خطرے میں دین اسلام ہے یا مسلمان - سیّد محمّد اشتیاق

دنیا کے دیگر خطّوں کی طرح مسلمان ہندوستان بھی وارد ہوئے۔ ہندوستان کی تاریخ کے کئی ادوار ہیں۔ مسلمان ہندوستان کی تاریخ کے عہد وسطی میں ہندوستان آئے۔ ہندوستان کی قدیم تاریخ کا سب سے دلچسپ اور اہم نکتہ یہ ہے کہ ہندوستانی قوم اور تہذیب نے ہر آنے والی قوم یا حملہ آور کو، اپنے مذہب اور عقیدے پر قائم رہتے ہوئے، اُس کی تہذیب سمیت اپنے اندر سمویا۔ لیکن جب مسلمان ہندوستان آئے تو یہاں کے باشندوں نے جہاں مسلمانوں کی تہذیب کو اپنے اندر سمویا وہیں اُن کے دین کو بھی کثیر تعداد میں شرف قبولیت بخشا۔ مسلمانوں کی آمد کے ساتھ ہی صوفیائے کرام بھی ہندوستان تشریف لائے، جن کی تعلیمات اعمال صالحہ سے متاثر ہو کر بھی ہندوستان کے مقامی باشندے اسلام قبول کرتے رہے اور یہ سلسلہ دور حاضر تک بھی جاری ہے۔

انگریز جب ہندوستان آئے تو مغل حکمرانوں کی قوت حکمرانی، اُن کی اپنی غفلت کی وجہ سے کمزور پڑ چکی تھی۔ انگریز نے اِس کا فائدہ اُٹھایا اور ہندوستان پر قابض ہوگیا۔ ہمیشہ کی طرح اِس دفعہ بھی ہندوؤں نے اپنے مذہب اور ثقافت پر قائم رہتے ہوئے، انگریزی ثقافت اور تہذیب کو دنیاوی ترقی کے لیے اپنایا۔ مسلمان کیونکہ سلطنت کھوجانے کے غم میں مبتلا تھے اور انگریزی ثقافت اور تہذیب کو اسلام پر حملہ اور مضر تصّور کرتے تھے، اِس لیے انگریزی تعلیم اور ثقافت کو اپنانے میں دیر لگائی اور قلیل تعداد کے جن مسلمانوں نے اپنایا بھی، وہ آج بھی طعن و تشنیع کی زد میں رہتے ہیں کیونکہ ایک مخصوص طبقہ ابھی بھی اسلام کو بہت کمزور تصّور کرتا ہے، اور سمجھتا ہے کہ اسلام خطرے میں ہے۔ انگریزوں اور ہندوؤں کو دین اسلام اور مسلمانوں کے لیے خطرہ سمجھتے ہوئے۔ تحریک تقسیم ہند اور قیام پاکستان چلی اور کامیابی سے ہمکنار ہوئی، گو کہ یہ کامیابی اُس شخص کی قیادت میں حاصل کی گئی جس کی اپنی تعلیم و تربیت انگریزی ماحول میں ہوئی اور جس نے ا نگریزی ثقافت کو بدرجہ اتم اپنایا ہوا تھا۔

یہ بھی پڑھیں:   دین اسلام کے اساسی و آفاقی تصورات - عبدالمتین

قیام پاکستان کے بعد بھی، پاکستانیوں کا ایک مخصوص طبقہ اسلام کو ہمیشہ خطرے میں محسوس کرتا ہے، اور یہ خطرہ سب سے زیادہ مرد مؤمن، مرد حق ضیاء الحق کے دور میں محسوس کیا گیا۔ اُس دور میں امریکہ نے اسلام کا بہت ساتھ دیا اور روس کو عبرت ناک شکست دینے میں پاکستان اور اسلام کا بھرپور کردار ادا کیا۔ روس کی افغانستان آمد کو پاکستان اور اسلام کے لیے خطرہ سمجھا گیا اور بتایا گیا کہ روس گرم پانیوں تک رسائی کے عزائم رکھتا ہے۔ اِس لیے امریکہ جو مسلمانوں اور اسلام کا ازلی خیر خواہ ہے، اُس کی مدد سے روس کے خلاف افغانستان میں جہاد کیا جارہا ہے۔ اب یہ محسوس ہوتا ہے کہ اسلام خطرے سے باہر نکل آیا ہے کیونکہ محترم وزیر اعظم پاکستان نے کہا ہے کہ وہ روس کو بھی سی پیک کا حصّہ بنانے پر غور کر رہے ہیں، اور گرم پانی تک رسائی دینے کی بھی بات کی ہے۔ اُن کے اِس بیان کی مذمّت، اُن دینی و سیاسی جماعتوں نے نہیں کی، جو افغان جہاد کا حصّہ تھیں۔

ان بیانات اور عزائم کی روشنی میں، اس نئے سال کے آغاز میں اسلام تو خطرے میں کم نظر آ رہا ہے لیکن جب ہم مجموعی طور پر مسلمانوں کی حالت زار کا مشاہدہ کرتے ہیں تو یہ حقیقت منکشف ہوتی ہے کہ افغان جہاد سے اسلام پر خطرہ تو کسی حد تک ٹل گیا ہے، لیکن مسلمانوں پر ظلم و ستم میں بے پناہ اضافہ ہوگیا ہے۔ اِس ظلم و ستم میں کیوں اضافہ ہوا؟ اُس پر روشنی تو وہی عناصر ڈال سکتے ہیں جو افغان جہاد کی کامیابی کے دعوے دار ہیں۔ ہماری وہ دینی و سیاسی جماعتیں، عناصر اور طبقہ، جن کو ہمیشہ اسلام خطرے میں نظر آتا ہے اور جو کشمیر، فلسطین، افغانستان، عراق، برما اور حلب میں مسلمانوں کی حالت زار پر نوحہ کرتے نظر آتے ہیں۔ شاید پاکستان، ہندوستان اور یمن میں مسلمانوں کی حالت زار سے مطمئن ہیں، کیونکہ اُن کی نظر میں شاید اِن ممالک میں مسلمان نہیں رہتے۔ بحیثیت تاریخ کے طالب علم اور حالات حاضرہ پر عمومی نظر کے حوالے سے ہم یہی کہہ سکتے ہیں کہ اسلام ہر دور میں پھیلتا رہا ہے لیکن مسلمانوں کی حالت زار دن بدن بگڑتی جارہی ہے۔ امریکی مفادات کے لیے لڑی جانے والی جنگ، جس کو افغان جہاد کے نام دیا گیا، مسلمانوں کے حق میں بہتر ثابت نہیں ہوئی۔ افغان جنگ کے دوران، کچھ اسلامی مما لک نے اپنے ناپسندیدہ افراد کو جہاد کے نام پر افغانستان اور پاکستان بھیج دیا، جو افغانستان اور پاکستان کے حق میں بہتر ثابت نہیں ہوا، اور اب صورتحال یہ ہے کہ دو بڑے متحارب اسلامی ملک اپنی جنگ، پاکستان میں لڑ رہے ہیں۔

یہ بھی پڑھیں:   دین و دنیا اور ’نظام‘ کی بحث - حامد کمال الدین

دین اسلام تو تاقیامت قائم رہنے کے لیے ہے۔ وہ ہمیشہ قائم رہے گا لیکن مسلم امّہ کے غلط فیصلوں اور آپس میں اختلافات کی وجہ سے دین اسلام بدنام ہو رہا ہے اور مسلمان ظلم و ستم کا شکار ہیں۔

error: اس صفحے کو شیئر کیجیے!