Tag: سیاست

بحیثیت قوم اگر ہمارا جائزہ لیا جاۓ تو ہمارے معاشرے میں تمدنی شعور کا فقدان پایا جاتاہے. ہمارا رویہ یہ ہے کہ ہم یہ چاہتے ہیں کہ میرے علاوہ باقی سب ٹھیک ہوجائیں۔ جہالت سے تمام تعلیم یافتہ طبقے کو نفرت اور شکایت ہے. لیکن ہمیں خود سے سوال پوچھنا چاہیے کہ ملک سے جہالت ختم کرنے میں ہمارا انفرادی یا اجتماعی سطح پر کیا کردار ہے؟

اگر جواب ہاں میں ہے تو یہ ایک مثبت قدم ہے اگر نفی میں ہے تو ہمیں اس پر سوچنا ہوگا۔ آپ صلی اللہ علیہ وسلم کا فرمان ہے کہ صفائی نصف ایمان ہے. نظام کی کمزوریاں اپنی جگہ لیکن ہمیں اس بات کا جائزہ لینا چاہیے کہ اپنے شہروں ،گلی محلوں ،پارکوں کو صاف ستھرا رکھنے میں ہمارا کتنا عمل دخل ہے . کسی بھی مہذب معاشرے میں قانون توڑنا معیوب سمجھا جاتاہے لیکن یہاں الٹ ہے قانون پر عمل درآمد نہ کرنا ہمارے لیے باعث فخر امر ہے۔ روزمرہ زندگی کے جس پہلو کو اٹھا کر دیکھتے ہیں انتہا درجے کی بد نظمی نظر آتی ہے .

کیا اے ٹی ایم استعمال کرتے وقت ہم خواتین کو اولیت دیتے ہیں؟
پبلک ٹرانسپورٹ میں خواتین اور بزرگوں کا کتنا خیال رکھا جا تا ہے؟
کیا ہم ایک دوسرے کے حقوق کا تحفظ کرتےہیں؟
کیا ہماری سوچ اپنی ذات تک محدود ہے یا اجتماعی مفادات پر بھی نظر رکھتے ہیں؟
کیا احتجاج،جلسے جلوس اور ریلیوں کے دوران ہم سرکاری املاک کا خیال رکھتے؟

ہم یہ کیوں نہیں سوچتے کہ سرکاری املاک کو نقصان پہچانا دراصل ہمارا اپنا ہی نقصان ہے کیوں کہ اس پر ہمارا ہی پیسہ خرچ ہوتاہے جو ہم ٹیکس کی صورت میں ادا کرتے ہیں۔میرا تو مشاہدہ رہاہے کہ جہاں جہاں ہمیں نظم و ضبط کا مظاہرہ کرنے کی زیادہ ضرورت ہوتی ہے بدقسمتی سے وہاں ہم بدنظمی کرنے میں پیش پیش پاۓ جاتے ہیں ۔ مرحوم طارق عزیز کے نام اور ان کی حب الوطنی سے کون واقف نہیں.ایک مرتبہ میں پی ٹی وی پر ان کا پروگرام دیکھ رہا تھا . ان کا مزاج تھا کہ پروگرام کے آخر میں کوئی ایک نصیحت یا مفاد عامہ کا اہم نکتہ بیان کرتے تھے انہوں نے پروگرام کے آخر میں جو بات کہی وہ آج تک میرے ذہن پر نقش ہے۔

انہوں نے کہا کہ اگر ہم سب پاکستانی صرف اپنے گھر کا ایک ایک بلب بند رکھیں تو ہمارے اس عمل سے بجلی کی بچت ہوگی اور کئی کارخانے چل پڑیں گے اور ملک ترقی کی راہ پر گامزن ہوگا دیکھیں کتنی خوبصورت بات کہہ گئے ہیں۔ دیکھا جاۓ تو آج وطن عزیز میں توانائی کا بحران ہے ان کی اس بات پر عمل کرنا آج وقت کی شدید ضرورت ہے . اس بات کو مد نظر رکھتے ہوۓ اگر آج اپنے ارد گرد کا جائزہ لیا جاۓ تو بجلی کا بے جا استعمال کرنے میں ہم گھریلو صارفین،سرکاری ونجی دفاتر میں کام کرنے والے سب برابر ہیں . ایسی کئی مثالیں ہیں جہاں ہم انفرادی اور اجتماعی مفادات کا خیال نہیں رکھتے جس کے نتیجے میں مسائل جڑ پکڑ گئے ہیں۔

افسوس کا امر یہ بھی ہے کہ اس طرح غیر منظم زندگی گذارنے کے عادی ہوچکے ہیں اس لیے ہمارا اس طرف دھیان ہی نہیں جاتا کہ معاشرے کو ٹھیک کرنے میں فرد کی حیثیت سے کس کی کتنی ذمہ داری بنتی ہے . تعلیمی اداروں میں تمدنی شعور کے متعلق تعلیم نہیں یہ ایک الگ المیہ ہے ہونا تو یہ چاہیے کہ تمدنی شعور کے متعلق طلبہ کو باقاعدہ تعلیم وتربیت فراہم کی جاۓ جس سے ہم مستقبل میں قابل ذکر نتائج حاصل کرسکیں۔تمدنی شعور کو فروغ دینے کے لیے حکومتی اداروں، ،مختلف این جی اوز تعلیمی اداروں کو مل کر اقدامات اٹھانا ہوں گے یہ وقت کی اشد ضرورت ہے ۔اداروں کے ساتھ عوام کو اس میں بھرپور تعاون کا مظاہرہ کرنا ہوگا۔

بظاہر یہ آپ کو جزوی مسائل نظر آئیں گے لیکن ان سے صرف نظر کرنا کسی صورت ممکن نہیں ان جزوی مسائل سے ہی کلی سطح پر اصلاحات کا سفر طے ہوگا اور ہم ایک مثالی اور صحت مند معاشرہ تشکیل دینے میں کامیاب ہوجائیں گے تاکہ ہم نہیں تو کم سے کم ہماری اگلی نسلیں ہی ایک نارمل زندگی گزار سکیں۔

کبھی آپ نے محسوس کیا ہے کہ ہمارے معاشرے میں طاقت کا تصور کس قدر بدل چکا ہے؟ ایک زمانہ تھا جب طاقتدار وہ کہلاتا تھا جس کے پاس کرسی ہو، عہدہ ہو، اختیار ہو — جو حکومتی اداروں کو چلاتا ہو، قانون بناتا ہو، اور فیصلے صادر کرتا ہو۔

لیکن آج؟
آج کا نوجوان اس طاقت کو ویسا نہیں دیکھتا جیسا ہمارے آباؤ اجداد نے دیکھا تھا۔ اب طاقت کا معیار بدل گیا ہے۔ اب طاقت وہ نہیں جس کے پاس قلم ہے، بلکہ وہ ہے جس کے الفاظ لاکھوں دلوں میں گونجتے ہیں۔ آج ہم ایک ایسے دور میں جی رہے ہیں جہاں کسی سادہ لباس میں ملبوس، کیمرہ ہاتھ میں لیے، ایک عام سا شخص اپنی بات چند لمحوں میں دنیا بھر میں پہنچا دیتا ہے۔ وہ کوئی وزیر نہیں، نہ ہی کوئی رکن اسمبلی، نہ ہی کسی حکومتی پالیسی کا حصہ، مگر اس کی آواز، اس کا انداز، اور اس کی سچائی — دلوں کو چھو جاتی ہے۔ یہی ہے انٹرنیٹ انفلونسر کا اثر — ایک خاموش انقلاب، جو بظاہر سادہ نظر آتا ہے، مگر اندر سے پورے نظام کو جھنجھوڑنے کی طاقت رکھتا ہے۔

سیاستدان: اقتدار کا محافظ، مگر جذبات سے کٹا ہوا
ہماری ریاستی تاریخ میں سیاستدان ہمیشہ سے اختیار کی علامت رہا ہے۔ اس کے پاس وہ قلم ہوتا ہے جو قانون کی سطریں رقم کرتا ہے۔ اس کی زبان سے نکلے وعدے، منشور، پالیسیاں اور ترقیاتی منصوبے قوم کی سمت کا تعین کرتے ہیں۔ وہ اسمبلی میں تقریریں کرتا ہے، پریس کانفرنسز میں بیانات دیتا ہے، جلسوں میں نعرے لگواتا ہے۔ مگر آج کا سچ یہ ہے کہ اس کی یہ ساری گھن گرج اکثر خالی خول بن چکی ہے۔ لوگ اب صرف الفاظ سے مطمئن نہیں ہوتے، وہ احساس چاہتے ہیں۔ وہ ایسی زبان سننا چاہتے ہیں جو ان کے دل کی بولی ہو، جو ان کے روزمرہ کے مسائل سے جڑی ہو، جو مصنوعی نہ ہو بلکہ حقیقت سے لبریز ہو۔ بدقسمتی سے بیشتر سیاستدان آج بھی اسی پرانے بیانیے میں الجھے ہوئے ہیں۔ وہ اب بھی فائلوں کے درمیان، سرکاری اصطلاحات میں، اور روایتی انداز میں اپنی بات کہتے ہیں۔ جبکہ آج کا شہری چاہتا ہے کہ اس سے سیدھی، سادہ اور سچائی پر مبنی گفتگو کی جائے۔ وہ چاہتا ہے کہ اس کے مسائل کو اس کی اپنی زبان میں سنا جائے، نہ کہ محض تقریروں اور وعدوں میں دبایا جائے۔

انفلونسرز: آواز کا سفر، اثر کی طاقت
انٹرنیٹ انفلونسرز اس خلا کو پُر کر رہے ہیں جو سیاستدان اور عوام کے درمیان پیدا ہو چکا ہے۔ وہ سادہ انداز میں بات کرتے ہیں، ان کی گفتگو میں زندگی ہوتی ہے، اور وہ وہی کچھ کہتے ہیں جو عوام سوچتی ہے لیکن بول نہیں پاتی۔ کسی یوٹیوبر کی ایک ویڈیو میں اگر پانی کی قلت کا مسئلہ اٹھتا ہے، تو وہ محض مسئلہ بیان نہیں کرتا بلکہ جذبات جگاتا ہے۔ کسی سوشل میڈیا ایکٹیوسٹ کی ایک پوسٹ اگر مہنگائی پر ہو، تو وہ صرف اعداد و شمار نہیں دکھاتا بلکہ ایک ماں کی آنکھوں میں جھلکتی پریشانی کو تصویر بنا کر سامنے رکھ دیتا ہے۔ یہی وجہ ہے کہ عوام ان پر یقین کرتی ہے۔ ان کی بات سنتی ہے، ان سے جڑتی ہے، اور ان کے بیانیے کو اپنا بیانیہ بنا لیتی ہے۔

اثر کی اصل بنیاد: جذبات سے جڑی زبان
اگر آپ غور کریں، تو سیاستدان کی زبان اور انفلونسر کی زبان میں سب سے بڑا فرق جذبات کا ہے۔ سیاستدان اکثر ‘معاشی اصلاحات’ کی بات کرتا ہے، انفلونسر ‘روٹی کے سوال’ کی۔ سیاستدان ‘تعلیمی بجٹ’ کی بات کرتا ہے، انفلونسر ‘سرکاری اسکول کی ٹوٹی ہوئی چھت’ کی۔ سیاستدان ‘روزگار کے مواقع’ پر تقریر کرتا ہے، انفلونسر ‘بیروزگار نوجوان کی آنکھوں کی نمی’ پر بات کرتا ہے۔ یہی وہ فرق ہے جو آج اثر اور اختیار کو دو مختلف سمتوں میں لے جا رہا ہے۔ اقتدار کے ایوانوں میں اختیار ہے، مگر دلوں کی دنیا میں اثر انفلونسرز کا ہے۔

سیاست کا بدلتا چہرہ
اب خود سیاستدان بھی اس بدلتے منظرنامے کو محسوس کر چکے ہیں۔ انہیں اندازہ ہو چکا ہے کہ اگر وہ صرف اسمبلی میں تقریریں کرتے رہے تو عوام ان سے کٹتی جائے گی۔ اسی لیے اب وہ بھی سوشل میڈیا کا سہارا لے رہے ہیں، اپنی بات کو عوامی انداز میں پیش کرنے کی کوشش کر رہے ہیں۔ کچھ سیاستدان خود بھی وی لاگنگ کرتے نظر آتے ہیں، کچھ انسٹاگرام لائیو سیشنز میں عوام سے جڑتے ہیں۔ یہ تبدیلی خود ایک نئی سیاست کی علامت ہے۔ اب کامیاب وہی ہوگا جو دل کی زبان بولے گا، چاہے وہ سیاستدان ہو یا انفلونسر۔

کیا انفلونسرز سیاست کا مستقبل ہیں؟
یہ سوال اکثر ذہن میں آتا ہے کہ کیا انفلونسرز واقعی سیاستدانوں کا متبادل بن سکتے ہیں؟ ظاہری طور پر تو شاید نہیں — کیونکہ ریاستی نظام کو چلانے کے لیے تجربہ، قانونی معلومات اور ادارہ جاتی شعور ضروری ہے۔ لیکن اگر قیادت صرف کرسی کا نام نہ ہو، بلکہ عوامی احساسات کی نمائندگی کا نام ہو، تو انفلونسرز آج کے حقیقی لیڈر ہیں۔
وہ نوجوان جو صرف ایک کیمرے اور ایک سچائی کے جذبے سے اپنی بات کہتا ہے، وہ قوم کی نبض پر ہاتھ رکھتا ہے۔ وہ معاشرے کے زخم دیکھتا ہے، ان پر مرہم رکھتا ہے، اور عوام کو شعور بخشتا ہے۔ ایسے لوگ وقتی سیاستدان نہیں ہوتے، بلکہ مستقبل کے معمار ہوتے ہیں۔

اختتامیہ: اختیار وقتی ہوتا ہے، اثر دائمی
آخر میں یہی کہا جا سکتا ہے کہ اختیار کی بنیاد کرسی ہو سکتی ہے، مگر اثر کی بنیاد ہمیشہ دل ہوتے ہیں۔ اگر ایک سیاستدان لاکھوں کے جلسے کر لے مگر لوگوں کے دلوں تک نہ پہنچ سکے، تو وہ کبھی حقیقی لیڈر نہیں بن سکتا۔ اور اگر ایک انفلونسر بغیر کسی عہدے کے دلوں میں جگہ بنا لے، تو وہ قوم کی آواز بن جاتا ہے۔ ہمیں اب اس فرق کو سمجھنا ہوگا۔ ہمیں دیکھنا ہوگا کہ ہم صرف وہ سن رہے ہیں جو ہمیں سنایا جا رہا ہے، یا وہ جو حقیقتاً ہمارے جذبات کی ترجمانی کر رہا ہے۔ وقت آ چکا ہے کہ سیاست کی تعریف بدل دی جائے۔ کیونکہ قوموں کی قیادت صرف کرسی سے نہیں ہوتی — دل سے ہوتی ہے۔

میرا نور چشم اسرار احمد پانچویں برس میں ہے، کارٹون دیکھنے کا شوقین ہے۔ کارٹون دیکھتے وقت وہ سوال پوچھتا رہتا ہے کہ کیا ان کرداروں کا کوئی حقیقی وجود بھی ہے یا یہ محض سکرین پر نظر آتے ہیں۔ حالیہ مہینوں میں اس کی معلومات میں کافی بہتری آئی ہے اور اس نے کافی حد تک جان لیا ہے کہ کن چیزوں کا حقیقی وجود ہوتا ہے اور کون سی چیزیں محض سکرین پر نظر آتی ہیں۔ اب وہ میرے بتانے سے پہلے ہی بتا دیتا ہے کہ کارٹون کا فلاں فلاں کردار محض سکرین پر نظر آتا ہے جب کہ اس کا کوئی حقیقی وجود نہیں ہے۔

وطن عزیز کی سیاست اور گورننس کی صورت حال بھی کارٹون سے کچھ مختلف نہیں ہے کہ اس کے بہت سے تصورات محض تصورات ہی ہیں اور ان کا کوئی حقیقی وجود نہیں ہے۔ ان میں سب سے اہم تصور جمہوریت کا ہے۔ جمہوریت کے ترانے ہر سر میں موجود ہیں۔۔جمہوریت کے ایک سے بڑھ کر ایک مدھر نغمے موجود ہیں۔ کوئی ٹالک شو ، کوئی انٹرویو، کوئی پریس کانفرنس اور کوئی جلسہ جمہوریت کے ذکر سے خالی نہیں ہوتا۔ سیاسی جماعتوں کے منشور لکھنے والوں نے بھی تمام زور بیاں جمہوریت کی عظمت بیان کرنے میں صرف کردیا ہے۔ لیکن سوال یہ ہے کہ کیا جمہوریت کا کوئی حقیقی وجود بھی ہے یا یہ اس کے نعرے صرف کارٹون کی طرح خوش رکھنے کا کام کرتے ہیں؟ جس طرح کارٹون بچوں کو غیر حقیقی کرداروں سے خوش کردیتے ہیں اسی طرح جمہوریت بھی ایک ناپید شے ہوتے ہوئے خوشی فراہم کرنے کا کام کرتی ہے۔ جمہوریت کا کوئی حقیقی وجود نہیں ہے۔

وطن عزیز کی سینیئر اور تجربہ کار سیاسی جماعتیں کو جمہوریت چھو کر بھی نہیں گزری۔ جمہوریت پسندی تو بہت دور کی بات ہے ، ہماری سیاسی جماعتیں جمہوریت سے خوف زدہ ہیں۔ حوادثِ زمانہ کی پیداوار سیاسی جماعتوں کا طرز عمل جمہوریت کی نفی کرتا ہے۔ سیاسی جماعتوں کے ہاں ایک دوسرے کا مینڈیٹ تسلیم نہ کرنے کی روش بہت پرانی ہے۔ وفاقی حکومت کا صوبائی حکومتوں پر چڑھ دوڑنا اور صوبائی حکومتوں کا وفاقی حکومتوں پر چڑھ دوڑنا جمہوری طرز عمل کا منہ چڑاتے ہوئے رویے ہیں۔ وطن عزیز کی سیاسی جماعتوں پر چند خاندانوں کی اجارہ داری ہے۔ وراثتی سیاست نے متبادل قیادت سامنے نہیں آنی دی۔ وراثتی سیاست کے حامیوں کا کہنا ہے کہ وراثتی سیاست نے جمہوریت کو بچا رکھا ہے۔ وراثتی سیاست نے جس شے کو بچا رکھا ہے وہ جمہوریت نہیں ہے بلکہ چند خاندانوں کی اجارہ داری ہے۔ سیاسی جماعتوں کے سینیئر اراکین قیادت کے بچوں کے سامنے دست بستہ کھڑے ہیں۔ قائدین کے بچوں کی عمر سے زیادہ سیاسی تجربہ رکھنے والے لوگ کب سے منتظر تھے کہ مہاراجہ جوان ہوں اور پارٹی کی قیادت کریں۔

صرف جماعت اسلامی ہے جس نے وراثتی سیاست کی نفی کرتے ہوئے وطن عزیز کی بہترین جمہوری جماعت بن کے دکھایا ہے۔ انٹرا پارٹی الیکشنز ہوں یا کسی کارکن کا محنت کے بل بوتے پر جماعت کا سربراہ بن جانا ، یہ جماعت اسلامی کا ہی طرہ امتیاز ہے۔ جماعت اسلامی کی طلبہ تنظیم اسلامی جمیعت طلبہ میں گزشتہ 78 برس سے ناظم اعلیٰ کے انتخابات ہورہے ہیں۔ وطن عزیز کی کوئی دوسری جماعت ایسی مثال پیش کرنے سے قاصر ہے۔ دیگر سیاسی جماعتوں کے انٹرا پارٹی الیکشنز اس اصول پر ہوتے ہیں کہ جماعت کے سربراہ حسب معمول کام کرتے رہیں گے، کوئی ان کے مقابل کھڑا نہیں ہوسکتا، ایک رسمی کارروائی ہوگی، تمام اراکین اس رسمی کارروائی میں حصہ لے کر تمغہ جمہوریت وصول کرسکتے ہیں۔

سیاسی جماعتیں بلدیاتی انتخابات سے بھی خوف زدہ ہیں۔ ان کے لیے یہ تصور ناقابل قبول ہے کہ کوئی میئر یا ناظم پر پرزے نکال کر جماعت کی قیادت سے آگے نکل جائے۔ ان کی بقاء اسی میں ہے کہ بونوں کا ایک ہجوم ہمہ وقت ان کے ارد گرد موجود رہے جو انہیں ان کے سروقد ہونے کے مغالطے میں مبتلا رکھے۔

اسی طرح اگر یہ سوال کیا جائے کہ کیا ترقی کا کوئی حقیقی وجود ہوتا ہے یا یہ بھی محض ٹیلی وژن سکرین یا اخبارات کے اشتہارات تک محدود ہوتی ہے؟ اس سوال کا جواب بھی یہی ہوگا کہ سر دست تو ترقی صرف ٹیلی وژن سکرین اور اخبارات کے اشتہارات تک ہی محدود ہے۔ اس کا حقیقی وجود دیکھنا ہر کسی کے نصیب کے بات نہیں ہے۔ تشہیری ترقی کے علاوہ ترقی کی صورت حال یہ ہے کہ تعلیم اور صحت نجی شعبے کے پاس چلے گئے ہیں۔ دیگر شعبوں میں اداروں کی اکثریت خسارے میں ہے۔ کچھ اداروں کی کارکردگی رشوت سے مشروط ہے۔

اسی طرح اگر یہ سوال کیا جائے کہ کیا ملک میں سچ مچ آئین کی بالادستی ہے یا آئین کی بالادستی صرف چند خوب صورت سطروں کا نام ہے؟ اس کا جواب بھی یہی ہوگا کہ آئین خوب صورت اقوال کا مجموعہ ہے لیکن یہ اقوال کبھی جامہ عمل میں ڈھلتے دکھائی نہیں دیتے۔ آئین کی ایسی شقیں جن کا تعلق عام آدمی کے وقار سے ہے، عملاً معطل ہیں۔ مثلاً آئین کی وہ شقیں جن کا تعلق شہریوں کی مساوات ، علاج معالجے اور انصاف کی فراہمی اور استحصال کے خاتمے سے ہے، کسی سیاسی جماعت کی ترجیحات میں شامل نہیں ہیں۔ مذکورہ بالا شقوں کی عملی صورت حال محتاج بیان نہیں ہے۔ ہر ذی شعور شخص حقائق سے بہ خوبی واقف ہے۔

کیا سول سروس سچ مچ عوام کی خادم ہے؟ نہیں ، ہرگز نہیں۔ یہ عوام پر ایک جابر آقا کی طرح مسلط ہے۔ اس کا رہن سہن عوام کے لیے وبال جان بن چکا ہے۔ یہ ایک سفید ہاتھی ہے۔ کیا عدالتیں سچ مچ آزاد ہیں؟ نہیں، عدالتیں آزاد نہیں ہیں۔ ان کے اپنے اپنے سیاسی رجحانات ہوتے ہیں۔ یہ آئین کی من چاہی تشریح کرکے کوئی بھی فیصلہ سناسکتی ہیں۔ ان میں تعینات ججز کے انتخاب کا طریق کار ہی غلط ہے۔ کیا فوج ایک پروفیشنل ادارہ ہے؟ ڈی جی آئی ایس پی آر کی پریس کانفرنس کی حد تک تو ایسا ہی ہے لیکن حقائق ان پریس کانفرنسز میں کیے گئے دعوؤں کی نفی کرتے ہیں۔ جس طرح اکثر کارٹون کیریکٹرز حقیقی وجود نہیں رکھتے، اسی طرح وطن عزیز کی سیاست اور گورننس کے بیش تر تصورات محض تصورات ہی ہیں، کوئی حقیقی وجود نہیں رکھتے۔ یہ خوش نما تصورات محض عوام کو خوش کرنے کے لیے تراشے گئے ہیں۔

کائنات میں زندگی کا وجود پانی سے ہے۔ لیکن موجودہ دور میں جہاں آبادی بڑھنے سے باقی مسائل آئے ہیں وہی پانی کی کمی بھی ایک اہم مسئلہ ہے ۔ ہر ملک پانی ذخیرہ کرنے کی کوشش میں لگا ہوا ہے۔ اور ماہرین کا کہنا ہے کہ اس کے بعد عالمی جنگ پانی پہ ہی ہو گی یہ اتنا اہم مسئلہ بنتا جا رہا ہے۔

اس لیے دنیا میں ڈیم بنانے کی دوڑ لگی ہوئی ہے۔ میٹھا پانی ذخیرہ کرنا ہر ملک کی پالیسی کی اولین ترجیح ہے کیونکہ کسی ملک میں کتنے ہی وسائل ہوں ، پانی کے بغیر زندہ نہیں رہ سکتا۔ لیکن یہی پانی جب امتحان بن جائے تو یہ زندگی کا ہر رنگ ، ہر نقش مٹا دیتا ہے۔ اس کی زندہ مثال اس وقت ہم اپنے ملک میں دیکھ رہے ہیں۔ جہاں سیلاب نے تباہی مچا رکھی ہے۔ اسی فیصد ملک سیلاب سے متاثر ہے۔ لاکھوں کی تعداد میں گھر گر چکے ہیں۔ کروڑوں لوگ متاثر ہیں۔ سڑکیں ، ہوٹل ، بجلی کا نظام سب درہم برہم ہو گیا ہے۔ کئی کئی فٹ پانی کھڑا ہے اور بارشیں مسلسل جاری ہیں۔ لوگوں کے پاس بارشوں سے بچنے کے لیے بھی سر چھیانے کو خیمے تک نہیں ہے۔ کھانے کو کچھ نہیں ہے۔ میڈیا رپوٹر بھی وہاں تک پہنچ نہیں پا رہے اس لیے میڈیا بھی یہ نہیں دیکھا رہا کہ کتنا نقصان ہو چکا ہے۔

[poetry]دور تک چھا ئے تھے بادل اور کہیں سایہ نہ تھا
اس طرح برسات کا موسم کبھی آیا نہ تھا [/poetry]

المیہ یہ ہے کہ ہمارے ملک میں بارشوں کے موسم میں سیلاب کسی نہ کسی پیمانے پہ ہر سال آتا ہے۔ لوگ مرتے ہیں، بے گھر ہوتے ہیں، مالی اور جانی نقصان ہوتا ہے ۔ پھر بارشیں روکتی ہیں ، پانی خشک ہو جاتا ہے تو سب بھول جاتے ہیں اور پھر اگلے سال وہی کہانی دوہرائی جاتی ہے ۔ اس تباہی سے بچنے کے لیے واحد راستہ ڈیم بنانا ہے، ۔ کیا ایک ڈیم بنانا، اسی فیصد ملک کو دوبارہ اسی حالت میں آباد کرنے سے بھی بڑا مسئلہ ہے۔سارا مسئلہ یہ ہے کہ ملک اور عوام تو کبھی کسی سیاسی پارٹی کے ایجنذے میں رہے ہی نہیں۔ حتی کہ اس نازک وقت پہ پہ جب لوگ مر رہے ہیں تب بھی تمام سیاسی پارٹیاں اپنی سیاست کے لیے ایک دوسرے سے دست و گریباں ہیں۔

کسی کو مرتے ، ڈوبتے لوگوں کا درد محسوس نہیں ہو رہا۔ اس وقت کی تمام بڑی سیاسی پارٹیاں حکومت میں رہ چکی ہیں لیکن ملک سیلاب اور خشک سالی کے دومیان پھنسا ہو ا ہے۔ ایک طرف پانی سیلاب کی صورت سب بہا کے لے جا رہا ہے اور دوسری طرف پانی کی کمی کے سبب ہمارے زرعی اور بجلی کے بنیادی مسائل حل نہیں ہو پا رہے۔ مسئلہ تو صرف بد انتظامی ہے۔ اگر یہی پانی ڈیم بنا کے محفوظ کیا جا سکے تو نہ ہی کمی رہے گی اور نہ سیلاب آئیں گئے۔ لیکن پتہ نہیں اس ملک کی قیادت کیوں کچھ کرنے کو تیار نہیں۔ کیونکہ ان کی اپنی زندگیاں محفوظ ہیں۔ پس تو عام آدمی رہا ہے۔

لمبی منصوبہ بندی تو اپنی جگہ وقتی طور پہ ہی سہی سیاست کو پیچھے چھوڑ کے کوئی اس عوام کے لیے نہیں سوچ رہا۔ کوئی سیاستدان چند دن کے لیے جیل میں چلا جائے تو یہ عوام سڑکوں پہ نکل آتی ہے، سڑکیں بند کر کے ، گاڑیاں جلا کے اپنے ہی ہم وطنوں کا نقصان کرنے لگتے ہیں لیکن جب یہ عوام مرتی ہے تو کون سا درد دل رکھنے والا سیاست دان نکلا ہے عوام کے لیے۔ وہ تو اقتدار میں ہوں یا اقتدار سے باہر، ایک پر سکون زندگی گزار رہے ہیں۔ ان کے مسئلے ، ان کا درد سیلاب میں اپنی جان، اپنا گھر اور اپنے گھر والوں کو کھونے سے بڑا نہیں ہے۔ اس جنون کا فائدہ اٹھا کے پچھتر سالوں سے عوام کا استحصال ہو رہا ہے۔ یہ عوام کب تک سیلاب میں بہتی رہے گی، دہشت گردوں کے ہاتھوں مرے گی، مہنگائی میں پستی رہے گی۔

اور اس کے با وجود سیاست دانوں کی عظمت کے گن بھی گاتی رہے گی۔ پانی زندگی ہے لیکن موت بن رہا ہے ،، خوشحالی ہے لیکن تباہی بن رہا ہے ۔ ہمیں اب یہ فیصلہ کرنا ہو گا کہ ہم نے ڈیموں پہ سیاست کر کے اس نقصان سے بار بار گزرنا ہے یا اس سے بچنے کا انتظام کرنا ہے۔

خواب انسانی زندگی کا ایک لازمی جزو ہیں۔ یہ وہ روشنی ہیں جو اندھیرے میں راستہ دکھاتی ہیں، وہ امید ہیں جو زندگی کو معنی دیتی ہیں، اور وہ خواہش ہیں جو آگے بڑھنے کی طاقت فراہم کرتی ہیں۔ خواب کسی بھی فرد کی سب سے قیمتی متاع ہوتے ہیں، مگر جب یہی خواب تجارت بن جائیں، جب ان کا سودا ہونے لگے، تو حقیقت تلخ ہو جاتی ہے۔ خواب بیچنے والے ہمیشہ چالاک اور عیار ہوتے ہیں، جو نہ صرف دوسروں کے خوابوں سے کھیلتے ہیں بلکہ اپنی فریب کاری سے ان خوابوں کے اصل مالکوں کو بھی بے وقوف بناتے ہیں۔

یہ خوابوں کے سوداگر ہر جگہ موجود ہوتے ہیں۔ کبھی سیاست کے میدان میں، کبھی محبت کے نام پر، کبھی تعلیم اور کیریئر کے جھوٹے وعدوں میں، اور کبھی مذہب و روحانیت کے پردے میں۔ ان کے ہتھیار مختلف ہو سکتے ہیں، مگر ان کا مقصد ایک ہی ہوتا ہے—دوسروں کے خواب بیچ کر اپنا مفاد حاصل کرنا۔

سیاست میں خوابوں کی تجارت
سب سے بڑے خوابوں کے سوداگر وہ ہوتے ہیں جو سیاست کے میدان میں کھڑے ہو کر خوشحالی، ترقی اور بہتر مستقبل کے سبز باغ دکھاتے ہیں۔ انتخابی مہموں میں عوام سے بڑے بڑے وعدے کیے جاتے ہیں، غربت ختم کرنے، روزگار دینے، اور بنیادی سہولیات فراہم کرنے کی یقین دہانیاں کرائی جاتی ہیں۔ لوگ ان خوابوں کو حقیقت سمجھ کر ان سیاست دانوں پر بھروسا کرتے ہیں، مگر اقتدار میں آتے ہی یہ خواب ریزہ ریزہ ہو جاتے ہیں۔ عوام ان کی حقیقت جاننے تک ایک اور الیکشن آ جاتا ہے، اور یہی خواب دوبارہ بیچے جاتے ہیں، ایک نئے پیکج کے ساتھ، ایک نئی شکل میں، مگر وہی پرانی چالاکی کے ساتھ۔

محبت کے نام پر خوابوں کی نیلامی
محبت بھی خوابوں کی ایک ایسی منڈی ہے، جہاں جذبات کی تجارت کی جاتی ہے۔ اکثر لوگ کسی کے دل میں جگہ بنانے کے لیے بڑے بڑے وعدے کرتے ہیں—ہمیشہ ساتھ نبھانے کے، ہر حال میں وفادار رہنے کے، ہر مشکل میں ہاتھ تھامنے کے۔ مگر جب وقت آتا ہے، تو یہی وعدے دھوکہ ثابت ہوتے ہیں۔ محبت کے نام پر خوابوں کو بیچ کر، انہیں توڑ کر، کچھ لوگ اپنی راہ بدل لیتے ہیں، جبکہ خواب دیکھنے والے کے پاس صرف پچھتاوا اور دکھ باقی رہ جاتا ہے۔ محبت میں خواب بیچنے والے ہمیشہ کامیاب رہتے ہیں، کیونکہ خواب خریدنے والے اپنی سچائی اور جذبات کی طاقت کو ہی سب کچھ سمجھ بیٹھتے ہیں۔

تعلیم اور کیریئر کے خوابوں کی تجارت
آج کے دور میں تعلیم بھی ایک کاروبار بن چکی ہے۔ یونیورسٹیاں، کوچنگ سینٹرز، اور ٹریننگ انسٹیٹیوٹس نوجوانوں کو یہ خواب دکھاتے ہیں کہ اگر وہ یہاں داخلہ لے لیں، تو ان کا مستقبل روشن ہو جائے گا، انہیں بہترین نوکریاں ملیں گی، اور کامیابی ان کے قدم چومے گی۔ مگر حقیقت اس کے برعکس ہے۔ ہزاروں طلبہ لاکھوں روپے خرچ کر کے ڈگریاں تو حاصل کر لیتے ہیں، مگر عملی دنیا میں انہیں وہ مواقع نہیں ملتے جن کا وعدہ کیا گیا تھا۔ یہ خواب صرف ان اداروں کے مفاد کے لیے بیچے جاتے ہیں، جبکہ خواب دیکھنے والوں کو بعد میں احساس ہوتا ہے کہ ان کی محنت اور دولت ایک دھوکے میں ضائع ہو گئی۔

مذہب اور روحانیت کے نام پر خواب فروشی
خوابوں کی سب سے خطرناک تجارت وہ ہے جو مذہب اور روحانیت کے نام پر کی جاتی ہے۔ کچھ نام نہاد رہنما لوگوں کو یہ یقین دلاتے ہیں کہ اگر وہ ان کے بتائے ہوئے طریقوں پر چلیں، ان کے دیے ہوئے اعمال کریں، تو ان کی دنیا اور آخرت سنور جائے گی۔ روحانی عملیات، جعلی دعائیں، اور معجزات کے وعدے کر کے معصوم اور مجبور لوگوں کو بے وقوف بنایا جاتا ہے۔ ان خوابوں کے عوض بڑی رقمیں وصول کی جاتی ہیں، مگر حقیقت میں کچھ نہیں بدلتا۔ یہ وہ کاروبار ہے جس میں خریدنے والا ہمیشہ نقصان میں رہتا ہے، جبکہ بیچنے والا ہمیشہ فائدے میں۔

خوابوں کے سوداگروں سے بچاؤ کیسے ممکن ہے؟
یہ حقیقت ہے کہ خوابوں کا بیچا جانا بند نہیں ہو سکتا، مگر شعور اور آگاہی سے ان سوداگروں کے جال میں پھنسنے سے بچا جا سکتا ہے۔ ہر خواب جو دکھایا جا رہا ہو، ضروری نہیں کہ وہ حقیقت بھی بن سکے۔ اس دنیا میں کچھ بھی مفت نہیں ملتا، اور اگر کوئی کسی کو بغیر محنت کے کچھ دینے کا وعدہ کر رہا ہے، تو وہ یقینی طور پر دھوکہ دے رہا ہے۔

سب سے اہم بات یہ ہے کہ حقیقی خواب وہی ہوتے ہیں جو انسان خود دیکھے، جنہیں وہ اپنی محنت اور لگن سے پورا کرے۔ اگر کوئی دوسرا تمہیں کوئی خواب دے رہا ہے، تو یاد رکھو کہ وہ اسے بیچ رہا ہے، اور اس کے بدلے میں تم سے کچھ نہ کچھ ضرور لے گا—چاہے وہ تمہاری دولت ہو، تمہارا وقت ہو، یا تمہاری امید۔

نتیجہ
خواب خوبصورت ہوتے ہیں، مگر جب ان کی تجارت ہونے لگے تو وہ خواب نہیں رہتے، دھوکہ بن جاتے ہیں۔ دنیا میں ہر جگہ خوابوں کے سوداگر موجود ہیں، جو کبھی سیاست میں، کبھی محبت میں، کبھی تعلیم اور کیریئر میں، اور کبھی مذہب اور روحانیت میں لوگوں کو سبز باغ دکھا کر ان کا استحصال کرتے ہیں۔ ان سے بچنے کا واحد راستہ یہ ہے کہ انسان شعور رکھے، حقیقت اور فریب میں فرق کرنا سیکھے، اور صرف ان خوابوں پر یقین کرے جو وہ خود دیکھے، خود سمجھے، اور اپنی محنت سے پورے کرے۔ ورنہ یہ دنیا ہمیشہ خواب بیچتی رہے گی، اور خواب خریدنے والے ہمیشہ نقصان میں رہیں گے۔

تاریخ ہمیں یہی سکھاتی ہے کہ کوئی ملک یا قیادت دوسروں کے سہارے پر اپنی جنگ لڑ کر کبھی دیرپا کامیابی حاصل نہیں کر سکتی۔جو قومیں یا قیادتیں دوسروں کے سہارے پر اپنی جنگیں لڑتی ہیں، وہ بالآخر بے بسی اور لاچاری کا شکار ہو جاتی ہیں۔ آج دنیا کے حالات پر نظر ڈالیں تو یوکرین کے صدر ولودیمیر زیلنسکی کی موجودہ حالت اس کا عملی ثبوت ہے۔ ایک وقت تھا جب مغربی ممالک اور امریکہ اس جنگ کو اپنی جنگ قرار دے کر یوکرین کے ساتھ کھڑے تھے، لیکن جیسے ہی عالمی ترجیحات بدلیں، ویسے ہی یوکرین مشکلات میں گھِرتا چلا گیا۔جنگ کے ابتدائی دنوں میں زیلنسکی کو ایک ہیرو کے طور پر پیش کیا گیا، عالمی میڈیا ان کے بیانات کو نمایاں کوریج دے رہا تھا، اور مغربی ممالک،امریکہ انہیں جدید اسلحہ، مالی امداد اور سفارتی حمایت فراہم کر رہے تھے۔لیکن وقت کے ساتھ یہ حقیقت عیاں ہوگئی کہ امریکی حمایت وقتی اور مفادات سے جڑی ہوئی تھی۔ آج یوکرین کو شدید جنگی دباؤ کا سامنا ہے، اس کی معیشت کمزور ہو چکی ہے، لاکھوں شہری بے گھر ہو چکے ہیں، اور عالمی سطح پر اس کے لیے وہ جوش و خروش نظر نہیں آ رہا جو پہلے تھا۔

دوسری طرف، روس کے صدر ولادیمیر پیوٹن نے اپنی حکمت عملی اور خودمختاری کے اصولوں پر چلتے ہوئے جنگ میں اپنی پوزیشن مضبوط رکھی اور آج وہ ایک کامیاب جنگی حکمت کار کے طور پر سامنے آئے ہیں۔یوکرین جنگ کے دوران ولادیمیر پیوٹن نے یہ ثابت کر دیا کہ اگر کوئی ملک اپنی طاقت، دفاع، اور سفارتی حکمت عملی پر بھروسہ کرے تو وہ عالمی پابندیوں، سفارتی دباؤ، اور اقتصادی جنگوں کے باوجود بھی اپنی پوزیشن قائم رکھ سکتا ہے۔ مغربی ممالک نے روس پر بے شمار پابندیاں لگائیں، روسی معیشت کو مفلوج کرنے کی کوشش کی، اور یوکرین کو اسلحہ اور مالی امداد فراہم کی، لیکن پیوٹن نے اپنی جنگی حکمت عملی تبدیل کرتے ہوئے نہ صرف جنگی محاذ پر کامیابی حاصل کی بلکہ روسی معیشت کو بھی سنبھالے رکھا۔ انہوں نے چین، بھارت، اور دیگر غیر مغربی ممالک کے ساتھ تعلقات مضبوط کیے، توانائی کی برآمدات کو جاری رکھا اور مغربی مالیاتی نظام کے متبادل نظام پر کام کیا۔پیوٹن کی اس کامیابی میں سب سے اہم عنصر خود انحصاری اور مضبوط دفاع تھا۔ انہوں نے اس بات پر انحصار نہیں کیا کہ دنیا ان کی حمایت کرے گی یا نہیں، بلکہ اپنی طاقت پر بھروسہ کرتے ہوئے فیصلہ کیا اور اس پر قائم رہے۔ ان کا یہ رویہ ان تمام ممالک کے لیے سبق ہے جو عالمی طاقتوں کی مدد پر انحصار کرتے ہیں اور ان کے فیصلوں پر چلتے ہیں۔

اگر ہم امریکہ کے صدر ڈونلڈ ٹرمپ کی سیاست پر نظر ڈالیں تو وہ ایک بالکل مختلف حکمت عملی پر عمل پیرا رہے۔ ٹرمپ نے اپنی سیاست کسی بیرونی سہارے پر نہیں، بلکہ اپنی عوامی حمایت اور اندرونی طاقت پر استوار کی۔ انہوں نے امریکی اسٹیبلشمنٹ، عالمی اداروں، اور حتیٰ کہ اپنی ہی پارٹی کے کچھ حصوں کے خلاف مزاحمت کی، لیکن اپنی پوزیشن کو برقرار رکھا۔ ٹرمپ نے یہ ثابت کیا کہ اگر قیادت کے پاس داخلی استحکام اور خود اعتمادی ہو، تو وہ دباؤ کے باوجود اپنی جگہ بنا سکتی ہے۔

زیلنسکی کی موجودہ حالت ایک سبق ہے کہ عالمی سیاست میں کامیابی صرف انہیں حاصل ہوتی ہے جو خودمختاری اور داخلی استحکام پر یقین رکھتے ہیں۔ کوئی بھی ملک یا قیادت ہمیشہ دوسروں کے سہارے پر اپنی جنگ نہیں لڑ سکتی۔ طاقت کا اصل سرچشمہ بیرونی امداد نہیں بلکہ اندرونی خود انحصاری اور عوامی حمایت ہوتی ہے۔

یوکرین کی جنگ نے یہ بھی ثابت کیا کہ طاقتور ممالک چھوٹے اور کمزور ممالک کو محض اپنے مفادات کے تحت استعمال کرتے ہیں، اور جب وہ اپنے مقاصد پورے کر لیتے ہیں، تو حمایت کمزور پڑ جاتی ہے۔امریکہ کے بدلتے رویے نے دنیا کو ایک بار پھر یہ باور کرایا کہ حقیقی خودمختاری اور بقا کا دارومدار صرف اندرونی طاقت پر ہوتا ہے، نہ کہ کسی بیرونی امداد یا وعدے پر۔یہی وہ نکتہ ہے جو تاریخ میں بار بار دہرایا گیا ہے۔چاہے وہ قدیم سلطنتوں کی جنگیں ہوں، یا جدید ریاستوں کے معرکے، وہی قیادتیں کامیاب رہتی ہیں جو اپنے زورِ بازو پر انحصار کرتی ہیں، نہ کہ دوسروں کے سہارے پر۔

یہی سبق پاکستان اور بھارت کے لیے بھی ہے کہ وہ اپنے معاملات خود طے کریں، کیونکہ دنیا تماشہ دیکھتی ہے اور جو کچھ بھی مدد کے نام پر دیا جاتا ہے، وہ حقیقت میں مفادات کا کھیل ہوتا ہے۔جنرل ضیاء الحق کے دور میں امریکہ نے سویت یونین کے خلاف اپنے مقاصد کو ”جہاد” کا نام دے کر پاکستان اور افغانستان کو ایک ایسی جنگ میں جھونک دیا جس کا خمیازہ آج تک بھگتنا پڑ رہا ہے۔ امریکہ کے لیے یہ جنگ بس ایک شطرنج کا کھیل تھی، جس کے ذریعے اس نے سویت یونین کو تحلیل کروا کر خود دنیا کا واحد سپر پاور بننے کی راہ ہموار کر لی۔ لیکن اس کھیل میں پاکستان اور افغانستان کے حصے میں تباہی اور عدم استحکام آیا۔ امریکہ نے اپنے مقاصد کے لیے جنگ لڑوائی، سوویت یونین کو کمزور کیا، اور پھر جب کام ختم ہو گیا تو پاکستان اور افغانستان کو مسائل میں گھرا چھوڑ دیا۔ یہ ایک ایسا سبق ہے جو عرب ممالک سمیت تمام چھوٹے ممالک کو سیکھنا چاہیے کہ عالمی طاقتیں صرف اپنے مفادات کے لیے دوست بنتی ہیں، نہ کہ کسی کی بہتری کے لیے۔

آج اگر دنیا کے کسی بھی خطے میں حقیقی امن کا سوال کیا جائے تو اس کا جواب صرف ایک ہے۔ مضبوط دفاع اور خودکفالت کوئی بھی ملک قرضوں اور امداد کے سہارے نہ مستحکم ہو سکتا ہے، نہ ہی اپنا حق حاصل کر سکتا ہے۔ کمزور ہمیشہ دوسروں کے رحم و کرم پر ہوتا ہے، اور جب فیصلہ سازی کا وقت آتا ہے تو اسے پیچھے ہٹنا پڑتا ہے۔ یہی اصول عالمی سیاست پر بھی لاگو ہوتا ہے۔ طاقتور ممالک ہمیشہ اپنے مفادات کی جنگ لڑتے ہیں، اور عالمی امن کو بھی اپنے مقاصد کے لیے استعمال کرتے ہیں۔

پاکستان اور بھارت کے درمیان بھی کئی مسائل موجود ہیں، لیکن ان کا حل صرف اسی صورت میں ممکن ہے جب دونوں ممالک اپنے فیصلے خود کریں۔ دنیا کے طاقتور ممالک ان کے تنازعات سے فائدہ اٹھاتے ہیں اور اپنے اسلحے کی فروخت، سفارتی دباؤ اور علاقائی چالوں کے ذریعے اپنی برتری قائم رکھتے ہیں۔ اگر جنوبی ایشیا میں واقعی دیرپا امن چاہیے تو اس کا راستہ خودمختاری، مضبوط دفاع، اور اقتصادی خودکفالت سے ہو کر گزرتا ہے، نہ کہ بیرونی امداد یا عالمی طاقتوں کی ثالثی سے۔پیوٹن کی حکمت عملی نے یہ واضح کر دیا ہے کہ عالمی سیاست میں وہی کامیاب ہوتا ہے جو اپنے فیصلے خود کرے، اپنی طاقت پر بھروسہ کرے اور دوسروں کی جنگ میں مہرہ نہ بنے۔ آج یوکرین مشکلات میں ہے کیونکہ اس نے مغرب اورامریکہ پر انحصار کیا، جبکہ روس اپنی طاقت کے سہارے کھڑا ہے اور کامیابی کی طرف بڑھ رہا ہے۔یہ وقت ہے کہ پاکستان، بھارت، اور دیگر علاقائی ممالک تاریخ سے سبق سیکھیں اور اپنے فیصلے خود کریں، کیونکہ کمزور ہمیشہ دوسروں کی جنگ کا ایندھن بنتا ہے، جبکہ طاقتور اپنی تقدیر خود لکھتا ہے۔