بلوچستان میں دہشت گردی کی تشویش ناک لہر - قادر خان یوسف زئی

ملک دشمن عناصر کی ہمیشہ سازش رہی ہے کہ پاکستان میں مختلف طریقوں سے بے امنی و شدت پسندی کی فضا برقرار رکھا جائے۔ گزشتہ چند دنوں سے بلوچستان میں ہزارہ برداری کو ایک بار پھر ٹارگٹ کیا جارہا ہے اور صرف ایک ہفتے میں 12سے زائد افراد کو ٹارگٹ کلنگ کا نشانہ بنایا جا چکا ہے۔ انسانی حقوق کی عالمی تنظیم ایچ آر سی پی کے مطابق گزشہ 16برسوں میں صرف ہزارہ برداری کے 525افراد کو ہلاک جبکہ 700کو زخمی کیا جاچکا ہے۔

فرقہ وارنہ ٹارگٹ کلنگ میں دوبارہ تیزی اس وقت شروع ہوئی جب 31مارچ کو قندھاری بازار کوئٹہ میں ایک ٹیکسی پر فائرنگ کی گئی تھی جس میں ڈرائیور جاں بحق اور ایک فرد زخمی ہوا۔ ایچ آر سی پی‘ کے چیئرمین ڈاکٹر مہدی حسن نے کہا ہے کہ کوئٹہ میں تشدد کی بڑھتی ہوئی لہر باعثِ تشویش ہے جس نے اپریل کے آغاز سے ہی شہر کو اپنی لپیٹ میں لے رکھا ہے۔ ذرائع ابلاغ میں آنے والی رپورٹس کے مطابق کوئٹہ میں دہشت گردی اور ٹارگٹ کلرز کے حملوں میں اضافہ ہوا ہے۔ 4 مئی کو صوبہ بلوچستان کے خاران شہر سے تقریباً 80 کلو میٹر دور لجے کے علاقے میں محنت کشوں کو نشانہ بنایا گیا۔ خاران شہر کے مشرق میں واقع لجے میں دہشت گردوں نے اوکاڑہ سے تعلق رکھنے والوں کو ایک موبائل کمپنی کا ٹاور نصب کام کرتے وقت چھ محنت کشوں کو ہلاک کر دیا ہے۔ بلوچستان میں زیادہ متاثر ہونے والے اضلاع میں سے ایک آواران سے بھی متصل ہے۔ خاران میں اس سے قبل بھی شاہراہوں کے منصوبوں پر کام کرنے والے مزدوروں پر حملے ہوتے رہے ہیں۔ جبکہ فرقہ وارنہ دہشت گردی سے متعلق رپورٹ کے مطابق کوئٹہ شہر میں پچھلے 3دنوں میں 6 اور ایک ہفتے میں 12افراد کی جان لے لی گئی. وزیر داخلہ بلوچستان سرفراز بگٹی نے حالیہ ٹارگٹ کلنگ کے واقعات کو انتشار پھیلانے والوں کی سازش قرار دیا ہے۔

بلوچستان حکومت کی جانب سے بے امنی پر قابو و حالات بہتر ہونے کے دعوے کیے جا رہے تھے، لیکن ان دعووں کے برعکس ٹارگٹ کلنگ اور دہشت گردی کے واقعات میں اضافے میں تشویش ناک حد تک اضافہ ہوا۔ چند روز قبل کوئٹہ کے ایئرپورٹ روڈ پر ہونے والے خود کش حملے میں 6 پولیس اہلکاروں کی شہادت کے واقعہ کی تحقیقات مکمل نہیں ہوئی تھیں کہ ٹارگٹ کلنگ کے واقعات شروع ہوگئے۔ واضح رہے کہ رواں برس 37سیکورٹی اہلکار دہشت گردی کا نشانہ بن چکے ہیں۔ 24 اپریل کے روز کوئٹہ میں ایئرپورٹ روڈ پر ایک خودکش بم دھماکے میں پانچ پولیس افسران شہید اور سات زخمی ہو ئے تھے۔ جبکہ دہشت گردی کے اس واقعے کے بعد27اپریل کوطوغی روڈکے قریب مقامی مسجد کے پیش امام کے بھائی کوٹارگٹ کلنگ کانشانہ بنایاگیا جبکہ 28اپریل کو جمال الدین افغان روڈپر2 افراد ٹارگٹ کلنگ کا نشانہ بنے، ان کا تعلق ہزارہ برادری سے تھا۔ 29 اپریل کوجان محمد روڈ پر دکانوں پر اندھادھند فائرنگ کرکے 6 افراد کو نشانہ بنایا گیا، جن میں سے 3 افراد جاں بحق جبکہ 3 زخمی ہوئے۔

کوئٹہ میں دہشت گردی کے حالیہ واقعات سے شہریوں میں خوف وہراس کی لہر دوڑ گئی اور احتجاج و دھرنوں کا سلسلہ شروع ہوگیا۔ مظاہرین نے چیف آف آرمی اسٹاف جنرل قمر جاوید باوجوہ سے دہشت گردی کے بڑھتے واقعات کا نوٹس لینے کا مطالبہ کیا۔ چیف آف آرمی اسٹاف نے امن و امان کا جائزہ لینے کے لیے کوئٹہ کا دورہ کیا۔ جہاں ان سے ہزارہ کیمونٹی کے عمائدین نے ملاقات کی اور یقین دہانی پر اپنے مظاہرے و دھرنے ختم کرنے کا اعلان کیا۔ حکومتی ارباب اختیار کا کہنا ہے کہ یہ حالیہ دہشت گردی شہر کے امن کو خراب کرنے کی سازش ہے۔ دوسری جانب وزیر اعلیٰ بلوچستان عبدالقدوس بزنجو، وزیر داخلہ احسن اقبال، صوبائی وزیر داخلہ سرفراز بگٹی اور آئی جی نے ایڈووکیٹ جلیلہ حیدر کی بھوک ہڑتال ختم کرائی۔ اس موقع پر احسن اقبال کا کہنا تھا کہ دہشت گردوں خلاف ہر ممکن کارروائی کریں گے۔ ہزارہ برادری کامطالبہ ہے کہ حکومت کوئٹہ میں امن کی بحالی کے علاوہ ٹارگٹ کلنگ کرنے والے ملزمان کو گرفتار کر کے بے نقاب کرے۔ چیف جسٹس آف پاکستان نے بھی ہزارہ برادری کی مسلسل ٹارگٹ کلنگ پر ازخود نوٹس لیتے ہوئے کوئٹہ میں 11مئی کو سماعت مقرر کردی ہے۔

بلوچستان پاکستان کا وہ بد قسمت صوبہ ہے جہاں امن کا خواب شرمندہ تعبیر ہی نہیں ہورہا۔ نام نہاد قوم پرستوں کا ملک دشمن ممالک کا آلہ کار و سہولت کار بننے کے بعد بلوچستان میں لسانیت کے نام پر قتل و غارت کرنا ایک معمول بن چکا تھا۔ اسی طرح پڑوسی ممالک میں پناہ لینے والے شدت پسندوں کی جانب سے بلوچستان میں دہشت گردی اپنے عروج پر رہی ہے۔ ایک طے شدہ ایجنڈے کے تحت بلوچستان کو ملک کے دیگر حصوں سے تنہا کرنے کے لیے منظم طور پر ایسی مہم چلائی گئی جس کی وجہ سے یہ تاثر پاکستان بھر میں گیا کہ یہاں لسانی بنیادوں پر کسی لسانی اکائی کے لیے بڑے خطرات موجود ہیں۔ پھر یکے بعد دیگرے ایسے واقعات رونما ہونے لگے جس سے اس تاثر کو تقویت ملی۔ نام نہاد قوم پرستوں کی جانب سے بھارت کی فنڈنگ پر پاکستان مخالف مہم عالمی سطح پر چلانے کی کوشش کی جاتی رہی ہے لیکن ان کا یہ پروپیگنڈا اپنی موت آپ مر گیا اور متعلقہ اداروں نے موثر انداز میں کام کرکے عالمی سازشوں کو ناکام بنایا۔ بھارت تو برملا نام نہاد قوم پرستوں کی پشت پناہی اور ان کے لیے مختص فنڈ کا اعلان کرچکا ہے۔

ابھی حال ہی میں سی آئی ڈی نے19ایسے انتہائی مطلوب افراد کی فہرست افغانستان کے حکام کو دی ہے جن کو افغانستان کی سرزمین پر دہشت گردی کی تربیت دی جا چکی ہے۔ یہاں یہ انکشاف بھی ہوا کہ سینکڑوں پاکستانیوں کو دہشت گردی کی تربیت دی جاچکی ہے۔ یہ انکشاف انتہائی تشویش ناک ہے۔ پاکستان بارہا اس حوالے سے افغانستان کو آگاہ کرکے اپنی تشویش سے آگاہ کرتا رہا ہے کہ کابل حکومت ان کالعدم گروپوں کے خلاف کارروائی کرے جنھوں نے افغانستان کی سرزمین کو گڑھ بنایا ہوا ہے۔ لیکن بد قسمتی سے کابل حکومت کی تمام تر توجہ بھارتی ایما پر پاکستان کے خلاف الزام تراشی پر ہی مرکوز رہی ہے۔ بلوچستان میں شیعہ مسلک سے تعلق رکھنے والے ہزارہ برداری کو خصوصی طور پر ٹارگٹ کلنگ کا نشانہ بنا جارہا ہے اور یہ کوئی اتفاق نہیں ہے بلکہ افغانستان میں بھی داعش کا نشانہ ہزارہ برداری سے تعلق رکھنے والے ہی ہوتے ہیں۔ 22 اپریل کوکابل میں پارلیمانی انتخابات کے لیے ووٹر کارڈ جسٹریشن آفس میں داعش نے ہزارہ برادری سے تعلق رکھنے والوں کو دہشت گردی کا نشانہ بنایا۔ داعش مسلسل فرقہ وارنہ بنیادوں پر نہتے عوام کو نشانہ بنا رہی ہے۔ داعش کی خراسان شاخ نے 4 مارچ کو ایک 25 منٹ کی ویڈیو جاری کی تھی جس میں شمالی اور مشرقی افغانستان میں داعش کے قلعوں کی ایسے عسکریت پسندوں کے لیے جو عراق یا شام نہیں پہنچ سکتے ''ہجرت کے لیے ایک انتخاب'' کے طور پر تشہیر کی گئی ہے۔ یہ بات ایس آئی ٹی ای انٹیلی جنس گروپ نے 6 مارچ کو بتائی۔ اس ویڈیو میں ایک عسکریت پسند تاریخی علاقے جس میں موجودہ دور کے افغانستان، پاکستان اور ہمسایہ ممالک کے حصے بھی شامل ہیں، کا حوالہ دیتے ہوئے کہتا ہے کہ ''دنیا کے ہر کونے میں (داعش) سے تعلق رکھنے والے! خراسان (افغانستان)کو ہجرت کر جاؤ۔ اگر تم عراق یا شام کو ہجرت نہیں کر سکتے تو خراسان (افغانستان)کو آ جاؤ“۔

عالمی تناظر میں جائزہ لیا جائے تو اس بات سے ہر ذی شعور آگاہ ہے کہ عراق و شام میں داعش کی شکست کے بعد دولت اسلامیہ کے شدت پسندوں کو ایک منصوبے کے تحت افغانستان میں مضبوط کیا جارہا ہے۔ داعشیوں کی بڑی منظم تعداد پاکستان کی قریبی سرحدوں پر مضبوط ٹھکانے بنا رہی ہے۔

فرقہ وارنہ بنیادوں پر داعش کے سہولت کاروں کی جانب سے پاکستان میں بھی ٹارگٹ کلنگ کی جاری ہے۔ ٹارگٹ کلنگ وارداتوں سے قبل دھماکہ خیز مواد کے استعمال کی وجہ سے کئی چھوٹے بڑے سانحات سے ہزارہ برداری کو بڑے جانی نقصانات کا سامنا ہوچکا ہے۔ چونکہ دہشت گردوں کے لیے عام عوام ایک سافٹ ٹارگٹ ہوتے ہیں اور ریاست کے لیے ممکن نہیں ہے کہ وہ ہزاروں افراد کو انفرادی سیکورٹی فراہم کرسکے اس کے باوجود اجتماعی نقصان سے بچانے کے لیے سیکورٹی اداروں نے بڑا فعال کردار ادا کیا اور دہشت گرد شدت پسندوں کو بڑی کارروائیوں کرنے سے روکے رکھا ہے۔ لیکن ایسے واقعات میں کمی نہیں آرہی جس میں سیکورٹی اداروں، پولیس اور شہریوں کو ٹارگٹ کلنگ کا نشانہ بنایا جاتا ہے۔ بلوچستان میں نام نہاد قوم پرستوں کے پھن کو کچلا جا چکا ہے لیکن وہ مملکت کو انتشار میں مبتلا کرنے کے لیے کسی بھی سازش میں شریک کار و سہولت کاری کا کردار ضرور ادا کررہے ہیں۔ ایران جانے والے زائرین کو بسوں سے اتار کر دہشت گردی کا نشانہ بنانے کی کوششوں کو سیکورٹی اداروں نے حکمت عملی کے تحت بڑی کامیابی سے کنٹرول کرلیا ہے اور ان کے ٹھکانوں پر مسلسل حملوں سے انہیں پسپائی پر مجبور کیا ہے۔ چونکہ بلوچستان ایک عرصے سے مخصوص گروہوں کی سازشوں کا اکھاڑہ بنا ہوا ہے اس لیے قانون نافذ کرنے والے اداروں کی جانب سے ٹارگٹڈ کارروائیاں کی جاتی ہیں تاکہ عام شہری کو کم ازکم نقصان پہنچے۔

ہزارہ برادری کی ٹارگٹ کلنگ کو نسل کشی قرار دیا جاتا ہے اور اس حوالے سے بد ظنی پھیلانے کی کوشش کی جا رہی ہے کہ پاکستان میں صرف ایک ہی گروہ کو نشانہ بناتا ہے تو یہ زمینی حقائق نہیں ہیں۔ بلاشبہ بلوچستان میں سافٹ ٹارگٹ ہزارہ برادری سے تعلق رکھنے والوں کی بڑی تعداد ہے۔ لیکن بلوچستان میں دیگر لسانی اکائیوں کے خلاف بھی دہشت گردی کی بڑی کارروائیاں کی جا چکی ہیں جن کا تعلق ہزارہ برادری سے نہیں تھا۔ بلو چستان میں اچانک فرقہ واریت میں شدت پسندی کی لہر اٹھنے میں کئی عنصر شامل ہیں۔ جن کے سدباب کے لیے ان ہی صفحات میں بڑی صراحت کے ساتھ وضاحت کی جا چکی ہے کہ پاکستان میں فرقہ وارنہ خانہ جنگیوں کے لیے مخصوص عناصر عالمی سازشوں کو پروان چڑھانے کی کوشش کررہے ہیں۔ بلوچستان میں حالیہ تمام دہشت گردیوں اور شدت پسندی کے واقعات کا تعلق براہ راست سی پیک منصوبے کو غیر محفوظ ثابت کرنے کی عالمی سازشیں ہیں۔ سی پیک منصوبے کے خلاف بھارتی اور امریکا کے عزائم کھل کر سامنے آچکے ہیں اور گوادر بندرگاہ کی وجہ سے اُن ممالک کو بھی کافی تحفظات ہیں جن کی معاشی ترقی میں سمندری راہدریوں نے اہم کردار ادا کیا ہے۔ اس لیے کسی بھی امکان کو نظر انداز نہیں کیا جاسکتا کہ پاکستان کے اس عظیم منصوبے کو آستین میں چھپے سانپوں سے بھی زیادہ خطرات لاحق ہیں۔

سیکورٹی اداروں کی مسلسل کوششوں کی وجہ سے جہاں ماضی کے مقابلے میں دہشت گردی کے واقعات میں نمایاں کمی ہوئی ہے تو دوسری جانب ملک دشمن عناصر اپنے مذموم مقاصد کو پورا کرنے کے لیے فرقہ وارنہ بنیادوں پر ٹارگٹ کلنگ کی واردتوں کا سہارا لے رہے ہیں۔ کالعدم تنظیمیں ان واقعات کے ذمے داریاں بھی قبول کررہی ہیں۔ لیکن ان کے خلاف مربوط آپریشن کی راہ میں رکاوٹ پاک-افغان بارڈر کا محفوظ نہ ہونا ہے۔ پاکستان اپنی مدد آپ کے تحت قیام پاکستان کے بعد پہلی مرتبہ شمال مغربی سرحدوں کو محفوظ بنانے کی تگ و دو میں مصروف ہے لیکن دوسری جانب سے عدم تعاون کے علاوہ مسلح حملے تشویش ناک ہیں۔ جب تک پاک-افغان سرحدی علاقو کو محفوظ نہیں کرلیا جاتا، گنجلگ دشوار گزار راستوں سے دہشت گردوں کی نقل و حرکت پر گرفت کرنا اس وقت تک ممکن نہیں ہے۔ لیکن حساس علاقوں میں چیک پوسٹوں کے قیام کے بعد بڑی دہشت گردی کے کارروائیوں میں نمایاں کمی ہوئی ہے۔ بزدل دشمن چھپ کر قانون نافذ کرنے والوں کے کے گشت پر جانے والی گاڑیوں کو بارودی سرنگوں کے ذریعے نشانہ بناتے ہیں اور عوامی مقامات میں عام شہری کے بھیس اختیار کرکے قانون نافذ کرنے والے، خاص طور پر پولیس اہلکاروں کو نشانہ بنایا جاتا ہے۔ جس کی وجہ سے انفرادی نقصانات میں اضافہ دیکھنے میں آرہا ہے۔

ایک طرف بزدلانہ کارروائیوں میں سیکورٹی فورسز کو نشانہ بنایا جاتا ہے تو دوسری جانب منصوبہ بندی کے تحت فرقہ وارنہ کشیدگی بڑھانے کے لیے بھی ٹارگٹ کلنگ کی جاتی ہے جس سے عوام مشتعل ہو جاتے ہیں اور ملک گیر سطح پر دہشت گردی کے ان واقعات کے خلاف مظاہرے اور دھرنے دیئے جاتے ہیں۔ دہشت گردی کے ان واقعات کو مخصوص عناصر کی جانب سے ردعمل بھی قرار دیا جاتا ہے لیکن نہتے و بیگناہ انسانوں کا قتل چاہے وہ کسی بھی مسلک، رنگ و نسل سے ہو، اس کی اجازت اسلام یا کوئی بھی مہذب مذہب نہیں دیتا۔ خاص طور پر اسلام کے نام پر ایسی شدت پسندکارروائیاں کرنے والوں کا اسلام سے کوئی تعلق نہیں جو اسلام کے نام پر بے گناہ انسانوں کی قتل و غارت کرتے ہیں۔ اور شدت پسندی میں نہتے و بے قصور انسانوں کو فرقہ واریت کے نام پر نشانہ بناتے ہیں۔ پاکستان کی تمام لسانی و مذہبی اکائیوں، خاص طور پر ہزارہ برداری کو اس امر کو نظر انداز نہ کریں کہ ایک سوچے سمجھے منصوبے کے تحت بار بار فرقہ وارنہ یا لسانی بنیادوں پر خانہ جنگی کرانے کی کوشش و سازشوں کو ملکرناکام بنانا ہوگا۔

WP2Social Auto Publish Powered By : XYZScripts.com
/* ]]> */