Category: کچھ خاص

اسلام میں مزدوروں کے بہت سے حقوق ہیں جن اسلام نے انتہائی اہمیت کے ساتھ بیان کیا ہے،مزدور ہی اس قوم کا اثاثہ ہیں جو روزانہ تازہ کماکر اپنے بچوں کا پیٹ پالتا ہے،کسی بھی ملک، قوم اورمعاشرے کی ترقی میں مزدور وں کا کردار بہت اہم ہوتا ہے، مگر سب سے زیادہ حق تلفی بھی انہی کی کی جاتی ہے۔

سرمایہ دار اور جاگیردار طبقے مزدور کا استحصال کرنا اپنا حق سمجھتے ہیں اور مزدور اسے اپنا مقدر سمجھ کر صبر کر لیتے ہیں۔ ہمارے سماج میں مزدوروں کا وجود ہے، جسے ہمیں تسلیم کرنا چاہیے۔ مزدوری ہر کوئی کرتا ہے، مگر سب کے درجات الگ ہوتے ہیں۔ ہر مزدور اپنے میدان میں اپنی بساط بھر مزدوری کرتا ہے اور اجرت حاصل کرکے اپنے اہل و عیال کی کفالت کرتا ہے۔ اسلام نے محنت کو بڑا مقام عطا کیا ہے اور محنت شخص کی بڑی حوصلہ افزائی کی ہے.

نبی کریم ﷺنے فرمایا :
خود کمانے والا اللہ تعالیٰ کا دوست ہوتا ہے. (طبرانی)

یہ فرما کر محنت کی قدرو قیمت اجاگر فرما دی۔ نیز آپ ﷺکا فرمان ہے کہ:
کسی نے اپنے ہاتھوں کی کمائی سے بہتر کوئی کھانا نہیں کھایا. (صحیح البخاری)

آپﷺ کو مزدوروں کے حقوق کا اس حد تک پاس تھا کہ وصال سے قبل آپﷺ نے اپنی امت کے لیے جو آخری وصیت فرمائی وہ یہ تھی کہ نماز کا خیال رکھو اور ان لوگوں کا بھی جو تمہارے زیر دست ہیں. (مسنداحمد، ابو داؤد)

آپ ﷺ نے مزید فرمایا:
تین قسم کے لوگ ایسے ہیں جن سے قیامت کے دن میں خود جھگڑوں گا۔ ان میں سے ایک وہ ہو گا جس نے کسی کام کروایا۔ کام تو اس سے پورا لیا مگر اسے مزدوری پوری ادا نہ کی.(صحیح البخاری)

ایک مرتبہ آپ ﷺ نے ایک شخص سے مصافحہ کرتے وقت اس کے ہاتھوں پر کچھ نشانات دیکھے، وجہ پوچھی تو اس نے بتایا روزی کمانے میں محنت مشقت کرنے کی وجہ سے، تو آپ ﷺنے اس کا ہاتھ چوم لیا۔
مزید ارشاد فرمایا:مزدور کو اس کا پسینہ خشک ہونے سے قبل اس کی مزدوری ادا کر دو. (ابن ماجہ)

جو کوئی غیر آباد زمین کو آباد کرے تو وہ اسی کی ہے (گویا اس کی محنت نے اس کو مالکانہ حقوق عطاء کر دئیے) .(احمد، ترمذی، ابو داؤد)

اجرت مزدور کا حق ہے، قرآن حکیم میں آتا ہے :
”جو ایمان لائے اور نیک عمل کرتے رہے تو ان کے لئے ختم نہ ہونے والا (دائمی) اجر ہے“

معاہدہ ملازمت (چاہے معاہدات واضح ہوں یا مضمر)کے جدید تصورات کی پیش گوئی کرتے ہوئے نبی کریمﷺ نے مزدور کو کام کی اجرت مقرر کیے بغیر بھرتی کرنے اور کام کروانے سے منع کیا ہے، ارشاد باری تعالیٰ ہےکہ اور دودھ پلانے والی ماؤں کا کھانا اور پہننا دستور کے مطابق بچے کے باپ پر لازم ہے۔محنت و مزدوری اللہ کے نبیوں کی سنت ہے۔ کم و بیش تمام انبیائے کرام نے مزدوری کو اپنا معاش بنایا۔ حضرت آدم علیہ السلام نے زمین کاشت کرکے غلہ حاصل کیا۔ حضرت نوح علیہ السلام بڑھئی کا کام کرتے تھے۔ حضرت داؤدعلیہ السلا زِرہ ساز تھے اور اپنے ہاتھ کے ہنر سے گزربسرکرتے۔ حضرت ادریس علیہ السلام درزی کا کام کرتے تھے۔ حضرت موسیٰ علیہ السلام نے10سال تک حضرت شعیب علیہ السلام کی بکریاں چرائیں۔ پیارے نبیؐ اور اللہ کے آخری رسول حضرت محمدﷺنے بھی بکریاں چرائیں۔

حضرت ابو ہریرہؓ سے روایت ہے کہ ”اللہ نے کوئی نبی نہیں بھیجا، جس نے بکریاں نہ چرائی ہوں۔“
صحابہ کے استفسار پر حضورﷺنے فرمایا۔ ”میں بھی مکے والوں کی بکریاں چند قیراط پر چرایا کرتا تھا“. (صحیح بخاری)

حضورﷺ کی خدمت میں ایک صحابی ؓ حاضر ہوئے۔ آپؐ نے دیکھا کہ مزدوری کرنے کی وجہ سے ان کے ہاتھ میں گٹھے پڑے ہوئے ہیں۔ آپ ؐ نے ان کا ہاتھ اپنے ہاتھوں میں لیتے ہوئے فرمایا :
”یہ وہ ہاتھ ہیں، جو اللہ اور اس کے رسول ﷺ کو بڑے پیارے ہیں۔“ (محنت کش اللہ کے دوست ہیں)

محنت و مزدوری کی عظمت و اہمیت کی دلیل یہ ہے کہ خود رب کائنات، مالک ارض و سماء، محنت کش، مزدور کو اپنا دوست قرار دے رہا ہے۔ ایک موقع پر اللہ کے رسول ﷺ نے ارشاد فرمایا ”بیشک اللہ روزی کمانے والے کو دوست رکھتا ہے“. (طبرانی)

نبی کریمﷺ نے فرمایا کہ :
”ایک ملازم (مرد/عورت) کم از کم درمیانے درجہ کے عمدہ کھانے اور کپڑوں کا حقدار ہے“
اور
”کسی جان کو اس کی طاقت سے بڑھ کر تکلیف نہ دی جائے“

اور یہ کہ مقرر کردہ اجرت ان (مزدوروں) کی بنیادی ضروریات کے لئے کافی ہو“ ایک اور موقع پر نبی کریمﷺ نے ارشاد فرمایا:
“تمہارے ہاں کام کرنے والے ملازمین تمہارے بھائی ہیں، اللہ تعالیٰ نے انہیں تمہاری ماتحتی میں دے رکھا ہے، سو جس کا بھی کوئی بھائی اس کے ماتحت ہو اسے وہی کھلائے جو وہ خود کھاتا ہے اور وہی پہنائے جو وہ خود پہنتا ہے۔”

تاریخی مطالعے سے یہ بات ثابت ہوتی ہے کہ حضرت عمر ؓنے فوجی جوانوں کے لئے اجرت مقرر فرمائی تھی اس اجرت پر دوران ملازمت مختلف معیارات جیسا کہ مدت ملازمت، بہترین کارکردگی اور علمی قابلیت کو مدنظر رکھتے ہوئے نظر ثانی کی جاتی،حضرتابو رافع ؓ بیان کرتے ہیں کہ رسول اللہ ﷺنے ایک اونٹ قرض لیا، پھر جب آپ ﷺ کے پاس صدقے کے اونٹ آئے، تو مجھے رسول اللہ ﷺ نے حکم دیا کہ میں اس شخص کا قرض ادا کر دوں جس سے چھوٹا اونٹ لیا تھا۔ میں نے کہا: میں تو اونٹوں میں چھ سال کے بہترین اونٹوں کے سوا کچھ بھی نہیں پاتا تو رسول اللہ ﷺنے فرمایا:

”اسی میں سے اسے دے دو، کیونکہ لوگوں میں بہتریں وہ انسان ہیں جو قرض ادا کرنے میں سب سے اچھے ہیں“ (موطا امام مالک ؒ روایۃ ابن القاسم: 524؛ جامع ترمذی: 1318)

حضرت عوف بن مالک ؓ کہتے ہیں کہ نبی کریمﷺ کے پاس جس دن مال فئے آتا، آپ اسی دن اسے تقسیم کر دیتے، شادی شدہ کو دو حصے دیتے اور کنوارے کو ایک حصہ دیتے، تو ہم بلائے گئے، اور میں عمار ؓ سے پہلے بلایا جاتا تھا، میں بلایا گیا تو مجھے دو حصے دئیے گئے کیونکہ میں شادی شدہ تھا، اور میرے بعد عمار بن یاسر ؓ بلائے گئے تو انہیں صرف ایک حصہ دیا گیا. (مسند احمد: 22905)

حضرت مقدام بن معدی کربؓ سے روایت ہے نبی کریم ؐؐ نے فرمایا:
”ہاتھ کی کمائی سے بہتر کوئی کھانا نہیں، حضرت داؤد علیہ السلام اپنے ہاتھ سے محنت کر کے کماتے تھے، حضرت موسیٰ نے اپنے نفس کو اپنی پاک دامنی کی حفاظت اور اپنے پیٹ کی غذا پر‘ آٹھ یا دس سال اجرت پر دیا“.

حضرت ابو ہریرہؓ سے روایت ہے نبی کریم ﷺکا اِرشاد مبارک ہے:
”اللہ نے جتنے اَنبیاء ؑبھیجے اُن سب نے بکر یوں کی نگہبانی کی ہے“ .(مشکوٰۃ‘258 باب الاجارہ)

حضرت سعد انصاریؓ سے نبی رحمتﷺ نے مصافحہ فرمایا تو ان کے پھٹے ہوئے ہاتھ دیکھ کر حضور نبی کریمﷺنے وجہ پوچھی تو انہوں نے عرض کیا‘ میں سارا دن”پھاوڑے“ سے محنت مزدوری کر تاہوں۔ اس لئے ہاتھ پھٹ گئے ہیں تو آپﷺ نے اُس کے ہاتھ کو بوسہ د ے کر فرمایا :
”یہ وہ ہاتھ ہیں جنہیں اللہ اور اُس کے رسولِ ﷺ بھی محبوب رکھتے ہیں“ .

حضرت ابو ہریرہ ؓسے روایت ہے،رسول اللہﷺ نے فرمایا اللہ جل شانہُ فرماتا ہے:
”میں قیامت کے دن تین شخصوں کا مد مقابل ہوں گا ایک وہ شخص جو میرے نام پر وعدہ کرکے عہد شکنی کرے‘ دوسرے وہ شخص جو آزاد کو بیچے پھر اس کی قیمت کھائے‘ تیسرا وہ شخص جو مزدور سے کام لے اوراس کی مزدوری نہ دے“.

ان احادیث سے معلوم ہوتا ہے کہ اسلام میں کم سے کم اور زیادہ سے زیادہ اجرت دونوں کے بارے میں رہنمائی موجود ہے، اس میں کم سے کم اجرت کی تو وضاحت کر دی گئی ہے تاکہ کسی مزدور کی بنیادی ضروریات کما حقہ پوری ہوسکیں۔ اسی طرح انسانی حقوق کے عالمی اعلامیے میں جس طرح ”انصاف پسند اور مناسب معاوضہ“ کی بات کی گئی ہے اسی طرح، اسلام کا موقف ہے کہ ملازمین کو اتنی تنخواہ ملنی چاہئے کہ اس سے بتقاضائے بشری اس کی او راس کے خاندان کی تمام ضروریات پوری ہو سکیں۔اللہ تعالیٰ ہمیں اسلام کے مطابق مزدورں کے حقوق ادا کر نے کی توفیق نصیب فرمائے .آمین.

ایک زمانے میں وفاقی شرعی عدالت کا دوسرا نام جسٹس فدا محمد خان ہوا کرتا تھا۔ ممکن ہی نہیں تھا کہ اس عدالت کا ذکر آئے اور جسٹس صاحب مرحوم کا ذکر نہ ہو۔ لیکن اس سے کہیں زیادہ لازم و ملزوم تنظیم اساتذہ پاکستان اور ہمارے محترم نصیر الدین ہمایوں سابق سیکریٹری جنرل تنظیم اساتذہ پاکستان ہوا کرتے تھے جب کبھی وہ مسکراتے کمرے میں داخل ہوتے تو حاضرین مجلس کے چہرے پر بشاشت آجاتی:

“لو جی! تنظیم اساتذہ پاکستان کی آمد آمد ہے.”
ہمایوں صاحب ہمیں گلے لگاتے اور پھر ہم سب کی باتیں سنتے اور مسکراتے رہتے۔ میں ان دنوں استاد نہیں تھا بلکہ اسلامی یونیورسٹی میں میری پڑھائی کے ایام کی بات ہے۔ کبھی وہ ہوسٹل میں آتے۔ رات گزار کر صبح اگلی کسی منزل کو چل پڑتے۔ عمروں میں کافی فرق کے باوجود ہم طلباء کے ساتھ یوں گھل مل جاتے کہ گویا ہم ہی میں سے ہیں۔

گرما کی تعطیلات میرے لیے مسئلہ بن جاتی تھیں چھوٹی سی یونیورسٹی، اپنے وسائل محدود، ہوسٹل بند، طعام گاہ مقفل،
آبائی گھر دوسرے قصبے میں، چھٹیوں کے تین ماہ قیام کروں تو کہاں؟ تنظیم کے صوبائی صدر، مرحوم پروفیسر مقصود پرنسپل گارڈن کالج کو معلوم ہوا تو انہوں نے ہمایوں صاحب سے بات کی۔ ضرورت تو نہیں تھی لیکن تب کے یہ منارہ ہائے نور حفظ مراتب اور روایات کے امین تھے وہ خود فیصلہ کر سکتے تھے کہ انہیں اختیار تھا اور ہمایوں صاحب نے کیا کہنا تھا وہ بھی ہنس کر بولے:
“اچھا ہے, پنڈی میں میرے قیام کے دوران میں کسی سے گپ شپ تو رہا کرے گی”۔

یوں میں نے تین سال (جون تا اگست) راولپنڈی کی الاکرام بلڈنگ کی چوتھی منزل میں وہاں گزارے جو تنظیم اساتذہ کا دفتر تھا،کمرہ کیا تھا، دو الماریوں کی لائبریری، لکھنے پڑھنے کی میز کرسی، تین چار اضافی کرسیاں یہ کائنات ایک موٹے قالین کے اوپر تھی۔ رات کو “لائبریری” کے اوپر سے گدا اتار کر میں اسے فرش پر بستر بنا لیتا۔ کبھی ہمایوں صاحب کا قیام ہوتا تو گدا عمودی کی بجائے افقی رخ اختیار کر لیتا۔ یوں ہم دونوں کی ٹانگیں گدے سے بے نیاز قالین پر جھولتی رہتیں۔ حدیث محرم راز خالق کائنات کے بموجب ایک کھانا دو مومنوں کے لئے کافی ہے۔ یوں مجھے فقہ اسلامی پڑھتے پڑھتے قیاس کا عملی تجربہ حاصل ہوا۔

ایک کھانا دو کے لیے کافی ہے تو قیاس کا تقاضا ہے کہ ایک بستر بھی دو مومنین کے لئے کافی ہو سکتا ہے۔ امید ہے کہ عہد حاضر کے جملہ مجتہدین میرے اس قیاسی اجتہاد کو قبول کرکے اسے اجماع کی سند جواز بخشیں گے۔ تنظیم اساتذہ کے اولین سیکرٹری جنرل پروفیسر عطاء اللہ چوہدری تب منصورہ میں افغان مجاہدین کے افغان سرجیکل اسپتال کے منتظم تھے۔ میرا لاہور جانا ہوتا تو قیام وہیں ہوتا۔ اب مخمصہ یہ ہے کہ چوہدری صاحب کو تنظیم اساتذہ کے زمرے میں ڈالوں یا انہیں جماعت اسلامی کا کارکن گنوں اقربا پروری کا تقاضا ہے کہ میں انہیں تنظیم اساتذہ کا فرد شمار کروں کہ میں خود استاد ہوں۔

وہ پنڈی آتے تو ہر دلعزیز اتنے کہ انہیں رات کو کہیں قیام کرنے کا سوچنا ہی نہیں پڑا ہوگا۔ لیکن پھر بھی کبھی ٹٹولنے کی خاطر اور کا ہے ربط و ضبط ملت بیضا کے مصداق وہ دو ایک دفعہ میری اس قیام گاہ میں ٹھہرے۔ ان کی آمد میرے لیے جمع بین الصلاتین کی طرح جمع بین العیدین ہو جاتی کہ بہت سے دیگر احباب جمع ہو جاتے تھے۔ پروفیسر صاحب کا نامہ اعمال اللہ کریم نے اگر میدان محشر میں عام کر دیا تو لوگ رشک کریں گے۔ صرف صدقہ کی ایک مد میں وہ بہت سے کھرب پتی صدقہ داروں سے بھی آگے ہوں گے۔ محرم راز خالق کائنات نے مسکراہٹ کو بھی تو صدقہ قرار دیا تھا۔

پڑھائی کے چار سال پورے ہوئے تو مرحوم پروفیسر مقصود صاحب ایک دفعہ پھر میدان عمل میں تھے: “شہزاد! بیگم کل درس قرآن میں گئیں تو فلاں لڑکی کو انہوں نے آپ کے لیے پسند کر لیا. کیا خیال ہے”؟ پروفیسر مقصود صاحب دراصل ہمارے قصبے کے کالج میں پروفیسر تھے۔ جب کبھی راولپنڈی اپنے آبائی گھر جاتے تو گھر کی رکھوالی ہم پانچ چھ دوستوں کے ذمہ ہوتی تھی جہاں ہم چپل کباب کی محفل جماتے یوں مقصود صاحب سے ان کے تادمِ رحلت تعلق رہا، ان کی بیگم کی پہلی کوشش کامیاب نہ ہوئی تو انہوں نے ہمت نہیں ہاری۔ اللہ کریم کی پھیلائی اس کارگاہ حیات کے تانے بانے میں ان کی بنت نہ چل سکی لیکن دونوں جنتی ارواح نے نیت اور عمل کا ثواب تو کما ہی لیا۔

مشتاق یوسفی نے کہیں لکھا ہے نا کہ جب کوئی ماضی سے آسودگی حاصل کرنا شروع کر دے تو سمجھ لو، بوڑھا ہوگیا ہے۔چلیے یوں ہی سہی یوسفی لکھنے سے پہلے مجھ سے مل لیتے تو یقیناً عبارت بدل دیتے، ماضی کے اس تذکرے کا مقصد آسودگی کا حصول نہیں بلکہ میں لاشعوری طور پر تنظیم اساتذہ کے آج کے افراد کو بھی شاید ویسا ہی دیکھنا چاہتا ہوں۔ تنظیم اساتذہ کے یہ تین معززین وہ ہیں جن سے میرا تعلق مقابلتاً زیادہ رہا، ورنہ اس عہد کا ہر فرد لگتا تھا کہ ایک ہی سانچے سے نکلا ہوا ہے، اور اسی سانچے سے روز دھل کر نکلتا ہے چند الفاظ میں ان لازوال کرداروں کو سمونا چاہوں تو انسان دوست، مثل باپ، ہمدرد، غمگسار، طلباء کے مسائل کے کھوجی، تربیتی سراغرساں اور ان جیسی متعدد دیگر کیفیات ذہن میں جھلملانے لگتی ہیں۔

میرے ذہن میں تنظیم اساتذہ کا ایک تاثر ہے کہ اس کا کام چند جامعات کو چھوڑ کر بہت سی اہم جامعات میں نہیں پھیل سکا۔ اس کا زیادہ تر کام کالجوں اور اسکولوں میں رہا ہے۔ میں تنظیم اساتذہ کے آج کے افراد اور عہدے داروں کے بارے میں زیادہ نہیں جانتا۔ خوش گمانی تو یہ ہے کہ اس سانچے میں ڈھلے آج کے افراد کو میں ویسا ہی سمجھوں۔ میں یہی کرتا ہوں اور گمان کرتا ہوں کہ تنظیم اساتذہ پاکستان میں پروفیسر عطاء اللہ چوہدری، پروفیسر مقصود احمد مرحوم اور پروفیسر نصیر الدین ہمایوں کے نت نئے اور مزید خوبیوں سے مزین ایڈیشن بھی متعارف ہوتے رہے ہوں گے، اب بھی موجود ہوں گے اور آئندہ بھی قحط الرجال نہیں ہوگا۔

اگر میری یہ خوش گمانی بجانب بحق ہے تو الحمدللہ! اس کا سراغ لگانے کو کسی تحقیقاتی کمیشن کی حاجت نہیں ہے. یہ لکھ کر دراصل میں اپنا جائزہ لے رہا ہوں کہ تنظیم اساتذہ نے جو مجھے دیا ہے، کیا میں نے اپنے طلبا کو لوٹایا۔ یہ امید بھی ہے کہ میری پیروی نہ سہی لیکن یہ توقع تو کر سکتا ہوں کہ آج کی تنظیم اساتذہ کے جملہ متعلقین میرے ان تین ممدوحین میں سے کم از کم کسی ایک جیسے تو ہوں۔

گزشتہ چند برسوں میں جو ظلم ملتان کی سرزمین، اس کے سائے دار درختوں اور آموں سے لدے باغوں پر ڈھایا گیا، وہ کسی موسمی یا قدرتی آفت کا نتیجہ نہ تھا بلکہ انسانی حرص، مفاد پرستی اور ترقی کے نام پر بے رحم منصوبہ بندی کا شاخسانہ ہے۔

گزشتہ دہائی میں ملتان جیسے زرخیز اور سرسبز خطے میں ترقی کے نام پر تقریباً 20,000 ایکڑ پر پھیلے آم کے باغات اور دیگر قیمتی درختوں کو بے دردی سے کاٹ کر رہائشی کالونیاں قائم کی گئیں۔ اگر صرف آم کے درختوں کی بات کی جائے تو فی ایکڑ اوسطاً 60 درخت لگائے جاتے ہیں، جس کا مطلب ہے کہ کم از کم 12 لاکھ آم کے درخت اس مدت میں ختم کر دیے گئے۔ لیکن اگر دیگر اقسام جیسے نیم، بیری، شیشم، شہتوت، کچنار اور یوکلپٹس کو بھی شامل کیا جائے، تو درختوں کی اوسط تعداد فی ایکڑ 100 سے بھی تجاوز کر سکتی ہے، جو ہمیں یہ ظاہر کرتی ہے کہ کم و بیش 20 سے 25 لاکھ درخت زمین سے مٹا دیے گئے۔ ان درختوں کی کٹائی نے نہ صرف فطری ماحول کو شدید نقصان پہنچایا بلکہ گرمیوں کی شدت، ہوا کی آلودگی، زمین کی زرخیزی اور مقامی حیاتیاتی نظام پر بھی تباہ کن اثرات مرتب کیے۔

ملتان، جو کبھی موسمِ گرما کے تاجدار آم کا مرکزِ ناز تھا، جہاں کی مٹی سے خاص مہک اٹھتی تھی، جہاں دھوپ کے بھی اپنے ادب تھے اور جہاں باغات کی چھاؤں میں قافلے دم لیتے تھے، اب سنگ و سیمنٹ کی بے حس بستیوں میں بدلتا جا رہا ہے۔ اس خطے کا آم نہ صرف پاکستان میں بلکہ عالمگیر سطح پر اپنی لطافت، مٹھاس، خوشبو اور رنگت کے باعث ایک منفرد مقام رکھتا تھا۔ اگر ہم اس قیمتی نعمت کو عالمی منڈیوں میں منظم انداز سے برآمد کرتے تو جنوبی پنجاب نہ صرف اربوں روپے زرِ مبادلہ کما سکتا تھا بلکہ کسانوں کو خوشحالی، ملکی معیشت کو استحکام اور پاکستان کو زرعی برآمدات کے میدان میں نمایاں حیثیت حاصل ہو سکتی تھی۔

ہم نے تجارت کے فطری وسائل کو ختم کرکے عارضی منافع کی چکاچوند کو ترجیح دی، جس کا نتیجہ یہ ہے کہ آج ملتان ایک اُجڑا ہوا سایہ بن چکا ہے، جس کی گرم سانسوں میں ماضی کی ٹھنڈی چھاؤں کی صدائیں ابھی بھی سسک رہی ہیں۔ پرانی نہریں سوکھ گئیں، باغات کی جگہ سیمنٹ کے بلاکس نے لے لی، اور جہاں کبھی ہوا میں پھلوں کی خوشبو ہوتی تھی، اب دھول، دھواں اور شور غالب آ چکا ہے۔ درخت صرف سایہ دینے یا پھل مہیا کرنے کا ذریعہ نہیں تھے، بلکہ وہ اس زمین کی روح تھے، جنہوں نے نسلوں کو سانس لینے کی مہلت دی، بارشوں کو روکا، زمینی پانی کو محفوظ رکھا اور گرمی کی شدت کو کم کیا۔ ان کی کٹائی سے ہم نے خود اپنی جڑیں کاٹ دی ہیں، اور آنے والی نسلوں کے لیے ایک بنجر، گرم اور بے حس دنیا چھوڑنے کی تیاری کر لی ہے۔

اپریل، جو کبھی پھولوں اور ہلکی ہوا کا مہینہ ہوا کرتا تھا، اب مئی و جون کی جھلسا دینے والی حدت کا عکس بن چکا ہے۔ فضائیں بے قرار، دھوپ بے رحم، اور زمین دہکتے لوہے کی مانند ہو چکی ہے۔ گرمی کی شدت صرف موسم کا مسئلہ نہیں بلکہ ہمارے اجتماعی اعمال کا ننگا آئینہ ہے۔ یہ عمل صرف ماحول دشمنی نہیں بلکہ فطرت سے بغاوت کے مترادف ہے، جس کی قیمت ہمیں اور ہماری آنے والی نسلوں کو اپنی سانسوں، پانی، اور زندگی سے چکانی پڑے گی۔ اگر آج بھی ہم نہ جاگے، نہ رُکے، اور نہ پلٹے، تو وہ وقت دور نہیں جب ہماری زمین کے باسی صرف درختوں کی تصویریں، آموں کی خوشبو اور بارش کی نمی کو صرف خوابوں میں تلاش کریں گے۔

[poetry]درخت کاٹ کے پوچھا فضا سے کیا گزری،
ہوا نے رو کے کہا، سانس بھی امانت تھی[/poetry]

حضرت سیدہ فاطمۃ الزہرا رضی اللہ عنہا جناب نبی کریم ﷺ کی چوتھی و لاڈلی صاحبزادی ہیں، خلیفہ چہارم شیر خدا حضرت سیدنا علی المرتضیٰ رضی اللہ عنہ کی زوجہ محترمہ ہیں،اور حسنین کریمین حضرت سید نا حسین رضی اللہ عنہ اور حضرت سیدنا حسن رضی اللہ عنہ کی والدہ محترمہ ہیں. آپ ؓ کی سیرت و فضائل متعدد مقامات پر وارد ہو ئے ہیں. حضرت سیدہ فاطمۃ الزہرارضی اللہ عنہا کی سیرت بہت اعلیٰ و ارفع ہے،ان کی زندگی ہماری خواتین کےلیے مشعل راہ کی حیثیت رکھتی ہے. اگر آج ہماری خواتین مائیں،بہنیں،بیٹیاں حضرت سیدہ فاطمۃ الزہرا رضی اللہ عنہ کا اسوہ اپنا لیں تو دنیا و آخرت کی کامیابی مل سکتی ہے.

نبی اکرمﷺ نے ارشاد فرمایا ”جنتی عورتوں میں حضرت خدیجہؓ اور حضرت فاطمہؓ افضل ہیں“ (سیر اعلام النبلاء، 90:2)جناب رسول اللہ ﷺنے فرما یا فاطمہ میرے جگر کا ٹکڑا ہے،جس نے اس کو ناراض کیا،اس نے مجھے ناراض کیا(صحیح بخاری3767) رسول اللہﷺ حضرت فاطمہؓ سے بالخصوص بے حد الفت و محبت رکھتے تھے۔ آپ ﷺنے جب اشاعت اسلام کا مقدس کام شروع کیا تو ان مظالم سے جو مشرکین کی طرف سے آپﷺپر ہوتے رہے، حضرت فاطمہؓ کا حساس دل ہمیشہ بہت متاثر ہوتا رہا اور جب اپنی والدہ کے انتقال کی وجہ سے وہ اس سایہ محبت و الفت سے بھی محروم ہوگئیں، جو ان کے لیے باعث تقویت تھا، تو انہوں نے اپنے آپ کو اپنے والد کی طرف متوجہ کرکے دل و جان سے رسول اللہ ﷺکی خدمت کے لیے وقف کردیا۔ رسول اللہﷺ بھی اکثر انہیں اپنے پاس سے جدا نہ ہونے دیتے اور ہمیشہ انھیں محبت اور شفقت سے یاد فرماتے تھے۔جب حضرت فاطمہؓ کسی ایسی محفل میں آتیں جہاں حضور انور ﷺ جلوہ افروز ہوتے تو آپ ﷺحضرت فاطمہؓ کی محبت و شفقت اور پیار سے کھڑے ہوجاتے تھے اور حضرت فاطمہؓ کو اپنے پہلو میں جگہ دیا کرتے تھے۔ (ترمذی شریف ومشکوٰۃ المصابیح)

حضرت فاطمہؓ کا نکاح حضرت علیؓ سے (غزوۂ بدر کے بعد) ماہ صفر (بقول بعض ذوالقعدہ یا ذوالحجہ) 2 ہجری میں ہوااور پانچ سو درہم (بقول بعض 480 یا چار سو درہم) مہر مقرر ہوا۔ البتہ رخصتی جنگ احد کے بعد ہوئی۔ بقول ابن کثیر شادی کے وقت حضرت فاطمہؓ کی عمر پندرہ برس پانچ ماہ تھی اور بعض دیگر روایتوں کے مطابق ان کی عمر اٹھارہ انیس برس تھی۔ حافظ ابن حجرؒ کے بقول حضرت علیؓ نے جب حضرت فاطمہؓ کے لیے پیغام دیا تو نبی اکرم ﷺ نے ان سے پوچھا کہ تمہارے پاس مہر میں دینے کے لیے کیا ہے؟ حضرت علیؓ نے کہا کچھ بھی نہیں۔ آنحضرت ﷺنے فرمایا: تمھاری وہ الحطمیہ نامی زرہ کہا ہے جو میں نے تمھیں دی تھی؟ فرمایا: وہ میرے پاس موجود ہے۔ آپ ﷺ نے فرمایا کہ وہ مہر میں فاطمہؓ کو دے دو۔ یہ زرہ چار سو یا چار سو اسّی درہم پر فروخت ہوئی۔ سو یہی حضرت فاطمہؓ کا مہر تھا۔ ایک اور روایت کے مطابق یہ زرہ حضرت عثمانؓ نے خریدی تھی جسے انھوں نے بعد ازاں حضرت علیؓ کو واپس کردیا تھا۔ نکاح کے موقع پر آنحضرت ﷺنے خطبہ ارشاد فرمایا۔تقریب نکاح مسجد نبویؐ میں نہایت سادہ طریقے سے ہوئی. نکاح کے بعد حاضرین میں شہد کا شربت اور کھجوریں تقسیم کی گئیں۔ حضرت فاطمہؓ کو ایک انتہائی سادہ سازو سامان کا گھر کرایہ پر لے لے کر دیا گیا تھا۔جہیز میں جو سامان دیا گیا وہ ایک تخت خواب، دو توشکیں، ایک گرم چادر، تکیہ، پانی کی چھاگل (مشکیزہ) اور لوٹا وغیرہ پر مشتمل تھا۔ دعوت ولیمہ، جو اسی سال حضرت فاطمہؓ کی نکاح کے بہت دنوں بعد کی گئی، وہ بھی اسی طرح سادہ اور پاکیزہ تھی (بحوالہ: سیرت خیرالانام ﷺ، صفحہ 728)

حضور اکرم ﷺکے اسوۂ حسنہ سے ثابت ہے کہ آپﷺنے جہیز میں کوئی چیز حضرت فاطمہؓ کو اپنی رقم سے نہیں دی۔ حضرت علیؓ نے ضرورت کا سامان حضرت فاطمہؓ کو دیا۔ حضرت فاطمہؓ کو ضرورت کا سامان ان کے شوہرنے عطا فرمایا۔ جس کی تفصیل یہ ہے٭ خوشبو٭ ایک پلنگ٭ ایک بستر٭ ایک چادر٭ دو چکیاں ٭ ایک مشک۔ (سیرت النبیؐ، جلد دوم، از سید سلیمان ندوی و شبلی نعمانی، صفحہ 252) واضح ہو کہ یہ جہیز نہیں تھا بلکہ سامانِ ضرورت تھا جو حضرت علیؓ نے حق مہر کی رقم سے خرید کر حضرت فاطمہؓ کو دیا تھا۔

سیرت خیرالانامﷺکے صفحہ نمبر 731 پر حضرت فاطمہؓ کی وصیت درج ہے جس میں آج کے دور میں خواتین کے لیے تقلید کا اعلیٰ نمونہ موجود ہے۔ ”وفات سے پہلے حضرت فاطمہؓ نے حضرت اسماءؓ بنت عمیس کو یہ وصیت کی کہ ان کے جسد مبارک کو اس طرح اٹھایا جائے کہ کوئی شخص یہ نہ جان سکے کہ یہ جنازہ عورت کا ہے یا مرد کا۔ نیز یہ کہ آپؓ کو رات کے وقت دفن کیا جائے۔ اس لیے جسد مبارک کے اوپر کے حصے کو کھجور کی شاخوں سے اس طرح ڈھانپ دیا گیا کہ آپؓ کا جسم دکھائی نہ دے سکے۔ غسلِ میت وصیت کے مطابق حضرت اسماءؓ بنت عمیس، حضرت علیؓ اور حضرت سلمیٰ اُمّ رافعؓ نے دیا۔ نماز جنازہ حضرت علیؓ (یا بروایت دیگر حضرت عباسؓ) نے پڑھائی۔“

حضرت فاطمہؓ نے 28 یا 30 برس کی عمر میں وفات پائی۔ علامہ ابن کثیرؒ اور علامہ ابن حزم کے مطابق: حضرت فاطمہؓ نے آنحضرت ﷺکے چھ ماہ بعد وفات پائی۔ خاتون جنت حضرت فاطمہؓ کی رسول اکرمﷺ کی سب سے چھوٹی صاحبزادی تھیں۔ آپؓ کی تربیت و پرورش بی بی خدیجہؓ کی گود میں اور رسول اللہ ﷺ کے سایہ عاطفت میں ہوئی۔ جب آپؓ اٹھارہ سال کی ہوئیں تو آپؓ کا نکاح رسول اکرمﷺنے ہجرت کے دوسرے سال مدینے میں حضرت علیؓ سے کردیا۔ چونکہ حضرت علیؓ کی مالی حالت بہت کمزور تھی اس لیے آپؓ جملہ امور خانہ داری کو صبر اور شکر سے سرانجام دیتی تھیں۔

آپؓ کی زندگی کا ہر پہلو دنیا بھر کی خواتین کے لیے قابلِ تقلید ہے۔ بیٹی کی حیثیت سے آپؓ اپنے والدین پر فدا تھیں۔ جنگ اُحد میں آپؓ نے رسول اکرمﷺ کے زخم دھوئے اور مرہم پٹی بھی کی۔ بیوی کی حیثیت سے آپؓ کی زندگی شوہر کی خدمت گزاری اور فرمانبرداری میں گزری اور ماں ہونے کی حیثیت سے آپؓ نے اپنی آغوش ان ہونہار جوانوں کو پالا پوسا جن کی قربانیوں نے اسلامی روایات کو زندہ رکھا۔ اللہ رب العزت نے حضرت فاطمہؓ کی اولاد میں بڑی برکت عطا فرمائی۔ سوانح نگار رقمطراز ہیں کہ حضرت فاطمہؓ کے تین بیٹے اور دو بیٹیاں تھیں۔ یعنی حضرت حسنؓ، حضرت حسینؓ، حضرت محسنؓ، حضرت زینبؓ اور حضرت اُمّ کلثومؓ۔ حضرت فاطمہؓ کی نسل حضرت حسنؓ اور حضرت حسینؓ کے ذریعے دنیا میں باقی رہی۔دورِ جدید میں حضرت فاطمہؓ کی سیرتِ مبارکہ سے رہنمائی: مسلم خواتین دورِ حاضر میں حضرت فاطمہؓ کی سیرت پاک سے انتہا درجہ کی رہنمائی حاصل کرسکتی ہیں اور مسلم معاشرے کی تشکیل میں اہم کردار ادا کرسکتی ہیں الغرض ہماری خواتین حضرت فاطمہؓ کی سیرت پاک کے ایک ایک مبارک پہلو پر غور کریں اور عمل پیرا ہونے کی سعی کریں۔ اس طرح ایک پاکیزہ معاشرہ تشکیل پائے گا۔