راز ِ زندگی – نورین تبسم

”زندگی کچھ دو کچھ لو کا نام ہے.\0“\nخوشی چاہتے ہو، خوشی دے دو\0، خوشی مل جائے گی۔ \nسکون چاہتے ہو، سکون دے دو، سکون مل جائے گا۔\n عزت چاہتے ہو، عزت دے دو، عزت مل جائے گی۔\n\nسوال یہ ہے کہ اگر یہ سب اِسی طرح سے ہے اور بہترین زندگی گُزارنے کا فلسفہ اتنا ہی سیدھا اور آسان ہے تو پھر انسان فلاح کے راستے پر کیوں نہیں چل پا رہا؟ انسانی عقل اس پر عمل کرکے کیوں نہیں ابدی اطمینان حاصل کر سکی؟ ہماری تو ساری عمر دوسروں کو آسانیاں بہم پہنچاتے گزر جاتی ہے اور ہمیں ایک پل کی خوشی نصیب نہیں ہوتی۔ زندگی کی شاہراہ پر بوجھ سے لدے گھوڑے کو سرپٹ دوڑتے کہیں دم لینےکی مہلت نہیں ملتی۔ چابک پر چابک پڑتے ہیں، اپنے سامان کو دیانت داری سے منزل تک پہنچا دے، پھر بھی کوئی صلہ نہیں۔ کیا کیا جائے؟ انسان نیکی کرنا چھوڑ دے؟ اپنے حصے کا کام دوسروں پر ڈال دے؟ خود غرض اور بےحس بن جائے کہ یہی اس دور کا چلن ہے۔ کیا یہ ہماری زندگی کا اختتام ہے؟ یہی وہ سبق ہے جو دنیا داری سکھاتا ہے؟\n\nنہیں! ہمیں ہر چیز کی تہہ تک جانا ہو گا۔ ہر شے سے بالاتر ہو کر جائزہ لینا ہے۔ جیسے کہا گیا؛\nخوشی چاہتے ہو خوشی دے دو\0، تو کیا ہے خوشی؟ ہمیں تو اس کا مفہوم ہی معلوم نہیں، ایک گھڑی کی تسکین پانی کےگھونٹ کی طرح ہے کہ جس کے بعد طلب مزید بڑھ جاتی ہے۔ اگر سَیر ہو کر پانی پیا جائے تو کچھ دیر بعد پیاس پھر اسی صُورت لگتی ہے۔\n سکون چاہتے ہو سکون دے دو۔ ہم کیا جانیں سکون کس شے میں ہے۔ پیاس میں ہے یا سیراب ہونے میں؟ کیا خبر جسے ہم سکون سمجھ رہے ہوں، وہ ہمارا تکبّر، ہماری انا ہو؟\n ہمیں ہمارے اعمال آراستہ کر کے دکھائے جا رہے ہوں اور اس دینے دلانے کے چکر میں بجائے پانے کے اپنے پاس جو بچا ہے اُسے بھی ضائع کر بیٹھیں۔\nعزت چاہتے ہوعزت دے دو۔ عزت خواہش کرنی والی شے ہی نہیں۔ یہ تو ہمارا بنیادی حق ہے۔ زندگی گزارنے کا پہلا عمل ہے۔ عزت ہوتی ہے یا نہیں ہوتی۔ خوف، ڈر یا حالات کے دباؤ سے کسی کے آگے جُھکا تو جا سکتا ہے، مگر اگرکسی کی عزت دل سے نکل جائے تو دوبارہ کسی قیمت پر واپس نہیں آ سکتی۔ عزت کسی شخص کسی رشتے کے ساتھ مشروط نہیں۔ عزت ہر شے کی مقدم ہے، چاہے جان دار ہو یا بےجان، انمول ہو یا حقیر، آقا ہو یا غلام، با افراط ہو یا بمُشکل میسّر ہو۔ \nاپنی راہ میں آنے والی ہر چیزکی عزت اگر دل سے کریں گے تو ہماری اپنی زندگی ہی پُرسکون رہے گی۔\nعزت دینے یا لینے کا نام نہیں بلکہ عزت محسوس کرنے کا نام ہے۔ یہ ہوا میں رچی خوشبو، روح میں اُترنے والی خوشی کا نام ہے۔ عزت کسی کو بتائے بغیر، جتائے بغیراُس کی قدر کرنے کا نام ہے۔ عزت وہ نیکی ہے جس کے بارے میں کہا گیا ہےکہ دوسرے ہاتھ کو خبر نہ ہو۔\n\nراہِ عمل یہ ہے کہ ہمیں کسی قسم کی تمنا کیے بغیر صرف اپنے حصے کا کام کرنا ہے اور وہ بھی جتنا ہماری استطاعت ہے۔ اور رب کا شُکر ہر حال میں ادا کرنا ہے کہ اس نے ہمت و طاقت دی ہے اور دینے والا ہاتھ عطا کیا ہے، وگر نہ ہم سے بڑھ کر بےوقوف کون ہوگا، جو دینے والے ہاتھ کو بھلا کر لینے والے ہاتھ کی تمنا رکھے۔ ہمیں کیا حق ہے کہ رب سے اپنی مرضی کا رزق طلب کریں۔ وہ خالق و مالک، رحمٰن و رحیم کیسے اس ناقدر شناس دنیا میں بےآسرا چھوڑ سکتا ہے۔\nہمیں اللہ سے اُس کا ساتھ مانگنا ہے، اُس کا رحم مانگنا ہے، اس کا کرم مانگنا ہے، اپنی چاہت کو رب کی رضا کے سامنے جھکانا ہے۔\n\n”یہ دنیا پانے کی نہیں سہنے کی جا ہے، اگر دُنیا میں من چاہی عارضی خوشیاں حاصل کر لیں تو آخرت کےعذاب کو سہنا پڑے گا.“

Comments

FB Login Required

نورین تبسم

جائے پیدائش راولپنڈی کے بعد زندگی کے پانچ عشرے اسلام آبادکے نام رہے، فیڈرل کالج سے سائنس مضامین میں گریجویشن کی۔ اہلیت اہلیہ اور ماں کے سوا کچھ بھی نہیں۔ لکھنا خودکلامی کی کیفیت ہے جو بلاگ ڈائری، فیس بک صفحے کے بعد اب دلیل کے صفحات کی جانب محوِسفر ہے۔

Protected by WP Anti Spam