعظمؒ نے پاکستان بننے کے بعد اس کی ابتداء کر دی تھی مگر قائداعظمؒ کی وفات کے بعد آل انڈیا مسلم لیگ کے کھوٹے سکوں نے اسلامی نظام حکومت قائم نہیں کیا۔ آج کمزور پاکستان بھارت کے مسلمانوں کی پشتی بانی کرنے کے قابل نہیں رہا۔ مودی بھارتی مسلمانوں کو شودر بنانے کے عمل پر باریکی سے عمل کر رہا ہے۔ اللہ بھارتی مسلمانوں کا حامی و ناصر ہو۔ آمین۔