Author: علیشبہ فاروق

لبرلزم بین الاقوامی تعلقات میں ایک اہم نظریاتی نقطہ نظر ہے۔ جو اس بات پر زور دیتا ہے کہ اقوام کے درمیان تعاون ،امن اور ترقی ممکن ہے۔ یہ نظریہ حقیقت پسندی کے برعکس زیادہ پر امید ہے، اور یہ مانتا ہے کہ انسان اور ریاستیں محض طاقت اور مفادات کے تابع نہیں ہیں، بلکہ باہمی انحصار ادارے اور اخلاقی اقدار بھی بین الاقوامی تعلقات میں اہم کردار ادا کرتے ہیں۔

لبرلزم کے مطابق ہر فرد کو اپنی زندگی کے فیصلے کرنے کی آزادی حاصل ہونی چاہیے اور ریاست کا کام ان حقوق کی حفاظت کرنا ہے، یہی اصول بین الاقوامی سیاست پر بھی لاگو ہوتا ہے، جہاں وہ قوموں کے درمیان تعلقات کو صرف طاقت کی کوئی بنیاد پر نہیں بلکہ باہمی انحصار اور ادارہ جاتی تعاون کے ذریعے منظم کیا جا سکتا ہے۔لبرل مفکرین کا ماننا ہے کہ ریاستیں صرف طاقت کے ذریعے نہیں بلکہ تعاون کے ذریعے بھی اپنے مسائل حل کر سکتی ہیں۔ اقوام متحدہ (UN)، عالمی تجارتی تنظیم (WTO)، اور یورپی یونین (EU) جیسے عالمی ادارے اس بات کا ثبوت ہیں کہ بین الاقوامی تعلقات میں تعاون ممکن ہے اور اس سے جنگوں کے امکانات کم کیے جا سکتے ہیں۔

لبرل نظریے کے تحت بین الاقوامی تنظیمیں تنازعات کو پرامن طریقوں سے حل کرنے میں مدد دیتی ہیں۔ تاہم، بعض اوقات فوجی کارروائی بھی ضروری ہو جاتی ہے، جیسا کہ خلیجی جنگ میں ہوا۔ 1990 میں عراق نے کویت پر حملہ کر کے اس پر قبضہ کر لیا۔ اقوام متحدہ کی سلامتی کونسل نے عراق کے خلاف سخت قراردادیں منظور کیں۔ جب سفارت کاری ناکام ہوئی، تو اقوام متحدہ کی سلامتی کونسل نے ایک بین الاقوامی اتحاد کی منظوری دی ۔جس نے عراق کو 1991 میں کویت سے باہر نکال دیا ۔

لبرلزم کے مطابق تمام افراد کو قانون کے سامنے برابر سمجھنا چاہیے۔ ہر شخص کو بنیادی حقوق حاصل ہونے چاہیے، جیسے آزادی، اظہار مذہب اور تحفظ۔ لبرلزم ایک متنازعہ فلسفہ ہے کچھ لوگوں کا خیال ہے کہ یہ ایک اچھا فلسفہ ہے، جو انفرادی حقوق اور آزادی کی حفاظت کرتا ہے ۔مگر کچھ کا خیال یہ ہے کہ یہ ایک برا فلسفہ ہے، جو معاشرے کو تقسیم کرتا ہے اور عدم مساوات کو بڑھاتا ہے۔لبرلزم پر تنقید حقیقت پسندی کے مفکرین نے کی، جن کا یہ کہنا ہے کہ لبرلزم بہت زیادہ پرامید ہے ۔ یہ نظر انداز کرتا ہے کہ ریاستیں اکثر اپنے قومی مفادات کے مطابق عمل کرتی ہیں۔

مجموعی طور پر، لبرلزم بین الاقوامی تعلقات میں ایک ایسا نظریہ پیش کرتا ہے جو تعاون، امن، اور ادارہ جاتی استحکام پر زور دیتا ہے۔ یہ تصور کرتا ہے کہ اقوام باہمی تعلقات، تجارت، جمہوریت، اور قوانین کے ذریعے تنازعات کو کم کر سکتی ہیں۔ اگرچہ اس نظریے کو بعض حلقوں سے تنقید کا سامنا ہے، لیکن یہ آج بھی بین الاقوامی سیاست کے ایک اہم فریم ورک کے طور پر جانا جاتا ہے، جو عالمی سطح پر تعاون اور ترقی کے امکانات کو اجاگر کرتا ہے۔

یہ کہانی صرف ایک واقعہ نہیں، بلکہ انسانیت کی اصل تصویر ہے—ایک ایسا جذبہ جو ہمیں ایک دوسرے کے ساتھ جوڑتا ہے۔ مگر جب ہم اپنے گرد و پیش نظر دوڑاتے ہیں، تو کیا واقعی ہمیں یہ جذبہ دکھائی دیتا ہے، یا یہ محض کتابوں اور تقریروں تک محدود ہو چکا ہے؟

علی، جو ایک متوسط طبقے سے تعلق رکھتا تھا، روزانہ دفتر سے واپسی پر ایک بزرگ کو ایک ہی جگہ بیٹھے دیکھتا تھا۔ وہ میلی کچیلی چادر اوڑھے، خاموشی سے راہ گزرتے لوگوں کی طرف امید بھری نظروں سے دیکھتے، مگر سب انہیں نظر انداز کرکے گزر جاتے۔ علی بھی باقی سب کی طرح بے توجہی برتتا، مگر ایک دن شدید بارش میں اس نے ان بزرگ کو وہیں بھیگتے دیکھا۔ قدم بے اختیار رک گئے، دل میں ایک خیال بیدار ہوا—”یہ بھی انسان ہیں، انہیں بھی ضرورت ہوگی۔”

علی فوراً قریب کی دکان سے ایک کمبل اور کھانے پینے کا سامان لے آیا۔ جب اس نے بزرگ کے لرزتے وجود پر کمبل ڈال کر کھانے کو ان کے سامنے رکھا، تو ان کی آنکھوں میں آنسو امڈ آئے۔ وہ لرزتی آواز میں دعائیں دینے لگے، جیسے برسوں سے کسی کے سائے کو ترسے ہوں۔ علی ان کے پاس بیٹھا، ان کا ساتھ دیا، ان کے ساتھ کھانا کھایا۔

کھانے کے بعد علی نے جھجکتے ہوئے پوچھا، “بابا جی، میں روز آپ کو یہاں بیٹھے دیکھتا ہوں۔ آپ ہمیشہ یہیں کیوں رہتے ہیں؟”
بزرگ نے گہری سانس لی، نگاہیں آسمان کی طرف اٹھائیں، اور پھر ایک تلخ مسکراہٹ کے ساتھ بولے:
“بیٹا، میں بھی کسی زمانے میں ایک خوشحال زندگی گزارتا تھا۔ محنت سے کماتا تھا، عزت سے جیتا تھا۔ میرا ایک چھوٹا سا گھر تھا، جہاں میری بیوی اور دو بیٹیاں ہنسی خوشی رہتی تھیں۔ سب کچھ تھا—سکون، عزت، خوشحالی—مگر پھر تقدیر نے ایسا کھیل کھیلا کہ سب ہاتھوں سے ریت کی مانند پھسل گیا۔ ایک دن کاروبار تباہ ہوگیا۔ جنہیں اپنا سمجھتا تھا، وہ وقت کے ساتھ بدل گئے۔ قرض کے بوجھ نے کمر توڑ دی، اور پھر… میرے اپنے ہی گھر والوں نے مجھ سے منہ موڑ لیا۔ میری وہ بیٹیاں، جنہیں نازوں سے پالا تھا، بے یار و مددگار رہ گئیں۔ بیوی نے بھی ساتھ چھوڑ دیا۔ کہتی تھی کہ ایک بے سہارا شخص کے ساتھ زندگی گزارنا اس کے بس کی بات نہیں۔ آج میں یہاں اس راہ گزر پر بیٹھا ہوں، جہاں روز ہزاروں لوگ گزرتے ہیں، مگر کوئی میری طرف دیکھتا بھی نہیں۔ ہر کوئی اپنی دنیا میں مگن ہے۔ مگر مجھے کسی سے شکوہ نہیں، شاید یہی میری قسمت تھی۔”

یہ کہتے ہوئے بزرگ کی آنکھوں سے آنسو بہنے لگے۔ علی کی آنکھیں بھی نم ہوگئیں۔ اس کا دل پکار اٹھا کہ دنیا کتنی ظالم ہے، جہاں انسان کی پہچان اس کے پاس موجود دولت سے کی جاتی ہے، نہ کہ اس کے کردار اور انسانیت سے۔
علی نے بزرگ کا ہاتھ تھاما اور نرمی سے کہا:
“بابا جی، آپ اکیلے نہیں ہیں۔ میں ہوں نا! میں روز آپ کے پاس آؤں گا، آپ کے ساتھ بیٹھوں گا، آپ کی مدد کروں گا۔”
بزرگ نے علی کی طرف دیکھا، اور پہلی بار ان کے چہرے پر ایک نرم سی مسکراہٹ ابھری۔ لرزتے ہاتھ علی کے سر پر رکھ کر بولے:
“بیٹا، تم جیسے لوگوں کی بدولت ہی انسانیت ابھی باقی ہے۔ اللہ تمہیں ہمیشہ خوش رکھے۔”
اس دن کے بعد، علی روز ان کے پاس بیٹھنے لگا، ان کی باتیں سنتا، ان کی مدد کرتا۔ اس نے جان لیا تھا کہ انسانیت محض الفاظ میں نہیں، بلکہ عمل میں پنہاں ہوتی ہے۔
یہ دنیا عجب بےحسی کی مثال ہے،
جہاں سچ کی ہر بات ہوتی نِہال ہے۔
یہاں خواب ہر روز بکتے رہے،
یہاں لوگ قیمت پہ چلتے رہے۔
یہاں درد کی کوئی سنتا نہیں،
یہاں ظلم کی حد بھی رُکتی نہیں۔
یہاں دولت کی حرص لالچی بن گئی،
یہاں عزت بھی اب بےوقعت سی ہو گئی۔
یہاں ظلمت کی راہیں سجائی گئیں،
یہاں اُلفت کی شمعیں بجھائی گئیں۔
یہاں رشتے فقط بوجھ ڈھوتے رہے،
یہاں دل کے زخم اور سوتے رہے۔
یہاں زندہ تو سب ہیں، پر بے جان ہیں،
یہاں انساں تو ہیں، پر بے ایمان ہیں۔

کیا بیٹی کا کوئی گھر نہیں ہوتا؟ کیا واقعی کوئی گھر اپنا ہوتا ہے؟ وہ گھر جہاں ہم نے آنکھ کھولی، پہلا قدم اٹھایا، ہنسی بکھیری، اور زندگی کے معصوم ترین لمحات گزارے—کیا وہ صرف ایک عارضی پڑاؤ تھا؟ کیا وہ در و دیوار، جن سے ہماری ہنسی اور رونے کی آوازیں وابستہ تھیں، ایک دن ہمارے لیے پرائے ہو جاتے ہیں؟

شادی کے ایک دن پہلے، آمنہ کی ماں نے اس کے ہاتھ میں اس کا شادی کا جوڑا، زیورات اور چوڑیاں تھما دیں۔ چہرے پر خوشی کے باوجود آنکھوں میں ایک انجانی اداسی تھی۔
“یہ لو بیٹا، کل تمھیں پہننا ہے”
ماں کی آواز میں شفقت تھی، مگر آمنہ کے دل میں ایک عجیب سی بےچینی اتر آئی۔ یہ لمحہ اس کے لیے آخری تھا جب وہ اپنی ماں کے دیے ہوئے کپڑے پہن رہی تھی، کیونکہ اگلے دن وہ کسی اور نام سے پکاری جائے گی، کسی اور گھر کی ہو جائے گی، اور کسی اور رسم و رواج میں ڈھلنے کی کوشش کرے گی۔

“کیا وہ گھر واقعی میرا ہوگا؟ کیا میں وہاں اپنائیت محسوس کر پاؤں گی؟”

شادی کا دن آ پہنچا۔ رخصتی کا لمحہ آیا تو ماں کی آنکھوں میں نمی تھی، باپ کی خاموشی بوجھل تھی، اور بہن بھائیوں کا شرارت بھرا انداز اب عجیب سا لگا۔ سب کچھ ایک لمحے میں بدل گیا۔

سسرال پہنچی تو ساس نے محبت سے کہا
“بیٹا، یہ تمہارا کمرہ ہے۔”
آمنہ نے چاروں طرف نظر دوڑائی—سب کچھ نیا، سب کچھ خوبصورت، مگر سب کچھ اجنبی۔ سسرال کے سب لوگ اچھے تھے، محبت کرنے والے تھے، مگر اس کے باوجود وہ اپنے اندر ایک خلا محسوس کر رہی تھی۔ ہر بات ناپ تول کر کہنی تھی، ہر قدم سوچ سمجھ کر اٹھانا تھا، ہر عمل کو صحیح ثابت کرنا تھا۔

سسر نے نرمی سے کہا
“بیٹا، اب تم اس گھر کی بہو ہو، ہماری عزت کا خیال رکھنا۔”
ان کے لہجے میں محبت بھی تھی، مگر ذمہ داری کا بوجھ بھی۔

دن گزرتے گئے، مگر آمنہ کے دل میں وہی بےچینی تھی۔ ایک دن اس نے ہمت کی اور ساس سے میکے جانے کی اجازت طلب کی۔ ساس مسکرائیں اور بولیں،
“بیٹا، میکے کے دروازے ہمیشہ کھلے ہوتے ہیں، مگر وہاں ہمیشہ رہا نہیں جاتا۔”
خیر وہ میکے رہنے کو آ گئی۔ ماں کے دروازہ کھولتے ہی آمنہ کو گلے لگا لیا، باپ نے سر پر ہاتھ رکھا، بہن بھائیوں نے چھیڑنا شروع کر دیا۔ سب کچھ وہی تھا، مگر کچھ بدل چکا تھا۔

وہ کمرے جہاں کبھی وہ بےفکری سے گھومتی تھی، اب اسے اجنبی لگ رہے تھے۔ ماں نے پوچھا،
“بیٹا، سسرال میں خوش تو ہو نا؟”
آمنہ نے مسکرا کر کہا
“جی امی، بہت خوش ہوں۔”
مگر ماں کی آنکھوں میں سوالات تھے، باپ کے دل میں فکر تھی، اور بہن بھائی جان چکے تھے کہ اب وہ پہلے والی آمنہ نہیں رہی۔
کیا واقعی وہ گھر اب اس کا نہیں تھا؟ کیا وہ سسرال کو اپنا پائے گی؟

میکے میں چند دن گزارنے کے بعد وہ سسرال واپس آ گئی، مگر اب دل میں ایک عجیب سا احساس تھا۔ نہ میکہ پہلے جیسا رہا تھا، نہ سسرال اپنا لگا۔ وہ ایک ایسے پل پر کھڑی تھی، جہاں نہ پیچھے جانا ممکن تھا، نہ آگے کا راستہ اپنا لگ رہا تھا۔
رات کے سناٹے میں چھت پر جا کر آسمان کو دیکھنے لگی۔ ستارے چمک رہے تھے—قریب ہوتے ہوئے بھی ایک دوسرے سے جداتھے۔
آمنہ نے سوچا، “یہ گھر، یہ لوگ، یہ رشتے سب میرے پاس ہیں، مگر کیا میں بھی ان کی ہوں؟”
یہ سوال شاید ہر لڑکی کے دل میں اٹھتا ہے، مگر اس کا جواب کبھی نہیں ملتا۔

دنیا بھر میں ماحولیاتی تبدیلی کے باعث درجہ حرارت میں دن بدن اضافہ ہوتا چلا جا رہا ہے، اور سائنس دانوں نے ایسا کہا ہے کہ زمین کو موسمیاتی تبدیلی کے باعث ہونے والی تباہی سے بچانے کے لیے اقدامات اٹھانے لازم ہو چکے ہیں۔ ماحولیاتی آگاہی سے مراد وہ شعور ہے جو افراد اور معاشرے کو ماحول کی حفاظت اور اس کے استحکام کے بارے میں آگاہ کرتا ہے۔

سوال یہ پیدا ہوتا ہے کہ موسمیاتی تبدیلی دراصل ہوتی کیا ہے ؟
کسی ایک علاقے کی اب و ہوا اس کے کئی سالوں کے موسم کا اوسط ہوتی ہے ماحولیاتی تبدیلی اس اوسط میں تبدیلی کو کہتے ہیں ۔

انسان اپنی ضروریات پوری کرتے ہوۓ فطرت سے فائدہ اٹھاتا ہے۔ ہماری زمین اب بہت تیزی سے ماحولیاتی تبدیلی کے دور سے گزر رہی ہے اور عالمی درجہ حرارت بھی بڑھتا چلا جا رہا ہے۔ آب و ہوا میں تو ہمیشہ سے قدرتی تغیرات ہی ہوتے ہیں لیکن انسانی سرگرمیوں کی وجہ سے اب عالمی درجہ حرارت بھر رہا ہے ،اور ہماری زمین بہت بری طرح سے متاثر ہو رہی ہے۔ ماضی میں تو لوگ تیل ،گیس اور کوئلے کا استعمال کرتے تھے۔ تب سے دنیا میں تقریباً 1.2 ڈگری سینٹی گریڈ زیادہ گرمی ہوئی ہے ۔ان سب کا استعمال بجلی کے کار خانوں، ٹرانسپورٹ اور گھروں کو گرم کرنے کے لیے ہوتا ہے۔ فضا میں ایک گرین ہاؤس گیس جو کاربن ڈائی اکسائیڈ ہے اس کی مقدار 19سویں صدی کے بعد سے تقریباً 50 فیصد اور گزشتہ دو دہائیوں سے اس میں 12 فیصد مزید اضافہ ہو چکا ہے ۔گرین ہاؤس گیسز میں اضافے کی وجہ جنگلات کی کٹائی، درختوں کا نہ اگانا، درختوں کو جلایا جانا یہ سب تو عام ہو چکا ہے۔ ان میں کاربن کا ذخیرہ ہوتا ہے۔ اور جب درخت نہیں ہوں گے تو اس کا اخراج تو ممکن ہو گا ہی۔

ہر سال 3 مارچ کو جنگلی حیات کا عالمی دن منایا جاتا ہے ۔اس دن کا مقصد دنیا بھر میں جنگلی جانوروں اور پودوں کے بارے میں آگاہی پیدا کرنا اور ان کے تحفظ کی اہمیت کو اجاگر کرنا ہوتا ہے۔ یہ دن 2013 میں اقوام متحدہ کی جنرل اسمبلی کی طرف سے طے کیا گیا تھا اور اس کا مقصد جنگلی حیات کے تحفظ کے لیے عالمی سطح پر کوششیں کرنا ہے۔ بد قسمتی سے جنگلی حیات کو اج بہت سے خطرات کا سامنا ہے۔ موسمیاتی تبدیلی پر قابو پانے کے لیے جلسوں ،جلوسوں ،مذاکروں، مظاہروں اور کانفرنسوں سے زیادہ مستقل بنیادوں پر موسمیاتی تبدیلی کی تعلیم دینا بہت ضروری ہے ۔تاکہ تمام شعبہ جات میں کام کرنے والے اپنے ہنر اور تجربے کو حاصل کر تعلیم سے ہم آہنگ کر کے ہر سرگرمی کو موسمیاتی تقاضوں کے مطابق بنا سکیں۔ ہم سب جنگلی حیات کے تحفظ میں اپنا حصہ ڈال سکتے ہیں۔ ہمیں چاہیے کہ اپنے گھروں کے اس پاس کے ماحول کو صاف رکھیں، جنگلات کی کٹائی کو روک کر اور غیر قانونی شکار کی حوصلہ شکنی کر کے جنگلی حیات کی مدد کریں۔

اگر ہم مستقبل کی بات کریں تو سیاسی دانوں نے درجہ حرارت میں 1.5 ڈگری سینٹی گریڈ کے اضافے کو گلو بل وارمنگ کے لیے محفوظ حد مقرر کیا ہے۔ اگر درجہ حرارت زیادہ ہو جائے تو قدرتی ماحول میں نقصان دہ تبدیلیاں انسانوں کی طرز زندگی کو تبدیل کریں گی۔ بہت سے سائنس دانوں کا یہ خیال ہے کہ اگر ایسا ہو گیا تو صدی کے اختتام تک 3 ڈگری سینٹی گریڈ یا اس سے زیادہ کہ اضافے کی پیش گوئی کی جا سکتی ہے ۔دنیا کے مختلف ممالک سے کہا جا رہا ہے کہ وہ ایسے اہداف اپنائیں جو ان کے گرین ہاؤس گیسز کے اخراج کو اس صدی کے وسط تک سفر تک لے جائیں۔ اس کا مطلب یہ ہے کہ کوئی بھی اخراج مساوی مقدار جذب کر کے متوازن ہو جاۓ گا۔ مثال کے طور پر درخت لگانے کے ذرائع زیادہ کیے جائیں۔ ہمیں چاہیے کہ ہم سفر کے لیے پبلک ٹرانسپورٹ یا سائیکل کا استعمال کر کے گاڑیوں پر انحصار کو کم کریں ،اپنے گھروں کو انسولیٹ کریں، ہوائی سفر کم کریں، پلاسٹک کے کم سے کم استعمال کو یقینی بنائیں۔

ماحولیاتی تبدیلی اور بارشوں کے نہ ہونے کی وجہ سے پاکستان کو بھی سخت ماحولیاتی مشکلات کا سامنا کرنا پڑ رہا ہے۔ ہمیں چاہیے کہ ہم اس اپنی پاک عرض سرزمین کو ماحولیاتی تحفظ فراہم کریں اور اس کے استحکام کے لیے جنگلات کا تحفظ بھی کریں۔ صحت مند اور قدرتی ماحول برقرار رکھنے کے لیے تمام طبقات کو اپنا کردار ادا کرنا ضروری ہو گا۔ فضائی آلودگی کے علاوہ صاف پانی کی عدم دستیابی شہریوں کے لیے پریشانی کا باعث ہے۔ حکومت کو چاہیے کہ عوام کو صاف پانی فراہم کیا جاۓ جس کی وجہ سے وہ بیماریوں سے بھی بچ سکیں۔

ایک صحت مند ماحول ہماری صحت اور خوشحالی کے لیے ضروری ہے۔ اس کے ساتھ ساتھ ماحولیاتی آلودگی کو کم کرنے کے لیے درخت لگانے کی مہم کو جاری و ساری رکھنا چاہیے تاکہ آنے والے وقت میں ہم اس ماحولیاتی آلودگی اور ماحولیاتی مشکلات کو ختم کر سکیں۔ ماحولیاتی آگاہی آج کے دور میں ناگزیر ہے، کیونکہ یہ نہ صرف ہمارے حال بلکہ مستقبل کو بھی متاثر کرتی ہے۔ اگر ہم ابھی سے مؤثر اقدامات نہیں کریں گے تو ہماری آئندہ نسلوں کو ایک بگڑا ہوا ماحول ملے گا۔ ہم اپنی اگلی نسلوں کے لیے ایک صحت مند اور پائدار سیارہ چھوڑنے کے ذمہ دار ہیں۔ ماحولیاتی آگاہی ہمیں ایسے اقدامات کرنے کی ترغیب دیتی ہے جو ہمارے سیارے کے مستقبل کو محفوظ بنائیں ۔ اس لیے ہر فرد، معاشرہ، حکومت اور بین الاقو امی تنظیموں کو ماحول کی حفاظت کے لیے اپنا کردار ادا کرنا چاہیے تاکہ زمین کو ایک محفوظ اور بہتر جگہ بنایا جا سکے۔

اولاد اللہ تعالی کی طرف سے بہت بڑی نعمت ہے اور اس کی بہترین پرورش کرنا والدین کا اولین فرض ہے۔ والدین کی خواہش ہوتی ہے کہ ان کی اولاد نہ صرف ایک کامیاب انسان بنے ،بلکہ معاشرے کے لیے بھی ایک کرامت انسان ثابت ہو۔

بعض اوقات بچوں کی تربیت کے دوران والدین بچوں کے کچھ روئیوں سے نالاں نظر آتے ہیں جس کی وجہ سے بچوں میں جارحانہ رویہ جنم لیتا ہے ۔جس کی وجہ نے بد مزاجی، زبانی اور جسمانی جارحیت کا مظاہرہ ،چڑچڑا پن اور اپنے اوپر قابو نہ پانا اور بے چینی جیسی کیفیت شامل ہوتی ہیں۔ ان پیچیدہ روئیوں کی وجہ سے بچوں کے اندر پریشانی اور ڈپریشن بھی پایا جاتا ہے ۔ایسے بچے کسی بھی سرگرمی میں خوش نظر نہیں آتے۔ ان میں عزت نفس کی کمی ہو جاتی ہے کچھ بچوں میں بھوک اور نیند بھی متاثر نظر آتی ہے۔ اگر پیچیدہ رویے زیادہ شدت اختیار کر لیں تو بچوں کے ذہن میں خود کشی جیسے خیالات بھی ظاہر ہونے لگتے ہیں۔

بچوں میں جارحانہ رویے کے مختلف اسباب ہو سکتے ہیں۔ جن میں ذہنی صحت کے مسائل نمایاں ہیں۔ اگر بچہ مستقل طور پر غصہ کرتا ہے ،چیزیں توڑتا ہے ،مار پیٹ کرتا ہے یا بد زبانی کرتا ہے تو اس کے پیچھے بھی عوامل ہو سکتے ہیں۔ تعلیمی دباؤ ،گھریلو مسائل، یا والدین کی لڑائی جھگڑے بچوں میں ذہنی تناؤ پیدا کرتے ہیں ۔اس کے ساتھ ساتھ اگر بچے کو پیار، توجہ یا تسلی نہ ملے تو وہ اپنے جذبات کو جارحیت کے ذریعے ظاہر کرتا ہے ۔اگر بچہ ایک ایسے ماحول میں پرورش پا رہا ہے جہاں تشدد عام ہے تو وہ بھی اس کو اپنانے لگتا ہے ،اور اس کو اپنے مسائل کا حل صرف اور صرف تشدد کے ذریعے حل کرنا ہی نظر آتا ہے ۔اس کی وجہ سے ڈپریشن، انیگزائٹی اور دیگر ذہنی بیماریاں بھی بچوں میں شامل ہو سکتی ہیں۔

ان سب کے ساتھ ساتھ والدین اپنے بہت سے معاشی مسائل میں گھرے ہوتے ہیں ۔بچوں میں ایسے رویہ اختیار کرنے کی ایک وجہ ان کے سماجی مسائل بھی ہو سکتے ہیں۔ جب بچے دوسرے بچوں کو اپنی ضروریات اور خواہشات کو پورا کرتے دیکھتے ہیں تو وہ بھی اپنے والدین سے تقاضا کرتے ہیں کہ ان کی خواہشات کو پورا کیا جائے ۔لیکن جب والدین اپنی معاشی تنگی کی وجہ سے ان کی خواہشات کو پورا نہیں کر پاتے تو بچہ بد مزاجی، غصے اور چڑ چڑے پن کا شکار ہو جاتا ہے۔والدین کی پریشانی بچوں میں بھی منتقل ہوتی ہے، اور وہ ذہنی و جسمانی دباؤ میں آ جاتے ہیں ۔والدین اور بچوں کے درمیان تعلقات بھی خراب ہو سکتے ہیں کیونکہ حد سے زیادہ فکر بچوں کو باغی بنا دیتی ہے۔

والدین اکثر اپنے بچوں کے مستقبل کی وجہ سے فکر مند رہتے ہیں، لیکن اگر ان کی یہ فکر حد سے زیادہ بڑھ جائے تو ان کو بھی ذہنی دباؤ کا سامنا کرنا پڑ جاتا ہے، جو ان کی زندگی پر منفی اثر ڈال سکتا ہے۔والدین کو چاہیے کہ وہ بچوں کو سمجھیں اور ان سے کھل کر بات کرنے کی کوشش کریں، تاکہ بچوں میں سے جارحیت جیسے رویے کا خاتمہ کر سکیں۔ بچوں میں جذباتی توازن پیدا کرنے کے لیے ان کی مثبت سرگرمیوں میں شمولیت ضروری ہوتی ہے۔ والدین کو اپنے ذہنی دباؤ کو کم کرنے کے لیے ایسی سرگرمیاں اختیار کرنی چاہیے جن کی وجہ سے ان کا ذہنی دباؤ ختم ہو جائے ۔جیسے ان کو ورزش ،عبادت وغیرہ کو اپنی زندگی کا حصہ بنا لینا چاہیے۔ بچوں کے اس رویے کو قابو میں رکھنے کے لیے انہیں پیار اور سمجھداری سے سمجھانا چاہیے نہ کہ ان کے ساتھ سختی سے پیش آنا چاہیے، کیوں کہ سختی کرنے سے اکثر اوقات بچوں میں مختلف اور چیزیں جنم لے لیتی ہیں ۔

اگر والدین کا اپنے بچوں کے ساتھ سنجیدگی سے پیش آنے کے باوجود اور ان کو ایک پرسکون ماحول فراہم کرنے کے باوجود ،ان کے بچے میں سے جارحیت جیسی عادت کا خاتمہ نہیں ہو رہا تو والدین کو چاہیے کہ وہ بہترین ماہر نفسیات سے مدد لیں ،تاکہ ان کا بچہ ان کی اولاد اور وہ خود بھی ایک پرسکون زندگی جی سکیں۔