Tag: انسٹاگرام

سوشل میڈیا موجودہ صدی کا سب سے بڑا انقلاب ہے جس نے پوری دنیا کو اپنے حصار میں لے رکھا ہے ۔ انسان نے کبھی سوچا بھی نہیں تھا کہ پوری کی پوری دنیا سمٹ کر اس کے ہاتھوں میں ایک موبائل ڈیوائس کے ذریعے سما جائے گی۔ گویا سوشل میڈیا نے پوری دنیا کوصحیح معنوں میں ایک گلوبل ویلج کی شکل دے دی ہے ۔

سوشل میڈیا اس وقت دنیا کا سب سے برق رفتار ہتھیار ہے ، مختلف سوشل میڈیا ایپلیکیشنز نے پوری دنیا میں رہنے والے سات ارب سے زائد افراد کو اپنے سحر میں مبتلا کر رکھا ہے۔

پاکستان میں سوشل میڈیا صارفین کی تعداد
پاکستان ٹیلی کمیونیکشن اتھارٹی کی حالیہ رپورٹ کے مطابق ملک میں تمام پلیٹ فارمز پر سوشل میڈیا صارفین کی تعداد سولہ کروڑ سے زائد ہے ۔ ملک میں سب سے زیادہ یوٹیوب صارفین ہیں جن کی تعداد سات کروڑ ستر لاکھ ہے ، اسی طرح فیس بک کے صارفین کی تعداد پانچ کروڑ اکہتر لاکھ ہے۔ یو ٹیوب کے مرد صارفین کا تناسب 72 فیصد جبکہ خواتین کا 28 فیصد ہے ۔اسی طرح فیس بک کے 71 فیصد مرد صارفین ہیں اور 22 فیصد خواتین ہیں ۔ رپورٹ کے مطابق ٹک ٹاک صارف ایک کروڑ تراسی لاکھ ہیں ، ان میں بیاسی فیصد مرد ٹک ٹاکرز ہیں اور خواتین اٹھارہ فیصد ہیں ۔ پاکستان میں انسٹا گرام صارفین کی تعداد ایک کروڑ اڑتیس لاکھ ہے اور ان میں پینسٹھ فیصد مرد اور چونتیس فیصد خواتین ہیں ۔

سوشل میڈیا کا مثبت استعمال
سوشل میڈیا آج کے دور کا بہت بڑا نیٹ ورک ہے جس کا مثبت استعمال ہمارے لیے بہت ہی فائدہ مند ثابت ہو سکتا ہے۔

1۔کمائی کا بہترین ذریعہ
اس حقیقت سے کوئی بھی انکار نہیں کرسکتا کہ سوشل میڈیا کمائی کا ایک بہترین ذریعہ ہے۔ یوٹیوب پر کافی عرصہ سے لوگ اپنے چینلز کے ذریعہ آمدنی حاصل کر رہے ہیں۔ خرید و فروخت کے بہت سارے مسائل بھی اس کے ذریعہ آسان ہوچکے ہیں۔

2۔معلومات کا اشتراک
سوشل میڈیا کسی بھی موضوع پر بر وقت معلومات جیسے، صحت، اسپورٹس اور دیگر موضوعات کی اپڈیٹس فراہم کرتا ہے۔

3۔ذریعہ حصول تعلیم و تعلم
نوجوان سوشل میڈیا کو تعلیم حاصل کرنے کا ذریعہ بنا کر اس سے تعلیم حاصل کرسکتے ہیں۔ سیکھنے اور معلومات حاصل کرنے والوں کیلئے بہترین پلیٹ فارم ہے۔سوشل میڈیا پر موجود مختلف تعلیمی ویڈیوز ،لیکچرز اور ٹیوٹوریلز کے ذریعے طلبہ اپنی تعلیم کو مزید بہتر بنا سکتے ہیں۔

4۔سماجی خدمت اور خیر خواہی
سماجی مسائل کو اجاگر کرنے اور مستحق لوگوں کی مدد کرنے کے لیے سوشل میڈیا ایک بہترین پلیٹ فارم ہے۔ ہم کئی فلاحی کام اور ضرورت مندوں کی مدد کے لیے اس کا استعمال کر سکتے ہیں۔ نبی کریم ﷺ نے فرمایا:
[arabic]”خَيْرُ النَّاسِ أَنْفَعُهُمْ لِلنَّاسِ”[/arabic]
(لوگوں میں سب سے بہتر وہ ہے جو دوسروں کو نفع پہنچائے۔) (مسند احمد: 23408)

5۔سما جی رابطوں کا ذریعہ
سوشل میڈیا کا سب سے اہم فائدہ یہ ہے کہ یہ لوگوں کے درمیان رابطے کے ذرائع کو سہل بناتا ہے اس کے ذریعے ہم اپنے دوستوں عزیزوں اور رشتہ داروں سے دوری کے باوجود جڑے رہتے ہيں۔

6۔مثبت نظریات اور اخلاقی اقدار کی ترویج
ہم سوشل میڈیا کو اچھے خیالات، دینی اور اخلاقی اقدار، اور مثبت پیغامات پھیلانے کے لیے استعمال کر سکتے ہیں۔ نبی ﷺکا فرمان ہے: “جو شخص کسی شخص کو بھلائی کی طرف رہنمائی کرتا ہے وہ اس کے برابر اجر پاتا ہے۔” (صحیح مسلم ) نیز اس کے ذریعے ہم دوسروں کی حوصلہ افزائی کر سکتے ہیں اور ایک خوشگوار معاشرتی فضا قائم کر سکتے ہیں۔

سوشل میڈیا کے آداب:
کسی بھی خبر یا معلومات کو شیئر کرنے سے پہلے اس کی تصدیق کرنا ضروری ہے۔ جھوٹی خبریں اور افواہیں پھیلانے سے نہ صرف معاشرتی بگاڑ پیدا ہوتا ہے۔ سوشل میڈیا پر ضرورت سے زیادہ وقت گزارنا وقت کا ضیاع ہے۔ اس کا استعمال معتدل انداز میں کرنا چاہیے۔ نبی اکرم ﷺ نے فرمایا:
[arabic]”نِعْمَتَانِ مَغْبُونٌ فِيهِمَا كَثِيرٌ مِنَ النَّاسِ: الصِّحَّةُ وَالْفَرَاغُ”[/arabic]
(دو نعمتیں ایسی ہیں جن کی قدر اکثر لوگ نہیں کرتے: صحت اور فارغ وقت۔) (بخاری: 6412)

اختلافِ رائے کو مہذب انداز میں بیان کرنا اور دوسروں کے نقطہ نظر کو برداشت کرنا سوشل میڈیا کے آداب میں شامل ہے۔ غیر ضروری بحث مباحثے،ایک دوسرے کا مذاق اڑانے اور گالم گلوچ سے اجتناب کرنا چاہیے۔ اللہ تعالیٰ نے فرمایا:
[arabic] “يَا أَيُّهَا الَّذِينَ آمَنُوا لَا يَسْخَرْ قَوْمٌ مِّن قَوْمٍ”[/arabic]
(اے ایمان والو! کوئی قوم کسی قوم کا مذاق نہ اُڑائے۔) (سورۃ الحجرات: 11)

آپ گوگل پر کسی مسئلے کے بارے میں تحقیق کر رہے ہیں، آپ فیس بک پر اسکرولنگ کر رہے ہیں یا یوٹیوب پر مطلوبہ موضوع کے بارے میں تلاش کر رہے ہیں یا انسٹاگرام، ٹوئٹر پر سرگرداں ہیں۔ آپ کا واسطہ کانٹینٹ سے پڑ رہا ہوتا ہے۔

کانٹینٹ کیا ہے؟
آپ جو بھی دیکھتے یا سنتے ہیں وہ کانٹینٹ یا “مواد” ہے۔ اب کانٹینٹ کسی خبر کی شکل میں ہو سکتا ہے، کوئی ویڈیو ، تصویر، تحریر، یا صرف آواز ہو سکتی ہے۔

اگلا سوال یہ ہے کہ “ویلیوایبل کانٹینٹ” کیا ہے؟
وہ کانٹینٹ یا مواد جو آپ کے وقت کو قیمتی بنائے، آپ کی زندگی پر مثبت اثر ڈالے۔ کیا آپ جانتے ہیں کہ ہماری آنکھیں جو دیکھتی ہیں یا ہمارے کان جو سنتے ہیں، اُن کا براہِ راست اثر ہماری شخصیت پر پڑتا ہے۔ آپ ایک پودے کو بھی مسلسل منفی باتیں سنائیں، طعن وتشنیع کا نشانہ بنائیں تو وہ جلد ہی مرجھا جائے گا۔ اب ذرا سوچیں کہ ہماری قوم کا سرمایہ ہمارے نوجوان روزانہ کس قسم کا “زہر” اپنے اندر جذب کر رہے ہیں۔ جدید ٹیکنالوجی کی بدولت ہر ہاتھ میں موبائل ہے اور موبائل پر “سوشل میڈیا” نامی جِن سب کی خدمت کے لیے حاضر۔

اب صورتِ حال یہ ہے کہ ہمارے ہاں ہر بندہ ہی کانٹینٹ بنانے میں لگا ہوا ہے۔ وہ لوگ جو کسی مثبت مقصد کے تحت کانٹینٹ بنا رہے ہیں، ان کی تعداد آٹے میں نمک کے برابر ہے۔ اکثر کا مطمح نظر صرف شہرت اور پیسے کا حصول ہے۔ ایسے میں جو کانٹینٹ سامنے آرہا ہے وہ عام طور پر اخلاقیات سے عاری ہے۔
ایک نوجوان کا واسطہ ایسے کانٹینٹ سے پڑ رہا ہے جو بے حیائی پر مشتمل ہے، یا وہ دوسروں کو ایک ایسی زندگی گزارتے ہوئے دیکھ رہا ہے جس میں مسائل کا شائبہ تک نہیں، دولت کی ریل پیل ہے۔ ایسے میں وہ اشتعال انگیزی اور مایوسی کا شکار ہو گا یا “کردار کا غازی” بنے گا۔ بات صرف یہیں تک ختم نہیں ہو جاتی۔ معاشرہ افراد سے بنتا ہے۔ جب تقریباً ہر شخص ہی مایوسی کا شکار ہو گا اور بے مقصد زندگی گزارنے پر مجبور ہو گا تو آپ خود سوچیں کہ ایسا معاشرہ اقوامِ عالم میں کہاں کھڑا ہو گا؟

سستی شہرت اور اندھا دھند دولت حاصل کرنے کی خواہش میں ہمارے ہاں ایسا کانٹینٹ بنایا جا رہا ہے جو معاشرے کے لیے زہر کا کام کررہا ہے۔ ایسے کانٹینٹ کے نتیجے میں:
1۔ ہم ترقی کی راہ سے دور ہوتے جا رہے ہیں۔
2۔ اخلاقی برائیاں پیدا ہو رہی ہیں۔
3۔ خاندانی اقدار کا لحاظ ختم ہو رہا ہے۔
4۔ حلال وحرام کا امتیاز بھی ختم ہو رہا ہے۔
اس کانٹینٹ کو “نشے” کا نام دیا جائے تو غلط نہیں ہو گا کیونکہ بنانے والے اور دیکھنے والے دونوں ہی معاشرے کی تعمیر میں اہم کردار ادا کرنے سے قاصر ہو جاتے ہیں۔

ویلیوایبل کانٹینٹ کی اہمیت:
ویلیوایبل کانٹینٹ کسی بھی قوم کا سرمایہ ہوتا ہے۔ درج ذیل نکات مفید مواد کی اہمیت اجاگر کرتے ہیں:
1۔ قومی تشخص:
کسی قوم کے اکثریتی افراد کا کانٹینٹ اقوامِ عالم میں اس قوم کا نمایاں تشخص قائم کرتا ہے۔ مقامِ فکر ہے کہ ہماری اکثریتی عوام کا کانٹینٹ بے حیائی کو فروغ دے رہا ہے۔ ہماری قوم کا تشخص فیملی ویلاگنگ اور فحش مواد کی بنا پر ایک ایسی قوم کا بن رہا ہے جو کاہل ہے، دولت کے حصول کے لیے اپنی اقدار کی پرواہ نہیں کرتی۔ زندگی گزارنے کے اصولوں سے ناواقف ہے۔

2۔ مستقبل کے لیے سنگ میل:
کانٹینٹ کسی بھی قوم کے نوجوانوں کو اپنے مستقبل کی راہ متعین کرنے میں معاون ہوتا ہے۔ اس وقت جو کانٹینٹ ہمارے ملک میں بن رہا ہے وہ ہمارے نوجوانوں کی کیا رہنمائی کرے گا۔ اس کانٹینٹ سے کاہلی، بے حیائی اور اخلاقی بحران جیسے ماشرتی ناسور پیدا ہورہے ہیں۔

3۔ سیکھنے کے عمل میں معاون:
انسان ہر وقت کچھ نہ کچھ سیکھتا ہے۔ کانٹینٹ اس سیکھنے کے سفر میں معاون ہوتا ہے۔ماضی میں کتاب بہترین استاد ہوا کرتی تھی۔ زندگی کے نشیب و فراز کے متعلق رہنمائی دیا کرتی تھی۔ ڈیجیٹل دور میں کتاب کی جگہ ڈیجیٹل کانٹینٹ نے لے لی۔ ہمارے ہاں بنننے والا اکثر کانٹینٹ معاشرتی و معاشی ترقی کے بجائے تنزلی کی طرف رہنمائی کر رہا ہے۔ آج کا نوجوان پیسےکی دوڑ میں “برکت” کے مفہوم سے ناآشنا ہے۔ اسی وجہ سے دولت کے ڈھیر کمانے کے چکر میں قوم کے تشخص اور ترقی کی قربانی دینے سے بھی گریز نہیں کرتا۔

مفید مواد ویلیوایبل کانٹینٹ کیسے بنایا جائے؟
کسی بھی قسم کا کانٹینٹ بنانے سے پہلے چند اہم نکات کو ذہن میں رکھیں:
1۔ کانٹینٹ بنانے سے آپ کا مقصد کیا ہے؟
آپ معاشرے کی ترقی میں اپنا کردار ادا کرنا چاہتے ہیں؟ اگر ایسا ہے تو آپ کو ضرور کانٹینٹ بنانا چاہیے۔ اگر آپ صرف شہرت یا دولت کمانے کے لیے کانٹینٹ بنانا چاہتے ہیں تو پھر کانٹینٹ کو ذریعہ بنا کر قوم کے مستقبل سے نہ کھیلیں۔
2۔ آپ کا کانٹینٹ کسی مسئلے کا حل پیش کر رہا ہے؟
کانٹینٹ بناتے ہوئے ذہن میں رکھیں کہ آپ کا کانٹینٹ کسی مسئلے کا حل پیش کر رہا ہو یا پھراس کا مقصد کسی چیز کو بہتر بنانے کے متعلق آگاہی دینا ہو۔
3۔ قومی و ملکی تشخص کا خیال:
دھیان رکھیں کہ آپ کے کانٹینٹ میں کچھ ایسا تو نہیں جو قومی یا ملکی شناخت کو نقصان پہنچائے؟
4۔دل آزاری سے گریز:
دیکھیں کہ آپ کے کانٹینٹ میں کچھ ایسا تو نہیں جو کسی بھی طبقے کے جذبات کو مجروح کرے؟
5۔ اشتعال انگیزی سے اجتناب:
آپ کے کانٹینٹ میںکچھ ایسا تو نہیں جو نفسیاتی یا سیاسی طور پر بُرا اثر ڈالے۔۔
7۔ تحقیق:
تحقیق شدہ معلومات ہی آگے پہنچائی جائیں۔

قرآن پاک کی سورہ “النور” میں “استیذان” کے آداب بتائے گئے ہیں۔ استیذان یعنی “گھر میں یا خلوت کے جگہ میں داخل ہونے سے پہلے اجازت لینے” کا حکم بتاتا ہے کہ اسلام گھریلو معاملات کو سربازار عام کرنے کے خلاف ہے۔ احادیث میں کسی کے گھر جھانکنے سے منع کیا گیا ہے۔ فیصلہ آپ کے ہاتھ میں ہے کہ فیملی ویلاگرز کس قسم کی حدود کو پامال کر رہے ہیں اور اس کے نتائج کیا کیا ہوسکتے ہیں۔ اور صرف یہی نہیں، ہر فحش و بےحیائی و بےدینی پھیلانے والاکانٹینٹ قوم کو ترقی کی راہ سے ہٹا دیتا ہے۔ ایک حدیث مبارکہ کا مفہوم ہے کہ جو شخص کوئی اچھا طریقہ ایجاد کرتا ہے اس طریقے پر چلنے والوں کا ثواب بھی اس کے نامہ اعمال میں درج ہوگا( ان کے ثواب میں کمی کے بغیر)۔