Author: فیض اللہ خان

تحریک انصاف کے سابق اور زبردستی ہروائے گئے موجودہ ایم این اے عالمگیر خان نے اپنی رہائش گاہ پہ تحریک تحفظ آئین پاکستان کی قیادت اور صحافیوں کی ایک مشترکہ نشست میں ہمیں بھی دوستوں کے ساتھ شرکت کی دعوت دی. روایتی کھانوں کے ساتھ اصل لطف محمود خان اچکزئی، لطیف کھوسہ، اسد قیصر اور سلمان اکرم راجہ سمیت دیگر رہنماؤں کےساتھ براہ راست مکالمے میں آیا.

مشر محمود خان اچکزئی سے میرا سوال تھا کہ جنرل پرویز مشرف کیخلاف اے پی ڈی ایم تحریک چلارہی تھی، انتخابات کے بائیکاٹ کا فیصلہ ہوا، مگر انتخابات سے قبل میاں محمد نواز شریف نے فیصلے سے انحراف کرتے ہوئے الیکشن میں حصہ لیا. آپ، قاضی حسین احمد اور عمران خان تنہا رہ گئے اور بائیکاٹ کیا. کچھ سال قبل پی ڈی ایم بنی، عوامی بالادستی کا نعرہ بلند ہوا، انتخابات ہوئے، آپ کے اتحادی میاں صاحب اور آصف زرداری حکومت میں ہیں، جبکہ آپ اور مولانافضل الرحمن پھر سے سڑکوں پہ ہیں. کیا ضمانت ہےکہ کل کو عمران خان ڈیل نہیں کریں گے. اور انھوں نے ڈیل کر لی تو کیا پھر آپ دوبارہ سڑکوں پہ ہوں گے؟

محمود خان اچکزئی کائیاں سیاستدان ہیں. اس سوال کا دو ٹوک جواب دینے کے بجائے ماضی سے بات کرنا شروع کی، اور کہا کہ لندن میں بےنظیر بھٹو اور نواز شریف کے درمیان میثاقِ جمہوریت وہ معاہدہ یا اتحاد تھا جو استخباراتی اداروں کی مداخلت کے بغیر قائم ہوا تھا. وہ کامیاب ہوتا تو صورتحال بالکل مختلف ہوتی. محمود خان اچکزئی نے دعویٰ کیا کہ عمران خان پختونوں کی دو ہزار سال کے واحد ایسے رہنما ہیں جنھیں پختونوں نے بھرپور حمایت دی. اسی کی ذیل میں ان کی سوات میں کی گئی تقریر سے یہ حوالہ دینا بھی دلچسپی کا باعث بنے گا، جب انھوں نے کہا کہ سوات کے پختونوں عمران کے ساتھ یونہی کھڑے رہنا، وفاداری نبھانا، جان دینے سے بھی گریز نہ کرنا کہ یہی پشتون روایت ہے.

لطیف کھوسہ نے محفل کے اختتام پہ مجھے کہا کہ آپ کا سوال بالکل درست تھا، اور اس کا جواب یہ ہے کہ اگر کل کو خان مفاہمت کرلے گا، اور طاقتور کی مداخلت برقرار رہے گی تو ہم عمران خان کے ساتھ نہیں ہوں گے بلکہ مخالف سمت میں کھڑے ہوں گے. کل کیا ہوگا؟ یہ کوئی نہیں جانتا ، یہ درست ہے کہ پیپلز پارٹی اور مسلم لیگ نے اسٹیبلشمنٹ کی سیاسی مداخلت کیخلاف جدوجہد کی، بلکہ پیپلز پارٹی کی قربانیاں کسی سے بھی زیادہ رہیں، مگر یہ بھی حقیقت ہے کہ عوامی طاقت کے سڑکوں پہ نہ نکلنے اور سیاسی حکمت عملی کی ناکامی میں پیپلز پارٹی اور مسلم لیگ نے طاقتور قوتوں سے مفاہمت کی اور اپنا بیانیہ چھوڑ دیا. پیپلز پارٹی اور مسلم لیگ نے کرپشن بھی خوب کی مگر ثابت کچھ نہ ہوا، البتہ یہ بیانیہ ان کے خلاف بھرپور استعمال ہوا ، اور آج کرپشن کا بیانیہ پاکستانی سیاست سے باہر اور عوامی بالادستی کا مقبول بیانیہ ہے. مگر اب اس کا علم عمران خان کے ہاتھ میں ہے .

سیاستدان کے پاس بندوق نہیں ہوتی. وہ جمہور کی طاقت سے اپنے لیے رستہ نکالتا ہے. پیپلز پارٹی، مسلم لیگ اور اس سے پہلے بلوچ و پشتون قوم پرست قیادت عوامی بالادستی اور آئین کی حاکمیت کا بیانیہ لیکر چلے تھے. یہ طویل اور صبر آزما سفر ہے. سیاستدان باہمی جنگیں پھر بھی کرسکتے ہیں مگر عوامی بالادستی کے معاملے پہ بہرحال انھیں ایک ہونا پڑے گا، ورنہ معتوب محبوب اور محبوب معتوب ہوتے رہیں گے، اور دائروں کا یہ سفر کبھی اختتام پذیر نہیں ہوگا .

خدا کرکے کہ عمران خان ڈٹا رہے، لیکن وہ بھی مفاہمت کر گیا تو پھر طویل شب ہے. محمود خان اچکزئی کے الفاظ میں جب تک ہم سیاستدان اپنی خامیوں کا جائزہ لیکر کندھے فراہم کرنا ترک نہیں کریں گے ، بات بنے گی نہیں. جب تک عمران خان مفاہمت نہیں کرتا ، اس کی حمایت اور تائید ہر انصاف پسند انسان کو جاری رکھنی چاہیے.

امت کا سپہ سالار چلا گیا . امت کے بیٹے کے جانے پہ امت سے ہی تو تعزیت بنتی ہے !

امت سے تعزیت نہ کریں تو کس سے کریں ؟ کلف لگی وردیوں پہ سجے بےشمار تمغوں والے روح سے یکسر خالی ابدان سے کہ جن کے دامن میں عثمانیوں کے بعد ایک انچ مقبوضہ اراضی حاصل کرنے کی کوئی تاریخ نہیں ، ہاں مگر اپنے لوگوں اور زمینوں کو مفتوح بنانے کا اچھا ریکارڈ رکھتے ہیں۔

کیا مسلم خطوں پہ قابض حاکموں سے تعزیت کریں ؟ کہ جنہیں عثمانیوں کے بعد استعمار نے اپنے سہولت کار کے طور پہ ہم پہ چھوڑ رکھا ہے؟

یہ تعزیت اس ظالمانہ قوم پرستی کے دعویداروں سے کریں کہ جن کے مطابق ان کے سوا کوئی مظلوم نہیں اور جو مظلوموں میں تفریق کے قائل ہیں؟

ان لبرل سیکیولر کمیونسٹ افکار سے لتھڑے اذہان سے کریں کہ جن کی زہریلی لپلپلاتی زبانیں ہمیشہ اسلام و مسلمانوں کو کمزور دیکھ کر کھلتی ہیں ؟

نہیں ، یہ تعزیت امت کے ہر اس شخص سے بنتی ہے کہ جو رنگ، نسل اور فرقے کی تفریق سے ماوراء ہوکر ” مہمان ” کے نام سے افسانوی شہرت پانے والے کماندان سے عقیدت و محبت رکھتا ہے

بلکہ ٹھہریے! یہ تعزیت ہر اس انصاف پسند سے بنتی ہے کہ جو رنگ و نسل اور مذہب و نظریہ کی تفریق سے بالا تر ہوکر حق کے ساتھ خود کو کھڑا پاتا ہے
اور یہ تعزیت ان بہادروں سے بھی بنتی ہے کہ جو مذہب و نظریہ کے بندھن میں بندھے بغیر فقط شجاعت و ہمت اور استقلال کی بنیاد پہ بہادروں کو پسند کرتے ہیں

شط العرب کا کماندان کوئی پچیس برس باجبروت طاقتور غاصبوں کے سامنے پرچم اٹھائے کھڑا رہا . خدا کے اس بندے نے محض ایمان، توکل اور حکمت کے توشے سے ٹیکنالوجی، وسائل، طاقت اور سب کچھ جان لینے کا دعویٰ رکھنے والوں کو دھوکے میں ڈالے رکھا کہ وہ معذور ہے، اس کی نقل و حرکت ایک بڑا مسئلہ ہے، مگر جب راز کھلا بلکہ قدسیوں نے خود ہی آشکار کیا تو دنیا کے سارے استخباراتی اداروں کو معلوم ہوا کہ وہ ہاتھ پیر سلامت رکھنے والا ایسا شیر دل تھا کہ جس نے غاصبوں کے ٹیکنالوجی سے بھرپور سات جان لیوا حملے ناکام بنائے.

گزشتہ تیس برس میں بندوق کے ذریعے تاریخ کا دھارا بدلنے والے قائدین آپس میں حکمت عملی اور فکر کا کتنا ہی اختلاف کیوں نہ رکھتے ہوں ، قدر مشترکہ یہ ہے کہ خود بھی قربان ہوتے ہیں، اور اپنی آل اولاد کی قربانی دینے کی ہمت بھی رکھتے ہیں، کابل تا دمشق، قدس تا شیشان ایک نہیں درجنوں امثال بھری پڑی ہیں.

ہمارا کماندار افق کو اپنے لہو کی سرخی دے کر اس پار چلا گیا، مگر اس سے بہت پہلے ایک خونخوار حملے میں بیوی بچے قربان کر گیا . یہ کہنے ، سننےاور پڑھنے میں بہت آسان مگر عمل میں ناممکن جیسا عمل ہے.

ہمارا کماندار چاہتا تو زندگی بھرپور طریقے سے جی سکتا تھا، ” ڈیل ” کرسکتا تھا ، غاصب ریاست ایسوں کو سونے میں نہیں ہیروں میں تولنے کو تیار ہوتی ہے. وسائل، نعمتیں، جاگیریں، شہریتیں، پنج ستارہ ریستورانوں میں کانفرنسوں کی سربراہی، تھنک ٹینک اور امریکی و یورپی جامعات میں سیمینار، شرم الشیخ میں تفریح کے مواقع . کاریں، گھر ، جہاز ، جزیرے ،کاروبار ، انٹرویوز ، دستاویزی فلمیں ، ہالی وڈ کی فلمیں، نیٹ فلیکس کی سیریز ، امن کا نوبل انعام وغیرہ وغیرہ، غرض فہرست لمبی، خواہشات لامحدود ، مگر وہ کیا ہے کہ زندگی بہت محدود ۔

ضیف! خدا آپ پہ، ساتھیوں پہ رحمتوں کا نزول فرمائے، بیشک آپ نے مادیت کے جال کو کاٹ ڈالا ، آپ ہمیشہ کے لیے زندہ ہوگئے

کسی دور صحرائی مقام سے لیکر بلند و بالا کہسار تک ، سرنگوں کی زیر زمین آباد عشق کی بستیوں سے لیکر ٹوٹی پھوٹی دیہاتوں کی مساجد تک، یہاں تک کہ امت کے نوجوانوں کے دلوں تک، ہر جگہ آپ زندہ رہیں گے. کسی لوک گیت میں، کسی رزم گاہ میں، کسی نعرے میں اور قدس کی ہواؤں کی سرسراہٹ میں ۔۔۔

ہم آپ کو یاد رکھیں گے. آپ کے حوصلے، عزم، ارادے ، اور ولولے کو دل کے نصاب کا حصہ بنائیں گے اور پھر ایک دن آئے گا جب آپ کی طرح ہم باقی امت بھی ” آزاد ” ہو جائیں گے
انا للہ وانا الیہ راجعون

اس موضوع پہ بات کرنے سے پہلے کچھ ذاتی تجربہ بیان ہوجائے تاکہ اس اہم مگر فراموش مسئلے کے حوالے سے کچھ معلومات میسر آسکیں . 1970 میں والد محترم دستگیر کراچی کی غوثیہ مسجد میں امام تعینات ہوئے. خوش الحان اور فنا فی القرآن تھے. قرآن سے ان کی محبت عجب ہی تھی. شہر بھر کی محفل قرات کا حصہ بنتے . پاکستان آمد پہ معروف مصری قاری قرآن شیخ عبد الباسط کو براہ راست سن چکے تھے. غالباً کراچی کا واقعہ بتاتے ہوئے کہنے لگے کہ ساٹھ کی دہائی کے نصف کے بعد جمعہ کو ہم ایک دوست کے یہاں جمع ہوکر پرانے طرز کے گھومنے والے ریکارڈر میں تلاوت سنتے اور اس مجلس میں نجانے کہاں سے مصری فوجی کیڈٹ بھی شریک ہونے لگ گئے. وہیں والد صاحب بھی تلاوت کیا کرتے. انھی فوجیوں نے تب ایک جیبی سائز قرآنی نسخہ والد کو تحفے کے طور پہ دیا جس کے پہلے صفحے پہ مصری صدر کا فوٹو نمایاں تھا. (یہ مصری تھے یا شامی یہ اب مجھے نہیں یاد مگر یہ کنفرم ہے کہ تھے کوئی عرب کیڈٹس ہی جو یہاں تربیت حاصل کر رہے تھے). والد صاحب کی قرآن سے محبت کا یہ عالم تھا کہ بستر مرض پہ جانے سے پہلے تہجد اور فجر کے اوقات میں کئی پاروں کی تلاوت معمول تھا . ایبٹ آباد کے ایوب ٹیچنگ اسپتال کی وہ سرد شام مجھے کبھی نہیں بھولے گی جب انھیں میں موبائل سے شیخ عبد الباسط ، شیخ منشاوی سمیت دیگر مصری قراء (انہیں حجاز کے بجائے مصری لہجہ بیحد پسند تھا) کی تلاوت سناتا رہا اور وہ اشاروں سے بتاتے کہ ہاں میں سن رہا ہوں اور پھر اس رات کی صبح فجر کی اذانوں کے ساتھ ہی وہ دنیائے فانی سے چلے گئے. اللہ پاک ان کی کامل مغفرت فرمائیں. آمین

خیر بات کہیں سے کہیں نکل گئی. 1970 میں والد صاحب نے غوثیہ مسجد کی امامت سنبھالی اور پھر 1995 تک وہیں رہے. امام مسجد کی تنخواہ اب کچھ نہیں تو سوچیں اس وقت کیا ہوتی ہوگی، سو گزارہ تھا ہوتا رہا، لیکن اصل پریشان کن صورتحال اس گھر کی تھی جہاں ہم نے پچیس برس گزارے، اور یہ تکلیف اس وقت مزید دو چند ہوگئی جب چندروز پہلے میرا وہاں ایک کام سے جانا ہوا اور دیکھا کہ جس ٹین اور سیمنٹ کی چادروں تلے ہمارے والدین نے زندگی کے قیمتی پچیس برس گزار دیے، اس کی حالت اب بھی نہ بدل سکی، البتہ رمضان کی خوشی میں بیرونی دیواروں پہ چونا پھیر دیا گیا تھا ۔

محلے کے ان پکے گھروں کے بیچ ہمارا کچامکان ایسے ہی نمایاں ہوتا جیسا کہ چھوٹے مکانات کے سامنے محل الگ سے نظر آتا ہے. ہمارا گھر یہاں کے اچھے گھروں میں گویا مخمل میں ٹاٹ تھا. مجھے اچھے سے یاد ہے کہ شام میں بچوں کے ساتھ کرکٹ وغیرہ کھیل کر کوشش ہوتی کہ اندھیرے میں گھر جاؤں تاکہ دوسرے محلے سے آنے والے بچے یہ نہ دیکھ سکیں کہ ہمارا گھر کتنا کچا اور قدیم زمانہ کا ہے. اپنے محلے کے بچے خواتین وغیرہ تو روز ہی ہمارے گھر اور ہم ان کے گھر جاتے کھیل کھیلتے ٹی وی دیکھتے اور گپ شپ مزے کی رہتی. پورے محلے میں گیس تھی اور وہ گھر گیس سے نوری سالوں کے فاصلے پہ تھا . امی لکڑیاں جلاکر ناشتہ کھانا بناتیں. 90 کی دہائی میں پھر جاکر گیس کا کنکشن ملا تو سہولت بنی. گرمیوں کے روزے وہاں زندگی جہنم بنادیتے. ٹین اور سیمنٹ کی چھت یوں تپتی کہ جسم پہ چھالے پڑجاتے. ہمیں سمجھ ہی نہیں نہ لگتی یہ مسئلہ کیا ہے . باتھ روم کے دروازے نہ تھے، بلکہ لکڑیاں جوڑ جاڑ کر دروازے بنانے کی بھونڈی کوشش کی گئی تھی. گھر کا آنگن بڑا تھا تو گرمی سے بچاؤ کے لیے امی ابو نے وہاں نیم کے دو درخت لگا دیے جو بڑے ہوکر چھاؤں کا سبب بنے. ہم بچے اور والد دوپہر میں مسجد چلے جاتے. اس کے حوض میں سر بھگو کر نیم اور پیپل کے پیڑ کے نیچے آرام کرتے، البتہ امی اسی گرمی میں رہتیں جس جگہ امام مؤذن اور خادم کے گھر بنے ہیں. کہتے ہیں کہ متنازعہ جگہ ہے، دستگیر میں تعمیراتی کام کے وقت کسی ٹھیکیدار نے اسے اپنا گودام بنا رکھا تھا، یہی ہمارا گھر کہلایا . چلیں ٹھیک ہے کہ جگہ متنازعہ ہے، مان لیا، مگر مسجد کا کچھ حصہ ان گھروں کے لیے مختص نہ کرنے میں کیا سائنس تھی، یہ آج دن تک سمجھ نہ آسکی (چند برس قبل امام کے لیے مسجد کے اندر پکا گھر بنادیا گیا ہے مگر مؤذن و خادم جنھیں یہاں چالیس برس بیت چکے، شاید اس قابل نہیں کہ انھیں بھی انسانوں والی زندگی فراہم کی جائے). حیرت مجھے ان لوگوں پہ بھی ہوتی ہے جو ارد گرد رہتے تھے مگر انھوں نے بھی کبھی امام، مؤذن اور خادم کو اس غیر انسانی ماحول سے نکالنے میں دلچسپی نہ دکھائی .

95 تا 98 کا عرصہ والد صاحب نے گلشن اقبال کی ایک مسجد میں امامت کی.(پھر امارت چلے گئے تھے جہاں کے اسلامیہ اسکول میں استاد ہوگئے). یہ مسجد کسی عرب شیخ نے بناکر دی تھی، اگر میں غلط نہیں تو تنخواہ انھیں کیطرف سے دی جاتی، یہاں تنخواہ اور گھر معقول تھے یعنی کہ پکے اور اچھے لیکن یہاں کی مسجد کمیٹی والد صاحب تو ایک طرف خاکسار کی زندگی میں بھی مداخلت کرتے، (میں بمشکل اسوقت 17/18 برس کا بچہ تھا ) ایک صاحب جن کا انتقال ہوگیا انہیں میری ٹوپی نہ پہننے اور جینز پہننے پہ اعتراض تھا. ایک بار ایسی ہی کسی بات پہ موصوف کو میں نے کمیٹی ارکان کے سامنے ٹوک دیا تھا ، اس کے بعد تسلی رہی۔

ایسا نہیں ہے کہ میں اب کوئی بنگلے میں رہتا ہوں. میری رہائش تو کراچی کے تقریباً مضافات میں ہے، گھر بھی کرائے کا ہے مگر الحمدللہ پکا ہے، ٹین اور سیمنٹ کی چادروں کا نہیں کہ گرمیوں میں بدترین حال ہوجائے . بس اسی طرح کے چھوٹے سے گھر سہی مگر پکے ہوں تو آئمہ اور مسجد سے جڑے دیگر خادمین کی زندگیاں کچھ آسان ہوجائیں گی. مسجد کمیٹی کی اکثریت پورے پاکستان میں بنیادی طور پہ زعم تقوی کی چادر لپیٹے ننھے ننھے فرعونوں کی ہوتی ہے، وہ طے کرتے ہیں کہ امام کپڑے کیسے پہنے گا ؟ کیا تفریح کرے گا؟ کہاں جائے گا؟ کہاں نہیں جائے گا؟ وغیرہ وغیرہ (انسان کے بچے کم کم ہی ملتے ہیں) مسجد کروڑوں کی ہوگی مگر امام، مؤذن اور خادم کی تنخواہیں آپ کو آج بھی پتہ چلیں تو انگلیاں دانتوں تلے داب لیں . مسجد کمیٹی کو کمترین تنخواہ میں بہترین عالم، شاندار قاری اور نستعلیق خطیب چاہیے، بدلے میں آٹھ دس ہزار دیتے ہیں . امام کو بہترین رہائش تنخواہ اور گاڑی ملنی چاہیے تاکہ وہ پرسکون ہوکر مسجد کے معاملات دیکھ سکے. نماز پڑھاتے ہوئے اسے بچوں کی فیس اور علاج کی ٹینشن ہو نہ ہی جمعہ کا وعظ کرتے قیمتی پوشاک اور مہنگی گاڑیوں میں آئے نمازیوں کے لیے قبر و حشر میں عذاب کی وعید سنائے.

جو بڑے ادارے آئمہ وغیرہ مساجد کو فراہم کرتے ہیں، وہ مسجد کمیٹی والوں سے انسانی رویہ اور آئمہ کے لیے بہترین سہولتوں کا بھی مطالبہ کریں ، جب یہ سب ہوجائے گا تو معاشرے کو بہترین علماء، خطیب اور قراء میسر ہوں گے اور لوگ ڈاکٹر انجینئر کی طرح امام مسجد بن کر معاشرے کے روحانی امراض کا بھی خوب علاج کرسکیں گے . عکس والد مرحوم قاری محمد فرہاد خان اور انکی والدہ یعنی ہماری دادی کا ہے . ایک بار ضرور والد محترم کے لئیے فاتحہ پڑھ کر ایصال ثواب کریں .

جماعت اسلامی کہاں ہے ؟ ظاہر ہے کہ فی الوقت تو کہیں نہیں ہے. انتخابی طور پہ نہ ہی سیاسی محاذ پہ ، موجودہ صورتحال سے قبل اپوزیشن نے رابطہ کرکے ووٹ مانگا مگر جماعت اسلامی نے اس عمل کو اراکین کی خریداری سے جوڑ کر شمولیت سے انکار کیا. خیبر اسمبلی کے لیے بھی اپوزیشن نے اچھی آفر کے ساتھ رابطہ کیا مگر انکار ہی رہا. رہی تحریک انصاف تو انھوں نے ضرورت ہی محسوس نہ کی کہ جماعت اسلامی سے رابطہ کیا جائے. جماعت اسلامی کا موقف کیا ہے ؟ جماعت اسلامی کہتی ہے کہ انتخابی اصلاحات اور الیکشن کمیشن کی خود مختاری کے بعد فوری الیکشن اور سفارتی مراسلے کی تحقیقات کے لیے سپریم کورٹ کمیشن تشکیل دے. یہ تو ہوگیا موجودہ صورتحال پہ جماعت کا سرکاری مؤقف. اب بڑھتے ہیں اگلی بات پہ.

تحریک انصاف کے چکاچوند والے جلسے ، کم و بیش جماعت اسلامی کے اختیار کردہ نعرے اور سیاسی/ انتخابی طور پہ جماعت اسلامی کی ناکامی نے اس کے ووٹرز اور کارکنوں کے ایک حصے کو پی ٹی آئی کی طرف متوجہ کیا ہے. اسے پس منظر کےساتھ سمجھنا بھی ضروری ہے . اس کہانی کا آغاز نوے کی دہائی میں اس وقت ہوا جب آئی جے آئی حکومت کے وزیر اعظم نواز شریف سے جماعت اسلامی کے اختلافات کا آغاز ہوا اور جماعت اسلامی نے پیپلز پارٹی کے ساتھ مسلم لیگ کو بھی اپنا ہدف بنالیا اور جماعت خود کو متبادل قوت کے طور پہ پیش کرنے لگی. قاضی حسین احمد فرماتے تھے کہ نواز شریف نے شرعی نظام کے نفاذ سمیت بعض دیگر وعدوں کی پاسداری سے انحراف کیا ہے جو اتحادی کے طور پہ کیے. اس دوران جماعت اسلامی کو شدید نقصان پہنچانے والوں میں مدیر تکبیر صلاح الدین شہید سرفہرست تھے. ان صاحب کو دماغی علاج کی ضرورت تھی، جبکہ وہ دانشور بن کر قوم بالخصوص جماعت اسلامی کے کارکنوں کے اذہان پراگندہ کرتے رہے. انھیں پیپلز پارٹی سے شدید نفرت اور نواز شریف سے اتنی ہی محبت تھی. تکبیر اس زمانے کا جیو ، اے آر وائی اور سما سمجھ لیں.

جب قاضی صاحب نے نواز شریف کیخلاف مہم شروع کی تو ان کی توپوں کا رخ جماعت اسلامی کی طرف ہوگیا. موصوف کی خواہش تھی کہ جماعت اسلامی کی شوریٰ ان کے اداریوں کی بنیاد پہ فیصلے کرے. صلاح الدین دائیں بازو کے انھی مفکرین میں سے تھے جو اپنے لوگوں سے فکری بدیانتی کے مرتکب ہوئے. بدقسمتی سے دائیں بازو کے دانشوروں کی اکثریت کم و بیش اب بھی ویسی ہی ہے. جماعت اسلامی کے ووٹ بینک کو مسلم لیگ کی طرف موڑنے میں تکبیر کی نفرت انگیز صحافت کا اہم ترین کردار تھا. بعد کے عرصے میں صحافتی حلقوں میں یہ باتیں عام ہوئیں کہ انھیں پریس نواز شریف نے لگوا کر دیا تھا. مرحوم نے جماعت اسلامی کے نوجوانوں کو پرو اسٹیبلشمنٹ بنانے میں کوئی کسر نہیں چھوڑی. بہرحال جماعت اسلامی نے اپنی غیر معمولی مہم کے ذریعے اگلے چند برس میں پیپلز پارٹی اور مسلم لیگ دونوں کے احتساب کا نعرہ لگایا (نوے کی ہی دہائی میں جماعت اسلامی نے بے نظیر حکومت کیخلاف دھرنے دیکر سیاسی نظام کو کمزور کیا ، جبھی خاکسار کا خیال ہے کہ حکومتوں کی مدت پوری ہونی چاہیے، آئینی عمل ہونے کے باوجود سیاسی استحکام تک اس سے گریز بہتر ہے) مگر تب تک تاخیر ہوچکی تھی، جماعت اسلامی پنجاب کے ووٹرز نواز شریف کے ساتھ جڑ چکے تھے. اس اتحادی سیاست نے جماعت اسلامی کو آگے چل کر مزید نقصان پہنچایا. یہاں تک کہ کبھی سائیکل، کبھی کار، کبھی کتاب کے نشانات پہ الیکشن لڑنے والی جماعت اسلامی کا اپنا نشان ” ترازو” یوں غائب ہوا کہ خود مجھے 2013ء میں پتہ چلا کہ بھئی جماعت کا انتخابی نشان تو ترازو ہے.

90 کی دہائی میں جماعت اسلامی کے سربراہ قاضی حسین احمد نے پوری جماعت کو پڑوس کی جدوجہد میں جھونک دیا ، حالانکہ اسے جماعت کے ایک شعبے کے طور پہ ہونا چاہیے تھا، مگر ایسا نہ ہوسکا اور یوں جماعت اسلامی سیاسی فیصلوں اور زمینی حقائق کے بجائے جذباتی فیصلوں کے تابع ہوگئی. بنیادی طور پہ جماعت اسلامی کی سیاست کے دو ادوار ہیں. ایک مولانا مودودی کی امارت دوسرا ان کے بعد۔ میاں طفیل محمد مرحوم سے لیکر قاضی حسین احمد صاحب تک کا ابتدائی دور جماعت اسلامی کی اسٹیبلشمنٹ سے محبت و عقیدت کا دور تھا. اس زمانے میں قاضی صاحب کے زمانے میں اسلامی جمعیت طلبہ کے نوجوانوں میں یہ بات عام تھی کہ پاکستانی فوج اگر نوجوانوں کی کسی تنظیم پہ سب سے زیادہ بھروسہ کرتی ہے تو وہ جمعیت ہے، البتہ مولانا مودودی کا دور اور ان کی سیاست اینٹی اسٹیبلشمنٹ رہی. جنرل ایوب کے مقابل وہ فاطمہ جناح کے ساتھ کھڑے تھے. ذوالفقار علی بھٹو سول آمر تھے، ان کے اپوزیشن سے بدترین طرز عمل نے اپوزیشن کو یکجا ہونے اور تحریک چلانے پہ مجبور کیا. اپوزیشن میں صرف جماعت اسلامی ہی نہیں بلکہ جمعیت علمائے اسلام، جمعیت علمائے پاکستان، تحریک استقلال اور عوامی نیشنل پارٹی سمیت دیگر بھی اس کا حصہ تھے. اس تحریک کے نتیجے میں جنرل ضیاء الحق نے اقتدار سنبھالا. پیش نظر رہے کہ جماعت اسلامی کے وزراء جلد ہی ضیاء کابینہ سے نکل آئے اور اسلامی جمعیت طلبہ جنرل ضیاء کے خلاف طلبہ تحریک کی سرخیل تھی. جمعیت کے ناظم اعلی سمیت کئی کارکن جیلوں میں گئے، کوڑے بھی کھائے. اس دوران قاضی صاحب امیر بنے. میری ناقص رائے کے مطابق اگر یہ منصب پروفیسر غفوراحمد کو ملتا تو جماعت اسلامی بہتر سیاسی فیصلے کرتی نہ کہ جذباتی، خیر جو ہونا تھا وہ ہوچکا ۔

نواز شریف کے ابتدائی ادوار کیطرف پھر چلتے ہیں. 1990 میں قاضی صاحب نے پاسبان اور اسلامی فرنٹ کی صورت میں بہترین تجربہ کیا. بدقسمتی سے وقت سے پہلے اچانک انتخابات اور جماعت اسلامی کی شوری کی شدید ترین مخالفت سے یہ دونوں پراجیکٹ دم توڑ گئے، مگر جب تک پاسبان موجود رہی وہ کم گو اور شرمیلے عمران خان کی شوکت خانم کی فنڈنگ اور بڑے اجتماعات میں معاون بنی اور انھیں متعارف کراتی رہی. { اس کا یہ مطلب نہیں کہ سارا فنڈ پاسبان وغیرہ نے کرا کے دیا. خان کی اپنی شخصیت اور کرزمہ تو ابھی تک برقرار ہے، جس پہ فنڈ بھی ملتا ہے، لوگ بھی آتے ہیں، صرف یہ بتانا ہے کہ پاسبان منظم تھی تو نوجوانوں کو جمع کرنے کی بھرپور صلاحیت رکھتی تھی } اس کے کچھ عرصے بعد قاضی حسین احمد عمران خان کو ہر جگہ ساتھ لیے پھرتے رھے یہاں تک کہ پنجاب یونیورسٹی کا حادثہ ہوا جس میں جمعیت نے عمران خان پہ تشدد کرکے پولیس کے حوالے کیا، اس کے باوجود عمران خان قاضی حسین احمد کو اپنا دوست قرار دیتے تھے. بعد میں سید منور حسن بھی عمران خان کے لیے قدرے نرم گوشہ رکھتے تھے. یہی وجہ تھی کہ جماعت اسلامی کے نوجوانوں میں عمران خان کو اپنا فطری اتحادی سمجھا جاتا تھا جو احتساب کے نعرے لگاتا، قبائلی علاقوں میں آپریشن اور پڑوس میں دہشت گردی کے نام پہ جنگ کا بہت بڑا مخالف تھا. عمران خان نے حالیہ پچیس برس میں جماعت اسلامی کے تین بنیادی نعرے اٹھا کر عوام میں پھیلا دیے، پہلا احتساب کا دوسرا ریاست مدینہ اور اب تیسرا امریکی مخالفت کا ، جماعت کی تیس برس کی سیاست انھی تین نعروں کے گرد ہے مگر اسے کامیابی نہ مل سکی اور عمران خان ان نعروں کو پاکستان کے ہر طبقے اور نسل کے لوگوں تک کامیابی سے پہنچا گئے اور اسی سبب جماعت اسلامی کے ہمدردوں نے خان میں کشش محسوس کی .

اب مسئلہ جماعت اسلامی کا ہے. آیا اسی نام سے اور نشان سے بغیر کسی اتحاد میں جائے الیکشن لڑنا ہے جیسا کہ اب فیصلہ ہوا ہے، یا پھر نیا نام، نئی جماعت اور مختلف پلیٹ فارم سے اترنا ہے. جماعت اسلامی الیکشن کو جیتنے کے لیے نہیں بلکہ انتخاب برائے انتخاب لڑتی ہے. پھر پے درپے بائیکاٹ کی سیاست نے الگ سے نقصان پہنچایا. جماعت اسلامی رائج انتخابی سیاست اور اپنے نظریات یا دستور کے بیچ پھنس کر رہ گئی ہے. اپنے کڑے معیار کے سبب اس کے پاس وہ نمائندے نہیں جو اپنے بل پہ جیت سکیں، الیکشن میں بہایا جانے والا بے تحاشہ پیسہ جماعت اسلامی کی قیادت کے پاس نہیں، اس وجہ سے دیانت داری، اہلیت اور شرافت کے باوجود وہ اس میدان میں مسلسل مار کھا رہے ہیں. پھر میڈیا بلیک آوٹ الگ سے پہلو ہے ، اس کے باوجود میری نظر میں جماعت اسلامی کی ناکامی میں اپنی نااہلی کا بھرپور کردار ہے. دیگر اسلامی ممالک کی طرح پاکستان میں جماعت اسلامی کے اجتماعات دعوتی، رفاہی، اور سیاسی سرگرمیوں پہ کوئی پابندی نہیں رہی { کچھ مخصوص عرصے اور مشکلات کے سوا } ایسے میں مذکورہ بالا عوامل کے ساتھ اپنی خامیوں کا جائزہ لینے کی ضرورت ہے.

آخری بات آپ کا وہ نظریہ ہے جس کے ساتھ جماعت اسلامی کا کارکن جڑا ہوا ہے، دیکھیں آپ اپنی بہترین کوشش، حکمت عملی، غلطیوں کو نہ دہرانے، جذباتی فیصلوں سے گریز کرتے ہوئے انتخابی عمل میں اتریں، اس کے بعد ایک سیٹ ملے یا سو ، گھبرانا نہیں ہے، کیونکہ آپ کی سیاست کسی دنیاوی مفاد سے نہیں جڑی، بلکہ اس کا مقصد خدا کی حاکمیت کے قیام کا ارفع ترین کام ہے، اپنے نظریہ کی موجودگی میں کسی دوسری تنظیم ، شخصیت یا نظریہ سے متاثر نہیں ہونا چاہیے. اپنے ان لوگوں کے ساتھ کھڑے ہوجائیں، جو کم ہیں، جو بلاشبہ خطاؤں سے پاک نہیں، جنھوں نے بڑی سیاسی غلطیاں بھی کیں، مگر یقین مانیے، یہ لوگ اب بھی میسر کھیپ میں بہرحال سب سے بہتر ہیں۔

سراج الحق پہ تنقید ایک فیشن ہے { دوسری مدت کے لیے بھی سید منور حسن کو ہی امیر ہونا چاہیے تھا مگر شاید اراکین جماعت ان کا بوجھ نہیں سہار سکتے تھے } مگر سچی بات تو یہ ہے کہ اپنی کمی کوتاہی کے ساتھ سراج الحق تو درحقیقت چالیس برس کے غلط فیصلوں کے سبب سیاسی عمل سے غیر متعلق ہونے والی جماعت اسلامی کو بچانے کی کوشش کر رہے ہیں. ان کا ویژن ممکن ہے کہ بہت انقلابی نہ ہو، ان کی سادہ زندگی کو نمایاں کرنا مجھے بھی ذاتی طور پہ پسند نہیں اور خاص کر 2018 ءکے الیکشن میں ناکامی کے بعد وہ کوئی بہت بڑ انقلابی منصوبہ نہ پیش کرسکے، مگر یہ حقیقت ہے کہ گزرے برسوں میں جماعت اسلامی نے نہ صرف فوجی عدالتوں کی مخالفت کی بلکہ جنرل باجوہ کے ایکسٹینشن سے بھی دور رہی، { حالانکہ پیپلز پارٹی مسلم لیگ و تحریک انصاف اس عمل میں ” تاریخ کی درست سمت ” ہی کھڑے تھے } اسی طرح سراج الحق کا ایک کریڈٹ جماعت اسلامی کو ” مقامی مسلمانوں” کے مسائل پہ بھی بات کرنے پہ آمادہ کرنا اور قیادت کو حوصلہ دینا شامل ہے. حافظ نعیم الرحمن ”حق دو کراچی کو” مہم منظم انداز سے تسلسل کے ساتھ کئی برس سے چلا رہے ہیں ، مولانا ہدایت الرحمن بلوچ کی بلوچستان میں تحریک و تحرک اس کا ایک اور واضح ثبوت ہے، اور پھر سینٹ میں مشتاق احمد خان کی کارکردگی، مسائل پہ گفتگو اور انھیں دستاویز کی صورت میں نمایاں کرنا سبھی کے سامنے ہے ، یہ اور ان جیسے تمام جماعت اسلامی کے ارکان اسمبلی کرپٹ ہیں نہ اخلاقی طور پہ مجرم، یہ سب عام افراد کی طرح میری آپ کی پہنچ میں ہیں. کراچی تین بار جماعت کو ملا تو اہلیت و شفافیت ثابت بھی ہوئی.

جماعت اسلامی کو چاہیے کہ اپنی دعوت پہ ڈٹ کر بغیر کسی شرمندگی کے کھڑے ہوجائیں، جو سیاسی ذھن رکھتے ہیں انھیں بھرپور موقع دیں، آگے بڑھائیں تاکہ وہ دائیں بائیں دیکھنے کے بجائے آپ کے ساتھ جڑے رہیں، اور جو احباب عمران خان یا نواز شریف کی محبت میں گرفتار ہوچکے، انھیں حکمت سے سمجھا کر ساتھ ملائیں. غیر ضروری مباحث لوگوں کو مزید دور کردیں گے.