Tag: ترقی

دفاتر میں ترقی کی نوید بظاہر کسی کے لیے مسرت، ادارے کے لیے کامیابی، اور نظم و نسق کے لیے تازگی کا پیغام ہوتی ہے، مگر یہی نوید بعض اوقات شخصی اخلاق کا ایسا کڑا امتحان بن جاتی ہے، جس میں کم ہی لوگ سرخرو ہو پاتے ہیں۔ ادارہ جب کسی خاک نشین کو منصبِ افسری پر فائز کرتا ہے تو دراصل اُس کے ظرف کا پیمانہ جانچتا ہے۔

مگر اکثر یہ دیکھنے میں آیا ہے کہ نیا عہدہ ملتے ہی کچھ افراد کے رویے میں ایسا تغیر آتا ہے جو اُن کی اصل شخصیت کا بھانڈا بیچ چوراہے پھوڑ دیتا ہے۔وہی شخص، جو کل تک ساتھیوں کے ساتھ نشست و برخاست میں خاکساری، انکسار اور اخلاص کا پیکر دکھائی دیتا تھا، آج جب اُس کے کندھے پر “عہدے” کا تمغہ سجتا ہے تو اُس کی زبان میں ترشی، لہجے میں رعونت، اور رویے میں تکبر در آتا ہے۔ وہ اپنے ماتحتوں سے یوں پیش آتا ہے گویا وہ اس کے ماتحت نہیں بلکہ کسی جاگیردار کے خاندانی غلام ہوں۔ وہ بھول جاتا ہے کہ عہدے بدلتے رہتے ہیں، مگر رویے ہی انسان کو یادگار بناتے ہیں۔ایسے افراد کے لیے ایک بزرگ کا قول پتھر پر لکیر کی حیثیت رکھتا ہے:

“اگر لوگ تمہیں صرف تمہارے منصب کی وجہ سے عزت دیتے ہیں، تو تم عبرت کا نمونہ ہو، باعثِ احترام نہیں۔”
کچھ ترقی یافتہ افسران کا حال تو اس سے بھی بدتر ہوتا ہے۔ وہ اپنے سینئرز کے سائے سے بھی خار کھانے لگتے ہیں اور اُن سے آگے نکلنے کے جنون میں اخلاقیات کا گلا گھونٹ دیتے ہیں۔ چاپلوسی، سازش اور موقع پرستی اُن کا شیوہ بن جاتی ہے۔ ان کی ترقی، ادارے کی ترقی نہیں بلکہ اخلاقی پستی کا پیش خیمہ ثابت ہوتی ہے۔اور پھر وہ طبقہ بھی ہے جنہیں دوسروں کی تذلیل سے سکون ملتا ہے۔ ماتحتوں کی عزت نفس کو پامال کر کے وہ سمجھتے ہیں کہ اُن کا وقار بلند ہو رہا ہے، حالانکہ وہ اپنی اخلاقی پستی کو خود ہی سب پر آشکار کر رہے ہوتے ہیں۔

یہ وہ لوگ ہوتے ہیں جنہیں نہ ادارہ دل سے قبول کرتا ہے، نہ ساتھی یاد رکھتے ہیں، نہ تاریخ میں ان کا کوئی مقام ہوتا ہے۔وقت کا پہیہ گھومتا ہے، اور وہی ماتحت جنہیں وہ خاک سمجھتے تھے، کل ان کے برابر یا بالا بھی ہو سکتے ہیں۔ اُس دن اُن کے رویے کی گواہی وہی لوگ دیں گے جنہیں وہ آج نظرانداز کر رہے ہیں۔ کرسی تو چند روزہ مہمان ہے، مگر انسان کا سلوک اُس کی پہچان بن کر ہمیشہ کے لیے باقی رہتا ہے۔لہٰذا ضروری ہے کہ ترقی کے بعد بھی انسانیت، انکسار، اور شرافت کو نہ چھوڑا جائے۔ منصب اگر کردار کو نگل جائے تو وہ زینت نہیں، وبالِ جان بن جاتا ہے۔ افسری کا اصل وقار اُس وقت ہے جب ماتحت دل سے دُعائیں دیں، نہ کہ دانت پیستے رہیں۔

جمہوریت ایک بہترین طرزِ حکومت ہے، اور دنیا کے ترقی یافتہ ممالک پر نظر ڈالیں تو زیادہ تر جمہوری نظر آتے ہیں لیکن اس کے ساتھ ساتھ چین اور روس جیسے ممالک بھی عالمی سطح پر نمایاں مقام رکھتے ہیں، حالانکہ ان کا جمہوری نظام مغربی معیارات سے مطابقت نہیں رکھتا۔ سوال یہ پیدا ہوتا ہے کہ کیا محض جمہوری عمل ہی ترقی کی ضمانت ہے یا قیادت کا کردار اور سیاسی رہنماؤں کا رویہ بھی اتنا ہی اہم ہے؟

پاکستان میں جمہوریت اور جمہوری عمل پر نظر ڈالیں تو آئین موجود ہے، سیاسی جماعتیں بھی سرگرم ہیں اور انتخابات کا تسلسل بھی برقرار رہا ہے، لیکن مکمل جمہوری نظام ابھی تک نہیں پنپ سکا۔ اس کی ایک بڑی وجہ شخصیت پرستی اور خاندانی سیاست پر مبنی طرزِ فکر ہے۔ ذوالفقار علی بھٹو کی جمہوری جدوجہد، ان کی قربانیاں اور ان کی جماعت کا کردار تاریخ کا ناقابلِ فراموش باب ہیں۔ ان کی عدالتی بحالی کے باوجود آج بھی ان کے خلاف منفی پروپیگنڈا کیا جاتا ہے۔

پاکستانی سیاست میں مخالفین پر الزام تراشی اور تنقید کے ذریعے اپنی جگہ بنانے کا رجحان عام ہے۔ تنقید اور پروپیگنڈے میں واضح فرق ہوتا ہے، مگر بدقسمتی سے یہاں یہ فرق مٹ چکا ہے۔ ذوالفقار علی بھٹو کی شخصیت سے اختلاف کیا جا سکتا ہے، لیکن یہ حقیقت اپنی جگہ مسلمہ ہے کہ وہ پاکستان کے پہلے منتخب وزیرِاعظم تھے، جنہوں نے ملک کو متفقہ آئین دیا، بیرونِ ملک روزگار کے مواقع پیدا کیے، اسٹیل ملز قائم کیں، زرعی اصلاحات کیں اور ہر شعبے میں انقلابی اقدامات کیے۔ دفاعی اور خارجہ پالیسی کے میدان میں ان کے فیصلے آج بھی پاکستان کے استحکام کی بنیاد سمجھے جاتے ہیں۔

اس کے باوجود بھٹو پر تنقید کا سلسلہ آج بھی جاری ہے، کیونکہ ان کی مقبولیت کو کم کیے بغیر کچھ سیاست دان اپنی جگہ نہیں بنا سکتے۔ شیخ مجیب الرحمٰن کے چھ نکات کی بنیاد پر ملک کی تقسیم کا الزام بھٹو پر لگایا جاتا ہے، حالانکہ وہ اس وقت اقتدار میں نہیں تھے اور ان کے پاس کوئی ایسی طاقت نہیں تھی کہ وہ مجیب الرحمٰن کے مینڈیٹ کو رد کر سکتے۔ اصل فیصلے طاقت کے مراکز میں ہوئے، مگر الزام بھٹو پر لگا کر انہیں متنازع بنایا گیا۔

اگر بھٹو کے بعد کوئی حقیقی عوامی لیڈر سامنے آتا تو شاید پاکستان ترقی کے سفر پر گامزن رہتا اور جمہوریت مستحکم ہوتی، مگر ایسا نہ ہوسکا۔ بھٹو وہ لیڈر تھے جو قومی مفاد کے لیے قید و بند کے باوجود بھی مخالفین کے ساتھ مذاکرات کے لیے تیار ہوتے۔ جب ایوب خان نے گول میز کانفرنس بلائی، تو بھٹو نے صرف ایک شرط رکھی کہ جیل میں قید مجیب الرحمٰن کو بھی مدعو کیا جائے۔ ایوب خان نے یہ شرط مان لی، اور 26 فروری 1969 کو یہ کانفرنس منعقد ہوئی، مگر چند دن بعد یحییٰ خان نے مارشل لا لگا کر جمہوری عمل کو سبوتاژ کر دیا۔

بدقسمتی سے پاکستان میں جمہوری سیاست کے بجائے شخصیات کو نشانہ بنانے کی روایت عام رہی۔ میاں نواز شریف اور عمران خان کی سیاست میں بھی سب سے بڑا ہدف بھٹو ہی رہے، جبکہ آمرانہ ادوار کے ذمہ دار ایوب خان، یحییٰ خان اور ضیاءالحق کو نظرانداز کیا جاتا رہا۔ اس سیاسی طرزِ عمل میں پاکستان کی ترقی نہیں بلکہ ذاتی اقتدار کی جستجو نمایاں رہی۔

موجودہ سیاسی حالات میں بلاول بھٹو زرداری نے درست کہا کہ قومی مسائل پر اتفاقِ رائے پیدا کرنا ناگزیر ہے۔ اپوزیشن اور حکومت کو تنگ نظری کی سیاست ترک کرکے عوام کے حقیقی مسائل پر توجہ دینی ہوگی۔ بلوچستان اور خیبر پختونخوا میں امن و امان کی بحالی اولین ترجیح ہونی چاہیے۔ سیاسی انتقام کے بجائے قومی ایشوز پر یکجہتی کی ضرورت ہے۔ دہشتگردی کے خلاف جنگ ہو یا معیشت کی بحالی، تمام جماعتوں کو اپنے ذاتی مفادات سے بالاتر ہو کر ملک کے لیے کام کرنا ہوگا۔

ذوالفقار علی بھٹو کے جمہوری طرزِ عمل اور خدمات کو دیکھیں تو واضح ہوتا ہے کہ وہ قومی ایشوز پر بدترین مخالفین کو بھی مذاکرات کی میز پر لانے کا فن جانتے تھے اور قومی اتفاق رائے کو ہمیشہ مقدم رکھتے تھے۔ مفاہمت ہی سیاست کا اصل جوہر ہے، اور مفاہمت اصولوں پر سمجھوتے کا نام نہیں بلکہ بہتر راستہ نکالنے کی صلاحیت کا اظہار ہے۔ انتشار اور تقسیم کسی حقیقی لیڈر کا شیوہ نہیں ہوتا، بلکہ ایک اچھا لیڈر اختلافِ رائے کو ایک حد میں رکھتے ہوئے ذاتیات اور شخصیات کو سیاست کا محور بنانے سے گریز کرتا ہے۔ پاکستان کی سیاست کو ذاتیات کے دائرے سے نکال کر حقیقی عوامی خدمت کی طرف لانے کی ضرورت ہے۔ اگر سیاستدان قومی مفاد کو مقدم رکھیں، تو جمہوریت مضبوط ہوگی اور ملک ترقی کی راہ پر گامزن ہوگا۔

خیبرپختونخوا میں بم دھماکے، جبکہ پنجاب میں روزانہ نئی ترقیاتی سکیموں کا آغاز ہوتا ہے۔ اس پر خیبرپختونخوا کے کئی لوگ تنقید کرتے ہیں، اور اگر میں کہوں کہ وہ جلتے ہیں تو غلط نہ ہوگا۔ عوام کا کہنا ہے کہ اگر واقعی ترقی چاہتے ہو تو کسی ایک پارٹی کو مسلسل سپورٹ کرنا چاہیے۔ خیبرپختونخوا میں یہ تیسرا دورِ حکومت ہے، مگر آج تک کوئی بڑی ترقیاتی خبر سننے کو نہیں ملی۔

پنجاب میں مریم نواز کی حکومت کا یہ پہلا دور ہے، لیکن ترقیاتی منصوبوں کی رفتار حیران کن ہے۔ اتنے زیادہ پروگرامز کا آغاز اور مسلسل منصوبوں کی شروعات، کیا یہ سب پہلے سے پری پلان تھے یا واقعی دیگر صوبوں کے خلاف کوئی سازش ہو رہی ہے؟ پنجاب میں ہر روز کسی نہ کسی منصوبے کا افتتاح ہو رہا ہے، کبھی کوئی ثقافتی میلہ تو کبھی کوئی ترقیاتی اقدام۔ فروری کے مہینے میں پورا پنجاب مختلف تقریبات سے لطف اندوز ہوتا رہا—فیض فیسٹیول، پرانی گاڑیوں کا میلہ، پھولوں کی نمائش، جانوروں کے شو، اور یہاں تک کہ ڈرون شوز تک۔ ساتھ ہی مختلف اسکالرشپس، لیپ ٹاپ اسکیمیں اور دیگر سہولیات پنجاب کے طلبہ کے لیے جاری کی گئیں۔

مگر خیبرپختونخوا کے لیے میرے پاس کچھ کہنے کو نہیں۔ یہاں یونیورسٹیوں کی زمینیں بیچ دی گئیں، کوئی نئی یونیورسٹی نہیں بنی۔ دہشت گردی جو کہ ہمارا سب سے بڑا مسئلہ ہے، اس میں کوئی نمایاں کمی نہیں آئی۔ ٹریفک کے مسائل جوں کے توں ہیں، کوئی نئے قواعد و ضوابط نہیں بنائے گئے۔ طلبہ کے لیے کوئی ایسی اسکیم نہیں جو ان کے تعلیمی اخراجات کم کر سکے، خاص طور پر ان کے لیے جو مہنگی تعلیم برداشت نہیں کر سکتے۔ نہ ہی کوئی ایسا ثقافتی پروگرام منعقد ہوا جس سے پختون کمیونٹی کو پہچان ملے۔

خیبرپختونخوا میں ٹریفک کا مسئلہ سنگین ہوتا جا رہا ہے، خاص طور پر ان علاقوں میں جہاں نان کسٹم پیڈ گاڑیاں عام ہیں۔ اگر ملاکنڈ ڈویژن کی بات کریں، تو آج تک وہاں ایک بھی ٹریفک سگنل نصب نہیں کیا گیا، حالانکہ اس کی اشد ضرورت ہے تاکہ عوام کو ٹریفک قوانین کا شعور حاصل ہو۔ چکدرہ، مینگورہ، تھانہ اور دیگر کئی علاقوں میں ٹریفک سگنلز کی سخت ضرورت ہے۔

اگر جنگلات کا ذکر کریں تو صورتحال اتنی مایوس کن ہے کہ شاید پڑھ کر آپ کو افسوس ہو۔ پچھلے چند سالوں میں جنگلات کا صفایا تقریباً مکمل ہو چکا ہے۔ اسی طرح بنوں کا واقعہ بھی اب تک کسی بڑی توجہ کا مرکز نہیں بن سکا۔

دنیا ترقی کی دوڑ میں کہاں جا رہی ہے اور ہم کہاں کھڑے ہیں؟ خیبرپختونخوا کے نوجوانوں اور طلبہ سے کہنا چاہوں گا کہ وہ دنیا کے کسی بھی حصے میں ہوں، ہمیں اپنے حقوق کے لیے آواز بلند کرنی ہوگی۔ ہمیں اپنے لیڈروں سے کوئی غرض نہیں، بس ہمیں ترقی چاہیے! ایسی اسکالرشپس درکار ہیں جن سے ہم اپنی تعلیم بہتر طریقے سے جاری رکھ سکیں۔ ہمیں ترقی چاہیے، حقیقی ترقی!

بہت سے لوگوں کو اس سوال کا جواب معلوم نہیں کہ تعلیم کا اصل مقصد کیا ہے؟ اگر تعلیم کا اصل مقصدصرف ڈگری لینا، پیسے کمانا، یا پھر نوکری کرنا ہے، تو یہ صحیح نہیں ہے، کیونکہ یہ سب کامیابیاں تو بغیر ڈگری کے بھی مل سکتی ہیں. تعلیم کا اصل مقصد تو اپنی صلاحیتوں میں اضافہ کرنا، بڑے خواب دیکھنا اور ناکامیوں سے خوفزدہ نہ ہونا ہے۔

ہمارے ہاں اکثر لوگ تعلیم کو بنیادی طور پر دو مقاصد کے لیے استعمال کرتے ہیں۔ پہلا یہ ہے کہ اس کو حاصل کر کے انسان کچھ مہارت سیکھتا ہے جس کو استعمال کر کے کوئی پیشہ اپنایا جا سکتا ہے، جبکہ دوسرا مقصد تعلیم کا یہ سمجھا جاتا ہے کہ اس کے ذریعے روایات، نظریات کو نئی نسل میں منتقل کیا جاسکے، اور یہی سب سے اعلٰی تعلیم ہے.

ایک بات عام طور پر کہی جاتی ہے کہ تعلیم حاصل کرو، ترقی کرو ، اور اپنے ملک کا نام روشن کرو. مگر افسوس کہ ایسی ترقی یہاں صرف امیروں اور سیاست دانوں کے بچے کر سکتے ہیں، اور یہ سلسلہ نسل در نسل سے چلتا آ رہا ہے. اس میں غلطی معاشرے کی بھی ہے کیوںکہ وہ ہمیں صرف نوکری تک محدود رکھتا ہے. ایک نوجوان کو شروع سے آخر تک یہی بات بتائی جاتی ہے کہ تمھیں پڑھ لکھ کرصرف نوکری کرنی ہے. آج کل جتنے بھی نوجوان یونیورسٹی جاتے ہیں، ان میں سے %90 کا مقصد صرف نوکری کےلیے ڈگری کا حصول ہوتا ہے. یہاں کامیاب انسان وہ ہے جس نے ڈگری لی ہو اور ساتھ میں نوکری کر رہا ہو. تعلیم بہت سے بند دروازے کھول دیتی ہے لیکن ہمارے ملک میں تو ایسا نہیں ہوا . یہاں آج بھی پڑھا لکھا طبقہ سیاست دانوں کے احکامات کے نیچے کام کرتا ہے اور وہ آزاد ہو کر بھی غلامی کی زندگی گزار رہا ہے .

پاکستان میں بنیادی طور پر تعلیم حاصل کرنے کے لئے مختلف ادارے موجود ہیں� جن میں مذہبی تعلیم سے لے کر انتہائی مہنگے انگریزی اسکول تک شامل ہیں۔ لیکن ہر دو قسم کے ادارے بنیادی طور پر وہی کام کر رہے ہیں جو اوپر بیان کیے گئے ہیں۔ ہمارے تعلیمی اداروں میں سوال کرنے پر پابندی ہے، اگر کوئی سوال پوچھے تو اس کو یہی کہا جاتا ہے کہ تمھیں بہت زیادہ سوال آئے ہوئے ہیں.

معاشرہ تربیت پر بھی بہت زیادہ تو جہ دیتا ہے. زیادہ زور اس پر ہوتا ہے کہ نئی نسل بالکل ویسے سوچے، ویسے عمل کرے جیسے ان سے پچھلی نسل کرتی آئی ہے. جبکہ وقت بدل رہا ہے، نئی سائنسی ترقی نے نئی نسل کو تیز کر دیا ہے۔ تیزی سے بدلتے دور نے تعلیمی مقاصد تبدیل کرنے پر مجبور کیا ہے۔ مغرب نے کافی عرصے سے تعلیم کے مقاصد تبدیل کر دیے ہیں۔ ان کے مطابق تعلیم کا مقصد ”دماغ کی تربیت کرنا ہے تاکہ وہ سوچ سکے،سوال کر سکے، اور زندگی میں آنے والے مسائل کو حل کر سکے.“ نوم چومسکی کے مطابق ”زندگی کا سب سے بڑا مقصد تلاش کرنا، بنانا اور ماضی کے اسباق کو اپنا حصہ بناتے ہوئے اپنی تلاش جاری رکھنا ہے“. ہم ترقی کرنا اور آگے بڑھنا چاہتے ہیں، لیکن یہ بات سمجھ نہیں آتی کہ ہمارا موجودہ تعلیمی نظام انگریزوں نے بنایا تھا، جس کا مقصد ایسےبے دام غلام پیدا کرنا تھا جو سوال نہ کرسکیں اور گورے کے اشاروں پر اس کا ہر کام سرانجام دیں۔ پاکستان بننے کے بعد بھی ہمارے حکمرانوں نے یہ نظام جاری رکھا ہوا ہے. جس سے ہمارے ذہن ایسے بن گۓ ہیں کہ ہم آگے چلتے ہوئے پیچھے دیکھتے رہتے ہیں۔

ضرورت اس بات کی ہے کہ ہم تعلیم کو صرف دو کام یعنی نوکری اور نظریات کی ترویج کے علاوہ بھی دیکھیں، اور آنے والی نسل کو نئے علوم و فنون سیکھنے پر لگائیں تاکہ ہمارے معاشرے میں امن، تحمل، معاشی ترقی، اور برداشت پیدا ہو سکے۔تعلیم لیڈر پیدا کرتی ہے نوکر نہیں. تعلیم دوسروں کو فائدہ دیتی ہے. خود کے بارے میں سوچنے کا نام تعلیم نہیں ہے. تعلیم انسان کو بہادر بناتی ہے بزدل نہیں. اگر تعلیم حاصل کرنے کے باوجود بھی ہمارے خواب چھوٹے ہیں تو پھر اس تعلیم کا کوئی فائدہ نہیں ہے ۔ ناکامی اور کامیابی زندگی کا حصہ ہیں، اپنی پہچان الگ سے بنائیں، دنیا میں اپنا نام بنائیں، ساری زندگی ایک ہی چیز پرضائع نہ کریں. آج ناکام ہوگئے تو کل ضرور کامیاب ہوگے. ناکامی ہی کامیابی ہے. بائیس گریڈ افسر سے وہ آدمی بہتر ہے جس کے پاس 22 افراد کام کرتے ہیں کیوں کہ وہ خود کے ساتھ ساتھ دوسروں کا بھی پیٹ پالتا ہے۔

سسٹین ایبل ڈولپمنٹ سے مراد وہ ترقی ہے جو آنے والی نسلوں کی ضروریات پر سمجھوتہ کئے بغیر موجودہ نسلوں کی ضروریات کو پورا کرتی ہے، پائیدار ترقی کا مقصد ایک ایسے سماج کی تشکیل ہے جہاں انسانی ضروریات کو ایک ایسے انداز میں پورا کیا جاتا ہے جہاں قدرتی وسائل کا ضرورت کے عین مطابق استعمال ہوتا ہے اور ضیاع سے حتی الوسع گریز کیا جاتا ہے، پھر اس کا بحیثیت مجموعی اس کرہ ارض اور آنے والی نسلوں پر ایک مفید و خوشگوار اثر پڑتا ہے ۔

پائیدار ترقی ایک ہمہ گیر نوعیت کا عنوان ہے جو کہ مختلف شعبہ ہائے زندگی سے منسلک ہے، اور ہر شعبہ زندگی میں اس کا گہرا عمل دخل ہے اور اگر ان پر عمل درآمد ہو تو بحیثیت مجموعی پائیدار ترقی کے تقاضوں کو پورا کیا جا سکتا ہے ۔

روزمرہ زندگی میں پائیدار ترقی کی بہت سی مثالیں موجود ہیں، برقی توانائی کی ہی مثال لے لیتے ہیں، ہم اپنے گھروں میں برقی توانائی کا استعمال کر کے بہت سے کام سرانجام دیتے ہیں، ہم استعمال کے ساتھ ان کا ضیاع بھی کرتے ہیں، اگر کوئی کمرہ ایک یا دو بلبوں سے روشن ہوتا ہے تو تیسرا بلب روشن نہیں کرنا چاہیے، ایسے بلب کا استعمال کرنا چاہیے جو روشنی کے ساتھ کفایت بھی مہیا کرے، دن کے وقت سورج کی روشنی کا زیادہ سے زیادہ استعمال کرنا چاہیے جس سے برقی توانائی کی بچت بھی ہوتی ہے، اور ماحول اور انسانی صحت پر ایک قدرتی اثر پڑتا ہے۔

ہمارے زیادہ تر گھروں میں برقی توانائی کا منبع واپڈا یا ڈسکوز کی طرف سے ہوتا ہے جنہیں ہم بھاری بھرکم بل ادا کرتے ہیں، پس اگر استطاعت ہو تو شمسی توانائی کا انتظام گھروں میں ضرور کرنا چاہیے جو کہ گرین انرجی یعنی سبز توانائی ہے، جبکہ ڈسکوز کی بجلی زیادہ تر فوسل پیول اور دوسرے غیر ماحول دوست ذرائع سے بنتی ہے اور اسکا استعمال بحیثیت مجموعی نہ صرف ماحول پر پڑتا ہے بلکہ نیشنل گرڈ پر بھی بوجھ میں اضافہ ہوتا ہے، پس اگر گرین انرجی کا استعمال زیادہ ہو تو نہ صرف انفرادی بچت ہے بلکہ سسٹم کو بجلی کی بچت مہیا کر کے لوڈشیڈنگ میں کمی لائی جا سکتی ہے اور اس میں پورے ملک و قوم کا بھی فائدہ ہے، مزید اب گرین میٹرز کا بھی اجرا ہو چکا ہے جو نیٹ مییٹرنگ کے اصولوں پر چلتی ہیں، یعنی کوئی بھی صارف مطلوبہ مقدار سے زیادہ توانائی برقی کمپنی یا گرڈ سسٹم کو بیچ سکتا ہے، پس یہ صارفین کے لیے بھی سودمند ہے، برقی توانائی کے پیداواری صلاحیت میں بھی ایک مثبت اضافہ ہے اور پائیدار ترقی کی جانب بھی ایک اہم قدم ہے۔

دوسری مثال سبز عمارات یعنی گرین بلڈنگز کی لی جا سکتی ہے، یہ ایسی عمارتیں ہوتی ہیں جنہیں پائیدار ترقی کو مدنظر رکھ کر ڈیزائن کیا جاتا ہے، وہاں کھڑکیوں کا ایسا نظام ہوتا ہے جہاں مد مقابل سمتوں سے تازہ ہوا داخل و خارج ہوتی ہے اور کمرے ہوادار ہوتے ہیں، چھتوں اور دیواروں میں تھرموسٹیٹ میکانزم ہوتا ہے جو درجہ حرارت کو موسمی تقاضوں کے عین مطابق معتدل رکھتا ہے اور معمول کے مطابق سردی یا گرمی سے بچنے کیلئے برقی آلات کا استعمال کم سے کم ہوتا ہے، گرین بلڈنگز کیلئے ایسا رقبہ بروئے کار لایا جاتا ہے جو زرعی نہ ہو، گرین بلڈنگز کے اندر معقول گرین بلٹس کا انتظام ہوتا ہے جس میں پھولدار اور سدا بہار پودے لگائے جاتے ہیں جو آکسیجن فراہمی کے ساتھ ساتھ ایک خوشگوار احساس بھی دلاتے ہیں ۔

پائیدار ترقی ایک وسیع عنوان ہے، جس کا احاطہ اس مختصر مضمون میں بالکل ناممکن ہے، اس ضمن میں اقوام متحدہ نے ایک جامع منصوبہ بنایا ہے جسے ویژن 2030 کے نام سے منسوب کیا گیا ہے، 2015 میں اقوامِ متحدہ نے کچھ اہداف رکھے تھے جو تعداد میں سترہ ہیں، مختصر طور پر ان کو سترہ ایس ڈی جیز (سسٹین ایبل ڈولپمنٹ گولز) کہا جاتا ہے، ان اہداف پر تمام ممبر ممالک نے 2030 تک عمل درآمد کو یقینی بنانا ہے، یہ سترہ اہداف بالترتیب یہ ہیں، غربت کا خاتمہ، بھوک یعنی غذائی قلت کا خاتمہ، اچھی صحت، معیاری تعلیم، صنفی مساوات، صاف پانی، قابل استطاعت توانائی، معیاری کام اور معاشی ترقی، صنعتیں ایجادات و انفراسٹرکچر، عدم مساوات کا خاتمہ، پائیدارشہر اور کمیونٹی، ذمہ دارانہ پیداوار و مصرف، موسمیاتی عملدرآمد، آبی جانداروں کا تحفظ، زمینی جانداروں کا تحفظ، امن انصاف اور مضبوط ادارے، ان اہداف کے حصول کیلئے باہمی تعاون ۔

یہ تمام وہ اہداف ہیں جن کے اندر آنے والی نسلوں کی ترقی مضمر ہے، اور ہماری زمین اور اس کے باسیوں کی بقا کیلئے بہت ہی اہم ہیں، ترقی یافتہ ممالک میں ان پر کافی حد تک عمل درآمد ہو چکا ہے جبکہ ترقی پذیر اور تھرڈ ورلڈ ممالک میں ان اہداف پر کام نہ ہونے کے برابر ہے، ترقی پذیر ممالک میں ان اہداف کے حوالے سے آگاہی کا بھی شدید فقدان پایا جاتا ہے، اور پہلا قرینہ ایک پر اثر آگاہی مہم کا ہے جسے حاصل کرکے ہی عملی طور پر ان اہداف کے حصول کو ممکن بنایا جا سکتا ہے۔

پاکستانی معاشرے میں روایتی طور پر خواتین کا کردار گھریلو ذمہ داریوں، خاص طور پر باورچی خانے تک محدود سمجھا جاتا رہا ہے۔ تاہم، وقت کے ساتھ یہ تصور تبدیل ہو رہا ہے، اور خواتین زندگی کے مختلف شعبوں میں نمایاں کامیابیاں حاصل کر رہی ہیں۔ آج کی پاکستانی عورت تعلیم، صحت، سائنس، سیاست، اور دیگر میدانوں میں اپنی صلاحیتوں کا لوہا منوا رہی ہے، جو معاشرتی ترقی میں اہم کردار ادا کر رہی ہیں۔

تعلیم اور خواتین کی ترقی
تعلیم کسی بھی فرد کی ترقی کا بنیادی ذریعہ ہے۔ یہ انسان کو شعور، خود اعتمادی، اور معاشرتی ترقی کی راہوں پر گامزن کرتی ہے۔ پاکستان میں خواتین کی تعلیم پر خصوصی توجہ دی جا رہی ہے، تاکہ وہ معاشرے میں مثبت کردار ادا کر سکیں۔ تعلیم یافتہ خواتین نہ صرف اپنے خاندان کی بہتری کا باعث بنتی ہیں بلکہ ملکی ترقی میں بھی اہم کردار ادا کرتی ہیں۔ مثال کے طور پر، ارفع کریم رندھاوا نے 2004 میں سب سے کم عمر مائیکروسافٹ سرٹیفائیڈ پروفیشنل کا خطاب حاصل کیا، اور عائشہ فاروق پاکستان کی پہلی خاتون فائٹر پائلٹ ہیں۔ یہ مثالیں ثابت کرتی ہیں کہ خواتین کسی بھی میدان میں مردوں کے شانہ بشانہ کھڑی ہو سکتی ہیں۔

پیشہ ورانہ میدان میں خواتین کا کردار
پاکستان میں خواتین مختلف پیشہ ورانہ میدانوں میں نمایاں خدمات انجام دے رہی ہیں۔ صحت کے شعبے میں، ڈاکٹرز، نرسز، اور دیگر طبی عملے کی بڑی تعداد خواتین پر مشتمل ہے، جو ملک کی صحت عامہ میں اہم کردار ادا کر رہی ہیں۔ تعلیم کے میدان میں، خواتین اساتذہ نسل نو کی تربیت میں مصروف ہیں۔ سائنس اور ٹیکنالوجی میں بھی خواتین کی شمولیت بڑھ رہی ہے، جو ملک کی ترقی میں معاون ثابت ہو رہی ہیں۔

سیاست اور خواتین کی شمولیت
سیاست میں خواتین کی شمولیت معاشرتی ترقی کے لیے ضروری ہے۔ پاکستان کی تاریخ میں فاطمہ جناح اور بے نظیر بھٹو جیسی شخصیات نے سیاست میں نمایاں کردار ادا کیا۔ آج بھی خواتین سیاستدان ملکی فیصلوں میں اہم کردار ادا کر رہی ہیں، جو جمہوری عمل کو مضبوط بنانے میں مددگار ثابت ہو رہی ہیں۔

معاشرتی ترقی میں خواتین کا حصہ
خواتین کی شمولیت کے بغیر کوئی بھی معاشرہ مکمل ترقی حاصل نہیں کر سکتا۔ معاشرتی ترقی کے لیے ضروری ہے کہ ہم روایتی تصورات سے باہر نکلیں اور خواتین کو ان کی صلاحیتوں کے مطابق آگے بڑھنے کے مواقع فراہم کریں۔ خواتین کی شمولیت معاشرتی توازن کو برقرار رکھنے اور ترقی کی رفتار کو تیز کرنے میں مددگار ثابت ہوتی ہے۔

نتیجہ
خلاصہ یہ کہ، خواتین کا کردار صرف باورچی خانے تک محدود نہیں ہونا چاہیے۔ انہیں اپنی صلاحیتوں کو بروئے کار لاتے ہوئے معاشرتی، تعلیمی، اور پیشہ ورانہ میدانوں میں آگے بڑھنے کا حق حاصل ہے۔ یہی رویہ ہمارے معاشرے کی ترقی اور خوشحالی کا ضامن ہے۔

ہر قوم کی ترقی کا دار و مدار اس کے افراد کی سوچ، طرزِ عمل اور رویوں پر ہوتا ہے۔ اگر ہم ایک کامیاب، خوشحال اور ترقی یافتہ قوم بننا چاہتے ہیں تو ہمیں اپنی اجتماعی اور انفرادی عادات میں بنیادی تبدیلیاں لانی ہوں گی۔ ترقی کا سفر کسی جادوئی عمل کا نتیجہ نہیں ہوتا بلکہ اس کے لیے مستقل مزاجی، نظم و ضبط، صبر، اور ایک واضح وژن کی ضرورت ہوتی ہے۔

سوچ کی تبدیلی: ایک نئے نقطۂ نظر کی ضرورت
ہماری سب سے بڑی کمزوری ہماری غیر مستقل مزاجی اور وقتی جذباتیت ہے۔ اکثر ہم وقتی جوش و خروش میں کوئی قدم اٹھاتے ہیں، لیکن جیسے ہی مشکلات سامنے آتی ہیں، پیچھے ہٹ جاتے ہیں۔ ترقی کے لیے ضروری ہے کہ ہم اپنی سوچ کو وقتی جذباتیت سے نکال کر حقیقت پسندی اور اصولی بنیادوں پر استوار کریں۔ دنیا میں جن اقوام نے ترقی کی منازل طے کی ہیں، ان کی کامیابی کا راز یہ ہے کہ وہ طویل المدتی منصوبہ بندی کرتی ہیں اور اصول پسندی کو اپنی زندگی کا حصہ بناتی ہیں۔ ہمیں بھی اپنی سوچ میں وسعت اور گہرائی پیدا کرنی ہوگی، تاکہ ہم محض وقتی فوائد کے بجائے دیرپا ترقی کی راہ پر گامزن ہو سکیں۔

نظم و ضبط اور استقامت: کامیابی کی کنجی
کسی بھی ترقی یافتہ معاشرے کا جائزہ لیا جائے تو معلوم ہوتا ہے کہ وہاں کے افراد نظم و ضبط اور صبر کے اصولوں پر کاربند ہوتے ہیں۔ ہمیں بھی اپنی روزمرہ زندگی میں ان صفات کو اپنانا ہوگا۔ وقت کی پابندی، وعدوں کی پاسداری، ذمہ داری کا احساس، اور اپنے فرائض کی ادائیگی میں سنجیدگی، یہ وہ اصول ہیں جو ہمیں ایک کامیاب اور منظم قوم بنا سکتے ہیں۔

اجتماعی سوچ: انفرادی نہیں، قومی مفاد کو ترجیح دیں
ہمارا ایک بڑا مسئلہ یہ بھی ہے کہ ہم اجتماعی سوچ کے بجائے انفرادی مفاد کو زیادہ اہمیت دیتے ہیں۔ ترقی یافتہ معاشرے وہی ہوتے ہیں جہاں افراد اجتماعی بہتری کے لیے کام کرتے ہیں۔ ہمیں یہ سمجھنا ہوگا کہ جب ہم بطورِ قوم آگے بڑھیں گے، تبھی ہم انفرادی طور پر بھی خوشحال ہوں گے۔ قانون کی پاسداری، دوسروں کے حقوق کا احترام، اور ملکی مفاد کو ذاتی مفاد پر ترجیح دینا، یہ وہ اصول ہیں جو کسی بھی قوم کو ترقی کی شاہراہ پر گامزن کر سکتے ہیں۔

قانون کی حکمرانی: حقیقی ترقی کی بنیاد

کوئی بھی قوم اس وقت تک ترقی نہیں کر سکتی جب تک کہ وہاں قانون کی حکمرانی نہ ہو۔ ہمیں اس حقیقت کو تسلیم کرنا ہوگا کہ اگر ہم ترقی چاہتے ہیں تو ہمیں قوانین پر سختی سے عمل کرنا ہوگا۔ ٹریفک قوانین کی پاسداری، ملاوٹ سے گریز، انصاف کے اصولوں کی پاسداری، اور سماجی ذمہ داریوں کو پورا کرنا، یہ وہ بنیادی عوامل ہیں جو کسی بھی قوم کو مہذب اور ترقی یافتہ بناتے ہیں۔

ایک روشن مستقبل کی امید
اگر ہم واقعی ترقی چاہتے ہیں تو ہمیں اپنی سوچ اور رویوں میں تبدیلی لانی ہوگی۔ ہمیں وقتی جذباتیت، غیر مستقل مزاجی اور بے اصولی کو ترک کر کے اصول پسندی، صبر، استقامت، نظم و ضبط، اجتماعی سوچ اور قانون کی پاسداری کو اپنانا ہوگا۔ یہی وہ راستہ ہے جو ہمیں ایک کامیاب، خودمختار اور ترقی یافتہ قوم میں بدل سکتا ہے۔ ترقی کا سفر مشکل ضرور ہوتا ہے، لیکن اگر ہم مستقل مزاجی اور ایمانداری کے ساتھ اس راہ پر چلیں تو ایک روشن مستقبل ہماری منتظر ہوگا۔