قرآن، ایک خاص تحفہ - عمران زاہد

پچھلی کسی پوسٹ میں ایک صاحب سے ملاقات کا ذکر کیا تھا جنہوں نے بہت محنت اور عرق ریزی کے بعد قرآنی ڈکشنری ترتیب دی تھی۔ اس کی خاصیت یہ تھی کہ قرآن کے الفاظ کا مطلب بیان کیا گیا تھا اور اس کے ساتھ ہر لفظ کے نیچے ان سورتوں اور آیات کی فہرست دی گئی تھی جن میں یہ لفظ استعمال ہوا ہے۔
:
یہ سہولت آن لائن بھی موجود ہے۔ قرآن کے علماء نے tanzil.net کے نام سے ایک ویب سائٹ بنائی ہے۔ تنزیل والوں نے قرآن کی آیات اور تراجم کی ڈیٹا بیس بھی تیار کی ہے۔ قران کی مختلف زبانوں میں نوے پچانوے فیصد موبائل ایپس اور کمپیوٹر سافٹ وئیرز میں وہی ڈیٹابیس استعمال ہوتی ہے۔ موبائل ایپس کے پروگرامر جانتے ہیں کہ قرآن کی ایپ بنانے کے لیے ایسی ڈیٹابیس درکار ہے جس میں ایک ایک آیت الگ الگ محفوظ ہو اور اس کا ترجمہ بھی آیت وار ہی محفوظ ہو۔

تنزیل والے اس ڈیٹا بیس کو (بہت سی زبانوں کے تراجم کے ساتھ) مفت فراہم کرتے ہیں۔ نیٹ پر موجود ہے، جائیے، ڈاؤن لوڈ کیجیے اور اپنی ایپ خود سے ڈیزائن کر لیجیے۔
ڈیٹا بیس ڈاؤن لوڈ کرنے کے لیے لنک http://tanzil.net/docs/resources ۔
:
سرچ کی سہولت ایسی بہترین ہے کہ انسان دنگ رہ جاتا ہے۔ آپ کسی خاص لفظ، آیت نمبر اور سورۃ نمبر پہ تو سرچ کر ہی سکتے ہیں، لیکن سب سے اعلیٰ، الفاظ کے مادے پر سرچ کرنے کی سہولت موجود ہے۔ یہ ایک بہت ہی نایاب چیز اور قرانی ریسرچرز کے لیے تحفہ ہے۔ مثلاً ایک مادہ ہے فقہ، اس مادے سے کئی الفاظ بنتے ہیں، مثلاً
[pullquote] يَفْقَھونَ، لیتفقھو، نَفْقَہ ، تَفْقَھونَ ، يَفْقَھوہ[/pullquote]

وغیرہ۔ قرآن میں جہاں جہاں بھی یہ الفاظ آئیں گے، فقہ سرچ کرنے سے وہ آیات سامنے آ جائیں گی۔ قرآن میں استعمال ہونے تمام الفاظ کے مادوں کی فہرست اس میں الف سے یے تک دے دی گئی ہے۔ مادہ چن لیجیے، اس کے مطابق آیات نمودار ہو جائیں گی۔
:
اس کے علاوہ دنیا کی ہر زبان میں ترجمہ موجود ہے۔ صرف اردو میں ہی آٹھ تراجم، انگریزی میں اٹھارہ تراجم، چینی میں دو، بنگالی میں دو، جرمن میں چار اور باقی کئی زبانوں میں کئی کئی تراجم موجود ہیں۔ اور تو اور دو عربی تراجم بھی موجود ہیں۔ تفسیرالجلالین اور تفسیر المیسر۔

یہ بھی پڑھیں:   قرآن کی عینک - ناہید خان

اسلام کی دعوت دوسری اقوام کو دینے کے لیے اس سے بہتر کوئی سہولت نہیں ہے۔ اگر مختلف زبان والے دوست احباب سوشل میڈیا پر موجود ہیں تو انہیں ان کی زبان میں قرآن کا ترجمہ پڑھنے کی ترغیب دی جا سکتی ہے۔ اللہ دل بدلنے والا ہے۔ کوئی بڑی بات نہیں کہ کوئی قرآن پڑھے اور اس کا سینہ ایمان سے منور ہو جائے۔ آپ جتنے نومسلموں کے حالات پڑھ لیجیے، سب کے سب قرآن سے متاثر ہوئے۔ وہ کسی عالم سے متاثر ہوئے نہ عام مسلمانوں کے کردار نے انھیں اسلام کی طرف راغب کیا۔ انہوں نے قرآن کا مطالعہ کیا اور وہ مسلمان ہو گئے۔ کسی جگہ پڑھا ہے کہ ایک پادری نے قرآن میں تضادات تلاش کرنے کے لیے قرآن کی مطالعہ شروع کیا تو تضادات تو کیا ملنے تھے، اسے ایمان مل گیا۔ اس کا سینہ اسلام کے لیے کھل گیا، وہ مسلمان ہو گیا۔ آپ بھی اپنے غیر مسلم دوستوں کو قرآن پڑھنے کی دعوت دیجیے، باقی اللہ پر چھوڑ دیجیے۔
:
مختلف زبانوں میں تراجم کے علاوہ 31 قراء کی آوازوں میں تلاوت موجود ہے۔ ایک آیت کو بار بار سنیے۔ ایک سورت کو بار بار سنیے یا شروع سے آخرتک پورا قران سنیے۔ ایسی ایسی تلاوت ہے کہ انسان سنتا چلا جائے اور دل نہ بھرے۔ چاہے کوئی لفظ سمجھ آئے یا نہ آئے، دل میں سکون سا ہلکورے لینے لگتا ہے، اور انسان کسی اور ہی دنیا میں پہنچ جاتا ہے۔
:
یہ ویب سائیٹ موبائل پر بھی اپنے تمام فیچرز کے ساتھ آرام سے کھل جاتی ہے۔ ضرور ٹرائی کیجیے۔